“Jesus Christ Saved Us from Sin and Death,” Liahona, April 2021
ຂ່າວສານປະຈຳເດືອນ Liahona, ເດືອນເມສາ 2021
ພຣະເຢຊູຄຣິດໄດ້ຊ່ວຍເຮົາຈາກການບາບ ແລະ ຄວາມຕາຍ
ເພາະການເສຍສະລະຂອງພຣະອົງ, ເຮົາທຸກຄົນຈຶ່ງມີໂອກາດທີ່ຈະພົບຄວາມສະຫງົບ ແລະ ຄວາມສຸກນິລັນດອນໄດ້.
Christ Creating the Earth [ພຣະຄິດກຳລັງສ້າງໂລກ], ໂດຍ ຣໍເບີດ ທີ ບາແຣັດ
ເຮົາຖືວ່າພຣະເຢຊູເປັນພຣະຜູ້ຊ່ວຍໃຫ້ລອດຂອງເຮົາ. ນີ້ກໍຍ້ອນວ່າ ພຣະອົງໄດ້ຈ່າຍຄ່າສຳລັບການບາບຂອງເຮົາ ແລະ ໄດ້ເອົາຊະນະອຳນາດແຫ່ງຄວາມຕາຍ. ພຣະອົງໄດ້ຊ່ວຍຊີວິດເຮົາ! ການເສຍສະລະຂອງພຣະອົງເພື່ອເຮົາ, ຊຶ່ງເອີ້ນວ່າ ການຊົດໃຊ້ນັ້ນ, ແມ່ນເຫດການທີ່ສຳຄັນທີ່ສຸດເທົ່າທີ່ເຄີຍເກີດຂຶ້ນ. ເພາະພຣະອົງ, ຄວາມຕາຍຈຶ່ງບໍ່ເປັນຈຸດຈົບ. ເພາະພຣະອົງ, ເຮົາຈຶ່ງສາມາດຮັບອະໄພການບາບ, ກັບມາສະອາດອີກຄັ້ງ, ແລະ ດີຂຶ້ນກວ່າເກົ່າໃນແຕ່ລະມື້.
ພຣະເຢຊູເປັນພຣະບຸດຫົວປີ
ກ່ອນທີ່ຈະມາສູ່ໂລກ, ເຮົາເຄີຍຢູ່ກັບບິດາມານດາແຫ່ງສະຫວັນຂອງເຮົາ. ໃນຖານະພຣະບຸດຫົວປີ, ພຣະເຢຊູຄຣິດໄດ້ຊ່ວຍສ້າງໂລກທີ່ສວຍງາມນີ້. ພຣະອົງໄດ້ຖືກເລືອກໃຫ້ເປັນພຣະຜູ້ຊ່ວຍໃຫ້ລອດຂອງເຮົາ ແລະ ໄດ້ຕົກລົງທີ່ຈະມາເກີດໃນໂລກນີ້ ເພື່ອວ່າພຣະອົງຈະສາມາດເປັນຕົວຢ່າງທີ່ດີພ້ອມ, ສິດສອນພຣະກິດຕິຄຸນຂອງພຣະອົງ, ແລະ ສຳເລັດການຊົດໃຊ້ເພື່ອເຮົາ.
O My Father [ພຣະບິດາຂອງລູກເອີຍ], ໂດຍ ຊາຍ ມັນ ດູວີ
ພຣະເຢຊູຄຣິດໄດ້ຈ່າຍຄ່າການບາບຂອງເຮົາ
ເມື່ອພຣະເຢຊູຮູ້ວ່າ ພຣະອົງຈະຕ້ອງຕາຍໃນບໍ່ຊ້າ, ພຣະອົງໄດ້ໄປທີ່ສວນແຫ່ງໜຶ່ງ ຊື່ວ່າ ເຄັດເຊມາເນ ເພື່ອອະທິຖານ. ໃນລະຫວ່າງການອະທິຖານນັ້ນ, ພຣະອົງໄດ້ເລີ່ມຈ່າຍຄ່າການບາບຂອງເຮົາ. ພຣະອົງເຕັມພຣະໄທທີ່ຈະທົນທຸກທໍລະມານ ເພື່ອວ່າເຮົາຈະບໍ່ຕ້ອງເປັນເຊັ່ນນັ້ນ—ຖ້າເຮົາກັບໃຈ. ເມື່ອເຮົາຫັນໜີຈາກບາບຂອງເຮົາ ແລະ ຕິດຕາມພຣະຜູ້ຊ່ວຍໃຫ້ລອດແທນ, ເຮົາຈະສາມາດພົບການໃຫ້ອະໄພ ແລະ ການປິ່ນປົວໄດ້. ຍ້ອນສິ່ງທີ່ພຣະອົງເຄີຍປະສົບຜ່ານມາແລ້ວໃນສວນເຄັດເຊມາເນ, ພຣະເຢຊູຈຶ່ງເຂົ້າໃຈເປັນຢ່າງດີວ່າ ການເປັນຄືເຮົານັ້ນເປັນຢ່າງໃດ. ພຣະອົງຮູ້ສຶກເຖິງຄວາມເສຍໃຈ, ຄວາມເຈັບປ່ວຍ, ແລະ ຄວາມເຈັບປວດທັງໝົດຂອງເຮົາ. ນີ້ແມ່ນສ່ວນທຳອິດຂອງການຊົດໃຊ້.
The Burial of Christ [ການຝັງສົບຂອງພຣະຄຣິດ], ໂດຍ ຄາລ ເຮັນຣິກ ບະລ່າ
ພຣະເຢຊູຄຣິດໄດ້ເອົາຊະນະຄວາມຕາຍ
ຫລັງຈາກການອະທິຖານຂອງພຣະອົງໃນສວນເຄັດເຊມາເນ, ພຣະເຢຊູໄດ້ຖືກທໍລະຍົດ, ຖືກຈັບ, ແລະ ຖືກຕັດສິນໃຫ້ປະຫານຊີວິດ ໂດຍການຄຶງທີ່ໄມ້ກາງແຂນ. ເຖິງແມ່ນວ່າພຣະອົງຊົງລິດທານຸພາບກໍຕາມ, ແຕ່ພຣະເຢຊູໄດ້ຍອມສິ້ນພຣະຊົນຢູ່ເທິງໄມ້ກາງແຂນ. ບັນດາຜູ້ຕິດຕາມຂອງພຣະອົງໄດ້ວາງຮ່າງກາຍຂອງພຣະອົງໄວ້ໃນອຸບມຸງດ້ວຍຄວາມຮັກ. ພວກເຂົາບໍ່ຮູ້ວ່າ ເຖິງແມ່ນຮ່າງກາຍຂອງພຣະອົງໄດ້ຕາຍແລ້ວ, ແຕ່ວິນຍານຂອງພຣະອົງຍັງມີຊີວິດຢູ່ໃນໂລກວິນຍານ. ສາມມື້ຕໍ່ມາ, ພຣະເຢຊູໄດ້ກັບມາມີຊີວິດອີກຄັ້ງ ແລະ ໄດ້ໄປຢ້ຽມຢາມພວກເຂົາ, ໂດຍພິສູດໃຫ້ເຫັນວ່າ ພຣະອົງສາມາດເອົາຊະນະເໜືອຄວາມຕາຍໄດ້. ສິ່ງນີ້ໄດ້ສຳເລັດການຊົດໃຊ້. ຍ້ອນວ່າພຣະເຢຊູໄດ້ຟື້ນຄືນພຣະຊົນ, ເຮົາແຕ່ລະຄົນຈະສາມາດກັບມາມີຊີວິດອີກຄັ້ງຫລັງຈາກທີ່ເຮົາຕາຍໄປ.
He Lives [ພຣະອົງຊົງພຣະຊົນຢູ່], ໂດຍ ຊາຍມັນ ດູວີ
ຄວາມໝາຍຂອງຄຣິດສະມາດ ແລະ ອີດສະເຕີ
ທົ່ວໂລກສະຫລອງມື້ພັກສອງມື້ທີ່ຊ່ວຍໃຫ້ເຮົາຈື່ຈຳການຊົດໃຊ້ຂອງພຣະເຢຊູຄຣິດ. ໃນຊ່ວງຄຣິດສະມາດ, ເຮົາຈື່ຈຳດ້ວຍຄວາມກະຕັນຍູວ່າ ພຣະເຢຊູໄດ້ເຕັມພຣະໄທຮັບພາລະກິດແຫ່ງການມາສູ່ໂລກນີ້, ເຖິງແມ່ນວ່າ ນັ້ນຈະລວມທັງການທົນທຸກທໍລະມານ ແລະ ການສິ້ນພຣະຊົນເພື່ອເຮົາ. ອີດສະເຕີສະຫລອງໄຊຊະນະຂອງພຣະຜູ້ຊ່ວຍໃຫ້ລອດ ເໜືອການບາບ ແລະ ຄວາມຕາຍ, ຊຶ່ງໃຫ້ຄວາມຫວັງແກ່ເຮົາສຳລັບອະນາຄົດນິລັນດອນແຫ່ງຄວາມສຸກ.
Christ Calling Peter and Andrew [ພຣະຄຣິດກຳລັງເອີ້ນເປໂຕ ແລະ ອັນເດອາ], ໂດຍ ເຈມສ໌ ເທເລີ ຮາວູດ
ພຣະຄຳພີກ່າວວ່າຢ່າງໃດກ່ຽວກັບການຊົດໃຊ້ຂອງພຣະຜູ້ຊ່ວຍໃຫ້ລອດ?
ຍ້ອນວ່າພຣະເຢຊູຮູ້ຈັກເຮົາເປັນຢ່າງດີ, ພຣະອົງຈຶ່ງສາມາດ “ຊ່ວຍເຫລືອ,” ເຮົາໄດ້ (ເບິ່ງ ແອວມາ 7:11–12).
ພຣະຜູ້ຊ່ວຍໃຫ້ລອດເຂົ້າໃຈເຖິງຄວາມທຸກ ແລະ ຄວາມເຈັບປວດຂອງເຮົາ (ເບິ່ງ ເອຊາຢາ 53:2–5).
ພຣະເຈົ້າໄດ້ສົ່ງພຣະເຢຊູມາຊ່ວຍເຮົາ ເພາະພຣະເຈົ້າຮັກເຮົາແຕ່ລະຄົນ (ເບິ່ງ ໂຢຮັນ 3:16–17).
ພຣະເຢຊູໄດ້ອະທິຖານເພື່ອບັນດາຜູ້ຕິດຕາມຂອງພຣະອົງ, ລວມທັງເຮົາ, ຈະໄດ້ຮັບການປົກປ້ອງຈາກຄວາມຊົ່ວຮ້າຍ ແລະ ເປັນໜຶ່ງດຽວກັບພຣະອົງ ແລະ ພຣະບິດາເທິງສະຫວັນ (ເບິ່ງ ໂຢຮັນ 17).
ພຣະຜູ້ຊ່ວຍໃຫ້ລອດຂອງເຮົາ ເຊື້ອເຊີນໃຫ້ເຮົາຕິດຕາມພຣະອົງ ແລະ ກັບຄືນສູ່ທີ່ປະທັບຂອງພຣະອົງ (ເບິ່ງ ຄຳສອນ ແລະ ພັນທະສັນຍາ 19:16–19, 23–24; 132:23).
© 2021 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly Liahona Message, April 2021. Laotian. 17467 331