“Pag-angkon sang Kusog nga Magpatawad,” Para sa Kusog sang mga Lamharon, Hunyo 2021, 10–11.

Dali, Magsunod sa Akon

Pag-angkon sang Kusog nga Magpatawad

Ni David Dickson

Mga Magasin sang Simbahan

Ang Ginuo nagsugo sa aton nga patawaron ang iban. Buligan Niya kita nga tumanon ang Iya mga kasugoan, lakip na ini.

Doktrina kag mga Kasugtanan 64:10

Litrato

babayi nga nagatulok sa isa ka tawo nga nagadaho sang kamot sa iya

Ilustrasyon ni James Madsen

Ang pila bala ka kasugoan mas mabudlay tumanon sangsa iban?

Ari ang isa [ka rason] kon ngaa ginatalawan ang madamo nga mga tawo: “Ako, nga Ginuo, magapatawad sang akon patawaron apang sa inyo ginamando nga patawaron ang tanan nga katawhan” (Doktrina kag mga Kasugtanan 64:10).

Dali lang. Kinahanglan naton patawaron ang tanan nga nakasala sa aton? Posible bala ina?

Isa ka butang ang magpatawad sang tawo sa paghambal sang masakit sa imo ukon sa pagkuha sang katapusan nga tinapay sa lamesa. Pero paano ang madalom nga mga pilas? Inang seryoso nga mga sala nga makatublag ukon bisan pa gani makaliwat sang lakat sang aton mga pangabuhi?

Kon kis-a ang ikasarang nga magpatawad sa tawo nga nakasakit sa aton sing tuman daw indi naton masarangan.

Ari ang maayong balita: Sa bulig ni Jesucristo, indi kita limitado sa kon ano lang ang mahimo naton sa aton kaugalingon.

Ang Bulig nga Iya Ginkinahanglan

Personal nga nasalapoan sang isa ka debotado nga Kristiyano halin sa Netherlands nga si Corrie ten Boom ang gahum sang pagpangayo sang bulig sa Dios agud buligan sia nga magpatawad.

Sia kag ang iya utod nga si Betsy ginpriso sa mga concentration camp sang Ika-duhang Inaway Kalibutanon. Si Corrie kag iban pa nag-antos sing makahaladlok nga pag-abuso halin sa Nazi nga mga gwardya sang prisohan. Ang iya magulang nga si Betsy napatay pa gani bilang resulta sinang pagpang-abuso. Si Corrie nakaluwas.

Pagkatapos sang giyera, nadiskubrehan ni Corrie ang nagapang-ayo nga gahum sang pagpatawad sa iban. Masami niya nga ginapaambit ang iya mensahe sa publiko. Ugaling isa ka adlaw gintestingan gid kon ano kahugot ang iya pagpati sa iya mga pulong.

Pagkatapos sang isa ka pamulong-pulong sa publiko, ginpalapitan sia sang isa sang pinakamapintas nga gwardya sa prisohan sang mga kampo.

Ginsugiran niya si Corrie nga nangin Kristiyano na sia pagkatapos sang giyera kag naghinulsol sang malaw-ay nga mga butang nga iya nahimo bilang gwardya sang prisohan.

Gindaho sang gwardya ang iya kamot sa pagpangamusta kag nagsiling, “Mapatawad mo bala ako?”

Sa pihak sang tanan nga iya natun-an kag napaambit parte sa pagpatawad sa iban, indi mabaton ni Corrie ang kamot sining tawo kag patawaron sia—indi sa iya lang kaugalingon nga kusog.

Nagsulat sia sang ulihi, “Samtang ang akig, matimaluson nga mga hunahuna nagaibwal sa sulod nakon, nakita ko nga sala ang mga ini. … Ginuong Jesus, pangamuyo ko, patawara ako kag buligi ako nga mapatawad sia.

“Gintinguhaan ko nga magyuhum, [kag] gintinguhaan nga alsahon ang akon kamot. Indi ko mahimo. Wala ako sing mabatyagan, bisan diutay gid lang nga igrab sang pagpakig-abyan ukon kaluoy. Kag gani, sekreto ako liwat nga nagpangamuyo. Jesus, indi ko sia mapatawad. Hatagi ako sang Imo pagpatawad.

“Sang gindaho ko ang iya kamot natabo ang indi mapatihan. Halin sa akon abaga pakadto sa akon butkon kag lapus sa akon kamot daw may kuryente nga nag-agi halin sa akon pakadto sa iya, samtang sa akon tagipusuon nagtubo ang gugma para sa sining estranghero nga halos mapunaw ako.

“Kag gani nadiskubrehan ko nga indi sa aton pagpatawad ukon aton kaayo nga nagasandig ang pag-ayo sang kalibutan, kundi sa Iya. Kon ginahambalan Niya kita nga higugmaon ang aton mga kaaway, ginahatag Niya, upod sang kasugoan, ang gugma mismo.”¹

Ara ang Dios agud buligan kamo nga tumanon ang Iya mga kasugoan, lakip na ang kasugoan nga magpatawad—bisan pa nga mabudlay ini. Mabuligan niya kamo pareho nga ginbuligan Niya si Corrie ten Boom.

Ang Pag-ayo nga Nagakabagay sa Imo

Ang kabuhi madaya. Magamo ini. Kag sigurado gid nga puno ini sang mga tawo nga ginhatagan sang Dios sang kahilwayan sa pagpili.

Sa mga tinion nga nagapili ang isa ka tawo nga nagatuga sang tuman mo nga kasakit—ukon bisan sa indi hungod—makabaton ka sang nagapang-ayo nga gahum sa imo pagpangamuyo sang bulig kag pagtinguha nga magpatawad.

Ang pagpatawad sa iban nagadala sang pag-ayo sa imo kalag. Sa bulig sang Dios, kon ginapatawad mo ang isa nga nakasala sa imo, ginabuhinan mo ang dako nga kabug-at sa imo palas-anon nga mahimo nagapugong sa imo. Bisan pa nga ang dalan pakadto sa matuod-tuod nga pag-ayo mabudlay, upod ang Dios, indi mo kinahanglan nga lakton ini nga nagaisahanon.

Ano ang Wala Ginapangayo sang Pagpatawad

Si Elder Jeffrey R. Holland sang Korum sang Dose ka Apostoles sadto naghambal parte sa kasugoan sang Manluluwas nga magpatawad. Dayon nagsiling sia:

“Importante ugaling, para sa pila sa inyo nga nagakabuhi sa tunay nga pag-antos nga tandaan ang wala Niya ginhambal. Wala Sia naghambal nga, ‘Wala kamo ginatugtan nga magbatyag sing tunay nga kasakit ukon tunay nga kalisod sa makaguba nga mga eksperiyensya nga inyo naagyan sa kamot sang iban.’ Wala man Sia naghambal, ‘Agud lubos nga magpatawad, kinahanglan ninyo magsulod liwat sa makahalalit nga relasyon ukon magbalik sa nagapang-abuso, makaguba nga sirkumstansya.’ Apang wala sapayan sang pinakagrabe nga kalainan nga mahimo mag-abot sa aton, makaluwas lamang kita sa aton mga kasakit kon sugdan naton ang paglakat sa dalan sang matuod-tuod nga pag-ayo.”²

© 2021 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly For the Strength of Youth Message, June 2021. Hiligaynon. 17470 861