Ano ang Pangulohan sang Dios?

Ang Amay nga Langitnon, si Jesucristo, kag ang Balaan nga Espiritu tatlo ka lainlain nga mga persona nga may isa lang ka katuyuan.

Litrato

Una nga Panan-awon

Detalye halin sa First Vision [Una nga Panan-awon], ni Jon McNaughton

Isa ka editor sang peryodiko ang namangkot sang una sa Propeta nga si Joseph Smith kon ano ang ginapatihan sang mga miyembro sang Ang Simbahan ni Jesucristo sang mga Santos sa Ulihing mga Adlaw. Bilang sabat, ang Propeta nagsulat sang 13 ka mga pahayag sang pagtuluohan nga ginatawag naton nga Mga Artikulo sang Pagtuo. Ang una nga pahayag nagasiling, “Nagapati kami sa Dios, ang Wala’y Katapusan nga Amay, kag sa Iya Anak nga si Jesucristo, kag sa Balaan nga Espiritu” (Mga Artikulo sang Pagtuo 1:1). Ining tatlo nagabug-os sang ginatawag naton nga Pangulohan sang Dios.

Dios, ang Walay Katapusan nga Amay

Ang Dios may nabanhaw nga lawas sang unod kag tul-an. Sia ang Amay sang aton mga espiritu. Ginahigugma Niya sing himpit ang tagsa sang Iya mga anak. Ang Dios perpekto, may tanan nga gahum, kag nakahibalo sang tanan. Makatarungan Sia, maluluy-on, kag maayo. Nagkabuhi kita bilang mga espiritu upod sa Dios antes kita matawo. Ginpadala Niya kita sa kalibutan agud magtuon kag mag-uswag. Ang pinakadako nga handum sang Dios amo nga ang tagsa sang Iya mga anak makabalik sa pagkabuhi liwat upod sa Iya pagkatapos kita mapatay. Ang Dios nagatudlo sa aton nga dapat naton sundon si Jesucristo agud makabalik sa presensya sang Dios.

Litrato

Si Jesucristo nga Nagawali sa Kalibutan sang Espiritu

Christ Preaching in the Spirit World [Si Cristo nga Nagawali sa Kalibutan sang Espiritu], ni Robert T. Barrett

Jesucristo

Si Jesucristo may nabanhaw man nga lawas sang unod kag tul-an. Sia ang panganay nga Anak sang Dios. Antes kita matawo, ginpili Sia sang Dios nga mangin aton Manluluwas. Buot silingon nga si Jesus nagkadto sa kalibutan agud mangin ehemplo para sa aton, magtudlo sang Iya ebanghelyo, magbayad sang aton mga sala, kag magluwas sa aton halin sa kamatayon. Tungod kay Jesucristo, sarang kita mapatawad sang aton mga sala kon maghinulsol kita. Si Jesucristo nagbatas man sang madamo nga mga butang agud nga mahangpan Niya kag mabuligan kita. Si Jesucristo napatay kag dayon nabuhi liwat, nga nagahimo nga posible para sa tanan nga mabuhi liwat.

Litrato

Ang paglubong kay Cristo

Laragway gikan sa Getty Images

Ang Balaan nga Espiritu

Ang Balaan nga Espiritu isa ka miyembro sang Pangulohan sang Dios nga wala sing pisikal nga lawas. Espiritu Sia. Ang Balaan nga Espiritu sarang magpabutyag direkta sa aton mga espiritu. Nagasaksi Sia sa aton nga ang Dios matuod kag si Jesucristo aton Manluluwas. Ang Balaan nga Espiritu nagaakto bilang mensahero sang Dios agud hatagan kita sang mga balatyagon sang pagpalangga, paggiya, ukon pagpaumpaw. Sang ginabunyagan kita kag ginakumpirma, ginabaton naton ang dulot sang Balaan nga Espiritu. Pagkatapos sang aton bunyag, ang Balaan nga Espiritu pirme mangin kaupod naton kon aton ginatuman ang mga kasugoan sang Dios.

Litrato

Una nga Panan-awon

First Vision [Una nga Panan-awon], ni Walter Rane

Ang Una nga Panan-awon ni Joseph Smith

Sa kadugayon sang panahon ang mga tawo naligban parte sa Pangulohan sang Dios. Ang mga tawo nagbinaisay parte sa kon ano ang Dios, si Jesucristo, kag ang Balaan nga Espiritu. Isa ini ka rason kon ngaa ang Unang Panan-awon ni Joseph Smith tuman ka importante. Nakita niya nga ang Amay nga Langitnon kag si Jesucristo may mga lawas kag duha ka lainlain nga mga persona.

Litrato

Pagpamati

Listening [Pagpamati]. ni Michael Jarvis Nelson

Lainlain pero Isa

Ang balaan nga mga kasulatan kag moderno nga mga propeta nagatudlo sa aton nga ang Dios, si Jesucristo, kag ang Balaan nga Espiritu lainlain nga mga persona nga may isa ka katuyuan: ang aton pagkawala’y kamatayon kag kabuhi nga wala’y katapusan (tan-awa sa Moises 1:39). Pareho sang mga miyembro sang isa ka grupo, nagahikot Sila sing ululupod agud buligan kita adlaw-adlaw. Makabatyag kita nga mas malapit sa Ila kon maghinulsol kita sang aton mga sala kag magpili sing husto.

Balaan nga mga kasulatan parte sa Pangulohan sang Dios

Ang Amay nga Langitnon kag si Jesucristo isa sing katuyuan (tan-awa sa Juan 10:30).
Ang Amay nga Langitnon nakighambal sa Iya Anak (tan-awa sa Mateo 3:16–17).
Si Jesucristo nakighambal sa Iya Amay (tan-awa sa Juan 11:41).
Si Jesucristo nagpangamuyo para sa aton nga mangin isa pila ka adlaw (tan-awa sa Juan 17:11).
Nakita ni Joseph Smith ang Amay kag sang Anak (tan-awa sa Joseph Smith—Kasaysayan 1:17).
Ang Balaan nga Espiritu nagasaksi nga si Jesucristo aton Manluluwas (tan-awa sa Juan 15:26).

© 2021 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, June 2021. Hiligaynon. 17470 861