“Finding Strength to Forgive,” For the Strength of Youth, June 2021, 10–11.
ຈົ່ງຕາມເຮົາມາ
ພົບເຫັນ ຄວາມເຂັ້ມແຂງ ເພື່ອຈະ ໃຫ້ອະໄພ
ພຣະຜູ້ເປັນເຈົ້າໄດ້ບັນຊາເຮົາໃຫ້ອະໄພຄົນອື່ນ. ພຣະອົງຈະຊ່ວຍເຮົາຮັກສາພຣະບັນຍັດຂອງພຣະອົງ, ລວມທັງຂໍ້ນີ້.
ຮູບພາບປະກອບ ໂດຍ ເຈມສ໌ ແມດເຊັນ
ພຣະບັນຍັດບາງຂໍ້ເບິ່ງຄືວ່າຈະຮັກສາໄດ້ຍາກກວ່າຂໍ້ອື່ນບໍ?
ນີ້ຄືຂໍ້ໜຶ່ງທີ່ເຮັດໃຫ້ຫລາຍຄົນຢ້ານກົວ: “ເຮົາ, ພຣະຜູ້ເປັນເຈົ້າ, ຈະໃຫ້ອະໄພຜູ້ທີ່ເຮົາຈະໃຫ້ອະໄພ, ແຕ່ພວກເຈົ້າຖືກຮຽກຮ້ອງໃຫ້ອະໄພມະນຸດທັງປວງ” (ຄຳສອນ ແລະ ພັນທະສັນຍາ 64:10).
ດຽວກ່ອນ. ເຮົາຕ້ອງໃຫ້ອະໄພ ທຸກຄົນ ທີ່ໄດ້ເຮັດຜິດຕໍ່ເຮົາຊັ້ນບໍ? ມັນຈະເປັນໄປໄດ້ຢູ່ບໍ?!
ຖ້າຄົນໃດຄົນໜຶ່ງເວົ້າຄຳຫຍາບຄາຍກັບເຮົາ ຫລື ກິນເຂົ້າຈີ່ກ້ອນສຸດທ້າຍຢູ່ໂຕະກິນເຂົ້າ ກໍພໍອະໄພໃຫ້ໄດ້ຢູ່. ແຕ່ກ່ຽວກັບບາດແຜເລິກໆເດລະ? ສ່ວນການກະທຳຜິດທີ່ຮ້າຍແຮງເຫລົ່ານັ້ນທີ່ສາມາດລົບກວນ ຫລື ແມ່ນແຕ່ປ່ຽນແປງເສັ້ນທາງຂອງຊີວິດເຮົາເດລະ?
ບາງເທື່ອຄວາມສາມາດທີ່ຈະໃຫ້ອະໄພຄົນໃດຄົນໜຶ່ງທີ່ໄດ້ເຮັດໃຫ້ເຮົາເຈັບປວດຫລາຍແທ້ໆ ກໍຮູ້ສຶກຄືວ່າເກີນກວ່າທີ່ເຮົາຈະສາມາດເຮັດໄດ້.
ນີ້ຄືຂ່າວດີ: ດ້ວຍຄວາມຊ່ວຍເຫລືອຈາກພຣະເຢຊູຄຣິດ, ເຮົາບໍ່ເຄີຍຖືກຈຳກັດດ້ວຍສິ່ງທີ່ເຮົາສາມາດເຮັດໄດ້ດ້ວຍຕົວເຮົາເອງ.
ຄວາມຊ່ວຍເຫລືອທີ່ນາງຕ້ອງການ
ຄົນຄຣິດສະຕຽນທີ່ອຸທິດຕົນຄົນໜຶ່ງຈາກປະເທດໂຮນລັງ ຊື່ ໂຄຣີ ເທັນ ບູມ ໄດ້ພົບເຫັນດ້ວຍຕົວເອງເຖິງພະລັງຂອງການທູນຂໍໃຫ້ພຣະເຈົ້າຊ່ວຍນາງໃຫ້ອະໄພຄົນໃດຄົນໜຶ່ງ.
ນາງ ແລະ ນ້ອງສາວຂອງນາງ ຊື່ ແບັດສີ ໄດ້ຖືກຄຸມຂັງຢູ່ໃນສູນກັກກັນ ລະຫວ່າງສົງຄາມໂລກຄັ້ງທີສອງ. ນາງໂຄຣີ ແລະ ຄົນອື່ນໆໄດ້ທົນທຸກກັບການຂົ່ມເຫັງທີ່ໂຫດຮ້າຍຈາກຄົນຍາມຄຸກ ພວກນາຊີ. ເບັດສີ ນ້ອງສາວຂອງນາງ ກໍໄດ້ເສຍຊີວິດເປັນເພາະການຂົ່ມເຫັງນັ້ນ. ນາງໂຄຣີລອດຊີວິດມາໄດ້.
ຫລັງຈາກສົງຄາມນັ້ນ, ນາງໂຄຣີໄດ້ຄົ້ນພົບພະລັງແຫ່ງການປິ່ນປົວຂອງການໃຫ້ອະໄພຄົນອື່ນ. ນາງໄດ້ແບ່ງປັນຂ່າວສານຂອງນາງໃນສະຖານທີ່ສາທາລະນະເລື້ອຍໆ. ແຕ່ມື້ໜຶ່ງຖ້ອຍຄຳຂອງນາງກໍຖືກທົດລອງເຖິງຂັ້ນສູງສຸດ.
ຫລັງຈາກການປາໄສສາທາລະນະ, ມີຄົນໜຶ່ງທີ່ເປັນຄົນຍາມຄຸກທີ່ໂຫດຮ້າຍທີ່ສຸດຈາກສູນກັກກັນ ໄດ້ເຂົ້າມາຫານາງໂຄຣີ.
ລາວໄດ້ບອກນາງໂຄຣີວ່າ ລາວໄດ້ກາຍເປັນຄົນຄຣິດສະຕຽນແລ້ວນັບຕັ້ງແຕ່ສົງຄາມ ແລະ ໄດ້ກັບໃຈຈາກສິ່ງທີ່ໂຫດຮ້າຍທີ່ລາວໄດ້ເຮັດລົງໄປ ໃນຖານະຄົນຍາມຄຸກ.
ລາວໄດ້ເດ່ມືອອກມາ ແລະ ເວົ້າວ່າ, “ເຈົ້າໃຫ້ອະໄພຂ້ອຍໄດ້ບໍ?”
ເຖິງແມ່ນວ່ານາງໄດ້ຮຽນຮູ້ ແລະ ໄດ້ແບ່ງປັນກ່ຽວກັບການໃຫ້ອະໄພຄົນອື່ນ, ນາງໂຄຣີບໍ່ສາມາດຈັບມືຂອງຜູ້ຊາຍຄົນນີ້ໂດຍສະເພາະ ແລະ ໃຫ້ອະໄພລາວ—ເຖິງແນວໃດ, ນາງກໍເຮັດບໍ່ໄດ້ດ້ວຍຕົວເອງຢູ່ແລ້ວ.
ຕໍ່ມານາງໄດ້ຂຽນວ່າ, “ເຖິງແມ່ນວ່າຂະນະທີ່ຄວາມຄິດໃຈຮ້າຍ ແລະ ຄວາມຄິດຢາກແກ້ແຄ້ນໄດ້ລຸກໄໝ້ຢູ່ພາຍໃນຂ້າພະເຈົ້າກໍຕາມ, ແຕ່ຂ້າພະເຈົ້າກໍເຫັນຄວາມເປັນບາບຢູ່ໃນນັ້ນ. … ອົງພຣະເຢຊູເຈົ້າເອີຍ, ຂ້າພະເຈົ້າໄດ້ອະທິຖານ, ຂໍຈົ່ງໃຫ້ອະໄພຂ້ານ້ອຍ ແລະ ຊ່ວຍຂ້ານ້ອຍໃຫ້ອະໄພລາວດ້ວຍເທີ້ນ.
“ຂ້າພະເຈົ້າໄດ້ພະຍາຍາມຍິ້ມ, [ແລະ] ຂ້າພະເຈົ້າໄດ້ພະຍາຍາມຍົກມືຂຶ້ນ. ແຕ່ຂ້າພະເຈົ້າກໍເຮັດບໍ່ໄດ້. ຂ້າພະເຈົ້າບໍ່ໄດ້ຮູ້ສຶກຫຍັງເລີຍ, ບໍ່ມີຄວາມອົບອຸ່ນ ຫລື ຄວາມໃຈບຸນຢ່າງໃດເລີຍ. ແລະ ອີກເທື່ອໜຶ່ງ ຂ້າພະເຈົ້າໄດ້ອະທິຖານງຽບໆຢູ່ໃນໃຈ. ພຣະເຢຊູເອີຍ, ຂ້ານ້ອຍໃຫ້ອະໄພລາວບໍ່ໄດ້. ຂໍຈົ່ງປະທານການໃຫ້ອະໄພຂອງພຣະອົງໃຫ້ຂ້ານ້ອຍແດ່.
“ຂະນະທີ່ຂ້າພະເຈົ້າໄດ້ຈັບມືລາວ ສິ່ງທີ່ໜ້າເຫລືອເຊື່ອທີ່ສຸດໄດ້ເກີດຂຶ້ນ. ຈາກບ່າໄຫລ່ລົງໄປຕາມແຂນ ແລະ ຜ່ານໄປເຖິງມືຂອງຂ້າພະເຈົ້າ ເບິ່ງຄືວ່າກະແສໃດໜຶ່ງໄດ້ຜ່ານຈາກຂ້າພະເຈົ້າໄປຫາລາວ, ໃນຂະນະທີ່ໃຈຂອງຂ້າພະເຈົ້າເກີດມີຄວາມຮັກຢ່າງບອກບໍ່ຖືກຕໍ່ຄົນແປກໜ້າຄົນນີ້.
“ແລະ ສະນັ້ນ ຂ້າພະເຈົ້າຈຶ່ງໄດ້ຄົ້ນພົບວ່າ ມັນບໍ່ໄດ້ຂຶ້ນຢູ່ກັບການໃຫ້ອະໄພຂອງເຮົາຫລາຍໄປກວ່າຄວາມດີງາມຂອງເຮົາ ທີ່ການປິ່ນປົວຂອງໂລກຄົງຢູ່, ແຕ່ມັນຂຶ້ນກັບພຣະອົງ. ເມື່ອພຣະອົງບອກເຮົາໃຫ້ຮັກສັດຕູຂອງເຮົາ, ພ້ອມທັງພຣະບັນຊານັ້ນ, ພຣະອົງກໍປະທານຄວາມຮັກໃຫ້ນຳອີກ.”1
ພຣະເຈົ້າປະທັບຢູ່ທີ່ນັ້ນເພື່ອຊ່ວຍເຈົ້າໃຫ້ຮັກສາພຣະບັນຍັດຂອງພຣະອົງ, ລວມທັງພຣະບັນຍັດວ່າໃຫ້ອະໄພ—ເຖິງແມ່ນມັນຍາກ. ພຣະອົງສາມາດຊ່ວຍເຈົ້າໄດ້ ດັ່ງທີ່ພຣະອົງໄດ້ຊ່ວຍນາງໂຄຣີ ເທັນ ບູມ.
ການປິ່ນປົວທີ່ເຈົ້າສົມຄວນໄດ້ຮັບ
ຊີວິດກໍຊັບຊ້ອນ. ມັນວຸ້ນວາຍ. ແລະ ມັນກໍເຕັມໄປດ້ວຍຜູ້ຄົນທີ່ມີອຳເພີໃຈທີ່ພຣະເຈົ້າປະທານໃຫ້ແທ້ໆ.
ໃນຊ່ວງເວລາເຫລົ່ານັ້ນ ເມື່ອຄົນໃດຄົນໜຶ່ງເລືອກເຮັດສິ່ງທີ່ເຮັດໃຫ້ເຈົ້າເຈັບປວດຢ່າງສາຫັດ—ຫລື ແມ່ນແຕ່ເຮັດລົງໄປໂດຍບໍ່ຕັ້ງໃຈ—ເຈົ້າກໍສາມາດໄດ້ຮັບອຳນາດແຫ່ງການປິ່ນປົວ ຂະນະທີ່ເຈົ້າອະທິຖານຂໍຄວາມຊ່ວຍເຫລືອ ແລະ ພະຍາຍາມໃຫ້ອະໄພ.
ການໃຫ້ອະໄພຄົນອື່ນ ຈະນຳການປິ່ນປົວມາສູ່ຈິດວິນຍານຂອງເຈົ້າ. ດ້ວຍຄວາມຊ່ວຍເຫລືອຈາກພຣະເຈົ້າ, ຂະນະທີ່ເຈົ້າໃຫ້ອະໄພຄົນໃດຄົນໜຶ່ງທີ່ໄດ້ເຮັດຜິດຕໍ່ເຈົ້າ, ເຈົ້າກໍໄດ້ປ່ອຍວາງພາລະໜັກຈາກບ່າໄຫລ່ຂອງເຈົ້າ ທີ່ອາດຖ່ວງດຶງເຈົ້າໄວ້. ແມ່ນແຕ່ເມື່ອເສັ້ນທາງທີ່ນຳໄປສູ່ການປິ່ນປົວທີ່ແທ້ຈິງນັ້ນຮູ້ສຶກຄືວ່າຍາກ, ກັບພຣະເຈົ້າ, ເຈົ້າຈະບໍ່ຈຳເປັນຕ້ອງເດີນຕໍ່ໄປຄົນດຽວ.
© 2021 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly For the Strength of Youth Message, June 2021. Laotian. 17470 331