ແມ່ນຫຍັງຄືຝ່າຍພຣະເຈົ້າ?

ພຣະບິດາເທິງສະຫວັນ, ພຣະເຢຊູຄຣິດ, ແລະ ພຣະວິນຍານບໍລິສຸດເປັນສາມພຣະອົງທີ່ແຕກຕ່າງກັນ ດ້ວຍຈຸດປະສົງອັນດຽວກັນ.

ຮູບພາບ

ພາບທີ່ມາໃຫ້ເຫັນຄັ້ງທຳອິດ

ລາຍລະອຽດຈາກ First Vision [ພາບທີ່ມາໃຫ້ເຫັນຄັ້ງທຳອິດ], ໂດຍ ຈອນ ມິກນໍທັນ

ບັນນາທິການໜັງສືພິມຄົນໜຶ່ງ ຄັ້ງໜຶ່ງໄດ້ຖາມສາດສະດາໂຈເຊັບ ສະມິດ ວ່າສະມາຊິກຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ໄດ້ມີຄວາມເຊື່ອຖືຫຍັງແດ່. ໃນຄຳຕອບນັ້ນ, ສາດສະດາໄດ້ຂຽນຂໍ້ຖະແຫລງການ 13 ຂໍ້ ເຖິງຄວາມເຊື່ອຖືທີ່ເຮົາເອີ້ນວ່າ ຫລັກແຫ່ງຄວາມເຊື່ອ. ຂໍ້ຖະແຫລງການຂໍ້ທີໜຶ່ງກ່າວວ່າ, “ພວກເຮົາເຊື່ອໃນພຣະເຈົ້າ, ພຣະບິດາຜູ້ສະຖິດນິລັນດອນ, ແລະ ໃນພຣະບຸດຂອງພຣະອົງ, ພຣະເຢຊູຄຣິດ, ແລະ ໃນພຣະວິນຍານບໍລິສຸດ” (ຫລັກແຫ່ງຄວາມເຊື່ອ 1:1). ສາມພຣະອົງນີ້ປະກອບເປັນຜູ້ທີ່ເຮົາເອີ້ນວ່າ ຝ່າຍພຣະເຈົ້າ.

ພຣະເຈົ້າ, ອົງເປັນພຣະບິດາຜູ້ສະຖິດນິລັນດອນ

ພຣະເຈົ້າມີພຣະກາຍທີ່ເປັນເນື້ອໜັງ ແລະ ກະດູກທີ່ໄດ້ຟື້ນຄືນພຣະຊົນແລ້ວ. ພຣະອົງເປັນພຣະບິດາຂອງວິນຍານຂອງເຮົາ. ພຣະອົງຮັກລູກໆຂອງພຣະອົງແຕ່ລະຄົນຢ່າງສົມບູນແບບ. ພຣະເຈົ້າແມ່ນດີພ້ອມ, ມີອຳນາດທັງໝົດ, ແລະ ຮູ້ທຸກສິ່ງທຸກຢ່າງ. ພຣະອົງທ່ຽງທຳ, ມີເມດຕາ, ແລະ ກະລຸນາທິຄຸນ. ເຮົາໄດ້ອາໄສຢູ່ກັບພຣະເຈົ້າໃນຖານະວິນຍານກ່ອນເຮົາໄດ້ມາເກີດ. ພຣະອົງໄດ້ສົ່ງເຮົາມາສູ່ໂລກເພື່ອຮຽນຮູ້ ແລະ ເຕີບໂຕ. ຄວາມປາດຖະໜາທີ່ຍິ່ງໃຫຍ່ທີ່ສຸດຂອງພຣະເຈົ້າສຳລັບລູກໆຂອງພຣະອົງແຕ່ລະຄົນ ແມ່ນໃຫ້ກັບຄືນໄປອາໄສຢູ່ກັບພຣະອົງອີກຄັ້ງຫລັງຈາກເຮົາຕາຍ. ພຣະເຈົ້າສິດສອນເຮົາວ່າ ເຮົາຕ້ອງຕິດຕາມພຣະເຢຊູຄຣິດ ເພື່ອຈະກັບຄືນໄປສູ່ທີ່ປະທັບຂອງພຣະເຈົ້າ.

ຮູບພາບ

ພຣະເຢຊູຄຣິດສັ່ງສອນຢູ່ໃນໂລກວິນຍານ

Christ Preaching in the Spirit World [ພຣະຄຣິດສັ່ງສອນຢູ່ໃນໂລກວິນຍານ], ໂດຍ ຣໍເບີດ ທີ ບາແຣັດ

ພຣະເຢຊູຄຣິດ

ພຣະເຢຊູຄຣິດກໍມີພຣະກາຍທີ່ເປັນເນື້ອໜັງ ແລະ ກະດູກທີ່ໄດ້ຟື້ນຄືນພຣະຊົນແລ້ວຄືກັນ. ພຣະອົງເປັນພຣະບຸດຫົວປີຂອງພຣະເຈົ້າ. ກ່ອນເຮົາໄດ້ມາເກີດ, ພຣະເຈົ້າໄດ້ເລືອກເອົາພຣະອົງໃຫ້ເປັນພຣະຜູ້ຊ່ວຍໃຫ້ລອດຂອງເຮົາ. ນີ້ໝາຍຄວາມວ່າ ພຣະເຢຊູໄດ້ສະເດັດມາສູ່ໂລກ ເພື່ອເປັນຕົວຢ່າງໃຫ້ແກ່ເຮົາ, ສິດສອນພຣະກິດຕິຄຸນຂອງພຣະອົງ, ຊົດໃຊ້ແທນບາບຂອງເຮົາ, ແລະ ຊ່ວຍກູ້ເຮົາຈາກຄວາມຕາຍ. ເປັນເພາະພຣະເຢຊູຄຣິດ, ເຮົາຈະສາມາດໄດ້ຮັບການໃຫ້ອະໄພຈາກບາບຂອງເຮົາ ເມື່ອເຮົາກັບໃຈ. ພຣະເຢຊູຄຣິດຍັງໄດ້ທົນທຸກທໍລະມານກັບຫລາຍສິ່ງຫລາຍຢ່າງນຳອີກ ເພື່ອວ່າພຣະອົງຈະສາມາດເຂົ້າໃຈ ແລະ ຊ່ວຍເຫລືອເຮົາ. ພຣະເຢຊູຄຣິດໄດ້ສິ້ນພຣະຊົນ ແລະ ໄດ້ຟື້ນຄືນພຣະຊົນ, ຊຶ່ງເຮັດໃຫ້ເປັນໄປໄດ້ສຳລັບທຸກຄົນທີ່ຈະມີຊີວິດອີກຄັ້ງ.

ຮູບພາບ

ການຝັງພຣະສົບຂອງພຣະຄຣິດ

ຮູບພາບຈາກ Getty Images

ພຣະວິນຍານບໍລິສຸດ

ພຣະວິນຍານບໍລິສຸດເປັນສະມາຊິກອົງໜຶ່ງຢູ່ໃນຝ່າຍພຣະເຈົ້າທີ່ບໍ່ມີພຣະກາຍທີ່ເປັນເນື້ອໜັງ. ພຣະອົງເປັນວິນຍານ. ພຣະວິນຍານບໍລິສຸດສາມາດສື່ສານກັບວິນຍານຂອງເຮົາໂດຍກົງ. ພຣະອົງເປັນພະຍານວ່າ ພຣະເຈົ້າມີຈິງ ແລະ ວ່າພຣະເຢຊູຄຣິດເປັນພຣະຜູ້ຊ່ວຍໃຫ້ລອດຂອງເຮົາ. ພຣະວິນຍານບໍລິສຸດປະຕິບັດໃນຖານະຜູ້ສົ່ງຂ່າວຂອງພຣະເຈົ້າ ເພື່ອປະທານຄວາມຮູ້ສຶກເຖິງຄວາມຮັກ, ການຊີ້ນຳ, ຫລື ການປອບໂຍນໃຫ້ແກ່ເຮົາ. ເມື່ອເຮົາໄດ້ຮັບບັບຕິສະມາ ແລະ ໄດ້ຮັບການຢືນຢັນ, ເຮົາກໍຮັບເອົາຂອງປະທານແຫ່ງພຣະວິນຍານບໍລິສຸດ. ຫລັງຈາກການບັບຕິສະມາຂອງເຮົາ, ພຣະວິນຍານບໍລິສຸດສາມາດສະຖິດຢູ່ນຳເຮົາ ຂະນະທີ່ເຮົາຮັກສາພຣະບັນຍັດຂອງພຣະເຈົ້າ.

ຮູບພາບ

ພາບທີ່ມາໃຫ້ເຫັນຄັ້ງທຳອິດ

First Vision [ພາບທີ່ມາໃຫ້ເຫັນຄັ້ງທຳອິດ], ໂດຍ ວາວເຕີ ເຣນ

ພາບທີ່ມາໃຫ້ເຫັນຄັ້ງທຳອິດຂອງໂຈເຊັບ ສະມິດ

ເມື່ອເວລາຜ່ານໄປ ຜູ້ຄົນກໍໄດ້ສັບສົນກ່ຽວກັບຝ່າຍພຣະເຈົ້າ. ຜູ້ຄົນບໍ່ໄດ້ເຫັນດ້ວຍກ່ຽວກັບພຣະເຈົ້າ, ພຣະເຢຊູຄຣິດ, ແລະ ພຣະວິນຍານບໍລິສຸດວ່າເປັນແບບໃດ. ນີ້ຄືເຫດຜົນໜຶ່ງວ່າ ເປັນຫຍັງພາບທີ່ມາໃຫ້ເຫັນຄັ້ງທຳອິດຂອງໂຈເຊັບ ສະມິດ ຈຶ່ງສຳຄັນຫລາຍແທ້ໆ. ເພິ່ນໄດ້ເຫັນວ່າ ພຣະບິດາເທິງສະຫວັນ ແລະ ພຣະເຢຊູຄຣິດ ມີພຣະກາຍ ແລະ ເປັນສອງພຣະອົງທີ່ແຕກຕ່າງກັນ.

ຮູບພາບ

ການຮັບຟັງ

Listening [ການຮັບຟັງ], ໂດຍ ໄມໂກ ຈາວິສ໌ ແນວສັນ

ແຕກຕ່າງກັນ ແຕ່ເປັນອັນໜຶ່ງດຽວກັນ

ພຣະຄຳພີ ແລະ ບັນດາສາດສະດາໃນຍຸກສະໄໝໃໝ່ສິດສອນວ່າ ພຣະເຈົ້າ, ພຣະເຢຊູຄຣິດ, ແລະ ພຣະວິນຍານບໍລິສຸດແມ່ນແຕກຕ່າງກັນ ທີ່ມີຈຸດປະສົງອັນດຽວກັນຄື: ຄວາມເປັນອະມະຕະ ແລະ ຊີວິດນິລັນດອນຂອງເຮົາ (ເບິ່ງ ໂມເຊ 1:39). ເໝືອນດັ່ງສະມາຊິກຢູ່ໃນທີມດຽວກັນ, ພວກພຣະອົງເຮັດວຽກຮ່ວມກັນ ເພື່ອຊ່ວຍເຫລືອເຮົາທຸກໆວັນ. ເຮົາສາມາດຮູ້ສຶກໃກ້ຊິດກັບພວກພຣະອົງຫລາຍຂຶ້ນ ເມື່ອເຮົາກັບໃຈຈາກບາບຂອງເຮົາ ແລະ ເລືອກສິ່ງດີ.

ຂໍ້ພຣະຄຳພີກ່ຽວກັບຝ່າຍພຣະເຈົ້າ

ພຣະບິດາເທິງສະຫວັນ ແລະ ພຣະເຢຊູຄຣິດເປັນໜຶ່ງດຽວກັນໃນຈຸດປະສົງ (ເບິ່ງ ໂຢຮັນ 10:30).
ພຣະບິດາເທິງສະຫວັນໄດ້ກ່າວກັບພຣະບຸດຂອງພຣະອົງ (ເບິ່ງ ມັດທາຍ 3:16–17).
ພຣະເຢຊູຄຣິດໄດ້ກ່າວກັບພຣະບິດາຂອງພຣະອົງ (ເບິ່ງ ໂຢຮັນ11:41).
ພຣະເຢຊູຄຣິດໄດ້ອະທິຖານເພື່ອໃຫ້ເຮົາກາຍເປັນໜຶ່ງດຽວກັນໃນມື້ໜຶ່ງ (ເບິ່ງ ໂຢຮັນ 17:11).
ໂຈເຊັບ ສະມິດ ໄດ້ເຫັນພຣະບິດາເທິງສະຫວັນ ແລະ ພຣະເຢຊູຄຣິດ (ເບິ່ງ ໂຈເຊັບ ສະມິດ—ປະຫວັດ 1:17).
ພຣະວິນຍານບໍລິສຸດເປັນພະຍານວ່າ ພຣະເຢຊູຄຣິດເປັນພຣະຜູ້ຊ່ວຍໃຫ້ລອດຂອງເຮົາ (ເບິ່ງ ໂຢຮັນ 15:26).

© 2021 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly Liahona Message, June 2021. Laotian. 17470 331