Tlohong, le ntatele

Ho Fumana Matla a ho Ts´oarela

Ka David Dickson

Limakasine tsa Kereke

Morena o re laetse hore re ts´oarele ba bang. O tla re thusa ho boloka litaelo tsa hae, ho kenyelletsa le ena.

Lithuto tsa Tumelo le Lilekane 64:10

mosali ea shebileng motho ea mo otlolletseng letsoho

Sets´oant´so ka James Madsen

Na litaelo tse ling li bonahala li le thata ho li boloka ho feta tse ling?

E ´ngoe e ts ´osang batho ba bangata ke ena: “ ´Na, Morena, ke tla ts´oarela eo ke tla mo ts´oarela, empa lona ho hlokahala hore le ts´oarele batho bohle” (Lithuto tsa Tumelo le Lilekane 64:10).

Emisa. Na re tlamea ho ts´oarela e mong le e mong ea re fositseng? Na feela hoo hoa khoneha?!

Ke ntho e ´ngoe ho ts´oarela motho bakeng sa ntho e hlokang tlhompho ea e buileng ho uena kapa bakeng sa ho nka bohobe ba ho qetela tafoleng ea lijo. Empa joang ka maqeba a tebileng? Na lits´ito tseo tse tebileng li ka sitisa kapa esita le ho fetola tsela ea bophelo ba rona?

Ka nako e ´ngoe matla a ho ts´oarela motho ea re utloisitseng bohloko bo ts´abehang a ka utloahala a feta moo re ka fihlelang.

Litaba tse monate ke tsena: Ka thuso ea Jesu Kreste, ha hona mohla re lekanyelitsoeng feela ho seo re ka se etsang ka bo rona.

Thuso Eo A Neng A e Hloka.

Mokreste ea inehetseng ho tsoa Netherlands ea bitsoang Corrie ten Boom o fumane ka bo eena matla a ho kopa Molimo hore a mo thuse ho ts´oarela motho e mong.

Eena le ngoanabo Betsy ba ne ba koalletsoe kampong ea litlhoriso nakong ea Ntoa ea Bobeli ea Lefats´e. Corrie le ba bang ba ile ba mamella tlhekefetso e ts´abehang ho tsoa ho balebeli ba teronko. Ngoanabo Betsy o ile a ba a shoa e le litlamorao tsa tlhekefetso eo. Corrie o ile a phela.

Kamor´a ntoa, Corrie o ile a sibolla matla a pholiso ea ho ts´oarela ba bang. Hangata o ne a arolelana ka molaetsa oa hae lipitsong tsa sechaba. Le ha ho le joalo ka letsatsi le leng mantsoe a hae a ile a behoa tekong ea ho qetela.

Kamor´a puo ea sechaba, Corrie o ile a atemeloa ke emong oa balebeli ba sehlohohali ba teronko ho tsoa likampong. .

O ile a bolella Corrie hore o fetohile Mokreste ho tloha nakong ea ntoa ´me o bakile linthong tse ts´abehang tseo a li entseng ha e le molebeli oa teronko.

O ile a ts´oara letsoho la hae ´me a re, “Na u tla nts´oarela?”

Ho sa natsehe sohle seo a ithutileng le ho arolelana ka ho ts´oarela ba bang, Corrie o ne a sitoa ho amohela letsoho la monna enoa ka ho khetheha ´me a mo ts´oarele—e seng ka bo eena feela joalo.

Hamorao o ile a ngola hore, “Esita le ha mehopolo ea khalefo le boiphetetso e ne e bela ka har´e ho ´na, ke ile ka bona sebe sa eona. … Morena Jesu, ka rapela, nts´oarele, ´me nthuse hore ke mo tsoarele.

Ke lekile ho bososela, [´me] ka sokola ho phahamisa letsoho la ka. Ke ne ke sitoa. Ka utloa ho se na letho, le ha e se le tlhase ea mofuthu kapa lerato. ´Me eaba hape ke feheloa thapelo e khutsitseng. Jesu, ke sitoa ho mo ts´oarela. Mphe ts´oarelo ea hau.

“Eare ha ke nka letsoho la hae, ntho e hlollang ka ho fetisa ea etsahala. Ho tloha lehetleng la ka ho tsamaea sephakeng ho isa letsohong la ka, eaka ho feta motlakase o tsoang ho ´na ho ea ho eena, ha ka pelong eaka ho qhoma lerato bakeng sa motho osele enoa hoo ke ileng ka batla ke hlolloa.

“´Me eaba kea fumana hore ha se ka ts´oarelo ea rona kapa ho feta ho loka ha rona moo pholo ea lefats´e e hoketsoeng, empa e ho tsa Hae. Ha a re bolella hore re rate lira tsa rona, O re fa, hammo le taelo eo, lerato ka bo lona.”¹

Molimo o teng ho u thusa hore u boloke litaelo tsa hae, ho kenyeletsa le taelo ea ho ts´oarela—esita le haele thata. A ka u thusa joaloka ha a thusitse Corrie ten Boom.

Pholo e u Lokelang

Bophelo bo maqheka. Bo bohlasoa. ´Me ehlile bo tletse batho ba bangata ba nang le boikhethelo bo fanoeng ke Molimo.

Ka linako tseo motho e mong a etsang khetho e u bakelang bohloko bo tebileng— kapa esita le ha e etsa joalo ka ts´ohanyetso—u ka amohela matla a pholiso ha u rapella thuso ´me u leka ho ts´oarela.

Ho ts´oarela ba bang ho tlisa pholo moeeng oa hau. Ka thuso ea Molimo, ha u ts´oarela e mong ea u fositseng, o lahla moroalo o ts´abehang ho tsoa mahetleng a hau oo e ka bang o u hulela morao. Esita le ha tsela ea pholo ea ´nete e utloahala e le thata, ha u na le Molimo, u ke ke oa hlola u e tsamea u le mong.

Seo Ts´oarelo e sa se Hlokeng.

Moholo Jeffrey R. Holland oa Lekhotla la Ba-apostola ba Leshome le Metso e ´Meli o kile a bua ka taelo ea Mopholosi ea ho ts´oarela. Eaba o re:

“Ho bohlokoa, le ha ho le joalo, bakeng sa ba bang ba lona ba phelang bohlokong ba ´nete ho ela hloko seo a se entseng e seng ho se bua. Ha a ka a re, ‘Ha lea lumelloa ho utloa bohloko ba ´nete kapa mahlomola a ´nete ho tsoa boiphihlelong bo thubang ho tsoa letsohong la e mong.’ Kapa ha a re: ‘Hore u tle u ts´oarele ka botlalo, u tlameha ho kena hape likamanong tse chefo kapa ho khutlela ho boemo bo hlekefetsang, bo senyang.’ Empa ho sa natsehe esita le ts´ito e ts´abehang ka ho fetisa e ka tlang ho rona, re ka phahamela ka holimo ho bohloko ba rona ha re beha maoto a rona tseleng ea pholo ea ´nete.”²

Hlokomela: Haeba u kile oa fihlela kapa u ntse u fumana tlhekefetso ea mofuta ofe kapa ofe, ho kenyeletsa nameng, maikutlong, kapa tlhekefetso ea motabo, bolella mobishopo oa hau hore u hloka ho kopana le eena bakeng sa thuso tseleng ea pholo ea ´nete. U na le linotlolo le matla a ka u thusang.

© 2020 by Intellectual Reserve, Inc. All rights reserved. Printed in USA. Tumello ea Sekhooa: 6/19. Tumello ea phetolelo: 6/19. Phetholelo ea Monthly For the Strength of Youth Message, June 2021.Sotho.17463 739 Sesotho 18611 739

Lintlha

1. Corrie ten Boom, The Hiding Place (1971), 215.

2. Jeffrey R. Holland, Mphalane. 2018, seboka se akaretsang (Ensign or Liahona, Pulungoana. 2018, 79).