ພຣະບິດາເທິງສະຫວັນຂອງເຮົາປະສົງໃຫ້ເຮົາມີຄວາມສຸກ

ຂະນະທີ່ເຮົາຈື່ຈຳແຜນແຫ່ງຄວາມສຸກຂອງພຣະເຈົ້າ, ເຮົາສາມາດພົບຄວາມສຸກໄດ້ແມ່ນແຕ່ໃນເວລາທີ່ຊີວິດລຳບາກ.

ກ່ອນເຮົາລົງມາເກີດຢູ່ເທິງໂລກນີ້, ເຮົາທຸກຄົນໄດ້ອາໄສຢູ່ກັບພຣະບິດາເທິງສະຫວັນໃນຖານະລູກໆທາງວິນຍານຂອງພຣະອົງ. ພຣະອົງໄດ້ສະເໜີແຜນເພື່ອຊ່ວຍລູກໆຂອງພຣະອົງໃຫ້ຮຽນຮູ້ ແລະ ເຕີບໂຕ. ຜ່ານທາງແຜນຂອງພຣະອົງ, ເຮົາສາມາດກາຍເປັນເໝືອນດັ່ງພຣະອົງຫລາຍຂຶ້ນ ແລະ ມີຄ່າຄວນກັບຄວາມສຸກຂອງຊີວິດນິລັນດອນ. ແຜນນີ້ເປັນໄປໄດ້ຍ້ອນພຣະບຸດຂອງພຣະເຈົ້າ, ພຣະເຢຊູຄຣິດ, ໄດ້ມາສູ່ໂລກເພື່ອທໍລະມານແທນບາບຂອງເຮົາ, ເປັນການເສຍສະລະທີ່ເອີ້ນວ່າການຊົດໃຊ້.

ແຜນຂອງພຣະບິດາເທິງສະຫວັນເອີ້ນວ່າ ແຜນແຫ່ງ

ຄວາມສຸກ (ເບິ່ງ ແອວມາ 42:8),
ຄວາມລອດ (ເບິ່ງ ໂມເຊ 6:62),
ການໄຖ່ (ເບິ່ງ ຢາໂຄບ 6:8), ຫລື
ຄວາມເມດຕາ (ເບິ່ງ ແອວມາ 42:15).

ດັ່ງທີ່ຂໍ້ພຣະຄຳພີເຫລົ່ານີ້ ແລະ ຂໍ້ພຣະຄຳພີອື່ນໆສະແດງໃຫ້ເຫັນ, ພຣະບິດາເທິງສະຫວັນປະສົງໃຫ້ເຮົາເປັນເໝືອນດັ່ງພຣະອົງ, ກັບຄືນໄປຫາພຣະອົງ, ແລະ ມີຄວາມສຸກຢ່າງແທ້ຈິງ (ເບິ່ງ ໂມເຊ 1:39).

ເຮົາມາສູ່ໂລກນີ້ເພື່ອຮຽນຮູ້ ແລະ ເຕີບໂຕ

ພຣະເຈົ້າໄດ້ສົ່ງເຮົາມາສູ່ໂລກນີ້, ບ່ອນທີ່ເຮົາສາມາດມີຮ່າງກາຍ (ເບິ່ງ ປະຖົມມະການ 1:26–27). ເຮົາຕ້ອງການຮ່າງກາຍເພື່ອຊ່ວຍໃຫ້ເຮົາມີປະສົບການຊີວິດຢູ່ເທິງໂລກນີ້.

ພຣະເຈົ້າຮູ້ວ່າເຮົາຈະບໍ່ມີຄວາມສຸກໄດ້ຕະຫລອດເວລາ. ເຮົາຈະປະສົບກັບຄວາມຜິດຫວັງ, ຄວາມເຈັບປວດ, ແລະ ແມ່ນແຕ່ຄວາມຕາຍ. ແຕ່ຜ່ານທາງການທ້າທາຍຂອງຊີວິດ, ພຣະບິດາເທິງສະຫວັນຊ່ວຍໃຫ້ເຮົາຮຽນຮູ້ ແລະ ເຕີບໂຕ.

ພຣະເຈົ້າຍັງໄດ້ມອບອຳເພີໃຈໃຫ້ແກ່ເຮົາ, ເປັນຄວາມສາມາດໃນການເລືອກລະຫວ່າງຄວາມດີ ແລະ ຄວາມຊົ່ວ. ພຣະອົງໃຫ້ເຮົາເລືອກເພື່ອຕົວເຮົາເອງ ໃນສິ່ງທີ່ເຮົາຄິດ ແລະ ກະທຳ. ພຣະອົງໄດ້ມອບພຣະຄຳພີ ແລະ ສາດສະດາທີ່ມີຊີວິດຢູ່ໃຫ້ແກ່ເຮົາ ເພື່ອຊ່ວຍເຫລືອເຮົາໃຫ້ຮຽນຮູ້ໃນການເລືອກສິ່ງທີ່ຖືກຕ້ອງ (ເບິ່ງ ອັບຣາຮາມ 3:25).

ພະຍາຍາມເປັນເໝືອນດັ່ງພຣະເຢຊູຄຣິດ

ພຣະເຈົ້າບໍ່ໄດ້ສົ່ງເຮົາມາສູ່ໂລກນີ້ໂດຍປາດສະຈາກຕົວຢ່າງໃຫ້ເຮັດຕາມ (ເບິ່ງ ໂຢຮັນ 13:15). ພຣະອົງໄດ້ສົ່ງພຣະບຸດຂອງພຣະອົງ, ພຣະເຢຊູຄຣິດ, ມາເພື່ອຊີ້ທາງໃຫ້ແກ່ເຮົາ. ເພື່ອຮຽນຮູ້ທີ່ຈະຕິດຕາມພຣະອົງ, ເຮົາສາມາດອ່ານພຣະຄຳພີເພື່ອຮຽນຮູ້ວ່າພຣະອົງແມ່ນໃຜ ແລະ ສິ່ງທີ່ພຣະອົງໄດ້ປະຕິບັດໃນຊ່ວງທີ່ພຣະອົງຢູ່ເທິງໂລກນີ້. ເຊັ່ນດຽວກັນ ເຮົາສາມາດເຮັດໃຫ້ດີທີ່ສຸດໃນການເປັນເໝືອນດັ່ງພຣະຄຣິດ ໂດຍການເຊື່ອຟັງພຣະເຈົ້າ ແລະ ຮັກຄົນອື່ນ.

ເມື່ອເຮົາເຮັດຜິດ, ເຮົາສາມາດຂໍການໃຫ້ອະໄພ ແລະ ໃຊ້ອຳນາດຂອງການຊົດໃຊ້ຂອງພຣະເຢຊູຄຣິດເພື່ອຊ່ວຍໃຫ້ເຮົາປ່ຽນແປງ. ເຮົາສາມາດມີຄວາມສຸກຂະນະທີ່ເຮົາພະຍາຍາມທຸກໆມື້ໃນການກາຍເປັນເໝືອນດັ່ງພຣະອົງ.

ຄວາມຕາຍບໍ່ແມ່ນຈຸດຈົບ

ເມື່ອເຮົາຕາຍໄປ, ວິນຍານຂອງເຮົາຈະໄປສູ່ໂລກວິນຍານ. ຢູ່ທີ່ນັ້ນເຮົາຮຽນຮູ້ຕໍ່ໄປຂະນະທີ່ເຮົາກຽມພ້ອມສຳລັບການຟື້ນຄືນຊີວິດ.

ໃນຊ່ວງເວລາຂອງການຟື້ນຄືນຊີວິດ, ຮ່າງກາຍ ແລະ ວິນຍານຂອງເຮົາຈະກັບຄືນເຂົ້າຫາກັນ. ຮ່າງກາຍຂອງເຮົາຈະສົມບູນແບບ, ແລະ ເຮົາຈະບໍ່ທໍລະມານກັບຄວາມຕາຍ ຫລື ພະຍາດອີກຕໍ່ໄປ (ເບິ່ງ ແອວມາ 11:44–45). ເຊັ່ນດຽວກັນກັບພຣະເຢຊູຄຣິດໄດ້ສິ້ນພຣະຊົນ ແລະ ກັບຄືນມາມີພຣະຊົນຊີບອີກຄັ້ງ, ເຮົາທຸກຄົນຈະມີຊີວິດຄືນມາອີກ.

ເມື່ອພຣະເຈົ້າພິພາກສາເຮົາ, ພຣະອົງຈະຄຳນຶງເຖິງການກະທຳ ແລະ ຄວາມປາດຖະໜາຂອງເຮົາ. ຖ້າວ່າເຮົາພະຍາຍາມຮັກສາພຣະບັນຍັດ ແລະ ຮັກສາສັນຍາທີ່ເຮົາໄດ້ເຮັດໄວ້ກັບພຣະບິດາເທິງສະຫວັນ, ແລ້ວເຮົາຈະສາມາດຢູ່ກັບພຣະອົງໄດ້ອີກຄັ້ງ.

ຊີວິດທີ່ຢູ່ກັບພຣະເຈົ້າ ແລະ ຄອບຄົວຂອງເຮົາໃນສະຫວັນ

ໃນອານາຈັກຊັ້ນສູງ, ເຮົາຈະຢູ່ກັບພຣະເຈົ້າ ແລະ ພຣະເຢຊູຄຣິດ. ເຮົາຈະສາມາດຢູ່ທີ່ນັ້ນກັບຄອບຄົວຂອງເຮົາຕະຫລອດໄປເຊັ່ນກັນ ຖ້າເຮົາຖືກຜະນຶກໄວ້ກັບເຂົາເຈົ້າ. ເຮົາຈະພົບຄວາມສະຫງົບ, ຄວາມສຸກ, ແລະ ການພັກຜ່ອນ (ເບິ່ງ ໂມໄຊຢາ 2:41).

ຊີວິດຂອງເຮົາຢູ່ເທິງໂລກອາດຈະຫຍຸ້ງຍາກເປັນບາງຄັ້ງ, ແຕ່ຖ້າເຮົາຕິດຕາມພຣະເຢຊູຄຣິດ, ເຮົາຈະສາມາດພົບຄວາມສຸກໄດ້ໃນຊີວິດນີ້ ແລະ ຄວາມສຸກນິລັນດອນໃນຊີວິດທີ່ຈະມາເຖິງ.

ພຣະຄຳພີກ່າວວ່າຢ່າງໃດກ່ຽວກັບແຜນແຫ່ງຄວາມສຸກ?

ວິທີການດຳລົງຊີວິດຂອງເຮົາເປັນສິ່ງທີ່ສຳຄັນ. ພຣະເຈົ້າຈະພິພາກສາ ແລະ ໃຫ້ລາງວັນແກ່ເຮົາອີງຕາມຄວາມຄິດ ແລະ ການກະທຳຂອງເຮົາ (ເບິ່ງ ແອວມາ 41:3).

ຊາຕານເປັນສັດຕູຕໍ່ຄວາມສຸກຂອງເຮົາ. ມັນລໍ້ລວງເຮົາໃຫ້ໃຊ້ຊີວິດໃນທາງທີ່ບໍ່ຄວນຢູ່ເທິງໂລກນີ້ ແລະ ໃຫ້ເຮັດບາບ. ມັນຢາກໃຫ້ເຮົາເສົ້າສະຫລົດໃຈຄືກັນກັບມັນ (ເບິ່ງ 2 ນີໄຟ 2:27).

ເມື່ອເຮົາມີສັດທາໃນແຜນຂອງພຣະເຈົ້າທີ່ມີໃຫ້ສຳລັບເຮົາ, ເຮົາສາມາດມີສັນຕິສຸກ ບໍ່ວ່າເຮົາຈະປະສົບກັບການທົດລອງໃດໆກໍຕາມ. ເຮົາສາມາດລໍຄອຍທີ່ຈະໄດ້ຢູ່ກັບພຣະເຈົ້າຕະຫລອດໄປ (ເບິ່ງ ຄຳສອນ ແລະ ພັນທະສັນຍາ 59:23).

© 2021 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly Liahona Message, July 2021. Laotian. 17471 331

ງານສິລະປະທັງໝົດ ໂດຍ ເຈ ເຄີກ ຣິເຈີດສ໌