“Panangpadur-as iti Kasayaatan a Dakayo,” Para iti Pigsa dagiti Agtutubo, Sept. 2021, 6–7.
Binulan a Mensahe ti Para iti Pigsa dagiti Agtutubo , Septiembre 2021
Panagpadur-as iti Kasayaatan a Dakayo
Lima a wagas a panangbangon iti naragsak ken narag-o a biag.
Dagiti panangiladawan ni Juliet Percival
Idi binilin ti Apo ni Joseph Smith a mangbangon iti Templo ti Kirtland, saanna a pinanawan isuna tapno makita no kasano nga aramidenna daytoy iti bukodna. Impalgakna ti maysa a plano nga agbanag iti balligi.
“Bangonenyo ti balay, saan a babaen ti wagas ti lubong,” impakdaar ti Apo. “Ngarud, bangonenyo babaen ti wagas nga itedko” (Doktrina ken Katulagan 95:13–14). Inted ti Apo kalpasanna dagiti pangiturong maipapan iti no kasano ti mangbangon iti templo (kitaen iti Doktrina ken Katulagan 95:15–17).
Siyayaman, impakita kadatayo ti Apo ti ad-adda pay ngem iti no kasano ti mangbangon kadagiti templo. Inikkannatayo pay kadagiti pangiturong a makatulong kadatayo nga agbalin a kasayaatan a tao a pagbalinantayo. No surotentayo ida, bangonentayto ti biagtayo “saan a babaen ti wagas ti lubong” ngem kalpasan ti wagas nga insangrat ti Apo.
Adtoy ti lima a wagas a panangbangon iti naragsak ken narag-o a biag a naisentro ken ni Jesucristo.
Mangbangon iti Saan a Mapagduaduan a Pundasion
Ibaganto kadakayo ti asino man nga arkitekto wenno agbangbangon a kasapulan ti nalagda a pundasion iti ania man a pasdek. Insuro ni Helaman a kasayaatan a pundasion para iti biagtayo ti “bato ti Mannubbottayo, nga isu ni Cristo, ti Anak ti Dios” (Helaman 5:12). Mabalin nga aramidentayo ni Cristo a pundasiontayo babaen iti yaasideg kenkuana ken panangsurot kadagiti pannursurona. Ania ti mariknayo nga ar-aramidenyo iti panamagbalin ken ni Cristo a pundasion ti biagyo?
Agserbi kadagiti Dadduma
Sabali pay a naindaklan a wagas a panangbangontayo iti biagtayo, segun ken ni Presidente Dieter F. Uchtdorf, Maikadua idi a Mammagbaga iti Umuna a Panguluen, sumangbay no “addatayo nga agserserbi iti Apo ken agserserbi kadagiti adda iti aglawlawtayo.”1 No agserbikayo kadagiti dadduma, ar-aramidenyo ti no ania ti inaramid ni Jesus ken agsursurokayo nga agbalin nga ad-adda pay a kas Kenkuana. Ket saanyo laeng a mabendisionan ti biag dagiti tao a pagserbianyo, ngem dakayo ket mabendisionan pay.
Mangparnuay iti Inaldaw a Kaugalian iti Panagkararag ken Panagadal iti Nasantuan a Kasuratan
Sabali pay a wagas a panangbangon iti naragsak a biag ket iti panangpapigsa iti relasion iti Nailangitan nga Ama ken ni Jesucristo. Maysa a naindaklan a wagas iti panangaramid dayta ket babaen ti kararag ken panagadal iti nasantuan a kasuratan.
Kinuna ni Presidente Uchtdorf: “Tapno mapapigsa ti relasiontayo iti Dios, kasapulantayo ti sumagmamano a napateg a panawen a makikadua Kenkuana. Ti siuulimek a panangipokus iti inaldaw a panagkararag ken panagadal iti nasantuan a kasuratan… agbalinto a sumagmamano a masirib a panangtaginayon iti panawen ken panagkagumaantayo nga ad-adda nga umasideg iti Nailangitan nga Amatayo.”2
Ti kararag ket maysa a gundaway a pannakisarita iti Amatayo iti Langit. Am-ammonatayo, ay-ayatennatayo, ken kayatna ti dumngeg kadatayo! No agkararagtayo a sipapasnek, idatontayo dagiti panagyamantayo, ket agkiddawtayo kadagiti banag a kasapulantayo, dumngeg ken kanayon a sumungbat iti bukodna a wagas ken panawen.
No maipanggep iti panagadal iti nasantuan a kasuratan, awan ti maysa laeng nga umno a wagas a panangaramid iti daytoy. Ti napateg a banag ket aramidenyo daytoy! Insuro ni Presidente Russell M. Nelson, “Ti inaldaw a pannakairarem iti balikas ti Dios ket napateg para iti naespirituan a panagtultuloy ti panagbiag.”3 Ti panangbubos iti oras iti inaldaw kadagiti nasantuan a kasuratan, awan duadua, a tulongannakanto a mangbangon iti biag nga addaan pammati ken pigsa.
Palawlawanyo ti Bagiyo kadagiti Mangparegta Kadakayo nga Agaramid iti Naimbag
Kayat ti Nailangitan nga Ama a mangikonekta ken mangbangontayo kadagiti pannakilangen iti dadduma—nangnangruna iti pamilia ken gagayyem. Masansan a sukogendatayo dagidiay pangibubosantayo iti orastayo. Miembroda man ti Simbaan wenno saan, nasken a palawlawanyo ti bagiyo kadagiti tao a mangtulong kadakayo nga agbiag iti ebanghelio, agtungpal kadagiti pagrukodan ti Apo, ken agbalin a nasaysayaat a tao. Makatulongkayo met kadagiti adda iti aglawlawyo a mangaramid iti kastoy. Asino kadagiti gagayyemyo ti mangtultulong kadakayo a mangbangon iti pundasionyo iti kinalinteg?
Sapulen iti Rag-o iti Panangbangon iti Pundasionyo
Adu dagiti dadduma pay a wagas a mabalin a panangbangonyo iti biagyo tapno agbalin a napigsa iti kinaespirituan ken maaddaan iti rag-o, agraman ti ipapan iti simbaan ken pannakiranud iti sakramento, panagaramid ken panagtungpal kadagiti katulagan, ken panangsurot iti balakad dagiti sibibiag a propeta.
Napateg a laglagipen nga itrabaho ken ikkan iti panawen amin dagitoy a banag. Kanayon nga adda maaramid a panangbangon ken panagsursuro, ngem saan met a nasken nga agmaymaysakayo a mangaramid iti daytoy. Tulongannakayonto ti Apo iti inaldaw bayat ti panangpadasyo a mangaramid iti amin a kabaelanyo a mangbangon iti biag a mabalinyo ken mabalinna nga ipagpannakkel ken mangisangbayto kadakayo iti rag-o.
© 2021 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly For the Strength of Youth Message, September 2021. Ilokano. 17473 864