Binulan a Mensahe ti Liahona , Septiembre 2021

Sapasap a Komperensia: Maysa a Miting iti Simbaan iti Sangalubongan

Dumngegtayo kadagiti propeta ken dadduma pay a lider iti Simbaan kabayatan ti sapasap a komperensia. Isurodatayo no ania ti kayat ti Dios a mangngegantayo.

Tunggal Abril ken Oktubre, ang-angayen ti Simbaan ti maysa a serye dagiti miting a maawagan iti sapasap a komperensia. Mangisuro ken agpaneknek dagiti lider maipapan ken ni Jesucristo ken ti ebangheliona. Maang-angay ti sapasap a komperensia iti Salt Lake City, Utah, USA, ken maiwaragawag iti intero a lubong iti nasurok a 80 a pagsasao. Maawis ti amin a miembro ken asino man a tattao nga interesado a dumngeg kadagiti mensahe.

Dagiti Umuna a Komperensia iti Simbaan

Opisial a nabukel ti Simbaan kabayatan ti miting idi Abril 6, 1830 (kitaen iti Doktrina ken Katulagan 20). Naangay ti umuna a sapasap a komperensia idi Hunio 9, 1830. Manipud idin, maang-angayen dagiti sapasap a komperensia babaen ti panangiturong ti Presidente ti Simbaan iti sadino man a makapaguummong dagiti miembro. Kadagidi a panawen ti 1840, rinugian nga inangay dagiti lider ti komperensia iti mamindua ti makatawen.

Kasano a Mabukel dagiti Komperensia iti Agdama

Agsarita ti Umuna a Panguluen, ti Korum dagiti Sangapulo-ket-dua nga Apostol, ken dadduma pay a lider iti Simbaan kabayatan ti sapasap a komperensia. Mangipaay iti musika ti Tabernacle Choir iti Temple Square ken ti dadduma pay a koro iti Simbaan. Addaan ti tunggal komperensia iti lima a sesion: tallo iti Sabado ken dua iti Domingo. Iti Abril, ti maikatlo a sesion iti Sabado ti para kadagiti miembro ti Aaronic ken Melchizedek Priesthood. Iti Oktubre, para daytoy kadagiti miembro ti Relief Society ken Young Women.

Dagiti Pannursuro dagiti Lider

Kadagiti bulan sakbay a komperensia, ikararag dagiti lider ti Simbaan maipapan iti no ania ti maisuro. Paregtaen ida ti Apo a mangammo no ania ti nasken nga isaoda. Isuroda dagiti kinapudno ti ebanghelio ken awisendatayo nga agtungpal kadagiti bilin ti Dios. Paneknekanda pay ni Jesucristo ket paregtaendatayo a mangsurot Kenkuana.

Panagsursuro manipud iti Komperensia

Sakbay ti sapasap a komperensia, makapagkararagtayo a dumngeg no ania ti kayat ti Apo a sursuruentayo. Bayat ti panagdengngegtayo kadagiti mensahe, isuronto ti Espiritu kadatayo no ania ti nasken a maammuantayo. Kalpasan ti komperensia, makita dagiti mensahe iti ChurchofJesusChrist.org, iti Gospel Library app, ken iti Liahona. Sikakararag nga adalentayo dagiti mensahe tapno masursuruan iti ad-adu pay maipapan ken ni Jesucristo ken ti ebangheliona.

Manipud kadagiti Nasantuan a Kasuratan

Insuro ni Jesucristo a nasken nga agtataripnongtayo a masansan (kitaen iti 3 Nephi 18:22).

No agdaydayaw a sangkamaysa dagiti miembro ti Simbaan, addanto ti Apo kadakuada (kitaen iti Mateo 18:20).

Binilin ti Apo dagiti miembro ti Simbaan nga “iwanwan ken itandudo[da] ti tunggal maysa” (Doktrina ken Katulagan 43:8).

No ipakita dagiti miembro ti Simbaan ti pammatida ken ni Cristo, kadkaduaento ida ti Espirituna bayat ti panagtataripnongda (kitaen iti Doktrina ken Katulagan 44:2).

© 2021 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Liahona Message, September 2021. Ilokano. 17473 864