ການສ້າງຕົວເຈົ້າໃນແບບທີ່ດີທີ່ສຸດ

ໂດຍ ເອຣິກ ບີ ເມີດ໊ອກ

ວາລະສານຂອງສາດສະໜາຈັກ

ຫ້າວິທີໃນການສ້າງຊີວິດທີ່ມີຄວາມສຸກ ແລະ ຄວາມຊົມຊື່ນຍິນດີ.

ຕອນທີ່ພຣະຜູ້ເປັນເຈົ້າສັ່ງໃຫ້ໂຈເຊັບ ສະມິດ ສ້າງພຣະວິຫານເຄີດແລນ, ພຣະອົງບໍ່ໄດ້ປ່ອຍໃຫ້ເພິ່ນຄິດຫາວິທີເຮັດເອງທັງໝົດ. ພຣະອົງໄດ້ເປີດເຜີຍແຜນການທີ່ຈະນຳໄປສູ່ຄວາມສຳເລັດ.

“ຈົ່ງສ້າງບ້ານຫລັງນັ້ນ, ບໍ່ແມ່ນຕາມວິທີຂອງໂລກ,” ພຣະຜູ້ເປັນເຈົ້າໄດ້ປະກາດ. “ຈົ່ງສ້າງມັນຕາມວິທີຊຶ່ງເຮົາຈະສະແດງ” (ຄຳສອນ ແລະ ພັນທະສັນຍາ 95:13–14). ແລ້ວພຣະຜູ້ເປັນເຈົ້າກໍໄດ້ປະທານຄຳແນະນຳເຖິງວິທີການສ້າງພຣະວິຫານ (ເບິ່ງ ຄຳສອນ ແລະ ພັນທະສັນຍາ 95:15–17).

ໂຊກດີທີ່ພຣະເຈົ້າສະແດງໃຫ້ເຮົາເຫັນຫລາຍກວ່າວິທີສ້າງພຣະວິຫານ. ພຣະອົງຍັງໄດ້ປະທານຄຳແນະນຳເພື່ອຊ່ວຍເຮົາໃຫ້ກາຍເປັນຄົນທີ່ດີທີ່ສຸດທີ່ເຮົາສາມາດເປັນໄດ້. ເມື່ອເຮົາເຮັດຕາມຄຳແນະນຳນັ້ນ, ເຮົາກໍຈະສ້າງຊີວິດຂອງເຮົາ “ບໍ່ແມ່ນຕາມວິທີຂອງໂລກ” ແຕ່ຕາມວິທີທີ່ພຣະຜູ້ເປັນເຈົ້າໄດ້ອອກແບບໄວ້.

ນີ້ແມ່ນຫ້າວິທີໃນການສ້າງຊີວິດທີ່ມີຄວາມສຸກ ແລະ ຄວາມຊົມຊື່ນຍິນດີ ໂດຍມີພຣະເຢຊູຄຣິດເປັນສູນກາງ.

ສ້າງຮາກຖານອັນແນ່ນອນ

ນັກສະຖາປະນິກ ຫລື ຄົນກໍ່ສ້າງທຸກຄົນຈະບອກເຈົ້າວ່າ ຮາກຖານທີ່ແຂງແກ່ນເປັນສິ່ງທີ່ສຳຄັນຕໍ່ຕຶກທຸກຫລັງ. ຮີລາມັນໄດ້ສິດສອນວ່າ ຮາກຖານທີ່ດີທີ່ສຸດສຳລັບຊີວິດຂອງເຮົາແມ່ນ “ດານຫີນຂອງພຣະຜູ້ໄຖ່ຂອງພວກເຮົາ, ຄືພຣະຄຣິດ, ພຣະບຸດຂອງພຣະເຈົ້າ” (ຮີລາມັນ 5:12). ເຮົາສາມາດເຮັດໃຫ້ພຣະຄຣິດເປັນຮາກຖານຂອງເຮົາ ໂດຍການມາຫາພຣະອົງ ແລະ ເຮັດຕາມຄຳສອນຂອງພຣະອົງ. ເຈົ້າຮູ້ສຶກແນວໃດໃນການເຮັດໃຫ້ພຣະຄຣິດເປັນຮາກຖານຂອງຊີວິດຂອງເຈົ້າ?

ຮັບໃຊ້ຄົນອື່ນ

ອີກວິທີໜຶ່ງທີ່ດີໃນການສ້າງຊີວິດຂອງເຮົາ, ອີງຕາມປະທານດີເດີ ແອັຟ ອຸກດອບ, ຄາວເພິ່ນເປັນທີ່ປຶກສາທີສອງໃນຝ່າຍປະທານສູງສຸດ ໄດ້ກ່າວວ່າ ຈະມາເຖິງເມື່ອ “ເຮົາຢືນຢູ່ຮັບໃຊ້ພຣະຜູ້ເປັນເຈົ້າ ແລະ ຮັບໃຊ້ຄົນທີ່ຢູ່ອ້ອມຂ້າງເຮົາ.”¹ ເມື່ອເຈົ້າຮັບໃຊ້ຄົນອື່ນ, ເຈົ້າກຳລັງເຮັດໃນສິ່ງທີ່ພຣະເຢຊູໄດ້ເຮັດ ແລະ ກຳລັງຮຽນຮູ້ ເພື່ອທີ່ຈະກາຍເປັນເໝືອນດັ່ງພຣະອົງຫລາຍຂຶ້ນ. ແລະ ເຈົ້າຈະບໍ່ພຽງແຕ່ເປັນພອນໃຫ້ແກ່ຊີວິດຂອງຜູ້ຄົນທີ່ເຈົ້າຮັບໃຊ້ເທົ່ານັ້ນ, ແຕ່ ເຈົ້າ ກໍຈະໄດ້ຮັບພອນເຊັ່ນກັນ.

ສ້າງກິດຈະວັດປະຈຳວັນໃນການອະທິຖານ ແລະ ການສຶກສາພຣະຄຳພີ

ອີກວິທີໜຶ່ງໃນການສ້າງຊີວິດທີ່ມີຄວາມສຸກ ແມ່ນການສ້າງຄວາມສຳພັນກັບພຣະບິດາເທິງສະຫວັນ ແລະ ພຣະເຢຊູຄຣິດ. ວິທີໜຶ່ງທີ່ດີໃນການເຮັດເຊັ່ນນັ້ນ ແມ່ນຜ່ານທາງການອະທິຖານ ແລະ ການສຶກສາພຣະຄຳພີ.

ປະທານອຸກດອບໄດ້ກ່າວໄວ້ວ່າ: “ເພື່ອທີ່ຈະເຮັດໃຫ້ຄວາມສຳພັນຂອງເຮົາກັບພຣະເຈົ້າເຂັ້ມແຂງຂຶ້ນ, ເຮົາຈຳເປັນຕ້ອງມີເວລາທີ່ມີຄວາມໝາຍກັບພຣະອົງຕາມລຳພັງ. ການເອົາໃຈໃສ່ຕໍ່ການອະທິຖານ ແລະ ການສຶກສາພຣະຄຳພີສ່ວນຕົວຢ່າງງຽບໆ… ຈະເປັນການໃຊ້ເວລາ ແລະ ຄວາມພະຍາຍາມຢ່າງສະຫລາດ ເພື່ອຈະເຂົ້າໃກ້ຊິດພຣະບິດາເທິງສະຫວັນຂອງເຮົາ.”²

ການອະທິຖານແມ່ນໂອກາດທີ່ຈະສື່ສານກັບພຣະບິດາຜູ້ສະຖິດໃນສະຫວັນຂອງເຮົາ. ພຣະອົງຮູ້ຈັກເຮົາ, ຮັກເຮົາ, ແລະ ຢາກໄດ້ຍິນຈາກເຮົາ! ເມື່ອເຮົາອະທິຖານຢ່າງຈິງໃຈ, ຖວາຍຂອບພຣະຄຸນ, ແລະ ຂໍໃນສິ່ງທີ່ເຮົາຕ້ອງການແລ້ວ, ພຣະອົງຈະຟັງ ແລະ ຈະຕອບຕາມວິທີ ແລະ ເວລາຂອງພຣະອົງເອງ.

ເມື່ອເວົ້າເຖິງການສຶກສາພຣະຄຳພີ, ມັນບໍ່ມີວິທີເຮັດວິທີດຽວທີ່ຖືກຕ້ອງ. ສິ່ງທີ່ສຳຄັນແມ່ນການທີ່ເຈົ້າລົງມືເຮັດ! ປະທານຣະໂຊ ເອັມ ແນວສັນ ໄດ້ສິດສອນວ່າ, “ການເຂົ້າຫາພຣະຄຳຂອງພຣະເຈົ້າທຸກວັນ ເປັນສິ່ງຈຳເປັນຕໍ່ການຢູ່ລອດທາງຈິດວິນຍານ.”³ ການໃຊ້ເວລາແຕ່ລະມື້ຢູ່ກັບພຣະຄຳພີຈະຊ່ວຍໃຫ້ເຈົ້າສ້າງຊີວິດແຫ່ງສັດທາ ແລະ ຄວາມເຂັ້ມແຂງ, ໂດຍທີ່ບໍ່ມີຂໍ້ສົງໄສ.

ອ້ອມຮອບຕົວເຈົ້າດ້ວຍຄົນທີ່ຊຸກຍູ້ໃຫ້ເຈົ້າເຮັດຄວາມດີ

ພຣະບິດາເທິງສະຫວັນປະສົງໃຫ້ເຮົາເຊື່ອມຕໍ່ ແລະ ສ້າງຄວາມສຳພັນກັບຄົນອື່ນ—ໂດຍສະເພາະກັບຄອບຄົວ ແລະ ໝູ່ເພື່ອນ. ເຮົາມັກຈະຖືກຫລໍ່ຫລອມໂດຍຄົນທີ່ເຮົາໃຊ້ເວລານຳ. ບໍ່ວ່າເຂົາເຈົ້າຈະເປັນສະມາຊິກຂອງສາດສະໜາຈັກຫລືບໍ່, ເຈົ້າຄວນອ້ອມຮອບຕົວເຈົ້າດ້ວຍຄົນທີ່ຈະຊ່ວຍໃຫ້ເຈົ້າດຳລົງຊີວິດໃນພຣະກິດຕິຄຸນ, ຮັກສາມາດຕະຖານຂອງພຣະຜູ້ເປັນເຈົ້າ, ແລະ ກາຍເປັນຄົນທີ່ດີກວ່າເກົ່າ. ເຈົ້າຍັງສາມາດຊ່ວຍຄົນທີ່ຢູ່ອ້ອມຂ້າງເຈົ້າໃຫ້ເຮັດຢ່າງດຽວກັນ. ໝູ່ຂອງເຈົ້າຄົນໃດທີ່ກຳລັງຊ່ວຍໃຫ້ເຈົ້າສ້າງຮາກຖານເທິງຄວາມຊອບທຳ?

ພົບຄວາມຊື່ນຊົມໃນການສ້າງຮາກຖານຂອງເຈົ້າ

ມີຫລາຍວິທີທີ່ເຈົ້າສາມາດສ້າງຊີວິດຂອງເຈົ້າໃຫ້ເຂັ້ມແຂງຂຶ້ນທາງວິນຍານ ແລະ ມີຄວາມຊື່ນຊົມ, ລວມທັງການໄປໂບດ ແລະ ການຮັບສ່ວນສິນລະລຶກ, ການເຮັດ ແລະ ການຮັກສາພັນທະສັນຍາ, ແລະ ການເຮັດຕາມການຊີ້ນຳຂອງສາດສະດາທີ່ມີຊີວິດຢູ່.

ມັນສຳຄັນທີ່ຈະຈື່ຈຳໄວ້ວ່າ ທຸກສິ່ງເຫລົ່ານີ້ໃຊ້ຄວາມພະຍາຍາມ ແລະ ເວລາ. ຈະມີການສ້າງ ແລະ ການຮຽນຮູ້ໃຫ້ເຮັດຢູ່ສະເໝີ, ແຕ່ເຈົ້າບໍ່ຈຳເປັນຕ້ອງເຮັດຄົນດຽວ. ພຣະຜູ້ເປັນເຈົ້າຈະຊ່ວຍເຈົ້າໃນແຕ່ລະມື້ ຂະນະທີ່ເຈົ້າພະຍາຍາມສຸດຄວາມສາມາດຂອງເຈົ້າ ເພື່ອທີ່ຈະສ້າງຊີວິດທີ່ເຈົ້າ ແລະ ພຣະອົງພູມໃຈ ແລະ ນຳຄວາມຊື່ນຊົມມາໃຫ້ເຈົ້າ.

© 2021 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly For the Strength of Youth Message, September 2021. Laotian. 17473 331