“General Conference: A Worldwide Church Meeting,” Liahona, September 2021
ຂ່າວສານປະຈຳເດືອນ Liahona, ເດືອນກັນຍາ 2021
ກອງປະຊຸມໃຫຍ່ສາມັນ: ການປະຊຸມສາດສະໜາຈັກທົ່ວໂລກ
ເຮົາຟັງບັນດາສາດສະດາ ແລະ ຜູ້ນໍາຂອງສາດສະໜາຈັກຄົນອື່ນໆໃນລະຫວ່າງກອງປະຊຸມໃຫຍ່ສາມັນ. ພວກເພິ່ນສິດສອນເຮົາເຖິງສິ່ງທີ່ພຣະເຈົ້າຢາກໃຫ້ເຮົາໄດ້ຍິນ.
ທຸກໆເດືອນເມສາ ແລະ ເດືອນຕຸລາ, ສາດສະໜາຈັກຈະຈັດຊຸດກອງປະຊຸມທີ່ເອີ້ນວ່າ ກອງປະຊຸມໃຫຍ່ສາມັນ. ບັນດາຜູ້ນຳຈະສິດສອນ ແລະ ເປັນພະຍານກ່ຽວກັບພຣະເຢຊູຄຣິດ ແລະ ພຣະກິດຕິຄຸນຂອງພຣະອົງ. ກອງປະຊຸມໃຫຍ່ສາມັນໄດ້ຖືກຈັດຂຶ້ນໃນເມືອງເຊົາເລັກ, ລັດຢູທາ, ສະຫະລັດອາເມຣິກາ, ແລະ ໄດ້ຖືກຖ່າຍທອດສົດໄປທັງທົ່ວໂລກຫລາຍກວ່າ 80 ພາສາ. ສະມາຊິກທຸກຄົນ ແລະ ຄົນໃດກໍຕາມທີ່ສົນໃຈ ໄດ້ຖືກເຊື້ອເຊີນໃຫ້ຮັບຟັງການປາໄສ.
ກອງປະຊຸມໃຫຍ່ຄັ້ງທຳອິດຂອງສາດສະໜາຈັກ
ສາດສະໜາຈັກໄດ້ຖືກຈັດຕັ້ງຂຶ້ນຢ່າງເປັນທາງການໃນລະຫວ່າງກອງປະຊຸມໃນວັນທີ 6 ເດືອນເມສາ, 1830 (ເບິ່ງ ຄຳສອນ ແລະ ພັນທະສັນຍາ 20). ກອງປະຊຸມໃຫຍ່ສາມັນຄັ້ງທຳອິດໄດ້ຖືກຈັດຂຶ້ນໃນວັນທີ 9 ເດືອນມິຖຸນາ, 1830. ຕັ້ງແຕ່ນັ້ນມາ, ກອງປະຊຸມໃຫຍ່ສາມັນໄດ້ຖືກຈັດຂຶ້ນພາຍໃຕ້ການຊີ້ນຳຂອງປະທານສາດສະໜາຈັກ ໃນບ່ອນໃດກໍຕາມທີ່ສະມາຊິກສາມາດເຕົ້າໂຮມກັນໄດ້. ໃນຊ່ວງຊຸມປີ 1840, ບັນດາຜູ້ນຳໄດ້ເລີ່ມຈັດກອງປະຊຸມໃຫຍ່ປີໜຶ່ງສອງເທື່ອ.
ວິທີທີ່ກອງປະຊຸມໃຫຍ່ຖືກຈັດຕັ້ງຂຶ້ນໃນທຸກວັນນີ້
ຝ່າຍປະທານສູງສຸດ, ກຸ່ມອັກຄະສາວົກສິບສອງ, ແລະ ບັນດາຜູ້ນຳຂອງສາດສະໜາຈັກຂຶ້ນກ່າວປາໄສໃນລະຫວ່າງກອງປະຊຸມໃຫຍ່ສາມັນ. ກຸ່ມນັກຮ້ອງແທເບີແນໂກ ທີ່ບໍລິເວນພຣະວິຫານ ແລະ ກຸ່ມນັກຮ້ອງອື່ນໆຂອງສາດສະໜາຈັກຈັດກຽມດົນຕີ. ກອງປະຊຸມແຕ່ລະຄັ້ງມີຫ້າພາກດ້ວຍກັນຄື: ສາມພາກໃນວັນເສົາ ແລະ ສອງພາກໃນວັນອາທິດ. ໃນເດືອນເມສາ, ພາກທີສາມຂອງວັນເສົາແມ່ນສຳລັບສະມາຊິກຂອງກຸ່ມຖານະປະໂລຫິດແຫ່ງອາໂຣນ ແລະ ເມນຄີເສເດັກ. ໃນເດືອນຕຸລາ, ແມ່ນສຳລັບສະມາຊິກຂອງສະມາຄົມສະຕີສົງເຄາະ ແລະ ອົງການຍິງໜຸ່ມ.
ຄຳສອນຂອງບັນດາຜູ້ນຳ
ໃນຫລາຍເດືອນກ່ອນກອງປະຊຸມໃຫຍ່, ບັນດາຜູ້ນຳຂອງສາດສະໜາຈັກຈະອະທິຖານວ່າຈະສິດສອນກ່ຽວກັບຫຍັງ. ພຣະຜູ້ເປັນເຈົ້າດົນໃຈພວກເພິ່ນໃຫ້ຮູ້ວ່າພວກເພິ່ນຄວນເວົ້າຫຍັງ. ພວກເພິ່ນສິດສອນຄວາມຈິງແຫ່ງພຣະກິດຕິຄຸນ ແລະ ເຊື້ອເຊີນເຮົາໃຫ້ຮັກສາພຣະບັນຍັດຂອງພຣະເຈົ້າ. ພວກເພິ່ນຍັງເປັນພະຍານເຖິງພຣະເຢຊູຄຣິດ ແລະ ຊຸກຍູ້ໃຫ້ເຮົາຕິດຕາມພຣະອົງນຳອີກ.
ການຮຽນຮູ້ຈາກກອງປະຊຸມໃຫຍ່
ກ່ອນກອງປະຊຸມໃຫຍ່ສາມັນ, ເຮົາສາມາດອະທິຖານເພື່ອຈະໄດ້ຍິນສິ່ງທີ່ພຣະຜູ້ເປັນເຈົ້າຢາກໃຫ້ເຮົາຮຽນຮູ້. ໃນຂະນະທີ່ເຮົາຟັງຄຳປາໄສ, ພຣະວິນຍານຈະສິດສອນເຮົາເຖິງສິ່ງທີ່ເຮົາຢາກຮູ້. ຫລັງກອງປະຊຸມໃຫຍ່, ຄຳປາໄສຕ່າງໆຈະປະກົດຢູ່ທີ່ ChurchofJesusChrist.org, ໃນແອັບຫ້ອງສະໝຸດພຣະກິດຕິຄຸນ, ແລະ ໃນ Liahona. ພວກເຮົາສາມາດສຶກສາຄຳປາໄສຕ່າງໆດ້ວຍການອະທິຖານ ເພື່ອຮຽນຮູ້ຕື່ມອີກກ່ຽວກັບພຣະເຢຊູຄຣິດ ແລະ ພຣະກິດຕິຄຸນຂອງພຣະອົງ.
ຈາກພຣະຄຳພີ
ພຣະເຢຊູຄຣິດໄດ້ສິດສອນວ່າ ພວກເຮົາຕ້ອງຊຸມນຸມກັນຢູ່ເລື້ອຍໆ (ເບິ່ງ 3 ນີໄຟ 18:22).
ເມື່ອສະມາຊິກຂອງສາດສະໜາຈັກນະມັດສະການນຳກັນ, ພຣະຜູ້ເປັນເຈົ້າຈະຢູ່ນຳພວກເຂົາ (ເບິ່ງ ມັດທາຍ 18:20).
ພຣະຜູ້ເປັນເຈົ້າໄດ້ບັນຊາສະມາຊິກຂອງສາດສະໜາຈັກໃຫ້ “ແນະນຳ ແລະ ສິດສອນກັນ” (ຄຳສອນ ແລະ ພັນທະສັນຍາ 43:8).
ເມື່ອສະມາຊິກຂອງສາດສະໜາຈັກສະແດງສັດທາໃນພຣະຄຣິດ, ພຣະວິນຍານຂອງພຣະອົງຈະຢູ່ນຳພວກເຂົາໃນຂະນະທີ່ພວກເຂົາຊຸມນຸມກັນ (ເບິ່ງ ຄຳສອນ ແລະ ພັນທະສັນຍາ 44:2).
© 2021 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly Liahona Message, September 2021. Laotian. 17473 331