“Temple Work,” Liahona, October 2021
ຂ່າວສານປະຈຳເດືອນ Liahona, ເດືອນຕຸລາ 2021
ວຽກງານພຣະວິຫານ
ພຣະວິຫານແມ່ນບ້ານຂອງພຣະຜູ້ເປັນເຈົ້າ. ເຮົາສາມາດຮັບພິທີການຕ່າງໆ ແລະ ເຮັດພັນທະສັນຍາກັບພຣະອົງໃນພຣະວິຫານ. ເຮົາຍັງສາມາດເຮັດພິທີການຕ່າງໆໃນພຣະວິຫານ ເພື່ອບັນພະບຸລຸດຂອງເຮົານຳອີກ.
ຕະຫລອດທົ່ວປະຫວັດສາດ, ພຣະຜູ້ເປັນເຈົ້າໄດ້ບັນຊາຜູ້ຄົນຂອງພຣະອົງໃຫ້ສ້າງພຣະວິຫານ. ພຣະວິຫານແມ່ນສະຖານທີ່ ທີ່ສັກສິດ ບ່ອນທີ່ເຮົາສາມາດຮູ້ສຶກເຖິງຄວາມຮັກຂອງພຣະເຈົ້າ, ຮັບພິທີການ, ແລະ ເຮັດຄຳສັນຍາກັບພຣະອົງ. ສາດສະໜາຈັກກຳລັງສ້າງພຣະວິຫານທົ່ວໂລກ ເພື່ອວ່າຫລາຍໆຄົນຈະສາມາດຮັບພອນເຫລົ່ານີ້ໄດ້.
ຮູບຜູ້ຍິງຢູ່ໜ້າພຣະວິຫານໂອເກີມາວເທນ ຢູທາ ໂດຍ ເນເຊໂອ ແລະ ແມັດທິວ ຣີເອີ
ຂອງປະທານສັກສິດ
ສະມາຊິກຂອງສາດສະໜາຈັກທີ່ກຳລັງດໍາລົງຊີວິດຢ່າງຊອບທໍາ ໄປພຣະວິຫານເພື່ອຮັບພິທີການ ແລະ ເຮັດພັນທະສັນຍາ, ຫລື ຄຳສັນຍາ, ກັບພຣະເຈົ້າ. ພິທີການໜຶ່ງທີ່ເຮົາຮັບໃນພຣະວິຫານແມ່ນຂອງປະທານສັກສິດ. ຄຳວ່າ ຂອງປະທານສັກສິດ ໝາຍເຖິງ “ຂອງຂວັນ.” ຂອງປະທານສັກສິດຂອງພຣະວິຫານແມ່ນຂອງຂວັນຈາກພຣະເຈົ້າ. ໃນພິທີການນີ້ ເຮົາຮຽນຮູ້ກ່ຽວກັບແຜນຂອງພຣະບິດາເທິງສະຫວັນເພື່ອຄວາມລອດຂອງເຮົາ, ແລະ ເຮົາເຮັດພັນທະສັນຍາວ່າຈະຮັກສາພຣະບັນຍັດຂອງພຣະເຈົ້າ. ຖ້າເຮົາຊື່ສັດຕໍ່ພັນທະສັນຍາທີ່ເຮົາໄດ້ເຮັດໄວ້, ພຣະເຈົ້າຈະອວຍພອນເຮົາ.
ຮູບຄູ່ຮັກກຳລັງຍ່າງຜ່ານພຣະວິຫານມານິລາ ຟີລິບປິນ ໂດຍ ຄຣິສຕີນາ ສະມິດ
ການຜະນຶກຄອບຄົວເຂົ້າກັນ
ການແຕ່ງງານໃນພຣະວິຫານກໍຖືກເອີ້ນວ່າ ການຜະນຶກ. ເມື່ອຄູ່ຮັກໄດ້ຮັບການຜະນຶກໃນພຣະວິຫານ ແລະ ຮັກສາພັນທະສັນຍາຂອງເຂົາເຈົ້າ, ເຂົາເຈົ້າຈະແຕ່ງງານກັນຕະຫລອດໄປ. ຖ້າເຂົາເຈົ້າມີລູກ, ລູກໆຂອງເຂົາເຈົ້າກໍຈະຖືກຜະນຶກເຂົ້າກັບເຂົາເຈົ້າເຊັ່ນກັນ. ພໍ່ແມ່ທີ່ໄດ້ຮັບການຜະນຶກຫລັງຈາກທີ່ມີລູກແລ້ວ ກໍສາມາດໃຫ້ລູກໆຂອງເຂົາເຈົ້າຜະນຶກເຂົ້າກັບເຂົາເຈົ້າໄດ້. ຖ້າເຂົາເຈົ້າດໍາລົງຊີວິດຢ່າງຊອບທຳ, ເຂົາເຈົ້າຈະເປັນຄອບຄົວດຽວກັນຕະຫລອດຊົ່ວນິລັນດອນ.
ຮູບອ່າງບັບຕິສະມາໃນພຣະວິຫານລິສບອນ ປອກຕຸຍການ ໂດຍ ເລສລີ ນິວສັນ
ວຽກງານພຣະວິຫານສຳລັບລູກໆທັງໝົດຂອງພຣະເຈົ້າ
ເຮົາເຮັດວຽກງານປະຫວັດຄອບຄົວເພື່ອຈະໄດ້ຮູ້ຈັກກ່ຽວກັບບັນພະບຸລຸດຂອງເຮົາ. ແລ້ວເຮົາກໍເຮັດວຽກງານພຣະວິຫານແທນເຂົາເຈົ້າ. ເຮົາເຮັດພິທີການທັງໝົດເພື່ອເຂົາເຈົ້າ ຊຶ່ງຜູ້ທີ່ມີຊີວິດຢູ່ຈຳເປັນຕ້ອງເຮັດເຊັ່ນ: ການບັບຕິສະມາ, ການຢືນຢັນ, ການຮັບຖານະປະໂລຫິດ (ສຳລັບຜູ້ຊາຍ), ການຮັບຂອງປະທານສັກສິດ, ແລະ ການຜະນຶກ. ແລ້ວເຂົາເຈົ້າສາມາດເລືອກໄດ້ວ່າ ເຂົາເຈົ້າຢາກຍອມຮັບເອົາພິທີການເຫລົ່ານີ້ຫລືບໍ່. ໂດຍວິທີນີ້, ລູກໆຂອງພຣະເຈົ້າທັງໝົດຈະສາມາດຊື່ນຊົມກັບພອນຂອງພຣະກິດຕິຄຸນ.
ຮູບຄອບຄົວຢູ່ໜ້າພຣະວິຫານຟິລາແດວເຟຍ ເພັນໂຊເວເນຍ ໂດຍ ໂຄດີ ແບວ
ພອນຂອງວຽກງານພຣະວິຫານ
ຖ້າເຮົາຮັກສາພັນທະສັນຍາທີ່ເຮົາເຮັດໃນພຣະວິຫານ, ເຮົາຈະໄດ້ຮັບພອນ, ຮັບການປົກປ້ອງ, ແລະ ຮັບຄວາມເຂັ້ມແຂງ. ເຮົາຈະມີອຳນາດຂອງຖານະປະໂລຫິດຢູ່ກັບເຮົາ. ຄອບຄົວຂອງເຮົາຈະຢູ່ນຳກັນຕະຫລອດໄປ.
ພຣະວິຫານເປັນສະຖານທີ່ແຫ່ງຄວາມສະຫງົບ ແລະ ການເປີດເຜີຍເຊັ່ນກັນ. ເມື່ອເຮົາເຮັດວຽກງານພຣະວິຫານ, ເຮົາຈະສາມາດຮັບການນໍາພາທາງວິນຍານ ແລະ ຮູ້ສຶກເຖິງຄວາມຮັກຂອງພຣະເຈົ້າໄດ້.
© 2021 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly Liahona Message, October 2021. Laotian. 17474 331