Mga importanting panghitabo gikan sa ika-191 nga Matag Tunga sa Tuig nga Kinatibuk-ang Komperensiya

Kita mausab kon atong gamiton ang mga kamatuoran sa ebanghelyo nga atong makat-onan. Si Presidente Russell M. Nelson mipaambit og yano apan makahuloganon nga mensahe sa pagbukas ug pagtapos sa kinatibuk-ang komperensiya.

“Ang putli nga doktrina ni Kristo gamhanan,” iyang gisulti atol sa iyang pangbukas nga pakigpulong. “Kini makapausab sa kinabuhi sa tanan kinsa makasabot niini ug magtinguha sa paggamit niini sa iyang kinabuhi.” Pagkasunod adlaw, sa iyang panapos nga pakigpulong, siya miingon: “Natudloan kita pag-ayo. … Karon ang pangutana mao, unsaon nato pagkahimong lahi tungod sa unsay atong nadunggan ug gibati?”

Pipila sa daghang importante nga mga leksiyon nga gitudlo atol niini nga kinatibuk-ang komperensiya:

• Atong nakat-onan nga panahon na sa pag-implementar sa dili ordinaryo nga mga paagi sa pagpalig-on sa atong personal nga espirituwal nga mga pundasyon (tan-awa sa Presidente Nelson sa pahina 93).

• Atong nakat-onan ang mahitungod sa kaimportante sa pagkadisipulo ingon man sa pagkayano niini (tan-awa sa Presidente M. Russell Ballard sa pahina 51, Elder Dieter F. Uchtdorf sa pahina 77, ug Elder Gary E. Stevenson sa pahina 47).

• Atong nakat-onan nganong magkinahanglan kita sa Simbahan ug nga kita makahimo og daghan sa pagpanalangin sa uban kon kita magtambayayong (tan-awa sa Presidente Dallin H. Oaks sa pahina 24, Bishop L. Todd Budge sa pahina 100, Bonnie H. Cordon sa pahina 10, ug Sharon Eubank sa pahina 53).

• Atong nakat-onan nga ang mahigugmaong Dios makatabang nato sa pagbuntog sa mga pagkabahin nga makapugong nato nga magkahiusa (tan-awa sa Elder Jeffrey R. Holland sa pahina 8, Elder D. Todd Christofferson sa pahina 16, ug Elder Dale G. Renlund sa pahina 83).

• Atong nakat-onan nga kita makadapit og pagpadayag sa atong kinabuhi pinaagi sa pagtugyan ngadto sa kabubut-on sa Ginoo ug nga ang pagbaton ug pagsukna og mga pangutana diin kita walay mga tubag madawat ra (tan-awa sa Presidente Henry B. Eyring sa pahina 74, Camille N. Johnson sa pahina 80, ug Susan H. Porter sa pahina 33).

Unsay inyong nadunggan? Unsay inyong gibati? Unsaon ninyo sa paggamit diha sa inyong kinabuhi ang putli nga kamatuoran, putli nga doktrina, ug putli nga pagpadayag nga inyong makit-an samtang magpadayon kamo sa pagtuon sa mga mensahe sa kinatibuk-ang komperensiya?