Usa ka Tibuok Kalibotan nga Impluwensya alang sa Kaayo
Samtang ang mga propeta ug mga apostol mopadayon sa ilang pangalagad, ang ilang impluwensya sa kaayohan makapanalangin og daghang kinabuhi ug makapalambo og usa ka tibuok kalibotan nga diwa sa pagserbisyo, kooperasyon, ug paglaom. Ania ang pipila ka importanting panghitabo niana nga pangalagad atol sa milabay nga unom ka bulan.
Atol sa Tokyo Summer Olympics, si Presidente Russell M. Nelson mibutang sa social media mahitungod sa panginahanglan sa pagwagtang sa panagbingkil ug mahitungod sa bili sa panaghigalaay, pagtahod, ug kooperasyon.
Si Elder Jeffrey R. Holland sa Korum sa Napulog Duha ka Apostoles miapil sa tibuok kalibotan nga komperensiya sa video nga naggikan sa Windsor, England. Ang mga mamumulong sa komperensiya naghisgot sa kahimsog sa hunahuna ug emosyonal sa minilyon ka tawo sa mga kampo sa refugee. Si Elder Holland nanawagan og suporta sa pagtugot sa mga refugee sa pagpahayag “sa relihiyoso nga pagtuo nga maghatag nila sa ilang pagkatawo.” Si Sister Sharon Eubank, Unang Magtatambag sa Kinatibuk-ang Kapangulohan sa Relief Society ug presidente sa Latter-day Saint Charities, miapil usab sa komperensiya.
Si Elder Quentin L. Cook sa Korum sa Napulog Duha ka Apostoles namulong sa usa ka konseho sa kooperasyon sa tanang relihiyon nga gihino sa Notre Dame University sa Indiana, USA. Si Elder Cook mihagit sa nanambong sa miting sa “pagbarog isip ehemplo sa pagtuo ug panaghiusa sa usa ka kalibotan nga sa kasagaran wala maghatag og bili sa duha.”
Si Elder Ronald A. Rasband sa Korum sa Napulog Duha ka Apostoles namulong sa G20 Interfaith Forum nga gihimo didto sa Bologna, Italy. (Ang G20 nga mga nasod mao ang 20 ka labing dagko nga mga ekonomiya sa kalibotan.) “Kon ang relihiyon hatagan og kagawasan nga molambo, ang mga tumutuo bisan asa makahimo og yano ug usahay bayanihon nga mga buhat sa pagserbisyo,” miingon si Elder Rasband. Sa sama nga porum, si Sister Eubank namulong mahitungod sa mga epekto sa kagutom ug dili sakto sa pagkaon tungod sa kakabos sa bata pa. “Ang kausaban mahimo lamang … matuman pinaagi sa personal nga mga relasyon sa pagsalig,” miingon siya.
Human sa linog nga miguba sa Haiti, si Elder Ulisses Soares sa Korum sa Napulog Duha ka Apostoles namulong sa usa ka debosyonal nga sibya ngadto sa mga miyembro nga French ang pinulongan sa Caribbean, nagpahinumdom nila nga ang “hugot nga pagtuo makapakita sa gahom sa Dios sa atong mga kinabuhi.” Si Sister Reyna I. Aburto, Ikaduhang Magtatambag sa Kinatibuk-ang Kapangulohan sa Relief Society, miapil sa debosyonal ug sa virtual nga paagi namulong usab ngadto sa mga miyembro diha sa mga miting sa pagpangulo ug mga komperensiya sa stake. “Kita makabarog nga dili matarog,” miingon siya, “bisan kon ang mga hangin moabot ug ang yuta mouyog sa atong palibot.” Si Elder Soares namulong usab sa usa ka debosyonal nga sibya alang sa kabatan-onan didto sa Caribbean, nagpahinumdom nila nga “kita nagkinahanglan sa impluwensya sa Espiritu Santo sa atong mga kinabuhi.”