“Covenants Connect Us with God,” Liahona, February 2022
ຂ່າວສານປະຈຳເດືອນ Liahona, ເດືອນກຸມພາ 2022
ພັນທະສັນຍາເຊື່ອມຕໍ່ເຮົາເຂົ້າກັບພຣະເຈົ້າ
ການເຮັດ ແລະ ຮັກສາພັນທະສັນຍານຳພອນມາໃຫ້.
ພັນທະສັນຍາແມ່ນຄຳສັນຍາລະຫວ່າງພຣະບິດາເທິງສະຫວັນກັບລູກໆຂອງພຣະອົງ. ພຣະອົງກຳນົດເງື່ອນໄຂຕ່າງໆສຳລັບພັນທະສັນຍາທີ່ເຮົາເຮັດກັບພຣະອົງ. ເມື່ອເຮົາເຮັດຕາມສິ່ງທີ່ພຣະອົງຂໍ, ເຮົາຈະໄດ້ຮັບພອນຫລາຍຢ່າງ. ແລະ ເຮົາບໍ່ພຽງແຕ່ໄດ້ຮັບພອນເທິງແຜ່ນດິນໂລກ—ເມື່ອເຮົາເຮັດ ແລະ ຮັກສາພັນທະສັນຍາ, ເຮົາຈະໄດ້ກັບໄປຢູ່ກັບພຣະເຈົ້າ ແລະ ຄອບຄົວຂອງເຮົາໃນສະຫວັນຈັກມື້ໜຶ່ງ.
ພັນທະສັນຍາ ແລະ ພິທີການ
ເຮົາເຮັດພັນທະສັນຍາໃນລະຫວ່າງພິທີການໃດໜຶ່ງໂດຍສະເພາະ. ເຮົາຈຳຕ້ອງໄດ້ຮັບພິທີການເຫລົ່ານັ້ນ ແລະ ເຊື່ອຟັງພັນທະສັນຍາເຫລົ່ານັ້ນເພື່ອຈະໄດ້ກັບໄປຢູ່ກັບພຣະເຈົ້າ. ພິທີການຕ່າງໆຖືກປະຕິບັດໂດຍສິດອຳນາດຂອງຖານະປະໂລຫິດ. ພິທີການເຫລົ່ານັ້ນ ແມ່ນລວມທັງການບັບຕິສະມາ ແລະ ການຢືນຢັນ, ການຮັບຖານະປະໂລຫິດແຫ່ງເມນຄີເສເດັກ (ສຳລັບຜູ້ຊາຍ), ແລະ ພິທີການຕ່າງໆທີ່ເຮົາໄດ້ຮັບໃນພຣະວິຫານ. ໃນລະຫວ່າງພິທີສິນລະລຶກ, ສະມາຊິກຂອງສາດສະໜາຈັກໄດ້ຕໍ່ຄຳສັນຍາທີ່ເຂົາເຈົ້າໄດ້ເຮັດກັບພຣະເຈົ້າ (ເບິ່ງ ຄຳສອນ ແລະ ພັນທະສັນຍາ 20:77, 79).
ພັນທະສັນຍາຊ່ວຍໃຫ້ເຮົາດຳລົງຊີວິດຢ່າງຊອບທຳ
ໃນລະຫວ່າງພິທີບັບຕິສະມາ, ເຮົາສັນຍາວ່າຈະຕິດຕາມພຣະເຢຊູຄຣິດ, ລະນຶກເຖິງພຣະອົງຕະຫລອດເວລາ, ແລະ ຮັກສາພຣະບັນຍັດ (ເບິ່ງ ຄຳສອນ ແລະ ພັນທະສັນຍາ 20:37). ພຣະເຈົ້າສັນຍາວ່າພຣະວິນຍານບໍລິສຸດຈະມາສະຖິດຢູ່ນຳເຮົາຕະຫລອດເວລາ.
ເມື່ອຜູ້ຊາຍໄດ້ຮັບຖານະປະໂລຫິດ, ເຂົາເຈົ້າສັນຍາວ່າຈະດຳລົງຊີວິດຢ່າງມີຄ່າຄວນຕໍ່ອຳນາດຖານະປະໂລຫິດຂອງພຣະເຈົ້າ. ພຣະເຈົ້າສັນຍາວ່າຈະໃຫ້ພອນແກ່ເຂົາເຈົ້າ. (ເບິ່ງ ຄຳສອນ ແລະ ພັນທະສັນຍາ 84:33–40.)
ພາບປະກອບຂອງພຣະວິຫານ ບຣາຊິນ ເຣຊີເຟ ໂດຍ ເຈມສ໌ ພອດເຕີ
ພັນທະສັນຍາທີ່ເຮົາເຮັດຢູ່ໃນພຣະວິຫານ
ເມື່ອສະມາຊິກຂອງສາດສະໜາຈັກໄດ້ຮັບຂອງປະທານສັກສິດໃນພຣະວິຫານ, ເຂົາເຈົ້າສັນຍາວ່າຈະດຳລົງຊີວິດຢ່າງຊອບທຳ ແລະ ເສຍສະລະເພື່ອພຣະກິດຕິຄຸນ. ເຂົາເຈົ້າໄດ້ຮັບຄຳສັນຍາວ່າ ຈະໄດ້ຮັບອຳນາດຈາກພຣະເຈົ້າ (ເບິ່ງ ຄຳສອນ ແລະ ພັນທະສັນຍາ 38:32; 109:22).
ໃນລະຫວ່າງການຜະນຶກໃນພຣະວິຫານ, ສາມີ ແລະ ພັນລະຍາໄດ້ແຕ່ງງານຊົ່ວນິລັນດອນ ແລະ ສັນຍາວ່າຈະຊື່ສັດຕໍ່ກັນ ແລະ ຕໍ່ພຣະເຈົ້າ. ພຣະເຈົ້າສັນຍາວ່າເຂົາເຈົ້າຈະສາມາດກັບໄປຫາພຣະອົງ ແລະ ຢູ່ນຳກັນເປັນຄອບຄົວຕະຫລອດໄປ. (ເບິ່ງ ຄຳສອນ ແລະ ພັນທະສັນຍາ 132:19–20.)
ພວກເຮົາແມ່ນຜູ້ຄົນແຫ່ງພັນທະສັນຍາ
ຜູ້ທີ່ເຂົ້າຮ່ວມສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍກາຍເປັນຜູ້ຄົນແຫ່ງພັນທະສັນຍາຂອງພຣະເຈົ້າ. ເຂົາເຈົ້າຍັງສືບທອດພອນ ແລະ ໜ້າທີ່ຮັບຜິດຊອບຕ່າງໆແຫ່ງພັນທະສັນຍາຂອງອັບຣາຮາມນຳອີກ (ເບິ່ງ ຄາລາເຕຍ 3:27–29). ການເປັນພາກສ່ວນໃນຜູ້ຄົນແຫ່ງພັນທະສັນຍາຂອງພຣະເຈົ້າໝາຍຄວາມວ່າ ເຮົາຊ່ວຍເຫລືອຊຶ່ງກັນແລະກັນຂະນະທີ່ເຮົາເຂົ້າໃກ້ພຣະຄຣິດຫລາຍຂຶ້ນ. ມັນຍັງມີຄວາມໝາຍຕື່ມອີກວ່າ ເຮົາເຮັດວຽກເພື່ອເສີມສ້າງສາດສະໜາຈັກຂອງພຣະເຈົ້າເທິງແຜ່ນດິນໂລກ. ເມື່ອເຮົາຮັກສາພັນທະສັນຍາຂອງເຮົາ, ເຮົາສາມາດເຫັນອຳນາດ ແລະ ຄວາມເຂັ້ມແຂງຈາກພຣະເຈົ້າ.
© 2022 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly Liahona Message, February 2022. Laotian. 18313 331