Parau poro’i tā’āva’e nō te Liahona, ’Ēperēra 2022

Te ’ōro’a mo’a : E tumu nō te ha’amana’o i te Fa’aora

The Last Supper [Te Tāmā’ara’a Hope’a], nā Simon Dewey

I te pō nā mua a’e i tōna fa’asataurora’ahia, ’ua fārerei Iesu Mesia i tāna mau ’āpōsetolo i te tāmā’ara’a hope’a. I reira, hōro’a atu ra ia rātou i te ’ōro’a mo’a nō te taime mātāmua. ’Ua fa’ata’a ’oia ē, e tumu te reira e ha’amana’o ai rātou iāna. Te ’ōro’a mo’a, e ’ōro’a te reira e rave ai tātou i te pāne ’e te pape nō te ha’amana’o i tā te Mesia tāra’ehara. E fa’ahōho’ara’a te pāne nō te tino o te Mesia, ’e e fa’ahōho’ara’a te pape nō tōna toto.

E rave tātou i te ’ōro’a mo’a i te mau sābati ato’a i roto i te purera’a ’ōro’a. E hīmene tātou i te hō’ē hīmene ’a vāvahihia ai e te feiā tei mau i te autahu’ara’a te pāne.

E fa’ahitihia te mau pure ta’a ’ē e te feiā tei mau i te autahu’ara’a ’o tei vāvāhi i te pāne. Tei roto teie mau pure i Te Ha’api’ira’a Tumu ’e te mau Fafaura’a 20:77, 79. E fa’aha’amana’o mai te mau pure ia tātou i te mea tā tātou i fafau i tō tātou Metua i te Ao ra ’e i te mea tāna i fafau mai ia tātou.

E ’ōpere te tahi atu tei mau i te autahu’ara’a i te ’ōro’a nā te mau melo nō te pāroita ’aore rā nō te ’āma’a. ’A rave ai tātou i te ’ōro’a mo’a, e ha’amana’o tātou i te Fa’aora ’e i tāna tusia nō tātou. E fa’a’apī ato’a tātou i tā tātou fa’aaura’a ’ia ha’apa’o i te mau fafaura’a (te mau ’euhe) tā tātou i rave i mua i tō tātou Metua i te Ao ra.

E fa’atura tātou ’a ha’amaita’i ’e ’a ’ōperehia ai te ’ōro’a mo’a. E taime teie nō tātou nō te feruri i te orara’a o Iesu Mesia, i te mau ha’api’ira’a ’e i tāna tāra’ehara. E nehenehe ato’a tātou e feruri nāhea tātou ’ia pe’e i tōna hi’ora’a.

Te mau parau e tano ’ia ’ite

Te ’ōro’a : o te hō’ē ïa ’ohipa mo’a e ravehia nā roto i te tura o te autahu’ara’a.

Te feiā tei mau i te autahu’ara’a : Te mau tāne ’e te feiā ’āpī tamāroa ti’a mā tei fāri’i i te ha’amanara’a nō te ha’a nā ni’a i te i’oa o Iesu Mesia.

Te tāra’ehara a Iesu Mesia : Tōna mamae nō tā tātou mau hara, te pohe i ni’a i te sātauro ’e te ti’afa’ahoura’a ’o te fa’atupu i tō tātou ho’i fa’ahoura’a e ora i pīha’i iho i te Atua.

HHa’api’i rahi atu ā

Mai te mea e uira’a tā ’outou nō ni’a i te ’ōro’a mo’a, e nehenehe ’outou e paraparau i tō ’outou mau taea’e ’aore rā mau tuahine aupuru, i tō ’outou feiā fa’atere pāroita, ’aore rā ’āma’a, ’aore rā i te mau misiōnare.

© 2022 nā Intellectual Reserve, Inc. Fatura’a pāruruhia. Nene’ihia i te Fenua Marite. Parau fa’ati’a nō te reo peretāne : 6/19. Parau fa’ati’a nō te ’īritira’a : 6/19. ’Īritira’a nō Monthly Liahona Message, April 2022. Tahiti. 17467 895