Parau poro’i tā’āva’e Nō te Pūai o te Feiā ’Āpī, ’Ēperēra 2022

Te Fa’aora mamae

E rave rahi hānere matahiti hou Iesu Mesia a haere mai ai, ’ua ’ite ātea ’o Isaia i tōna mamae nō tā tātou mau hara.

Isaïa 53:3–5

3 I vahavahahia’oia,’e ’aore i ha’apa’ohia ’ei ta’ata ; e ta’ata mātaro i te ’oto, ’e ’ua ’ite ho’i i te mihi, mai te ta’ata e huna ’ē i tōna mata ia tātou nei ; i vahavahahia ’oia, ’e ’aore ’oia i mana’o-maita’i-hia e tātou nei.

4 ’Ua rave mau rā ’oia i tō tātou paruparu, ’e ’ua hōpoi ’ē ’oia i tō tātou ’oto ; ’ua parau rā tātou iāna ē, tā’iri utu’a tōna ; mai te ta’ata tā’irihia e te Atua, i pohe ai ra.

5  I paruparu rā ’oia i tā tātou nei hara, i tā’irihia ’oia i tō tātou nei ’ino : ’e te a’o i hauhia ai tō tātou, tei ni’a ïa iāna, ’e nō tōna paruparu e ora ai tātou.

vahavahahia ’oia ’e ’aore i ha’apa’ohia

I te haerera’a mai Iesu Mesia i ni’a i te fenua nei, ’ua ti’aturi te tahi mau ta’ata iāna, ’eiaha rā te rahira’a. ’Ua hi’o ’ino ato’a rātou iāna, ’e e rave rahi tei au ’ore iāna. I te pae hope’a, ’ua mā’iti te mau ta’ata ’ia ha’amamae ’e ’ia ha’apohe iāna. (Hi’o 1 Nephi 19:9.)

’ua rave mau rā ’oia i tō tātou paruparu

’Ua rave Iesu Mesia i ni’a iāna iho i tō tātou mau māuiui ato’a, tō tātou ma’i, ’e tō tātou paruparu. ’Ua rave ’oia i te reira ’ia aroha mai ’oia ia tātou ’e ’ia ’ite nāhea i te tauturu ia tātou. (Hi’o Alama 7:11–13.)

I paruparu rā ’oia i tā tātou nei hara

’Ua māuiui Iesu Mesia nō tā tātou mau hara. ’Ua nā reira ’oia ’ia fa’a’orehia tā tātou mau hara ’ia tātarahapa ana’e tātou. (Hi‘o Te Ha’api’ira’a Tumu ’e te mau Fafaura’a 18:11 ; 19:15–19.)

nō tōna paruparu e ora ai tātou

« Tōna mau pēpē » o tōna ïa mau puta. Tē fa’ahōho’a nei te reira i te mau māuiui ato’a tāna i fa’a’oroma’i nō tātou, tae noa atu i te ha’amani’ira’ahia tōna toto ’e tōna pohe. Nō te mea ’ua māuiui Iesu Mesia nō tātou, e nehenehe fa’ahou tō tātou mau pepe e ora roa. Nā roto i tāna tūsia e fa’a’orehia tā tātou mau hara. ’A tātarahapa ai tātou ’e ’a tāmata ai i te ha’apa’o i tā tātou mau fafaura’a, e fa’aora ’e e taui ’oia ia tātou. (Hi’o Mosia 3:7–11 ; Te mau Hīro’a Fa’aro’o 1:3.)

© 2022 nā Intellectual Reserve, Inc. Fatura’a pāruruhia. Nene’ihia i te Fenua Marite. Parau fa’ati’a nō te reo peretāne : 6/19. Parau fa’ati’a nō te ’īritira’a : 6/19. ’Īritira’a nō Monthly For the Strength of Youth Message, April 2022. Tahitian. 18314 895