Mā’iti

’Ua fa’aitoito Iosua i tōna nūna’a ’ia rave i te mā’itira’a ti’a—’ia pe’e i te Fatu.

mā’iti

Tō tātou ti’ara’a ’ia mā’iti ’e ’ia rave nā roto ia tātou iho, e parauhia ïa te ti’amāra’a ’ia mā’iti. E tuha’a faufa’a rahi nō te fa’anahora’a a tō tātou Metua i te ao ra. Hō’ē o te mau tumu nō teie orara’a ’o te fa’a’itera’a ïa ē, e mā’iti tātou ’ia ha’apa’o i te mau fa’auera’a a te Atua, ’ia nehenehe ia tātou ’ia riro hau atu ā mai iāna te huru. E ha’avāhia tātou mai te au i tā tātou mau mā’itira’a. (Hi’o 2 Nephi 2:27 ; Te Ha’api’ira’a Tumu ’e te mau Fafaura’a 101:78 ; Aberahama 3:25.)

teie nei mahana

’Ua fa’aitoito Iosua i tōna nūna’a ’ia mā’iti « i teie nei mahana », ’aore rā i teienei. E nehenehe tātou e rave i te mau mā’itira’a faufa’a rahi i te hō’ē taime ’e i muri iho ’ia tāmata i te tāpe’a i te reira. (Hi’o Salamo 37:5.)

ha’amori

I roto i teie ’īrava, te aura’a ’ia ha’amori ’o te tāvinira’a ïa, te tauturura’a, te ha’apa’ora’a ’e te hōro’ara’a ia ’outou iho i te hō’ē ta’ata. E tāvini tātou i te Fatu (hi’o Mose 1:15).

te mau atua

’Ua fa’auehia ’Īserā’ela ’ia tāvini noa i te Atua mau ’e te ora, ’o Iesu Mesia (hi’o Exodo 20:2–5). ’Ua hōro’a Iosua i te hi’ora’a nō te tahi atu mau atua ’eiaha tōna nūna’a ’ia ha’amori. E nehenehe te tahi atu mau atua i roto i tō tātou orara’a, ’o te mau faufa’a ïa i roa’a mai, te mau mana’o o vetahi ē, te tahi atu mau fa’a’ana’anataera’a—te mau mea ato’a e fa’aātea ’ē ia tātou i te Fatu.

vau e tō’u ato’a ra ’utuāfare

’Ua parau Iosua nōna iho ’e nō tōna ’utuāfare. ’Ua parau ’oia e ha’amori rātou i te Fatu. ’Ua hina’aro ’oia e arata’i i tōna ’utuāfare i te parauti’a ’e e ha’api’i ia rātou ’ia pe’e i te Fatu (hi’o Te Ha’api’ira’a Tumu ’e te mau Fafaura’a 93:40).

© 2022 nā Intellectual Reserve, Inc. Fatura’a pāruruhia. Nene’ihia i te Fenua Marite. Parau fa’ati’a nō te reo peretāne : 6/19. Parau fa’ati’a nō te ’īritira’a : 6/19. ’Īritira’a nō Monthly For the Strength of Youth Message, June 2022. Tahitian. 18315 895