Parau poro’i tā’āva’e nō te Liahona, Tiunu 2022

E aha tē tupu i roto i te mau purera’a a te ’Ēkālesia i te sābati ?

E putuputu te mau melo o Te ’Ēkālesia a Iesu Mesia i te Feiā Mo’a i te mau Mahana Hope’a nei i te mau sābati ato’a, nō te ha’amori i te Atua ’e nō te ha’api’i i te tahi ’e te tahi i te ’evanelia a Iesu Mesia. E fāri’i-poupou-hia te tā’āto’ara’a ’ia haere mai, ’e e fāna’o te mau melo ’ia pure, ’ia hōro’a i te mau a’ora’a ’e ’ia ha’api’i i te mau ha’api’ira’a mai te mea e hina’aro rātou. E tauturu teie mau rurura’a i te mau melo ’ia ha’apūai i te tahi ’e te tahi i roto i te fa’aro’o ’e ’ia vai « tāhō’ē mai i tō rātou ’ā’au i roto i te tāhō’ēra’a ’e i roto i te here » (Mosia 18:21).

Purera’a ’ōro’a

E putuputu te mau melo o te pāroita ’aore rā o te ’āma’a i te mau sābati ato’a nō te purera’a ’ōro’a. (E fāri’i-poupou-hia te feiā e ’ere nō tā tātou ha’apa’ora’a fa’aro’o ’ia haere ato’a mai.) E hōro’ahia te ’ōro’a mo’a i te mau melo i roto i teie purera’a nō te tauturu ia rātou ’ia ha’amana’o ia Iesu Mesia (hi’o April 2022 Gospel Basics article [parau ve’a nō ni’a i te mau parau niu o te ’Evanelia, ’Ēperēra 2022 nō te tahi atu mau ha’amāramaramara’a nō ni’a i te ’ōro’a mo’a). Tei roto ato’a i te rurura’a te mau pure, te mau hīmene ha’amorira’a, ’e te mau a’ora’a e hōro’ahia mai e te mau melo nō ni’a i te ’evanelia a Iesu Mesia.

Te tahi atu mau rurura’a

I muri mai i te purera’a ’ōro’a, e fa’ata’ahia te mau melo i roto i te mau piha ha’api’ira’a ’e te mau pupu autahu’ara’a. Te mau tamari’i mai te 18 ’āva’e e tae atu i te 11 matahiti, e haere rātou i te Paraimere. I te sābati mātāmua ’e te toru o te sābati o te ’āva’e tāta’itahi, e haere te mau melo ato’a i te Ha’api’ira’a Sābati. I te piti ’e te maha o te sābati, e haere rātou i te mau rurura’a Sōtaiete Tauturu, Feiā ’Āpī Tamāhine ’aore rā pupu autahu’ara’a.

Mau pure

E hōro’ahia mai te mau pure i roto i te mau purera’a a te ’Ēkālesia e te mau melo. E mea ’ōhie roa te mau pure ’e e arata’ihia e te Vārua Maita’i. E pure te mau melo ma te fa’a’ohipa i te mau parau ’o tē fa’a’ite i te here ’e te fa’atura i te Metua i te ao ra. Ma te fa’a’ohipara’a i te mau parau fa’a’ite ’o ’oe, tō ’oe, tā ’oe ’e ’oe ’ia pure ana’e iāna.

Mau a’ora’a

E ani te hō’ē melo o te ’episekōpora’a ’aore rā o te peresidenira’a ’āma’a i te mau melo ’ia hōro’a mai i te mau a’ora’a i roto i te purera’a ’ōro’a. E fa’atumuhia teie mau a’ora’a i ni’a i te ’evanelia a Iesu Mesia. E fa’a’ohipa te feiā a’o i te mau pāpa’ira’a mo’a ’e te mau parau a te feiā fa’atere o te ’Ēkālesia, ’a fa’aineine ai rātou i tā rātou a’ora’a. E fa’a’ite pāpū ato’a rātou nō te mau ha’amaita’ira’a o te mau parau tumu o te ’evanelia.

Mau ha’api’ira’a

I muri a’e i te purera’a ’ōro’a, e ha’api’i mai te mau melo nō ni’a i te ’evanelia i roto i te mau piha na’ina’i. E nehenehe te mau ha’api’ira’a nō ni’a i te mau pāpa’ira’a mo’a, te mau ha’api’ira’a nō roto mai i te ’āmuira’a rahi, ’aore rā te tahi atu mau tumu parau. Noa atu e fa’atere te ’orometua i te ha’api’ira’a, e ’ere roa nā te ’orometua noa e paraparau mai. E nehenehe te mau pīahi ato’a o te piha e fa’a’ite mai i tō rātou mau mana’o nō ni’a i te tumu parau.

’Itera’a pāpū

Hō’ē taime i te ’āva’e, i roto i te purera’a ’ōro’a, tē vai ra te purera’a nō te ’itera’a pāpū. ’Ua matarohia i te sābati mātāmua o te ’āva’e. I roto i teie putuputura’a, e fa’a’ite mai te mau melo i tō rātou ’itera’a pāpū nō Iesu Mesia ’e tāna ’evanelia. Te aura’a e fa’a’ite i te ’itera’a pāpū ’o te paraura’a ïa i te parau mau o te ’evanelia mai te au i te fa’aurura’a a te Vārua Maita’i.

Fa’aineinera’a

E fa’aineine te mau melo nō te mau purera’a i te sābati nā roto i te pure, te tuatāpapara’a pāpa’ira’a mo’a ’e ma te vai ineine nō te fāri’i i te fa’aurura’a a te Vārua Maita’i. Mai te mea e anihia ia ’outou ’ia hōro’a i te hō’ē a’ora’a ’aore rā ’ia ha’api’i i te hō’ē ha’api’ira’a, ’a feruri nā roto i te pure nāhea ’outou e ha’api’i ai i te mau parau tumu o te ’evanelia. Fa’a’ohipa i te mau pāpa’ira’a mo’a. Fa’a’ite i te ’itera’a pāpū nō te parau mau. E nehenehe tō ’outou feiā fa’atere o te ’Ēkālesia e tauturu ia ’outou ’ia fa’aineine, mai te mea e hina’arohia.

Mai te mea e uira’a tā ’outou nō ni’a i te mau purera’a a te ’Ēkālesia, e ’āparau atu i tō ’outou mau taea’e ’aore rā mau tuahine aupuru, i te feiā fa’atere nō tā ’outou pāroita ’aore rā ’āma’a ’aore rā i te mau misiōnare.

Nō roto mai i te mau pāpa’ira’a mo’a

E arata’ihia te mau purera’a a te ’Ēkālesia nā roto i te Vārua (hi’o Moroni 6:9).

E ha’api’i te mau melo o te ’Ēkālesia i te tahi ’e te tahi i te ’evanelia (hi’o Te Ha’api’ira’a Tumu ’e te mau Fafaura’a 88:77–78).

E fa’a’ohipa te mau ’orometua i te mau pāpa’ira’a mo’a nō te ha’api’i i te mau parau tumu o te ’evanelia (hi’o Te Ha’api’ira’a Tumu ’e te mau Fafaura’a 42:12).

Te mau fa’anahora’a pāroita

Paraimere : Nō te mau tamari’i 18 ’āva’e ē tae atu i te 11 matahiti.

Mau piha Feiā ’Āpī Tamāhine : Nō te feiā ’āpī tamāhine mai te 12 matahiti ē tae atu i te 18 matahiti.

Mau pupu Autahu’ara’a a Aarona : Nō te feiā ’āpī tamāroa mai te 12 matahiti ē tae atu i te 18 matahiti.

Sōtaiete Tauturu : Nō te mau vahine pa’ari, e ha’amata i te 18ra’a o te matahiti.

Pupu peresibutero : Nō te mau tāne pa’ari, e ha’amata i te 18ra’a o te matahiti.

© 2022 nā Intellectual Reserve, Inc. Fatura’a pāruruhia. Nene’ihia i te Fenua Marite. Parau fa’ati’a nō te reo peretāne : 6/19. Parau fa’ati’a nō te ’īritira’a : 6/19. ’Īritiraa nō Monthly Liahona Message, June 2022. Tahitian. 18315 895