O Le Faia o Sauniga o le Malumalu ia Tele ina Avanoa

I le talafaasolopito atoa, ua faia ai e le Alii ia sauniga taua o loo maua i totonu o Ona malumalu paia. E ala mai i nei sauniga o le perisitua ma feagaiga e o faatasi ai, Na te fusia ai i tatou ia te Ia ma mafai ai ona maua le faaeaga.

Na maua e le Perofeta o Iosefa Samita faaaliga na mua’i valoia ai le taua o sauniga o le malumalu mo e o soifua ma e ua maliliu a o lei O Le Ekalesia a Iesu Keriso o le Au Paia o Aso e Gata Ai sa faatulagaina aloaia i le 1830 (tagai Mataupu Faavae ma Feagaiga 2).

O le taua o nei sauniga i le popofou o le Toefuataiga sa faamamafaina e le taumafaiga e fausia malumalu e oo lava i lalo o tulaga faigata. Talu mai lena taimi, e mafai ona vaaia lo latou taua a o fausia malumalu ia latalata atili atu i tagata o le Ekalesia i nofoaga i le salafa o le lalolagi.

1831: Sa faaali atu e le Alii i le Au Paia e faapea, ua tofia se malumalu mo Initipene, Misuri (tagai Mataupu Faavae ma Feagaiga 57:1–3). I le 1838, sa tofia ai foi se isi malumalu i Fa Uesi, Misuri (tagai Mataupu Faavae ma Feagaiga 115:7–16). Ona o le vevesi, sa lei fausia ai nei malumalu i lena taimi. E le o aofia ai i le lisi o loo i ai nei o malumalu ua faasilasila atu ma e le o fuafuaina lelei.

1836: Sa faapaiaina le Malumalu o Katelani ia Mati 1836, i le na o le ono tausaga talu ona faatulagaina le Ekalesia toefuataiina i le 1830. Na suia le anaina ina ua tuua e le toatele o tagata o le ekalesia ia Katelani i le 1838, ma ua le toe faitauina le fale i le aofaiga o malumalu ua maea ona faapaiaina.

1846: O le Malumalu o Navu sa muai faapaiaina ia Me 1846. Sa tele lava ina faatamaia e le afi i le 1848. Sa toe fausia le Malumalu o Navu Ilinoi i le uluai nofoaga ma faapaiaina i le 2002.

1847: Sa fofogaina e Polika Iaga le mea na mulimuli ane avea ma Malumalu o Sate Leki i le na o le fa aso talu ona taunuu i le vanu. O le a faaauau ai seia oo i le 1893 mo le faapaiaina o le malumalu.

1855: I le va o le lafoaia o le Malumalu o Navu i le 1846 ma le faapaiaga o le Malumalu o St. George Iuta i le 1877, sa leai se malumalu faapaiaina. E mafai e le Au Paia o Aso e Gata Ai ona maua o latou sauniga o le malumalu i le Maota o Faaeega Paia seia oo ina faaleagaina i le 1889.

1945: O le Malumalu o Mesa Arisona na ofoina atu sauniga i le faaSipaniolo, o le malumalu muamua lea na tuuina atu ai sauniga i se gagana e ese mai le Igilisi.

1978: Faatasi ai ma le faapaiaga o le Malumalu o São Paulo Pasila i le 1978, e 17 malumalu sa faaaogaina.

1985: I le taimi o avea Peresitene Spencer W. Kimball o le Peresitene o le Ekalesia mai le 1973 i le 1985, e 31 malumalu na fofogaina mai.

1997: Na fofogaina e Peresitene Gordon B. Hinckley mamanu mo ni malumalu laiti. I le 1998, sa ia faasilasila atu ai lona faamoemoega ia oo atu i le 100 le aofaiga o malumalu e faaaogaina i le tausaga e 2000.

2000: Na faapaiaina e Peresitene Hinckley malumalu e fa i le vaiaso e tasi (Iuni 11–18): Malumalu o Fukuoka Iapani, Malumalu o Adelaide Ausetalia, Malumalu o Melepone Ausetalia, ma le Malumalu o Suva Fiti.

2008: I le taimi o avea Peresitene Hinckley o le Peresitene o le Ekalesia mai le 1995 i le 2008, e 78 malumalu na fofogaina mai ai.

2018: I le taimi o avea Peresitene Thomas S. Monson o le Peresitene o le Ekalesia mai le 2008 i le 2018, e 45 malumalu na fofogaina mai.

2021: I uluai tausaga e fa o le auaunaga a Peresitene Russell M. Nelson o le Peresitene o le Ekalesia mai le 2018 e oo atu i le faaiuga o le 2021, e 83 malumalu ua fofogaina mai.

2022: E oo atu i le aso 1 Ianuari, 2022, ua fofogaina mai malumalu e 265, o loo fausiaina, pe ua faapaiaina.