“Faatasi ai ma le Ta’ita’iga a le Alii,” Liahona, Iulai 2022.
O Leo o le Au Paia o Aso e Gata Ai
Faatasi ai ma le Ta’ita’iga a le Alii
I le lotolotoi o faigata, sa ou aoao ai e mafai ona ou faia ni mea faigata.
I le avea ai ma se tausima‘i i le Vaega Faaleoleo o le Neivi a le IS i le taimi o le faama’i pipisi o le KOVITI-19, sa faaaogaina au ma tofia i le falema’i mo fa’alavelave fa’afuase’i i le Jacob K. Javits Convention Center i Niu Ioka, ma tuuina atu le tausiga muamua i le taimi o le tumutumu o le faamai o le KOVITI-19 i le aai.
Ina ua amata o‘u tiute, sa tele atugaluga na faatumulia ai lo’u mafaufau. Sa faapitoa lava lo‘u popole i le tausiga o gasegase ma le faafetauia o lenei vairasi faataumaoi.
Sa ou lagonaina le pei o Nifae, i le “taitaia e le Agaga, ma le le mua‘i iloa muamua o mea e tatau ona ou faia” (1 Nifae 4:6). O lenei manatu na fesoasoani ia te au e faalagolago ai i le Tama Faalelagi ma tatalo soo ina ia ou faalogo i Lona siufofoga, mulimuli i Ana faatonuga, ma tuuina atu le tausiga sili ou te mafaia i au ma‘i.
I le taimi o lo‘u po muamua i le tuuina atu o le tausiga, sa taofia ai se gasegase i se tulaga ogaoga. A o amata ona matou iloiloina ma a‘u uo lona tulaga, sa vave ona ou iloaina e na o le faaSipaniolo e mafai ona ia tautala ai. Sa na o au lava iina sa tautala faaSipaniolo, aua na ou aoaoina i lau misiona i Venesuela.
A o amata ona ou talanoa atu i le gasegase, sa ia fesili mai pe o le a lelei mea uma. Sa ou faamautinoa atu ia te ia, ma fai atu ia te ia o loo ia mauaina le tausiga sili ona lelei. Sa ou lagonaina se tikeri o le faatuatuaina ma le mafanafana i ona mata. I le po atoa na totoe, sa masani ona ou asiasi atu i autafa o lona moega, ma faia ni iloiloga ma tuuina atu ni auiliiliga fou. I totonu o ni nai aso, sa faaleleia atili lona tulaga ma sa te’a i tua o ia.
I le taimi o lo‘u tofiga, sa ou feiloai ai i le toatele o gasegase o e sa matele lava ina tautatala i le faaSipaniolo. O lou tomai e talanoa atu ai ia i latou na ofoina atu ai ia i latou le toomaga ma le faamautinoaga i le taimi o lo latou sailiga faasiligā malosi.
A o ou tomanatu i lenei aafiaga o le sailia o le taitaiga faalelagi e tuuina atu i tagata mamai le tausiga sili, ua faamanatu mai ai ia te au le fautuaga a Elder Brook P. Hales o le Fitugafulu. Sa ia saunoa mai o loo aofia ai le Tama Faalelagi “i auiliiliga o o tatou olaga” ma “ua ia i tatou le aia tatau i se tafe faifai pea o le taitaiga faalelagi e ala i le uunaiga ma musumusuga a le Agaga Paia.”1
Na amata ona ou iloa lelei o loʻu tomai e tautala faaSipaniolo e tutusa lava le tāua ma loʻu poto faafomaʻi. A o ou tausia isi, sa ou maua foi se vaaiga manino e faapea, i le lotolotoi o faigata, ma faatasi ai ma le taitaiga a le Alii, e mafai ai ona ou faia ni mea faigata.