“Faalatalata Atili Mai ia Iesu Keriso,” Liahona, Iulai 2022.
Mo Matua
Faalatalata Atili Mai ia Iesu Keriso
Matua Pelē,
Ua tuuina mai e le Alii ia i tatou Lana talalelei, le perisitua, malumalu, ma le tele o isi punaoa e fesoasoani tatou te aoao ai e uiga ia te Ia ma saunia ai e toe foi atu ia te Ia. Ua faasoa mai e lenei lomiga o le mekasini ni auala e mafai ai e i tatou uma ona latalata atili atu ia Keriso e ui lava i luitau o loo siomia ai i tatou.
Talanoaga o le Talalelei
O Le Malumalu: O Le Nofoaga Sili ona Paia e Tapuai Ai
I le itulau e 4, e mafai ona e faaaogaina aoaoga mai ia Elder David A. Bednar e aoao ai lou aiga i le taua o sauniga o le malumalu. O le mulimuli ai i lena tusiga o se tuufaatasiga o molimau mai tagata o le ekalesia i le lalolagi atoa e uiga i malumalu fou i o latou eria. Faaali atu i lou aiga le siata o loo i le itulau e 12 e vaai ai i le faatupulaia o le aofai o malumalu ua uma ona fofogaina mai talu ai nei. E faapefea e sauniga o le malumalu ona aumaia tagata taitoatasi ma aiga ia latalata atili atu i le Tama Faalelagi ma Iesu Keriso?
O ā Tusitusiga Paia?
E mafai ona e faaaogaina le tusiga Faavae o le Talalelei o loo i le itulau e 22 e aoao atu ai po o a tusitusiga paia ma pe aisea e taua ai le suesue i ai ma aoaoga a perofeta o aso nei.
O le a Ta’ita’ia i Tatou e le Alii
I le itulau e 40, o loo talanoaina ai e Elder Ciro Schmeil ni faataitaiga o tagata o e sa avea ma meafaigaluega i aao o le Alii. Faitau nisi o upusii mai le tusiga ma talanoaina ma tagata o le aiga pe mafai faapefea ona latou maua le lotomatala i uunaiga a le Agaga ma avea ma meafaigaluega i aao o le Alii.
Mea Faafiafia Faaleaiga o leSau, Mulimuli Mai ia te A’u
Mo Se Taimi Faapenei
Sa lototele Eseta i le alu atu i le tupu ma laveai lona nuu.
-
Saofai i se li‘o ma fai atu i se tagata o le aiga e ta’u mai se toa manumanu sa lototele, ma ta‘u mai se tasi o auala na faaalia ai e le tagata le lototele (faataitaiga: Eseta, lototele e tautala).
-
Tau mai e le isi tagata i le li‘o le igoa o le toa muamua ona filifili lea o se isi tagata i tusitusiga paia latou te manatu sa lototele ma faamatala mai pe aisea.
-
Faaauau ona faataamilo i le li‘o, ma faaigoa ia tagata taitoatasi mai tusitusiga paia o e ua filifilia ma faaopoopo i ai se igoa fou. Faaauau pea ona taaalo seia oo ina maua e tagata uma o le aiga ia le itiiti ifo ma le tasi le avanoa.
Talanoaga: E mafai faapefea ona tatou lototetele i o tatou taimi ma i o tatou tulaga patino? E mafai faapefea ona tatou faamanuiaina olaga o isi pe a tatou galulue ma le lototele ma faia le mea sa‘o?
Numera e Le Mafai ona Motusia
Faitau le tala ia Elisaia ma le auauna talavou i le 2 Tupu 6:8–23.
-
Ia aumai se fasilaau lauiti e mafai ona faigofie ona gauia.
-
Lu‘i se tasi e gagauina.
-
Tuu faatasi ni fasilaau se 10 pe sili atu. Lu‘i le tagata lava lea e tasi e gagauina laau e aunoa ma le tuueseeseina o fasilaau.
-
Aisea na sili atu ai ona faigata le luitau i le taimi lona lua?
-
Faitau le 2 Tupu 6:16-17: “Aua e te fefe: aua e toatele ua ia te i tatou i e ua ia te i latou. Ona tatalo ai lea o Elisaia, ua faapea atu, Ieova e, ia e faapupula i ona mata, ina ia na iloa. Ona faapupulaina lea e Ieova o mata o le taulealea, ona iloa ai lea e ia; faauta foi, ua tumu le mauga i solofanua ma kariota afi ua latou vagavagai ia Elisaia.”
-
O ai na vaai i ai Elisaia ma le auauna talavou o puipuia i laua?
-
Faitau atu le mea lenei: “E pei foi o lena auauna a Elisaia, e toatele atu o loo faatasi ma oe nai lo i latou e mafai ona e vaaia o loo tetee ia te oe. O nisi o loo faatasi ma outou o le a le vaaia e o outou mata faaletino” (Henry B. Eyring, “E, Outou o E o Atu,” Liahona, Nov. 2008, 58).
Talanoaga. Faitau le Mataupu Faavae ma Feagaiga 84:88. E i ai taimi tatou te ono lagona ai le tuuatoatasi, e mafai faapefea ona tatou talitonuina e le o tuua na o i tatou? O faapefea ona puipuia ma fesoasoani mai le Alii ia i tatou i aso nei? (Mo manatu, tagai Ronald A. Rasband, “Aua Le Atuatuvale,” Liahona, Nov. 2018, 18–21.)