“Ania ti Sardam iti Pagtaengan?” Liahona, Ago. 2022.
Binulan a Mensahe ti Liahona , Agosto 2022
Ania ti Sardam iti Pagtaengan?
Ti sardam iti pagtaengan ket maysa nga oras a nailasin bayat ti lawas para iti panagtitipon ti pamiliayo. Kabayatan daytoy nga oras, mabalinyo ti “masursuruan iti ebanghelio, mangpapigsa kadagiti pammaneknek, mangbangon iti panagkaykaysa, ken mangparagsak iti tunggal maysa” (General Handbook: Serving in The Church of Jesus Christ of Latter-day Saints, 2.2.4, ChurchofJesusChrist.org). Makita a kasla naiduma ti sardam iti pagtaengan para iti tunggal pamilia. Ngem ti panggep a tun-oyen ket usaren daytoy nga oras tapno umas-asideg iti Mangisalakan.
Panagsagana
Panunotem ti maysa nga aktibidad a magustuan ti pamiliam ken maysa a topiko ti ebanghelio a kayatmo a pagsasaritaan ken adalen a sangsangkamaysa. Kasta met, agpilikayo iti aldaw ken oras iti kada lawas a mabalin nga agtataripnong ti kaaduan wenno amin a miembro ti pamilia. Allukoyen ti Simbaan dagiti miembro a mangangay iti sardam iti pagtaengan kadagiti rabii ti Lunes. Ngem makapagtataripnong dagiti pamilia no kasayaatan dayta kadakuada.
Kararag
Rugian ken gibusan ti adu a pamilia ti sardam iti pagtaengan babaen iti kararag. Daytoy ti mangawis iti Espiritu Santo iti pagtaenganda. Ti sardam iti pagtaengan ti maysa a nasayaat nga oras a pakasursuruan dagiti ubbing ken nataengan ti agkararag a kadua ti bassit a grupo.
Musika
Adu pay a pamilia ti addaan iti panglukat ken pangserra a kanta. Gagangay a mangpilida iti kanta manipud iti hymnbook wenno iti Primary songbook. Addaan ti Simbaan kadagiti piano recording dagiti himno iti music.ChurchofJesusChrist.org. Mabalinyo pay a buyaen dagiti video ti Tabernacle Choir iti Temple Square. Ti panagkanta bayat ti sardam iti pagtaengan ket makatulong kadagiti miembro a mangsursuro kadagiti himno a makanta iti simbaan.
Leksion
Adu ti resources ti Simbaan a makatulong iti sardam iti pagtaengan. Mabalinmo ti mangbubos iti sumagmamano a minuto a mangbasa ken mangilawlawag iti maysa nga artikulo manipud iti Liahona, ti Friend, wenno Para iti Pigsa dagiti Agtutubo. Mabalin a daytoy pay ti oras ti panagbuya ken panaglilinnawag kadagiti video iti Simbaan. Wenno mabalinmo a basaen ti maysa a mensahe manipud iti sapasap a komperensia, basaem dagiti nasantuan a kasuratan, wenno pagsasaritaan ti panagbasa iti dayta a lawas iti Umaykayo, Sumurot Kaniak.
Ladawan dagiti ubbing nga agar-aramid iti cookies ni Michelle Loynes
Pannakiraman ti Pamilia
Mabalin dagiti ubbing ti makiraman iti sardam iti pagtaengan. Makatulongda a mangplano kadagiti aktibidad, agkararag, wenno agpili ken mangidaulo kadagiti kanta. Mabalinda pay ketdi ti mangisuro kadagiti adalen. Sakbay ti sardam iti pagtaengan, mabalinmo a tulongan ti anakmo nga agbasa iti maysa nga estoria iti magasin a Friend wenno ti paboritoda nga estoria iti nasantuan a kasuratan. Kalpasanna mabalin nga isarita ti ubing dayta nga estorai iti pamilia kas adalen. Magustuan pay ti adu nga ubbing ti panangyakem kadagiti estoria iti nasanttuan a kasuratan para iti sardam iti pagtaengan. Bay-am nga iplano dagiti in-inauna nga ubbing ti adalen wenno mangpili iti maysa a mensahe iti sapasap a komperensia a kayatda a basaen. Kalpasanna, paidauluam kadakuada ti panaglilinnawag.
Dagiti Aktibidad
Magusgustuan ti adu a pamilia ti agaramid kadagiti aktibidad kas paset ti sardam iti pagtaengan. Mabalin a karaman kadagiti aktibidad iti uneg ti panagay-ayam, panagaramid iti crafts, wenno panagluto a sangapada.
Para kadagiti aktibidad iti ruar mabalinyo ti agpagnapagna, mapan ag-hike kas pamilia, wenno agay-ayam iti maysa nga isport iti ruar a sangapada. Mangsapul iti maysa nga aktibidad a mabalin nga aramiden ti amin a miembro ti pamilia, ken agragragsak a sangapada. Liklikan dagiti kanito a panagbabalubal a mabalin a mangpapanaw iti Espiritu.
Panagserbi
Ti sardam iti pagtaengan ti maysa a napintas a gundaway a panagserbi dagiti pamilia iti dadduma. Mabalinmo a tulongan ti sumagmamano a natataengan a kaarruba, mangiserbi iti taraon iti pagyanan dagiti awanan pagtaengan, agsurat kadagiti misionario, wenno agpidut iti basura, kas pagarigan.
© 2022 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Liahona Message, August 2022. Ilokano. 18316 864