Bulanan nga Mensahe sa Liahona, Nobyembre 2022
Dauga ang Kalibutan kag Mag-angkon sang Kapahuwayan
Mag-angkon sang kapahuwayan halin sa kasingki, kawala sang kasigurohan, kag kalisod sining kalibutan paagi sa pagdaog sang kalibutan paagi sa inyo mga kasugtanan upod sa Dios.
Mahal kong mga kauturan, nagapasalamat gid ako nga matamyaw kamo sa sining mahimayaon nga aga sang Adlaw nga Inugpahuway. Ara kamo pirme sa akon hunahuna. Nagadayaw ako sa madasig ninyo nga pag-aksyon tagsa nga makita ninyo ang iban nga nagakinahanglan. Nagadayaw ako sa pagtuo kag testimonya nga liwat-liwat ninyo nga ginapakita. Nagakasubo ako sa inyo mga kasakit sang buot, kapaslawan, kag mga palaligban. Palangga ko kamo. Ginapasalig ko sa inyo nga ang aton Amay nga Langitnon kag ang Iya Pinalangga nga Anak nga si Jesucristo, nagapalangga sa inyo. Lubos Niya nga nahibal-an ang inyo mga sirkumstansya, ang inyo kaayo, ang inyo mga panginahanglan, kag ang inyo mga pag-ampo para sa bulig. Liwat-liwat, ginapangamuyo ko nga mabatyagan ninyo ang Ila pagpalangga sa inyo.
Importante nga maeksperiyensyahan ang Ila pagpalangga, kay daw ginasugata kita adlaw-adlaw sang sige-sige nga masubo nga mga balita. Mahimo nga may mga inadlaw nga nagapangabay kamo nga kuntani pwede lang kamo magpajama, magbarikutot, kag silingon ang iban nga pukawon lang kamo kon tapos na ang kinagamo.
Pero, mahal kong mga kauturan, kadamo sang matahum nga mga butang sa palaabuton. Sa maabot nga inadlaw, makita naton ang pinakadalagko nga pagpakita sang gahum sang Manluluwas nga amo pa lang makita sang kalibutan. Halin karon tubtob sa tion sang Iya pagbalik “nga may gahum kag dako nga himaya,”1 magahatag Sia sang indi maisip nga mga pribelihiyo, mga bugay, kag mga milagro sa mga nagatuo.
Wala sapayan sini, nagakabuhi kita sa karon sa sigurado pinakakomplikado nga tion sa kasaysayan sang kalibutan. Ang kakomplikado kag mga hangkat nagahatag sa madamo nga mga tawo sang pamatyagan nga daw matambakan kag makakalapoy. Ugaling, hunahunaa ining nagligad lang nga eksperiyensya nga mahimo makahatag kasanagan kon paano kamo kag ako makaangkon sang kapahuwayan.
Sang nagligad lang nga open house sang Templo sang Washington D.C, isa ka miyembro sang komite sang open house nakasaksi sang maalam nga diskusyon samtang ginaupdan niya ang pila ka kilala nga mga journalist sa templo. Isa ka pamilya nga may magagmay nga kabataan ang nagsala nga masimpon sa sining media tour. Ang isa ka reporter sige pamangkot parte sa “pagpanglakaton” sang isa ka sumilimba sa templo sa iya pagsaylo-saylo sa mga kwarto sang templo. Gusto niya mahibal-an kon ang pagpanglakaton sa templo nagasimbolo sang mga hangkat sa pagpanglakaton sang tawo sa kabuhi.
Ang bata nga lalaki nag-entra sa paghinambalanay. Sang magsulod ang grupo sa endowment room, gintudlo sang bata nga lalaki ang altar, kon diin nagaluhod ang mga tawo para maghimo sang mga kasugtanan upod sa Dios, kag nagsiling, “Ay ho, kanami. Amo ini diri ang lugar para ang mga tawo makapahuway sa ila pagpanglakaton sa templo.”
Ambot kon nahibal-an sang bata kon daw ano kadako sang kahulugan sang iya obserbasyon. Sigurado wala sia sang ideya parte sa direkta nga koneksyon sang paghimo sang kasugtanan upod sa Dios sa templo kag sang indi matupungan nga promisa sang Manluluwas:
“Kari sa akon, tanan kamo nga ginabudlayan kag ginabug-atan, kag papahuwayon ko kamo.
“Itakod ang akon gota sa inyo, kag magtuon kamo sa akon; … kag makakita kamo sang kapahuwayan sa inyo mga kalag.
“Kay ang akon gota mahulas, kag ang akon lulan mamag-an.”2
Mahal kong mga kauturan, nagakalisod ako sa mga nagabiya sa Simbahan tungod pamatyagan nila kadako sang ginapangayo sa ila bilang mga miyembro. Wala pa nila madiskubrehi nga ang paghimo kag pagtuman sang mga kasugtanan mas nagapahapos pa gani sang kabuhi! Ang tagsa ka tawo nga nagahimo sang mga kasugtanan sa mga tulugmawan sa bunyag kag sa templo—kag nagatuman sang mga ini—may mas dako nga ikasarang sa paglab-ot sang gahum ni Jesucristo. Palihog binagbinaga inang makahalawhaw nga kamatuoran!
Ang premyo sa pagtuman sang mga kasugtanan upod sa Dios amo ang langitnon nga gahum—gahum nga nagapabakod sa aton para mas mapakigbatuan ang aton mga pagtilaw, mga tentasyon, kag mga kapaslawan. Ining gahum nagapahapos sang aton dalanon. Ang mga nagapangabuhi sang mas mataas nga mga layi ni Jesucristo may ikasarang nga maglab-ot sa mas dako Niya nga gahum. Gani, ang mga nagatuman sang mga kasugtanan may kinamatarong sa sinang espesyal nga klase sang kapahuwayan nga nagaabot sa ila paagi sa ila relasyon sa kasugtanan upod sa Dios.
Antes ginpaidalom sang Manluluwas ang Iya Kaugalingon sa kasakit sang Getsemani kag Kalbaryo, ginsiling Niya sa Iya mga Apostoles, “Sa kalibutan kamo makaangkon sang kalisdanan: apang magmangin masinadyahon kamo; [Nadaog] ko ang kalibutan.”3 Pagkatapos, ginpangabay ni Jesus sa tagsa sa aton nga himuon ang amo man sang Sia nagsiling, “Buot ko nga daugon ninyo ang kalibutan.”4
Pinalangga kong mga kauturan, ang mensahe ko sa inyo karon amo nga tungod nadaog ni Jesucristo ining kalibutan nga nahulog sa sala, kag tungod nagbayad-sala Sia para sa tagsa sa aton, sarang man ninyo madaog ining puno-sang-sala, maiyaiyahon, kag masami makakalapoy nga kalibutan.
Bangod ang Manluluwas, paagi sa Iya Wala Dulonan nga Pagbayad-Sala, nagluwas sang tagsa sa aton halin sa aton kahuyang, mga kasaypanan, kag sala, kag tungod naeksperiyensyahan Niya ang tagsa ka kasakit, kabalaka, kag kabug-at nga naagyan ninyo,5 sa amo kon matuodtuod kamo nga maghinulsol kag magpangayo sang Iya bulig, mahimo kamo nga magpangibabaw sa sining delikado nga kalibutan sa karon.
Mahimo ninyo nga malampuwasan ang makakalapoy sa espiritu kag emosyon nga mga salot sang kalibutan, lakip na ang pagkamatinaastaason, bugal, kaakig, imoralidad, dumot, kadalok, kahisa, kag kahadlok. Wala sapayan sa mga tublag kag pagpatalang nga nagapalibot sa aton, mahimo kamo nga makaangkon sang matuodtuod nga kapahuwayan—buot silingon kaumpawan kag kalinong—bisan sa tunga sang inyo makaulugtas nga mga problema.
Ining importante nga kamatuoran nagapukaw sang tatlo ka importante nga mga pamangkot:
Una, ano ang buot silingon sang daugon ang kalibutan?
Ikaduha, paano naton ini himuon?
Kag ikatatlo, paano ang pagdaog sang kalibutan magabugay sang aton mga kabuhi?
Ano ang buot silingon sang daugon ang kalibutan? Nagakahulugan ini nga daugon ang tentasyon nga mas ulikdan ang mga butang sining kalibutan sangsa mga butang sang Dios. Nagakahulugan ini sang pagsalig sa doktrina ni Cristo sangsa mga pilosopiya sang tawo. Nagakahulugan ini sang pagkasadya sa kamatuoran, pagsikway sang pagpatalang, kag ang mangin “mapainubuson nga mga sumulunod ni Cristo.”6 Nagakahulugan ini sang paglikaw sa bisan ano nga nagatabog sang Espiritu palayo. Nagakahulugan ini nga mangin handa nga “talikdan” bisan ang aton paborito nga mga sala.7
Karon, ang pagdaog sang kalibutan wala nagakahulugan nga mangin perpekto sa sining kabuhi, wala man ini nagakahulugan nga ang inyo mga problema gulpi lang nga madula—kay indi ini madula. Kag wala ini nagakahulugan nga indi na kamo makahimo sang mga sala. Pero ang pagdaog sang kalibutan nagakahulugan nga ang inyo ikasarang sa pagbato sa sala magadako. Ang inyo tagipusuon magahumok samtang ang inyo pagtuo kay Jesucristo nagatubo.8 Ang pagdaog sang kalibutan nagakahulugan sang mas pagdako sang pagpalangga sa Dios kag sa Iya Pinalangga nga Anak sangsa imo pagpalangga sa bisan sin-o ukon bisan ano nga butang.
Gani, paano naton daugon ang kalibutan? Gintudlo ini sa aton ni Haring Benjamin. Siling niya nga ang “kinaugali nga tawo isa ka kaaway sang Dios” kag mangin amo sini sa gihapon kag sa gihapon “luwas nga magaampo sia sa mga pagpangganyat sang Espiritu nga Balaan, kag ubahon ang kinaugali nga tawo kag mangin isa ka santos paagi sa pagpasag-uli ni Cristo nga Ginuo.”9 Tagsa nga pangitaon ninyo kag sundon ang mga pagpabatyag sang Espiritu, tagsa nga maghimo kamo sang maayo—mga butang nga indi paghimuon sang “kinaugali nga tawo”—ginadaog ninyo ang kalibutan.
Ang pagdaog sang kalibutan indi isa ka hitabo nga nagakatabo lamang sa isa ukon duha ka adlaw. Nagakatabo ini sa bilog nga kabuhi samtang sulit-sulit naton nga ginapangabuhi ang doktrina ni Cristo. Nagakultibar kita sang pagtuo kay Jesucristo paagi sa paghinulsol adlaw-adlaw kag pagtuman sang mga kasugtanan nga nagahatag sa aton sang gahum. Nagapabilin kita sa dalan sang kasugtanan kag ginabugayan sang espirituhanon nga kusog, personal nga rebelasyon, nagadako nga pagtuo, kag sang pag-alagad sang mga anghel. Ang pagpangabuhi sang doktrina ni Cristo nagaresulta sa pinakamabaskog nga dungganon nga pagpangabuhi, nga nagapahamtang sang espirituhanon nga buylo sa aton mga kabuhi.10
Samtang ginatinguhaan naton nga ipangabuhi ang mas mataas nga mga layi ni Jesucristo ang aton mga tagipusuon kag ang aton mismo mga kinaugali nagasugod nga magbag-o. Ang Manluluwas nagaalsa sa aton lapaw sa butong sining aton kalibutan nga nahulog sa sala paagi sa pagbugay sa aton sang mas dako nga gugma sa isigkatawo, pagpaubos, kaalwan, kaayo, disiplina sa kaugalingon, kalinong, kag kapahuwayan.
Karon, mahimo nga nagapanumdom kamo nga daw mabudlay ini nga espirituhanon nga buluhaton imbes nga kapahuwayan. Pero ari ang dako nga kamatuoran: mientras nga ang kalibutan nagainsister nga ang gahum, pagkabutang, popularidad, kag ang mga kalipayan sang unod ang nagadala sang kalipay, indi ini matuod! Indi nila ini mahimo! Ang ila madala amo lamang ang hapaw nga kabaylo sang “bulahan kag malipayon nga kahimtangan sadtong mga nagatuman sang [mga] kasuguan sang Dios.”11
Ang matuod amo nga mas makapoy ang maglagas sang kalipayan sa lugar nga indi mo ini makita! Pero, kon ihigot ninyo ang inyo kaugalingon kay Jesucristo kag himuon ang espirituhanon nga hilikuton nga kinahanglan para dag-on ang kalibutan, Sia, kag Sia lamang, ang may gahum nga alsahon kamo lapaw sa butong sining kalibutan.
Karon, paano ang pagdaog sang kalibutan magabugay sang aton mga kabuhi? Maathag ang sabat: ang pagsulod sa kasugtanan nga relasyon upod sa Dios nagahigot sa aton sa Iya sa paagi nga ang tanan parte sa kabuhi mangin mahapos. Palihog indi ninyo ini paghangpa sang lain: Wala ako nagasiling nga ang paghimo sang mga kasugtanan nagapahapos sang kabuhi. Ang matuod, paabuta ang kabaliskaran, tungod ang kaaway indi gusto nga madiskubrehan ninyo ang gahum ni Jesucristo. Pero ang paghigot sang inyo kaugalingon sa Manluluwas nagakahulugan nga matigayon ninyo ang Iya kusog kag nagatubos nga gahum.
Ginapamatud-an ko ang makatalandog nga pinanudlo ni Pangulong Ezra Taft Benson: “Ang mga lalaki kag babayi nga nagatugyan sang ila mga kabuhi sa Dios makadiskubre nga madamo Sia sang mahimo sa ila mga kabuhi sangsa ila masarangan. Padalumon Niya ang ila mga kalipay, pasangkaron ang ila panulukan, padasigon ang ila mga kaisipan, … alsahon ang ila mga espiritu, doblehon ang ila mga bugay, padakuon ang ila mga oportunidad, paumpawan ang ila mga kalag, magpatubo sang mga abyan, kag magbubo sang kalinong.”12
Ining indi makumparar nga mga pribelihiyo nagasunod sa mga nagahandum sang suporta sang langit para buligan sila nga daugon ining kalibutan. Sa sining rason, ginatanyag ko sa mga miyembro sang bilog nga Simbahan ang amo man nga pangagda nga ginhatag ko sa aton lamharon nga mga hamtong sang nagligad nga Mayo. Gin-agda ko sila sadto—kag nagapangabay ako sa inyo karon—nga hikuta ang inyo kaugalingon nga testimonya parte kay Jesucristo kag sang Iya ebanghelyo. Pangabudlayi nga maangkon ini. Sagura ini agud nga magdako. Sagura ini sang kamatuoran. Indi ini pagsimbugi sang indi matuod nga mga pilosopiya sang mga wala nagatuo nga mga lalaki kag babayi. Samtang ginahimo ninyo nga pinakamataas nga prayoridad ang padayon nga pagpabakod sang inyo testimonya kay Jesucristo, magpaabot sang mga milagro nga matabo sa inyo kabuhi.13
Ang pangabay ko sa inyo sini nga aga amo nga mag-angkon sang kapahuwayan halin sa kasingki, kawala sang kasigurohan, kag kalisod sining kalibutan paagi sa pagdaog sang kalibutan paagi sa inyo mga kasugtanan upod sa Dios. Pahibal-a Sia paagi sa inyo mga pangamuyo kag sa inyo mga aksyon nga seryoso kamo nga daugon ang kalibutan. Pangabaya Sia nga pasanagan ang inyo kaisipan kag padalhan kamo sang bulig nga kinahanglan ninyo. Kada adlaw, isulat ang mga panghunahuna nga nagaabot sa inyo samtang nagapangamuyo kamo; dayon himoa ining sing matutom. Maghatag sing mas dako nga tion sa templo, kag pangayoa nga maintiendihan kon paano ang templo nagatudlo sa inyo nga magpangibabaw sa sining kalibutan nga nahulog sa sala.14
Sa nasiling ko na sadto, ang pagtipon sang Israel amo ang pinaka importante nga buluhaton nga nagakatabo sa duta sa karon. Isa ka kritikal nga elemento sining pagtipon amo ang paghanda sang katawhan nga makasarang, handa, kag nagakaangay nga magbaton sang Ginuo kon magbalik Sia liwat, katawhan nga nagpili na ngadaan kay Jesucristo imbes sang sining nahulog nga kalibutan, katawhan nga nagakalipay sa ila kahilwayan sa pagpili nga ipangabuhi ang mas mataas, mas balaan nga mga layi ni Jesucristo.
Nagapanawagan ako sa inyo, pinalangga kong mga kauturan, nga mangin ining matarong nga katawhan. Hatagi sang bili kag tahura ang inyo mga kasugtanan labaw pa sa iban nga mga pangako. Samtang ginatugotan ninyo ang Dios nga magpangibabaw sa inyo kabuhi, ginapromisa ko sa inyo ang mas dako nga kalinong, kompiyansa, kalipay, kag huo, kapahuwayan.
Upod ang gahum sang balaan nga pagkaapostoles nga ginhatag sa akon, ginabendisyunan ko kamo sa inyo handum nga daugon ining kalibutan. Ginabendisyunan ko kamo nga patubuon ang inyo pagtuo kay Jesucristo kag tun-an nga mas makig-angot sa Iya gahum. Ginabendisyunan ko kamo nga makilala ninyo ang kamatuoran sa sayop. Ginabendisyunan ko kamo nga mas ulikdan ang mga butang sang Dios sangsa mga butang sining kalibutan. Ginabendisyunan ko kamo nga makita ang mga panginahanglan sang mga ara sa inyo palibot kag pabakuron ang inyo mga ginapalangga. Tungod nadaog ni Jesucristo ang kalibutan, mahimo man ninyo ini. Ako nagapamatuod gid sini sa sagrado nga ngalan ni Jesucristo, amen.