“Families Are Eternal,” Liahona, Jan. 2023.
ຂ່າວສານປະຈຳເດືອນ Liahona, ເດືອນມັງກອນ 2023
ຄອບຄົວຢູ່ນຳກັນຊົ່ວນິລັນດອນ
ຄອບຄົວເປັນໜ່ວຍພື້ນຖານຂອງສັງຄົມ ແລະ ສາດສະໜາຈັກ. ສະມາຊິກຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍເຊື່ອວ່າຄອບຄົວສາມາດຢູ່ນຳກັນຊົ່ວນິລັນດອນ. ເຮົາເຮັດວຽກໃນການເພີ່ມຄວາມເຂັ້ມແຂງໃຫ້ແກ່ຄອບຄົວຂອງເຮົາຢູ່ໃນໂລກນີ້. ເຮົາຍັງມີສັດທາວ່າເຮົາສາມາດຮັບພອນຂອງຄອບຄົວນິລັນດອນໄດ້.
ຄອບຄົວຂອງພຣະເຈົ້າ
ທຸກຄົນລ້ວນແລ້ວແຕ່ເປັນບຸດ ຫລື ທິດາທາງວິນຍານຂອງພຣະບິດາມານດາເທິງສະຫວັນ. ເຮົາທຸກຄົນເປັນພາກສ່ວນໜຶ່ງໃນຄອບຄົວຂອງພຣະເຈົ້າ. ເຮົາທຸກຄົນມີ ທຳມະຊາດແຫ່ງສະຫວັນ ແລະ ຈຸດໝາຍປາຍທາງທີ່ສູງສົ່ງ. ຖ້າເຮົາດຳລົງຊີວິດຢ່າງຊອບທຳ, ເຮົາຈະສາມາດກັບຄືນໄປຢູ່ກັບພຣະບິດາເທິງສະຫວັນຂອງເຮົາ ຊຶ່ງເປັນພາກສ່ວນໜຶ່ງໃນຄອບຄົວຂອງພຣະອົງຕະຫລອດໄປ.
ຮູບຖ່າຍງານແຕ່ງ ໂດຍ ໂຈເຊັບ ຄາລູບາ
ຄອບຄົວນິລັນດອນ
ເມື່ອຊາຍ ແລະ ຍິງແຕ່ງງານກັນໃນພຣະວິຫານ ແລະ ຮັກສາ ພັນທະສັນຍາ ຂອງເຂົາເຈົ້າ, ການແຕ່ງງານຂອງເຂົາເຈົ້າຈະຄົງຢູ່ຊົ່ວນິລັນດອນ. ພິທີການພຣະວິຫານຢ່າງນີ້ເອີ້ນວ່າ ການຜະນຶກ. ເດັກນ້ອຍທີ່ເກີດມາຫລັງຈາກພໍ່ແມ່ຂອງເຂົາໄດ້ຜະນຶກເຂົ້າກັນແລ້ວ ແມ່ນຖືວ່າກຳເນີດໃນພັນທະສັນຍານັ້ນ. ເດັກນ້ອຍທີ່ເກີດມາກ່ອນທີ່ພໍ່ແມ່ຂອງເຂົາໄດ້ຜະນຶກເຂົ້າກັນ ກໍສາມາດຜະນຶກເຂົ້າກັບພໍ່ແມ່ໄດ້ໃນພຣະວິຫານ ເພື່ອວ່າເຂົາເຈົ້າຈະສາມາດເປັນຄອບຄົວດຽວກັນຕະຫລອດໄປ. ສະມາຊິກຂອງສາດສະໜາຈັກເຮັດການສຶບປະຫວັດຄອບຄົວ ແລະ ວຽກງານພຣະວິຫານ ເພື່ອວ່າເຂົາເຈົ້າຈະສາມາດຜະນຶກເຂົ້າກັບຄອບຄົວຂອງຕົນ ໄວ້ນຳກັນທຸກຊົ່ວອາຍຸຄົນ. ພອນຂອງຄອບຄົວນິລັນດອນສາມາດເປັນໄປໄດ້ຍ້ອນພຣະເຢຊູຄຣິດ ແລະ ການຊົດໃຊ້ຂອງພຣະອົງ.
ການແຕ່ງງານ
ການແຕ່ງງານລະຫວ່າງຊາຍ ແລະ ຍິງໄດ້ຖືກ ແຕ່ງຕັ້ງ ໄວ້ໂດຍພຣະເຈົ້າ. ພຣະກິດຕິຄຸນຂອງພຣະເຢຊູຄຣິດສິດສອນວ່າ ສາມີ ແລະ ພັນລະຍາຈະຕ້ອງຈົງຮັກພັກດີຕໍ່ກັນ ແລະ ຊື່ສັດຕໍ່ພັນທະສັນຍາການແຕ່ງງານຂອງເຂົາເຈົ້າ. ເຂົາເຈົ້າຕ້ອງຊື່ສັດໃນຄວາມຄິດ, ໃນຄຳວາຈາ, ແລະ ໃນການກະທຳ. ການແຕ່ງງານຄືການເປັນຫຸ້ນສ່ວນທີ່ເທົ່າທຽມກັນ, ແລະ ທັງຄູ່ຄວນໃຫ້ກຳລັງໃຈ, ປອບໂຍນ, ແລະ ຊ່ວຍເຫລືອຊຶ່ງກັນແລະກັນ.
ພໍ່ແມ່ ແລະ ລູກໆ
ພຣະເຈົ້າໄດ້ບັນຊາອາດາມ ແລະ ເອວາໃຫ້ມີລູກ. ຜູ້ນຳຂອງສາດສະໜາຈັກໄດ້ສິດສອນວ່າ ພຣະບັນຍັດຂໍ້ນີ້ຍັງນຳໃຊ້ຢູ່. ພໍ່ ແລະ ແມ່ເຮັດວຽກຮ່ວມກັນໃນການລ້ຽງດູລູກໆຂອງເຂົາເຈົ້າດ້ວຍຄວາມຮັກ ແລະ ຄວາມຊອບທຳ (ເບິ່ງ ຄຳສອນ ແລະ ພັນທະສັນຍາ 68:25–28). ລູກໆໄດ້ຖືກສິດສອນໃຫ້ເຄົາລົບ ແລະ ເຊື່ອຟັງພໍ່ແມ່ຂອງພວກເຂົາ (ເບິ່ງ ອົບພະຍົບ 20:12).
ການສິດສອນ ແລະ ການຮຽນຮູ້
ພໍ່ແມ່ສິດສອນລູກໆຂອງເຂົາເຈົ້າໃຫ້ຮັກພຣະເຈົ້າ ແລະ ເຊື່ອຟັງພຣະບັນຍັດຂອງພຣະອົງ. ຊີວິດຄອບຄົວເຮັດໃຫ້ເຮົາມີໂອກາດຮູ້ສຶກເຖິງຄວາມສຸກ ແລະ ຮຽນຮູ້ຄວາມອົດທົນ ແລະ ຄວາມບໍ່ເຫັນແກ່ຕົວ. ຄຸນລັກສະນະເຫລົ່ານີ້ຊ່ວຍໃຫ້ເຮົາກາຍເປັນເໝືອນດັ່ງພຣະເຈົ້າຫລາຍຂຶ້ນ ແລະ ກຽມເຮົາໃຫ້ດຳລົງຊີວິດຢ່າງມີຄວາມສຸກໃນຖານະຄອບຄົວຕະຫລອດໄປ.
ການເພີ່ມຄວາມເຂັ້ມແຂງໃຫ້ແກ່ຄອບຄົວ
ຕ້ອງມີການປະຕິບັດ, ອຸທິດຕົນ, ແລະ ອົດທົນໃນການສ້າງຄອບຄົວທີ່ປະສົບຜົນສຳເລັດ. ຫລັກທຳພຣະກິດຕິຄຸນເຊັ່ນ ສັດທາ, ການອະທິຖານ, ການໃຫ້ອະໄພ, ຄວາມຮັກ, ວຽກງານ, ແລະ ຄວາມມ່ວນຊື່ນທີ່ເປັນປະໂຫຍດສາມາດຊ່ວຍໃຫ້ເຮົາພົບຄວາມສຸກໃນຊີວິດຄອບຄົວໄດ້. ເຮົາຍັງສາມາດໄດ້ຮັບ ການເປີດເຜີຍ ສ່ວນຕົວເພື່ອໃຫ້ຮູ້ວິທີທີ່ຈະຊ່ວຍເພີ່ມຄວາມເຂັ້ມແຂງໃຫ້ແກ່ຄອບຄົວຂອງເຮົາໄດ້ແນວໃດ.
Christ’s Image [ຮູບພາບພຣະຄຣິດ], ໂດຍ ເຮັນຣິກ ຮ໊ອບແມນ
ພອນຕ່າງໆມີໃຫ້ສຳລັບທຸກຄົນ
ບໍ່ແມ່ນທຸກຄົນທີ່ມີໂອກາດໄດ້ເປັນສ່ວນໜຶ່ງຂອງຄອບຄົວໃນອຸດົມຄະຕິຢູ່ເທິງໂລກນີ້. ແຕ່ພຣະເຈົ້າໄດ້ສັນຍາວ່າ ທຸກຄົນຜູ້ທີ່ຮັກສາພຣະບັນຍັດຂອງພຣະອົງຈະໄດ້ຮັບພອນທຸກປະການຂອງຄອບຄົວນິລັນດອນ. ເຮົາສາມາດໄວ້ວາງໃຈໃນພຣະອົງ ແລະ ມີສັດທາຕາມເວລາຂອງພຣະອົງ.
© 2023 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly Liahona Message, January 2023. Language. 18904 331