ແຫລ່ງຂໍ້ມູນສຳລັບຊາວໜຸ່ມ ແລະ ເດັກນ້ອຍ

ພໍ່ແມ່ມີໜ້າທີ່ຮັບຜິດຊອບຕົ້ນຕໍທີ່ຈະສິດສອນລູກໆຂອງຕົນກ່ຽວກັບພຣະເຢຊູຄຣິດ ແລະ ພຣະກິດຕິຄຸນຂອງພຣະອົງ. ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ມີອົງການ, ໂຄງການ, ແລະ ແຫລ່ງຂໍ້ມູນອື່ນໆເພື່ອຊ່ວຍເຫລືອພໍ່ແມ່ໃນຄວາມພະຍາຍາມຂອງພວກເຂົາ. ຮ່ວມກັນ, ພໍ່ແມ່, ຜູ້ນຳໃນສາດສະໜາຈັກ, ແລະ ໝູ່ເພື່ອນ ສາມາດຊ່ວຍໃຫ້ເດັກນ້ອຍ ແລະ ໄວລຸ້ນທຸກຄົນມາຫາພຣະຄຣິດໄດ້.

ຮູບຖ່າຍ ໂດຍ ເບັນ ຈອນສັນ

ປະຖົມໄວ

ປະຖົມໄວ ແມ່ນອົງການຂອງສາດສະໜາຈັກສຳລັບເດັກນ້ອຍອາຍຸ 18 ເດືອນ ຫາ 11 ປີ. ໃນປະຖົມໄວ, ເດັກນ້ອຍຮຽນຮູ້ກ່ຽວກັບພຣະເຢຊູຄຣິດ ແລະ ພຣະກິດຕິຄຸນຂອງພຣະອົງ ຜ່ານທາງບົດຮຽນ, ເພງ, ແລະ ກິດຈະກຳຕ່າງໆ. ປະຖົມໄວສາມາດຊ່ວຍໃຫ້ເດັກນ້ອຍຮູ້ສຶກເຖິງຄວາມຮັກຂອງພຣະເຈົ້າທີ່ມີຕໍ່ພວກເຂົາ.

ກຸ່ມຖານະປະໂລຫິດແຫ່ງອາໂຣນ ແລະ ຫ້ອງຮຽນຍິງໜຸ່ມ

ໃນເດືອນມັງກອນຂອງປີທີ່ເດັກນ້ອຍມີອາຍຸໄດ້ 12 ປີ, ພວກເຂົາຈະຍ້າຍຈາກປະຖົມໄວໄປຫາກຸ່ມຖານະປະໂລຫິດແຫ່ງອາໂຣນ (ສຳລັບຜູ້ຊາຍ) ຫລື ຫ້ອງຮຽນຍິງໜຸ່ມ (ສຳລັບຜູ້ຍິງ). ໃນກຸ່ມ ແລະ ໃນຫ້ອງຮຽນຂອງພວກເຂົາ, ຊາວໜຸ່ມສືບຕໍ່ເພີ່ມຄວາມເຂັ້ມແຂງໃຫ້ແກ່ປະຈັກພະຍານຂອງພວກເຂົາ ແລະ ຮັບໃຊ້ຜູ້ອື່ນ.

ໂຄງການເດັກ ແລະ ຊາວໜຸ່ມ

ໃນຊ່ວງໄວເຍົາຂອງພຣະອົງ, ພຣະເຢຊູຄຣິດໄດ້ຈະເລີນເຕີບໃຫຍ່ຂຶ້ນ “ໃນດ້ານສະຕິປັນຍາ ແລະ ໃນດ້ານຮ່າງກາຍ, ແລະ ເປັນທີ່ພໍພຣະໄທຕໍ່ພຣະເຈົ້າ ແລະ ຕໍ່ມະນຸດດ້ວຍ” (ລູກາ 2:52). ໂຄງການເດັກ ແລະ ຊາວໜຸ່ມ ຊ່ວຍໃຫ້ສະມາຊິກໜຸ່ມໃນສາດສະໜາຈັກຕິດຕາມຕົວຢ່າງຂອງພຣະຄຣິດ. ພວກເຂົາຮຽນຮູ້ ແລະ ເຕີບໃຫຍ່ໃນທຸກດ້ານຂອງຊີວິດ—ດ້ານວິນຍານ, ດ້ານສັງຄົມ, ດ້ານຮ່າງກາຍ, ແລະ ດ້ານສະຕິປັນຍາ.

ວາລະສານຂອງສາດສະໜາຈັກ

ວາລະສານຂອງສາດສະໜາຈັກສຳລັບເດັກນ້ອຍແມ່ນ ວາລະສານ Friend. For the Strength of Youth ແມ່ນວາລະສານສຳລັບຊາວໜຸ່ມ. ວາລະສານເຫລົ່ານີ້ລວມທັງ ເລື່ອງລາວ, ຄຳສອນ, ແລະ ກິດຈະກຳຕ່າງໆທີ່ມີຂຽນໄວ້ສຳລັບເດັກນ້ອຍ ແລະ ໄວລຸ້ນໂດຍສະເພາະ.

ປຶ້ມຄູ່ມື For the Strength of Youth

For the Strength of Youth: A Guide for Making Choices ສິດສອນຊາວໜຸ່ມກ່ຽວກັບຄວາມຈິງເລື່ອງພຣະກິດຕິຄຸນ. ມັນສິດສອນພວກເຂົາກ່ຽວກັບວິທີການຕັດສິນໃຈ ທີ່ຈະຊ່ວຍພວກເຂົາໃຫ້ຕິດຕາມພຣະເຢຊູຄຣິດ. ມັນຍັງລວມທັງຄຳຕອບຕໍ່ຄຳຖາມທີ່ຊາວໜຸ່ມອາດມີກ່ຽວກັບວິທີດຳລົງຊີວິດຕາມພຣະກິດຕິຄຸນນຳອີກ.

ຫ້ອງສະໝຸດພຣະກິດຕິຄຸນ

ຫ້ອງສະໝຸດພຣະກິດຕິຄຸນມີແຫລ່ງຂໍ້ມູນດິຈິຕັນຫລາຍໆຢ່າງ, ລວມທັງວິດີໂອ, ເພງ, ເລື່ອງລາວພຣະຄຳພີ, ແລະ ກິດຈະກຳຕ່າງໆ. ມັນຍັງລວມທັງແຫລ່ງຂໍ້ມູນເພື່ອຊ່ວຍເຫລືອພໍ່ແມ່ ແລະ ຜູ້ນຳ ໃນການສິດສອນຫລັກທຳຂອງພຣະກິດຕິຄຸນອີກດ້ວຍ. ແຫລ່ງຂໍ້ມູນເຫລົ່ານີ້ມີຢູ່ທີ່ຫ້ອງສະໝຸດພຣະກິດຕິຄຸນທີ່ ChurchofJesusChrist.org ແລະ ໃນແອັບຫ້ອງສະໝຸດພຣະກິດຕິຄຸນ.

ກອງປະຊຸມ FSY

ເລີ່ມຈາກປີທີ່ພວກເຂົາມີອາຍຸໄດ້ 14 ປີ, ຊາວໜຸ່ມຈະຖືກເຊື້ອເຊີນໃຫ້ເຂົ້າຮ່ວມກອງປະຊຸມ ສຳລັບຄວາມເຂັ້ມແຂງຂອງຊາວໜຸ່ມ (FSY). ລາຍການເຫລົ່ານີ້ລວມທັງກິດຈະກຳ ແລະ ຫ້ອງຮຽນຕ່າງໆທີ່ຊ່ວຍເພີ່ມຄວາມເຂັ້ມແຂງໃຫ້ແກ່ສັດທາໃນພຣະເຢຊູຄຣິດ ແລະ ຊ່ວຍໃຫ້ຊາວໜຸ່ມເຕີບໂຕດ້ານວິນຍານ, ດ້ານສັງຄົມ, ດ້ານຮ່າງກາຍ, ແລະ ດ້ານສະຕິປັນຍາ.

ຈາກພຣະຄຳພີ

ເດັກນ້ອຍຈະຮູ້ສຶກເຖິງສັນຕິສຸກ ເມື່ອເຮົາສິດສອນເຂົາກ່ຽວກັບພຣະເຈົ້າ (ເບິ່ງ ເອຊາຢາ 54:13; 3 ນີໄຟ 22:13).

ພໍ່ແມ່ມີໜ້າທີ່ຮັບຜິດຊອບໃນການສິດສອນລູກໆຂອງພວກເຂົາໃຫ້ເຂົ້າໃຈພຣະກິດຕິຄຸນ (ເບິ່ງ ຄຳສອນ ແລະ ພັນທະສັນຍາ 68:25).

ພໍ່ແມ່ໄດ້ຮັບບັນຊາໃຫ້ລ້ຽງດູລູກໆຂອງພວກເຂົາ “ໃນຄວາມສະຫວ່າງ ແລະ ຄວາມຈິງ” (ຄຳສອນ ແລະ ພັນທະສັນຍາ 93:40).

ແຫລ່ງຂໍ້ມູນດິຈິຕັນສຳລັບເດັກນ້ອຍ

ເລື່ອງພຣະຄຳພີ (scripturestories.ChurchofJesusChrist.org): ຊອກຫາໜ້າລະບາຍສີ, ວິດີໂອ, ແລະ ເລື່ອງພຣະຄຳພີທີ່ມີຂຽນໄວ້ສຳລັບຜູ້ອ່ານທີ່ອາຍຸນ້ອຍ.

ວິດີໂອ (ChurchofJesusChrist.org/children/videos): ເບິ່ງວິດີໂອສຳລັບ ແລະ ກ່ຽວກັບເດັກນ້ອຍ.

ບ່ອນເກັບກຳສຳລັບເດັກນ້ອຍໃນຫ້ອງສະໝຸດພຣະກິດຕິຄຸນ: ຢູ່ໃນແອັບ ແລະ ຢູ່ທີ່ ChurchofJesusChrist.org, ບ່ອນເກັບກຳໃນຫ້ອງສະໝຸດພຣະກິດຄຸນ ກ້ອງຫົວຂໍ້ “ເດັກນ້ອຍ” ປະກອບດ້ວຍ ເພງ, ວິດີໂອ, ເລື່ອງລາວ, ແລະ ກິດຈະກຳອື່ນໆ.

ຊອກຫາໄດ້ຕື່ມ

ຖ້າຫາກທ່ານມີຄຳຖາມ ກ່ຽວກັບແຫລ່ງຂໍ້ມູນຂອງສາດສະໜາຈັກສຳລັບເດັກນ້ອຍ ແລະ ຊາວໜຸ່ມ, ທ່ານສາມາດເວົ້າລົມກັບອ້າຍນ້ອງ ຫລື ເອື້ອຍນ້ອງຜູ້ປະຕິບັດສາດສະໜາກິດຂອງທ່ານ, ຜູ້ນຳໃນຫວອດ ຫລື ສາຂາຂອງທ່ານ, ຫລື ຜູ້ສອນສາດສະໜາໄດ້. ທ່ານຍັງສາມາດຊອກຫາຫລາຍໆແຫລ່ງຂໍ້ມູນໄດ້ທີ່ ChurchofJesusChrist.org.

© 2023 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly Liahona Message, February 2023. Language. 18910 331