ເຮົາຈຳເປັນຕ້ອງດີພ້ອມຕອນນີ້ບໍ?

ໂດຍ ແອວເດີ ແຈັບຟະຣີ ອາ ຮໍແລນ

ແຫ່ງກຸ່ມອັກຄະສາວົກສິບສອງ

ຈາກ ຄໍາປາໄສຂອງກອງປະຊຸມໃຫຍ່ສາມັນ ເດືອນຕຸລາ 2017.

ພຣະຄຳພີໄດ້ຖືກຂຽນໄວ້ເພື່ອ ເປັນພອນ ແລະ ຊຸກຍູ້ ເຮົາ, ແລະ ມັນກໍເປັນແນວນັ້ນແທ້. ແຕ່ບາງຄັ້ງທ່ານເຄີຍສັງເກດບໍວ່າ ຂໍ້ຄວາມຈະເບິ່ງຄືເປັນສິ່ງເຕືອນເຮົາວ່າ ເຮົາຂາດຕົກບົກພ່ອງ ຢູ່? ຍົກຕົວຢ່າງ: “ດ້ວຍເຫດນັ້ນ ເຈົ້າທັງຫລາຍຕ້ອງເປັນຄົນດີທີ່ສຸດ ເໝືອນຢ່າງພຣະບິດາຂອງເຈົ້າ … ໃນສະຫວັນເປັນຜູ້ດີທີ່ສຸດ” (ມັດທາຍ 5:48). ດ້ວຍພຣະບັນຍັດນັ້ນ, ເຮົາຢາກກັບຄືນໄປນອນ ແລະ ເອົາຜ້າຫົ່ມປົກຫົວໄວ້. ເປົ້າໝາຍຊັ້ນສູງນັ້ນ ເບິ່ງຄືວ່າເກີນກວ່າທີ່ເຮົາຈະບັນລຸໄດ້. ແຕ່ພຣະຜູ້ເປັນເຈົ້າຈະບໍ່ເຄີຍປະທານພຣະບັນຍັດຂໍ້ໃດ ທີ່ພຣະອົງຮູ້ວ່າ ເຮົາບໍ່ສາມາດຮັກສາ.

“ແທ້ຈິງແລ້ວ, ຈົ່ງມາຫາພຣະຄຣິດ, ແລະ ຖືກເຮັດໃຫ້ເປັນ ຄົນດີພ້ອມໃນພຣະອົງ,” ໂມໂຣໄນໄດ້ອ້ອນວອນ. “ຈົ່ງຮັກພຣະເຈົ້າດ້ວຍສຸດພະລັງ, ຄວາມນຶກຄິດ, ແລະ ກຳລັງຂອງທ່ານ, ເມື່ອນັ້ນ … ໂດຍພຣະຄຸນຂອງພຣະອົງ, ທ່ານຈະດີພ້ອມໃນພຣະຄຣິດ” (ໂມໂຣໄນ 10:32; ເນັ້ນຄຳເນີ້ງ). ຄວາມຫວັງຢ່າງດຽວຂອງເຮົາສຳລັບຄວາມດີພ້ອມທີ່ແທ້ຈິງ ແມ່ນຂໍໃຫ້ສະຫວັນ ປະທານ ໃຫ້—ເຮົາບໍ່ສາມາດ “ຊອກຫາ” ມາໄດ້ດ້ວຍຕົວເອງ.

ຍົກເວັ້ນແຕ່ພຣະເຢຊູເທົ່ານັ້ນ, ບໍ່ເຄີຍມີການກະທຳໃດທີ່ປາດສະຈາກຂໍ້ບົກພ່ອງ ຢູ່ໃນໂລກທີ່ເຮົາອາໄສຢູ່ນີ້, ສະນັ້ນ ໃນຊ່ວງມະຕະນີ້ ຂໍໃຫ້ເຮົາພະຍາຍາມ ພັດທະນາຕົນເລື້ອຍໄປ ແລະ ຫລີກເວັ້ນຈາກຄວາມຄາດຫວັງທີ່ຫລາຍຈົນເກີນໄປ ສຳລັບຕົວເຮົາເອງ ແລະ ຄົນອື່ນ.

ຖ້າຫາກເຮົາ ພາກພຽນ, ແລ້ວ ໃນຈຸດໃດຈຸດໜຶ່ງໃນນິລັນດອນ ການຫລໍ່ຫລອມຂອງເຮົາຈະສຳເລັດ ແລະ ສົມບູນແບບ—ຊຶ່ງເປັນຄວາມໝາຍຢູ່ໃນພຣະຄຳພີໃໝ່ ຂອງຄຳວ່າ ດີພ້ອມ.

© 2023 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly For the Strength of Youth Message, February 2023. Language. 18910 331