“Faith in Jesus Christ,” Liahona, Apr. 2023.
ຂ່າວສານປະຈຳເດືອນ Liahona, ເດືອນເມສາ 2023
ສັດທາໃນພຣະເຢຊູຄຣິດ
Jesus Christ [ພຣະເຢຊູຄຣິດ], ໂດຍ ແຮຣີ ແອນເດີສັນ
ການມີສັດທາໃນພຣະເຢຊູຄຣິດເປັນຫລັກທຳຂໍ້ທຳອິດຂອງພຣະກິດຕິຄຸນ (ເບິ່ງ ຫລັກແຫ່ງຄວາມເຊື່ອ 1:4). ສັດທາຂອງເຮົາຈະຊ່ວຍໃຫ້ເຮົາເລືອກສິ່ງທີ່ຈະນຳພາເຮົາໄປຫາພຣະບິດາເທິງສະຫວັນ. ເຮົາສາມາດເຮັດວຽກງານໃນການເພີ່ມຄວາມເຂັ້ມແຂງໃຫ້ແກ່ສັດທາຂອງເຮົາ ຕະຫລອດຊີວິດຂອງເຮົາໄດ້.
ສັດທາຄືຫຍັງ?
ສັດທາຄືຄວາມເຊື່ອອັນໜັກແໜ້ນ ຫລື ໄວ້ວາງໃຈໃນບາງສິ່ງ. ການມີສັດທາແມ່ນລວມທັງການມີຄວາມຫວັງ ແລະ ຄວາມເຊື່ອວ່າສິ່ງນັ້ນເປັນຄວາມຈິງ, ເຖິງແມ່ນວ່າເຮົາບໍ່ສາມາດເບິ່ງເຫັນ ຫລື ເຂົ້າໃຈສິ່ງນັ້ນທັງໝົດກໍຕາມ (ເບິ່ງ ເຮັບເຣີ 11:1; ແອວມາ 32:21).
ລາຍລະອຽດຈາກ Christ and the Rich Young Ruler [ພຣະຄຣິດ ແລະ ເຈົ້ານາຍມະຫາເສດຖີໜຸ່ມ], ໂດຍ ເຮັນຣິກ ຮ໊ອບແມນ
ສັດທາມີສູນກາງຢູ່ທີ່ພຣະເຢຊູຄຣິດ
ເພື່ອນຳໄປສູ່ຄວາມລອດ, ສັດທາຂອງເຮົາຕ້ອງມີສູນກາງຢູ່ທີ່ພຣະເຢຊູຄຣິດໃນຖານະພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ຂອງເຮົາ. ການມີສັດທາໃນພຣະຄຣິດໝາຍເຖິງການມີຄວາມໝັ້ນໃຈໃນພຣະອົງ. ໝາຍເຖິງການເພິ່ງອາໄສພຣະອົງຢ່າງເຕັມທີ່—ໄວ້ວາງໃຈໃນອຳນາດ, ສະຕິປັນຍາ, ແລະ ຄວາມຮັກຂອງພຣະອົງ. ລວມທັງການເຊື່ອ ແລະ ການເຮັດຕາມຄຳສອນຂອງພຣະອົງເຊັ່ນກັນ.
ເພີ່ມພູນສັດທາຂອງເຮົາ
ສັດທາຄືຂອງປະທານຈາກພຣະເຈົ້າ, ແຕ່ເຮົາຕ້ອງສະແຫວງຫາ ແລະ ພະຍາຍາມຮັກສາມັນໃຫ້ແຂງແກ່ນ. ເຮົາສາມາດເພີ່ມພູນສັດທາຂອງເຮົາໂດຍການອະທິຖານ ແລະ ການສຶກສາພຣະຄຳພີ ແລະ ຄຳສອນຂອງສາດສະດາຍຸກສຸດທ້າຍ. ເຮົາຍັງເພີ່ມຄວາມເຂັ້ມແຂງໃຫ້ແກ່ສັດທາຂອງເຮົາຂະນະທີ່ເຮົາດຳລົງຊີວິດຢ່າງຊອບທຳ ແລະ ຮັກສາ ພັນທະສັນຍາ ຂອງເຮົາ.
ດຳລົງຊີວິດດ້ວຍສັດທາ
ສັດທາແມ່ນເປັນຫລາຍກວ່າການມີຄວາມເຊື່ອ. ມັນລວມທັງການປະຕິບັດຕາມຄວາມເຊື່ອນັ້ນດ້ວຍ. ເຮົາສະແດງສັດທາຂອງເຮົາໃນວິທີທີ່ເຮົາດຳລົງຊີວິດ. ສັດທາໃນພຣະເຢຊູຄຣິດກະຕຸ້ນໃຫ້ເຮົາເຮັດຕາມຕົວຢ່າງອັນດີພ້ອມຂອງພຣະອົງ. ສັດທາຂອງເຮົານຳພາເຮົາໃຫ້ເຊື່ອຟັງພຣະບັນຍັດ, ກັບໃຈຈາກບາບຂອງເຮົາ, ເຮັດ ແລະ ຮັກສາພັນທະສັນຍາຕ່າງໆ.
ສັດທາສາມາດນຳພາໄປສູ່ການມະຫັດສະຈັນ
ສັດທາທີ່ແທ້ຈິງນຳໄປສູ່ ການມະຫັດສະຈັນ, ທີ່ອາດລວມທັງພາບນິມິດ, ຄວາມຝັນ, ການປິ່ນປົວ, ແລະ ຂອງປະທານອື່ນໆທີ່ມາຈາກພຣະເຈົ້າ. ພຣະຄຳພີບັນຈຸດ້ວຍເລື່ອງລາວຢ່າງຫລວງຫລາຍຂອງຜູ້ຄົນທີ່ໄດ້ຮັບການມະຫັດສະຈັນຈາກພຣະຜູ້ເປັນເຈົ້າ ຍ້ອນສັດທາຂອງພວກເຂົາໃນພຣະອົງ. ເບິ່ງ “ການມະຫັດສະຈັນ” ໃນ ຄູ່ມືພຣະຄຳພີ ສຳລັບບາງຕົວຢ່າງ.
ສັດທາສາມາດນຳສັນຕິສຸກມາໃຫ້
ການມີສັດທາໃນພຣະເຈົ້າ ແລະ ໃນ ແຜນແຫ່ງຄວາມລອດ ຂອງພຣະອົງ ສາມາດເພີ່ມຄວາມເຂັ້ມແຂງໃຫ້ແກ່ເຮົາໃນຊ່ວງຂອງການທ້າທາຍຕ່າງໆຂອງເຮົາໄດ້. ສັດທາສາມາດເພີ່ມຄວາມເຂັ້ມແຂງໃຫ້ແກ່ເຮົາທີ່ຈະດຳເນີນໄປໜ້າ ແລະ ປະເຊີນກັບຄວາມຍາກລຳບາກດ້ວຍຄວາມກ້າຫານ. ເຖິງແມ່ນວ່າອະນາຄົດເບິ່ງຄືບໍ່ແນ່ນອນ, ແຕ່ສັດທາຂອງເຮົາໃນພຣະຜູ້ຊ່ວຍໃຫ້ລອດສາມາດມອບສັນຕິສຸກໃຫ້ເຮົາໄດ້.
ສັດທາໃນພຣະເຢຊູຄຣິດນຳພາໄປສູ່ຄວາມລອດ
ການໃຊ້ສັດທາໃນພຣະຄຣິດຈະນຳພາໄປສູ່ຄວາມລອດຂອງເຮົາ. ພຣະຄຣິດໄດ້ກະກຽມວິທີທາງໄວ້ໃຫ້ເຮົາເພື່ອຈະໄດ້ຮັບຊີວິດນິລັນດອນ. ຂະນະທີ່ເຮົາດຳລົງຊິວິດດ້ວຍສັດທາຂອງເຮົາໃນພຣະອົງ, ເຮົາສາມາດໄດ້ຮັບການໃຫ້ອະໄພຈາກບາບຂອງເຮົາ ແລະ ກັບຄືນໄປຢູ່ກັບພຣະເຈົ້າອີກຄັ້ງ.
© 2023 ໂດຍ Intellectual Reserve, Inc. ສະຫງວນລິຂະສິດທຸກປະການ. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly Liahona Message, April 2023. Language. 19006 331