Ujumbe wa kila mwezi wa gazeti la Liahona, Juni 2023

Roho Mtakatifu Anaweza Kutusaidia

Roho Mtakatifu ni mshiriki wa tatu wa Uungu. Maandiko pia humwelezea Yeye kama Roho, Roho Mtakatifu au Mfariji. Tunapojifunza kusikiliza sauti Yake, Yeye atatushuhudia sisi juu ya Yesu Kristo na kutusaidia kujifunza kweli za injili.

Mshiriki wa Uungu

Baba wa Mbinguni, Yesu Kristo, na Roho Mtakatifu ndio Uungu. Wanatupenda na wanafanya kazi katika umoja ili kukamilisha ule mpango wa wokovu. Ingawa Baba wa Mbinguni na Yesu Kristo wanayo miili ya nyama na mifupa; Roho Mtakatifu hana. Yeye ni roho.

Shahidi wa Baba na Mwana.

Roho Mtakatifu anashuhudia juu ya Baba na Mwana (2 Nefi 31:18). Hii humaanisha kwamba sisi tunaweza kupokea ushuhuda juu ya Baba Yetu wa Mbinguni na Yesu Kristo kupitia Roho Mtakatifu.

Anashuhudia juu ya ukweli

Roho Mtakatifu anashuhuda juu ya ukweli wote. Yeye atatusaidia sisi kujua kwamba injili—ikijumlisha mpango wa wokovu, amri za Mungu, Urejesho, na Upatanisho wa Yesu Kristo—ni kweli. Yeye ataimarisha ushuhuda wetu tunapoendelea kusali, kushika amri, na kujifunza injili.

Hutuongoza na Kutulinda

Roho Mtakatifu anaweza kutuongoza katika maamuzi yetu na kutulinda kutokana na hatari ya kimwili na kiroho. Yeye atatusaidia kupata majibu ya maswali yetu kama tutasali na kujaribu kufanya kilicho sahihi. Yeye daima atatuongoza “kufanya mema” (Mafundisho na Maagano 11:12).

Hutufariji

Roho Mtakatifu wakati mwingine anaitwa kama “Mfariji” (Yohana 14:26). Yeye anaweza akatujaza “matumaini na upendo mkamilifu” (Moroni 8:26) tunapokuwa na mashaka, huzuni, au tunapokuwa waoga. Wakati Anapotusaidia kuhisi upendo wa Mungu, tunaweza kushinda kukatishwa tamaa na kuweza kuimarishwa katika majaribu yetu.

Kipawa cha Roho Mtakatifu

Baada ya kuwa tumebatizwa, tunapokea kipawa cha Roho Mtakatifu katika ibada inayoitwa uthibitisho. Mara tupokeapo kipawa hiki, ndipo tunapokuwa na ushirika wa kudumu wa Roho Mtakatifu ilimradi tunaendelea kuishi kwa uadilifu.

Kielelezo na J. Kirk Richards

Namna Tunavyomsikia Roho Mtakatifu

Roho Mtakatifu anawasiliana na watu katika njia tofauti. Hizi zinaweza kujumuisha njia za amani, hisia zenye kufariji au tambuzi kuhusu kitu gani cha kusema au kufanya. Tunaposali kwa ajili ya mwongozo na kusikiliza misukumo Yake, tunaweza kujua jinsi gani Yeye anaongea na sisi.

Kutoka katika Maandiko

Roho Mtakatifu atakufundisha mambo yote (ona Yohana 14:26).

Unaweza kujua ukweli kupitia Roho Mtakatifu (ona Moroni 10:5).

Roho Mtakatifu anaweza kusema nawe katika akili yako na katika moyo wako (ona Mafundisho na Maagano 8:2).

Maneno ya Kukumbuka

Mpango wa wokovu: mpango wa Mungu kuwasaidia watoto Wake kuwa kama Yeye na kurejea Kwake.

Ushuhuda: ushahidi wa kiroho kwamba kitu fulani ni cha kweli.

Ibada: tendo takatifu, linalofanywa kwa mamlaka ya ukuhani.

Gundua Zaidi

Kama una maswali kuhusu Roho Mtakatifu, unaweza kujifunza maandiko, mahubiri ya mkutano mkuu na nyenzo nyinginezo katika Maktaba ya Injili (kwenye ChurchofJesusChrist.org au katika programu ya simu ya mkononi). Unaweza pia kuzungumza na akina kaka au akina dada watumishi, viongozi wako wa kata au tawi au wamisionari.

© 2023 na Intellectual Reserve, Inc. Haki zote zimehifadhiwa. Limepigwa chapa Marekani. Idhini ya Kingereza: 6/19. Idhini ya kutafsiri: 6/19. Tafsiri ya Monthly Liahona Message, April 2023. Language. 19026 743