“Self-Reliance Strengthens Us,” Liahona, Aug. 2023.
ຂ່າວສານປະຈຳເດືອນ Liahona, ເດືອນສິງຫາ 2023
ການກຸ້ມຕົນເອງເຮັດໃຫ້ເຮົາເຂັ້ມແຂງຂຶ້ນ
ການກຸ້ມຕົນເອງໝາຍຄວາມວ່າ ເຮົາສາມາດດູແລຄວາມຕ້ອງການຂອງຕົນເອງ ແລະ ຂອງຄອບຄົວຂອງເຮົາໄດ້. ເມື່ອເຮົາກຸ້ມຕົນເອງ, ເຮົາກໍຈະສາມາດຮັບໃຊ້ພຣະຜູ້ເປັນເຈົ້າ ແລະ ເບິ່ງແຍງຄົນອື່ນໄດ້ດີຍິ່ງຂຶ້ນ. ແຕ່ການກຸ້ມຕົນເອງບໍ່ໄດ້ໝາຍຄວາມວ່າ ເຮົາຕ້ອງປະເຊີນກັບຄວາມທ້າທາຍຂອງເຮົາໂດຍລຳພັງ. ເຮົາສາມາດຂໍຄວາມຊ່ວຍເຫລືອຈາກໝູ່ເພື່ອນ, ຄອບຄົວ, ສະມາຊິກຫວອດ ຫລື ສາຂາ, ແລະ ມືອາຊີບ ເມື່ອເຮົາຕ້ອງການ.
ຫລັກທຳຂອງການກຸ້ມຕົນເອງ
ການກາຍເປັນຄົນກຸ້ມຕົນເອງຮຽກຮ້ອງໃຫ້ມີການສຶກສາ, ການເຊື່ອຟັງ, ແລະ ການເຮັດວຽກໜັກ. ເຮົາພະຍາຍາມດູແລຕົນເອງໃຫ້ດີທີ່ສຸດ, ແລະ ເຮົາສາມາດຂໍຄວາມຊ່ວຍເຫລືອຈາກຄົນອື່ນໄດ້ ເມື່ອຈຳເປັນ. ເຖິງຢ່າງໃດກໍຕາມ, ເພື່ອທີ່ຈະກາຍເປັນຄົນກຸ້ມຕົນເອງຢ່າງແທ້ຈິງ, ເຮົາຕ້ອງຮຽນຮູ້ທີ່ຈະມີສັດທາໃນພຣະເຢຊູຄຣິດເຊັ່ນກັນ. ຫລັງຈາກນັ້ນ ຂະນະທີ່ເຮົາເຮັດວຽກເພື່ອທີ່ຈະຊ່ວຍຕົນເອງ, ພຣະອົງຈະເພີ່ມຄວາມເຂັ້ມແຂງໃຫ້ເຮົາ.
ການກຸ້ມຕົນເອງທາງວິນຍານ
ເຮົາສາມາດສ້າງການກຸ້ມຕົນເອງທາງວິນຍານໄດ້ໂດຍການພະຍາຍາມເພີ່ມຄວາມເຂັ້ມແຂງໃຫ້ແກ່ປະຈັກພະຍານຂອງເຮົາເຖິງພຣະເຢຊູຄຣິດ. ເຮົາເຮັດສິ່ງນີ້ເມື່ອເຮົາອະທິຖານ, ສຶກສາພຣະຄຳພີ, ໄປໂບດ, ເຊື່ອຟັງພຣະບັນຍັດ, ແລະ ເຮັດສິ່ງອື່ນໆທີ່ເຮັດໃຫ້ເຮົາເຂົ້າໃກ້ພຣະຄຣິດຫລາຍຂຶ້ນ. ການທີ່ຮູ້ວ່າ ພຣະອົງເຕັມພຣະໄທທີ່ຈະຊ່ວຍເຫລືອເຮົາ ຈະເຮັດໃຫ້ເຮົາມີສັດທາທີ່ຈະເຂັ້ມແຂງ ແມ່ນແຕ່ໃນຍາມທີ່ຊີວິດຍາກລຳບາກ.
ການກຸ້ມຕົນເອງທາງໂລກ
ການກຸ້ມຕົນເອງທາງໂລກແມ່ນລວມທັງການທີ່ສາມາດດູແລຄວາມຕ້ອງການທາງຮ່າງກາຍຂອງຕົນເອງ ແລະ ຂອງຄອບຄົວຂອງເຮົາ. ນີ້ລວມທັງອາຫານ, ບ່ອນຢູ່ອາໄສ, ສຸຂະພາບ, ແລະ ຄວາມຕ້ອງການອື່ນໆ. ເຮົາເຮັດສິ່ງນີ້ໂດຍການມີການສຶກສາທີ່ດີ, ການຮຽນຮູ້ ຫລື ການເສີມຂະຫຍາຍທັກສະທີ່ຈຳເປັນ, ການເຮັດວຽກໜັກ, ການໃຊ້ເວລາຢ່າງສະຫລາດ, ແລະ ການບໍລິຫານເງິນຂອງເຮົາໃຫ້ດີ.
ການກຸ້ມຕົນເອງທາງອາລົມ
ການກຸ້ມຕົນເອງທາງອາລົມ ແມ່ນຄວາມສາມາດໃນການປັບຕົວຕໍ່ຄວາມທ້າທາຍທາງອາລົມດ້ວຍຄວາມກ້າຫານ ແລະ ສັດທາ. ເຮົາທຸກຄົນຕ່າງກໍມີຄວາມທ້າທາຍ ແລະ ຄວາມຜ່າຍແພ້. ຂອບຄຸນສຳລັບພຣະກິດຕິຄຸນ, ເຮົາຈຶ່ງຮູ້ວ່າ ເຮົາສາມາດເລືອກວິທີທີ່ຈະຕອບສະໜອງຕໍ່ສິ່ງເຫລົ່ານີ້. ການຕອບສະໜອງດ້ວຍສັດທາໃນພຣະຜູ້ເປັນເຈົ້າ ເພີ່ມຄວາມສາມາດໃນການປະເຊີນກັບຄວາມຍາກລຳບາກອື່ນໆດ້ວຍຄວາມຫວັງທີ່ຫລາຍຍິ່ງຂຶ້ນ.
ການສຶກສາ
ເຮົາຄວນຮຽນຮູ້ຢູ່ສະເໝີ. ພຣະເຈົ້າຕ້ອງການໃຫ້ເຮົາໃຫ້ຄວາມຮູ້ແກ່ຈິດໃຈຂອງເຮົາ ແລະ ພັດທະນາທັກສະຂອງເຮົາຕະຫລອດທັງຊີວິດນີ້ ແລະ ໃນຊີວິດໜ້າ. ຍິ່ງເຮົາຮຽນຮູ້ຫລາຍເທົ່າໃດ, ເຮົາກໍຈະຍິ່ງສາມາດເປັນອິດທິພົນດີກວ່າເກົ່າເພື່ອຄວາມດີ ແລະ ຈັດຫາໃຫ້ຕົນເອງ, ຄອບຄົວຂອງເຮົາ, ແລະ ຄົນທີ່ຂັດສົນ.
ພອນຂອງການກຸ້ມຕົນເອງ
ສາດສະດາໄດ້ສິດສອນວ່າ ເມື່ອເຮົາພັດທະນາການກຸ້ມຕົນເອງຂອງເຮົາ, ເຮົາຈະໄດ້ຮັບພອນແຫ່ງຄວາມຫວັງ ແລະ ສັນຕິສຸກທີ່ຫລາຍຍິ່ງຂຶ້ນ. ເຮົາຈະສາມາດຊ່ວຍເຫລືອຄອບຄົວຂອງເຮົາ ແລະ ຄົນອື່ນທີ່ຂັດສົນໄດ້. ແລະ ເຮົາຈະໄດ້ຮັບພອນໂດຍການມີໂອກາດຫລາຍຂຶ້ນ ແລະ ມີຄວາມສາມາດໃນການສືບຕໍ່ກ້າວໜ້າຕໍ່ໄປ.
ແຫລ່ງຊ່ວຍເຫລືອຂອງສາດສະໜາຈັກ
ສະເຕກຂອງທ່ານອາດສະເໜີກຸ່ມການກຸ້ມຕົນເອງ. ກຸ່ມເຫລົ່ານີ້ສາມາດສິດສອນທ່ານກ່ຽວກັບຫລັກທຳຂອງການກຸ້ມຕົນເອງ ແລະ ທັກສະເຊັ່ນ ການບໍລິຫານເງິນຂອງທ່ານເອງ ຫລື ການຊອກຫາວຽກເຮັດງານທຳທີ່ດີກວ່າ. ທ່ານສາມາດຊອກຫາແຫລ່ງຊ່ວຍເຫລືອທີ່ກ່ຽວຂ້ອງໄດ້ໃນຫ້ອງສະໝຸດພຣະກິດຕິຄຸນ. ເລືອກ “Books and Lessons” ແລະ ຈາກນັ້ນ “Self-Reliance.”
© 2023 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly Liahona Message, August 2023. Language. 19046 331