“Seek Understanding,” For the Strength of Youth, Aug. 2023.
ຂ່າວສານປະຈຳເດືອນ For the Strength of Youth, ເດືອນສິງຫາ 2023
ສະແຫວງຫາຄວາມເຂົ້າໃຈ
ດັດແປງຈາກ ຄຳປາໄສຂອງກອງປະຊຸມໃຫຍ່ສາມັນ ເດືອນເມສາ 2019.
ພາບປະກອບ ໂດຍ ເອັມມະລີ ໂຈນສ໌
ຈຸດປະສົງຂອງເຮົາໃນຂະນະທີ່ເຮົາສະແຫວງຫາຄວາມເຂົ້າໃຈກ່ຽວກັບພຣະກິດຕິຄຸນຂອງພຣະເຢຊູຄຣິດຕ້ອງແມ່ນເພື່ອເພີ່ມສັດທາໃນພຣະເຈົ້າ ແລະ ໃນແຜນແຫ່ງຄວາມສຸກທີ່ສູງສົ່ງຂອງພຣະອົງ ແລະ ໃນພຣະເຢຊູຄຣິດ ແລະ ການເສຍສະລະຊົດໃຊ້ຂອງພຣະອົງ ແລະ ເພື່ອບັນລຸ ການປ່ຽນໃຈເຫລື້ອມໃສ ທີ່ຍືນຍາວ. ສັດທາທີ່ເພີ່ມຂຶ້ນ ແລະ ການປ່ຽນໃຈເຫລື້ອມໃສເຊັ່ນນັ້ນ ຈະຊ່ວຍໃຫ້ເຮົາເຮັດ ແລະ ຮັກສາພັນທະສັນຍາກັບພຣະເຈົ້າ, ຊຶ່ງຈະເສີມສ້າງຄວາມປາດຖະໜາຂອງເຮົາໃນການຕິດຕາມພຣະເຢຊູ ແລະ ການສ້າງການປ່ຽນແປງທາງວິນຍານໃນຕົວເຮົາ. ການປ່ຽນແປງນີ້ຈະນຳຊີວິດທີ່ມີຄວາມສຸກຂຶ້ນ, ມີປະສິດທິພາບຂຶ້ນ, ແລະ ມີສຸຂະພາບດີຂຶ້ນມາສູ່ເຮົາ ແລະ ຊ່ວຍໃຫ້ເຮົາຮັກສາທັດສະນະນິລັນດອນ.
ເພື່ອທີ່ຈະບັນລຸສິ່ງນີ້, ເຮົາຕ້ອງສະໜິດໃນພຣະເຢຊູຄຣິດໂດຍ ການດື່ມດ່ຳ ໃນພຣະຄຳພີ, ປິຕິຍິນດີໃນມັນ, ຮຽນຮູ້ຄຳສອນຂອງພຣະອົງ, ແລະ ພະຍາຍາມຢ່າງໜັກເພື່ອທີ່ຈະດຳລົງຊີວິດຕາມວິທີທີ່ພຣະອົງໄດ້ດຳລົງ. ເມື່ອນັ້ນ ເຮົາຈະໄດ້ຮູ້ຈັກພຣະອົງ ແລະ ຮູ້ຈັກສຸລະສຽງຂອງພຣະອົງ, ໂດຍຮູ້ວ່າ ເມື່ອເຮົາມາຫາພຣະອົງ ແລະ ເຊື່ອໃນພຣະອົງ, ເຮົາຈະບໍ່ມີວັນຢາກເຂົ້າ ຫລື ຫິວນໍ້າຈັກເທື່ອ (ເບິ່ງ ໂຢຮັນ 6:35).
ສິ່ງນັ້ນບໍ່ເກີດຂຶ້ນໂດຍບັງເອີນ. ການປັບ ຕົວເຮົາໃຫ້ເຂົ້າກັບອິດທິພົນສູງສຸດແຫ່ງຄວາມເປັນພຣະເຈົ້ານັ້ນ ບໍ່ແມ່ນເລື່ອງງ່າຍ; ມັນຮຽກຮ້ອງໃຫ້ມີການເອີ້ນຫາພຣະເຈົ້າ ແລະ ການຮຽນຮູ້ວິທີນຳພຣະກິດຕິຄຸນຂອງພຣະເຢຊູຄຣິດມາສູ່ສູນກາງຂອງຊີວິດຂອງເຮົາ.
ຂ້າພະເຈົ້າເປັນພະຍານຕໍ່ທ່ານວ່າ ເມື່ອເຮົາສະແຫວງຫາທີ່ຈະເຂົ້າໃຈພຣະກິດຕິຄຸນຂອງພຣະເຢຊູຄຣິດ ຢ່າງເອົາຈິງເອົາຈັງ, ເຕັມໃຈ, ແນ່ວແນ່, ແລະ ຈິງໃຈ ແລະ ສິດສອນກັນແລະກັນດ້ວຍຈຸດປະສົງທີ່ແທ້ຈິງ ແລະ ພາຍໃຕ້ອິດທິພົນຂອງພຣະວິນຍານ, ແລ້ວຄຳສອນເຫລົ່ານີ້ອາດປ່ຽນໃຈ ແລະ ດົນໃຈໃຫ້ມີຄວາມປາດຖະໜາໃນການດຳລົງຊີວິດຕາມຄວາມຈິງຂອງພຣະເຈົ້າ.
© 2023 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly For the Strength of Youth Message, August 2023. Language. 19046 331