Bulanan nga Mensahe sa Liahona, Septyembre 2023

Pag-atipan sang mga Nagakinahanglan

He Healed Many of Diverse Diseases [Nagpang-ayo Sia sang Madamo nga Nagkalain-lain nga mga Balatian], ni J. Kirk Richards, indi pwede kopyahon

Bilang mga miyembro sang Ang Simbahan ni Jesucristo sang mga Santos sa Ulihing mga Adlaw, ginasunod naton ang tudlo sang Ginuo nga atipanon ang mga nagakinahanglan. Ginaatipan naton ang iban paagi sa pagserbisyo sa ila, sa pagbulig sa ila nga mangin self-reliant, kag paghatag sang kon ano ang may ara kita.

Ang Ehemplo ni Jesucristo

Si Jesucristo nagpalangga, nagpaumpaw, kag nagpangamuyo para mga nakapalibot sa Iya. “Naglibot [Sia] nga nagahimo sang kaayohan” (Mga Binuhatan 10:38). Sarang naton sundon ang Iya ehemplo paagi sa pagpalangga, pagpaumpaw, pagserbisyo, kag pagpangamuyo para sa mga nakapalibot sa aton. Pwede gid kita pirme magpangita sang paagi agud makabulig sa iban.

Ministering

Ang tinaga nga ministering ginagamit sa balaan nga kasulatan kag sa Simbahan sang Ginuo para ilaragway kon paano naton atipanon ang kada isa. Ang mga nagakapot sang priesthood gina-assign bilang ministering brother sa tagsa ka indibidwal ukon pamilya sa ward ukon branch. Mga ministering sister ang gina-assign sa tagsa ka hamtong nga babayi. Ginasiguro sang mga ministering brother kag sister nga ang tanan nga miyembro sang Simbahan ginadumdom kag ginaatipan.

Pagbulig sa Iban nga Magtindog sa Ila Kaugalingon (Self-Reliant)

Mabuligan naton ang mga miyembro sang pamilya kag mga abyan nga magtindog sa ila kaugalingon paagi sa pagpaisog sa ila nga magpangita sang mas malawig nga solusyon sa ila mga problema. Dayon suportahan naton sila nga gihuon ang ila mga handum. Magpangita sang dugang nga impormasyon parte sa self-reliance sa Agosto 2023 nga Liahona Gospel Basics article.

Pagserbisyo sa Iban

Kadamo sang pamaagi nga makaserbisyo kita sa mga ara sa aton palibot kag mabuligan sila sabat sang ila temporal, espiritwal, kag emosyunal nga mga kinahanglanon. Ang paghibalo parte sa iban makabulig sa aton kon paano sila serbisyuhan sang mas maayo. Pwede man kita magpangamuyo para sa giya agud mahibal-an kon ano ang aton mahimo para kita makabulig.

Pagpaambit sang Kon Ano nga May-ara Kita

Pwede kita magserbisyo sa iban paagi sa pagpaambit sang kon ano nga ginbugay sang Dios sa aton. Halimbawa, pwede kita maghatag sang maalwan nga halad-puasa ukon magdonar sa Humanitarian Aid Fund sang Simbahan. Makaalagad man kita sa aton komunidad kag sa aton mga calling sa Simbahan.

Mga Katungdanan sang mga Lider sang Simbahan

Ang bishop ang nagadumala sa pag-atipan sadtong mga nagakinahanglan sa iya ward. Pwede niya gamiton ang kuwarta halin sa mga halad-puasa sa pagbulig sa mga miyembro nga nagakinahanglan. Ang iban nga mga lider, upod ang iya mga manuglaygay kag ang mga presidente sang Relief Society kag elders quorum, nagabulig sa mga miyembro sa pagpangita sang makuhaan sang ila mga kinahanglanon.

Mga Pagpanikasog sang Simbahan sa Paghatag sang Tawhanon nga Bulig

Ang Simbahan nagabulig sa mga tawo sa bilog nga kalibutan sa pagsabat sa mga emerhensya, mga proyekto sa komunidad, kag sa iban pa nga mga programa pareho sang limpyo nga tubig kag pagbakuna. Para sa dugang nga pagtuon, tan-awa sa Dallin H. Oaks, “Pagbulig sa mga Imol kag Nalisdan,” Liahona, Nob. 2022, 6–8.

Halin sa Balaan nga mga Kasulatan

“Ang Dios nagahigugma sa manughatag nga malipayon” (2 Mga Taga-Corinto 9:7).

Tudloan naton ang aton mga kabataan sa pagserbisyo sang mga nagakinahanglan (tan-awa sa Mosias 4:15–16).

Paumpawan naton ang iban kag buligan sila sa ila mga palas-anon (tan-awa sa Mosias 18:8–9).

Mga Dapat Tandaan

Calling: isa ka partikular nga responsibilidad sa pag-alagad sa Simbahan. Ang mga lider sang Simbahan nagapangayo sang inspirasyon para mahibal-an kon sin-o ang gusto sang Ginuo nga ila tawgon.

Mga halad-puasa: kuwarta nga aton ginahatag sa Simbahan kon kita magpuasa, nga katumbas sang kantidad nga aton magasto kuntani sa pagkaon samtang nagapuasa.

Nagasalig-sa-kaugalingon: ikasarang sa pag-atipan sa mga kinahanglanon sang aton kaugalingon kag sang aton pamilya.

Hibaloa sing Dugang

Kon may mga pamangkot kamo parte sa pag-atipan sang mga nagakinahanglan, pwede mo istoryahon ang imo mga ministering brother ukon sister, ang mga lider sang inyo ward, ukon branch, ukon ang mga misyonero. Makakita ka man sang mga pamulong-pulong sa pangkabilogan nga komperensya parte sa sining topiko kag iban pa nga balasahon sa Librarya sang Ebanghelyo (sa ChurchofJesusChrist.org ukon sa mobile app).

© 2023 by Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, September 2023. Language. 19047 861