Fanongonongo ʻe he Siasí ʻa e Fakamatala Fakamuimuitaha ki he Ngaahi Himí

ʻOku lolotonga palani ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ke tuku atu ʻa e Ngaahi Himí—ki he ʻApí mo e Siasí ʻi he lea faka-Pilitāniá, faka-Sipeiní, faka-Potukalí, mo e faka-Falaniseé ʻi he fakaʻosinga ʻo e 2026, pea ʻe toki muimui mai ha ngaahi lea fakafonua kehe.

ʻE ʻi he tohi himi foʻoú ha ngaahi himi ʻe 450 ki he 500 pea mo e hiva ʻa e fānaú. ʻE aʻu ki he ngaahi lea fakafonua ʻe 50 ʻe pulusi ʻi he 2030. ʻOku ʻuhinga ʻeni ʻe lotu fakataha ʻa e kāingalotu ʻo e Siasí ʻi he funga ʻo e māmaní mo e tohi himi tatau kuo fakatahatahaʻí, ʻa ia ʻoku fakafika tatau pē ʻi he ngaahi lea fakafonua ʻoku lahi taha hono fakaʻaongaʻi ʻi he Siasí.

Lolotonga iá, ʻe tukuange fakaʻilekitulōnika ʻe he Siasí ha ngaahi hiva foʻou ʻo kamata ʻi he konga ʻuluaki ʻo e 2024. ʻE lava ke fakaʻaongaʻi fakataha ia mo e ngaahi himí mo e ngaahi hivá ʻi he tohi himi mo e tohi hiva lolotonga ʻa e Siasí kuo pulusí. ʻE kau heni ha ngaahi hiva manakoa ʻo e Siasí naʻe faʻu hili ʻa e 1985 (hangē ko e “Faith in Every Footstep”), hiva naʻe ohi mei he ngaahi tui fakalotu kehé, pea mo ha niʻihi ʻo e ngaahi hiva foʻou ʻe 17,000 naʻe fakahū mai ʻe he kāingalotu ʻo e Siasí. Ko e lahi, kapau ʻoku ʻikai ko e kotoa ʻo e ngaahi hiva foʻou ko ʻeni ʻe tuku atu fakaʻilekitulōnika ki muʻá, ʻe toki fakakau atu ia ʻamuiange ki he Ngaahi Himí—ki he ʻApí mo e Siasí.