ʻE Lava ke Fakataimi-tēpileʻi ʻa e Ngaahi ʻApoinimeni Fakakulupu ki he Temipalé ʻi he ʻInitanetí

ʻE lava ʻa e Kāingalotú ʻi he taimí ni ʻo fakataimi-tēpileʻi ʻa e ngaahi ʻapoinimeni fakakulupu ki he ngaahi ouau fakafofonga kotoa pē ʻo fakaʻaongaʻi ʻa e polokalama ʻinitaneti ki he ngaahi ʻapoinimeni temipalé. Naʻe fakangofua pē ʻe he polokalamá kimuʻa ʻa e ngaahi ʻapoinimeni fakakulupu ki he papitaiso fakafofongá mo e ngaahi ouau silá.

ʻE hoko ʻa e polokalama foʻou ko ʻení ko ha tānaki atu hono talitali lelei ʻa e ngaahi fāmili mo e kaungāmeʻa ʻoku nau fie ō fakataha ki he temipalé. ʻOku kole ki he ngaahi kulupu lalahi ange hangē ko e ngaahi uōtí mo e siteikí ke hokohoko atu ʻenau fakatatalí ʻi he ʻīmeilí pe telefoní.

ʻI he taimi ʻoku fakataimi-tēpileʻi ai ha ʻapoinimeni, fakaʻilongaʻi ʻa e puha ʻoku fakahingoa ko e “kau fakaafe kehé” pea fakahū ʻa e tokolahi ʻo e kau mēmipa tangata mo fefine ʻe kau maí. ʻOku kehekehe ʻa e tokolahi taha ʻo e kulupú ʻi he temipalé pea ʻoku makatuʻunga ʻi he tokolahi ʻe malavá.

ʻE vakai ʻa e kau ngāue temipalé ki he ʻapoinimení ʻi he taimi ʻe vakaiʻi ai ʻa e kau fakaafé ʻi he tesi lekomení pea te nau fakahinohinoʻi ʻa e kau fakaafé ʻi heʻenau aʻu maí.