“For the Strength of Youth: The Savior’s Message to You,” For the Strength of Youth, Mar. 2024.

ຂ່າວສານປະຈຳເດືອນ For the Strength of Youth, ເດືອນມີນາ 2024

ສຳລັບຄວາມເຂັ້ມແຂງຂອງຊາວໜຸ່ມ: ຂ່າວສານຂອງພຣະຜູ້ຊ່ວຍໃຫ້ລອດເຖິງເຈົ້າ

ໂດຍ ແອວເດີ ດີເດີ ແອັຟ ອຸກດອບ

ແຫ່ງກຸ່ມອັກຄະສາວົກສິບສອງ

ຮູບພາບ

ດີເດີ ແອັຟ ອຸກດອບ

ຄູ່ມືນີ້ຈະຊ່ວຍໃຫ້ເຈົ້າເຊື່ອມຕໍ່ການເລືອກຂອງເຈົ້າເຂົ້າກັບພຣະເຢຊູຄຣິດ ແລະ ຄຳສອນຂອງພຣະອົງ.

ຮູບພາບ

ພຣະເຢຊູຄຣິດ

I Stand at the Door and Knock [ເຮົາຢືນເຄາະຢູ່ທີ່ປະຕູ], ໂດຍ ເຈ ເຄີກ ຣິເຈີດສ໌

ລອງຈິນຕະນາການເບິ່ງວ່າ ເຈົ້າກຳລັງຢູ່ໃນຄາລີເລສະໄໝບູຮານ, ເມື່ອ 2,000 ປີກ່ອນ. ເຈົ້າ ແລະ ໝູ່ເພື່ອນຂອງເຈົ້າໄດ້ຖືກເຊີນໃຫ້ໄປຮ່ວມກອງປະຊຸມໃຫ້ຄຳດົນໃຈສຳລັບຊາວໜຸ່ມຢູ່ທີ່ທຳມະສາລາໃນທ້ອງຖິ່ນ, ໂດຍມີຜູ້ປາໄສຮັບເຊີນພິເສດ: ເຢຊູໄທນາຊາເຣັດ. ແລະ ເມື່ອເຖິງຈຸດໜຶ່ງໃນຂ່າວສານຂອງພຣະອົງ, ພຣະເຢຊູເຊື້ອເຊີນຊາວໜຸ່ມໃນກຸ່ມຜູ້ຟັງໃຫ້ຖາມຄຳຖາມພຣະອົງ.

ເຈົ້າຄິດວ່າເຈົ້າອາດໄດ້ຍິນຄຳຖາມປະເພດໃດ?

ຂ້າພະເຈົ້າເດົາວ່າ ບາງຄຳຖາມຈະສະທ້ອນເຖິງວັດທະນະທຳ ແລະ ສະພາບການຂອງສະໄໝນັ້ນ. ແຕ່ຂ້າພະເຈົ້າເຊື່ອຢ່າງແທ້ຈິງວ່າ ຫລາຍໆຄຳຖາມ ໜ້າຈະຄ້າຍຄືກັບຄຳຖາມທີ່ເຮົາມີໃນທຸກວັນນີ້.

ຍົກຕົວຢ່າງ, ໃນພຣະຄຳພີໃໝ່, ຜູ້ຄົນໄດ້ຖາມພຣະຜູ້ຊ່ວຍໃຫ້ລອດຄຳຖາມດັ່ງນີ້:

ຂ້ານ້ອຍຈະຕ້ອງເຮັດແນວໃດ ຈຶ່ງຈະໄດ້ຮັບຊີວິດນິລັນດອນ?¹
ຂ້ານ້ອຍໄດ້ເປັນທີ່ຍອມຮັບແລ້ວບໍ? ຂ້ານ້ອຍເປັນສ່ວນໜຶ່ງແລ້ວບໍ?²
ຖ້າພີ່ນ້ອງຂອງຂ້ານ້ອຍເຮັດຜິດຕໍ່ຂ້ານ້ອຍ, ຂ້ານ້ອຍຕ້ອງຍົກໂທດໃຫ້ເຂົາຈັກເທື່ອ?³
ຈະເກີດຫຍັງຂຶ້ນຕໍ່ໂລກນີ້ໃນອະນາຄົດ? ຂ້ານ້ອຍຈະປອດໄພບໍ່?⁴
ພຣະອົງສາມາດປິ່ນປົວຄົນທີ່ຂ້ານ້ອຍຮັກໄດ້ບໍ່?⁵
ແມ່ນຫຍັງຄືຄວາມຈິງ?⁶
ຂ້ານ້ອຍຈະຮູ້ໄດ້ແນວໃດວ່າຂ້ານ້ອຍກຳລັງໄປໃນທາງທີ່ຖືກຕ້ອງ?⁷

ເຮົາທຸກຄົນບໍ່ສົງໄສໃນສິ່ງດຽວກັນເປັນບາງຄັ້ງຄາວບໍ? ຕະຫລອດຫລາຍສັດຕະວັດທີ່ຜ່ານມາ, ຄຳຖາມບໍ່ໄດ້ມີການປ່ຽນແປງຫລາຍ. ແລະ ຄວາມເຫັນອົກເຫັນໃຈຂອງພຣະຜູ້ຊ່ວຍໃຫ້ລອດຕໍ່ຜູ້ທີ່ຖາມຄຳຖາມກໍບໍ່ໄດ້ປ່ຽນແປງເຊັ່ນກັນ. ພຣະອົງຮູ້ຈັກວ່າ ຊີວິດຊ່າງໜ້າໜັກໃຈ ແລະ ສັບສົນພຽງໃດ. ພຣະອົງຮູ້ວ່າ ມັນງ່າຍຫລາຍສໍ່າໃດທີ່ຈະຫລົງທາງ. ພຣະອົງຮູ້ວ່າ ບາງເທື່ອເຮົາກໍກັງວົນກ່ຽວກັບອະນາຄົດ. ແລະ ພຣະອົງກ່າວກັບເຈົ້າ ແລະ ຂ້າພະເຈົ້າ, ດັ່ງທີ່ພຣະອົງໄດ້ກ່າວກັບຜູ້ຕິດຕາມຂອງພຣະອົງເມື່ອດົນນານມາແລ້ວວ່າ:

“ຢ່າໃຫ້ໃຈຂອງເຈົ້າທັງຫລາຍວຸ້ນວາຍໄປ.”⁸
“ເຮົານີ້ແຫລະ ເປັນທາງນັ້ນ [ແລະ] ເປັນຄວາມຈິງ.”⁹
“ຈົ່ງຕາມເຮົາມາ.”¹⁰

ເມື່ອເຈົ້າມີການເລືອກທີ່ສຳຄັນທີ່ຕ້ອງຕັດສິນໃຈເລືອກ, ພຣະເຢຊູຄຣິດ ແລະ ພຣະກິດຕິຄຸນທີ່ຖືກຟື້ນຟູຂອງພຣະອົງເປັນທາງເລືອກທີ່ດີທີ່ສຸດ. ເມື່ອເຈົ້າມີຄຳຖາມ, ພຣະເຢຊູຄຣິດ ແລະ ພຣະກິດຕິຄຸນທີ່ຖືກຟື້ນຟູຂອງພຣະອົງແມ່ນຄຳຕອບທີ່ດີທີ່ສຸດ.

ນີ້ຄືເຫດຜົນທີ່ຂ້າພະເຈົ້າມັກ ສຳລັບຄວາມເຂັ້ມແຂງຂອງຊາວໜຸ່ມ: ຄູ່ມືສຳລັບການເລືອກ. ມັນຊີ້ໃຫ້ເຮົາໄປຍັງພຣະເຢຊູຄຣິດ ເພື່ອວ່າເຮົາຈະສາມາດຮັບຄວາມເຂັ້ມແຂງຈາກພຣະອົງໄດ້. ຂ້າພະເຈົ້າເກັບຫົວໜຶ່ງໄວ້ໃນຖົງຂອງຂ້າພະເຈົ້າຕະຫລອດເວລາ. ຂະນະທີ່ຂ້າພະເຈົ້າພົບຄົນທັງຫລາຍທົ່ວໂລກ ຜູ້ທີ່ຢາກຮູ້ວ່າ ເປັນຫຍັງເຮົາ, ໃນຖານະສະມາຊິກຂອງສາດສະໜາຈັກຂອງພຣະເຢຊູຄຣິດ, ຈຶ່ງເຮັດໃນສິ່ງທີ່ເຮົາເຮັດ, ຂ້າພະເຈົ້າກໍແບ່ງປັນຄູ່ມືນີ້ໃຫ້ກັບເຂົາເຈົ້າ.

ປຶ້ມ ສຳລັບຄວາມເຂັ້ມແຂງຂອງຊາວໜຸ່ມ ສິດສອນ ຄວາມຈິງນິລັນດອນ ກ່ຽວກັບພຣະຜູ້ຊ່ວຍໃຫ້ລອດ ແລະ ວິທີທາງຂອງພຣະອົງ. ມັນ ເຊື້ອເຊີນ ເຈົ້າໃຫ້ຕັດສິນໃຈເລືອກຕາມຄວາມຈິງເຫລົ່ານັ້ນ. ແລະ ມັນແບ່ງປັນ ພອນທີ່ສັນຍາໄວ້ ທີ່ພຣະອົງຍື່ນໃຫ້ຜູ້ທີ່ຕິດຕາມພຣະອົງ. ກະລຸນາອ່ານ, ໄຕ່ຕອງ, ແລະ ແບ່ງປັນຄູ່ມືນີ້!

ເຊື້ອເຊີນໃຫ້ພຣະອົງເຂົ້າມາ

ພຣະເຢຊູຄຣິດຢາກເປັນສ່ວນໜຶ່ງຂອງຊີວິດເຈົ້າ—ສະຖິດຢູ່ດ້ວຍ, ເປັນປະຈຳທຸກມື້, ທັງໃນຍາມດີ ແລະ ຍາມຮ້າຍ. ພຣະອົງບໍ່ພຽງແຕ່ຢືນຢູ່ທີ່ປາຍເສັ້ນທາງ, ລໍຖ້າໃຫ້ເຈົ້າໄລ່ຕາມພຣະອົງໃຫ້ທັນເທົ່ານັ້ນ. ພຣະອົງຈະຍ່າງໄປກັບເຈົ້າທຸກໆບາດກ້າວ. ພຣະອົງ ເປັນ ທາງນັ້ນ!

ແຕ່ພຣະອົງຈະບໍ່ຍັດຍຽດວິທີທາງຂອງພຣະອົງໃສ່ໃນຊີວິດເຈົ້າ. ເຈົ້າເຊື້ອເຊີນພຣະອົງເຂົ້າມາ, ຜ່ານທາງການເລືອກຂອງເຈົ້າ. ນີ້ຄືເຫດຜົນທີ່ຄູ່ມືສຳລັບການເລືອກ, ເຊັ່ນ ສຳລັບຄວາມເຂັ້ມແຂງຂອງຊາວໜຸ່ມ, ຈຶ່ງລໍ້າຄ່າຫລາຍ. ທຸກເທື່ອທີ່ເຈົ້າຕັດສິນໃຈເລືອກເຮັດສິ່ງທີ່ຊອບທຳ ຕາມຄວາມຈິງນິລັນດອນຂອງພຣະຜູ້ຊ່ວຍໃຫ້ລອດ, ເຈົ້າກໍສະແດງໃຫ້ເຫັນວ່າ ເຈົ້າຕ້ອງການພຣະອົງໃນຊີວິດຂອງເຈົ້າ. ການເລືອກເຫລົ່ານັ້ນໄຂປະຕູສະຫວັນ, ແລະ ຄວາມເຂັ້ມແຂງຂອງພຣະອົງຈະຖອກເທລົງມາສູ່ຊີວິດຂອງເຈົ້າ.¹¹

ສ້າງການເຊື່ອມຕໍ່ທີ່ແຂງແຮງ

ເຈົ້າອາດຈື່ໄດ້ວ່າ ພຣະຜູ້ຊ່ວຍໃຫ້ລອດໄດ້ປຽບທຽບຜູ້ທີ່ ໄດ້ຍິນ ແລະ ປະຕິບັດ ຕາມພຣະຄຳຂອງພຣະອົງວ່າເປັນເໝືອນຄົນສະຫລາດທີ່ “ປຸກເຮືອນຂອງຕົນຢູ່ເທິງດານຫີນ.” ພຣະອົງໄດ້ອະທິບາຍວ່າ:

“ຝົນທັ່ງເທລົງມາ, ນໍ້າກໍນອງຖ້ວມລົ້ນຫ້ວຍຮ່ອງ, ແລະ ລົມກໍພັດ, ປະທະເຮືອນຢ່າງແຮງ; ແຕ່ເຮືອນນັ້ນກໍບໍ່ເຈື່ອນເພພັງລົງ, ເພາະມັນຖືກສ້າງຂຶ້ນເທິງດານຫີນ.”¹²

ເຮືອນຈະບໍ່ລອດໃນພະຍຸເພາະຄວາມແໜ້ນໜາຂອງມັນ. ມັນຈະບໍ່ລອດເພາະດານຫີນທີ່ແຂງແກ່ນເຊັ່ນກັນ. ເຮືອນຈະລອດໄດ້ຍ້ອນວ່າມັນຍຶດຕິດຢ່າງໝັ້ນຄົງຢູ່ກັບດານຫີນທີ່ແຂງແກ່ນ. ມັນແມ່ນຄວາມເຂັ້ມແຂງຂອງ ການເຊື່ອມຕໍ່ ກັບດານຫີນ ທີ່ເປັນສິ່ງສຳຄັນ.

ເຊັ່ນດຽວກັນ, ດັ່ງທີ່ເຮົາສ້າງຊີວິດຂອງເຮົາ, ການຕັດສິນໃຈເລືອກທີ່ດີເປັນສິ່ງສຳຄັນ. ແລະ ມັນສຳຄັນທີ່ຈະເຂົ້າໃຈຄວາມຈິງນິລັນດອນຂອງພຣະຜູ້ຊ່ວຍໃຫ້ລອດ. ແຕ່ຄວາມເຂັ້ມແຂງທີ່ເຮົາຈະຕ້ອງການເພື່ອທົນທານຕໍ່ມໍລະສຸມຊີວິດ ມາເຖິງເມື່ອເຮົາ ເຊື່ອມຕໍ່ ການເລືອກຂອງເຮົາເຂົ້າກັບພຣະເຢຊູຄຣິດ ແລະ ຄຳສອນຂອງພຣະອົງ. ນັ້ນຄືສິ່ງທີ່ ສຳລັບຄວາມເຂັ້ມແຂງຂອງຊາວໜຸ່ມ ຊ່ວຍໃຫ້ເຮົາເຮັດ.

ຍົກຕົວຢ່າງ, ໝູ່ເພື່ອນຂອງເຈົ້າອາດຮູ້ວ່າ ເຈົ້າພະຍາຍາມບໍ່ໃຊ້ພາສາທີ່ກ້າວລ້າວ ຫລື ເຮັດໃຫ້ເຈັບໃຈ. ພວກເຂົາອາດເຫັນເຈົ້າເອື້ອມອອກໄປຊ່ວຍເດັກນ້ອຍຄົນນັ້ນໃນໂຮງຮຽນທີ່ຄົນສ່ວນຫລາຍເມີນເສີຍ ຫລື ແມ່ນແຕ່ກັ່ນແກ້ງ. ແຕ່ພວກເຂົາຮູ້ບໍ່ວ່າ ເຈົ້າຕັດສິນໃຈເລືອກເຮັດສິ່ງເຫລົ່ານີ້ ເພາະພຣະເຢຊູຄຣິດໄດ້ສິດສອນວ່າ “ທຸກຄົນແມ່ນອ້າຍເອື້ອຍນ້ອງຂອງເຈົ້າ—ລວມທັງ … ຄົນທັງຫລາຍທີ່ແຕກຕ່າງຈາກເຈົ້າ”?¹³

ໝູ່ເພື່ອນຂອງເຈົ້າອາດຮູ້ວ່າ ເຈົ້າໄປໂບດທຸກໆວັນອາທິດ. ພວກເຂົາອາດສັງເກດເຫັນເມື່ອເຈົ້າປິດເພງບາງເພງ ຫລື ປະຕິເສດຄຳເຊີນໃຫ້ໄປເບິ່ງໜັງບາງເລື່ອງ. ແຕ່ພວກເຂົາຮູ້ບໍ່ວ່າ ເຈົ້າຕັດສິນໃຈເລືອກເຮັດສິ່ງເຫລົ່ານີ້ ເພາະເຈົ້າມີ “ຄວາມສຳພັນແຫ່ງພັນທະສັນຍາທີ່ຊື່ນຊົມກັບພຣະບິດາເທິງສະຫວັນ ແລະ ພຣະເຢຊູຄຣິດ,” ແລະ ວ່າໃນຖານະທີ່ເປັນສ່ວນໜຶ່ງຂອງຂໍ້ຜູກມັດໃນການຕິດຕາມພຣະຜູ້ຊ່ວຍໃຫ້ລອດນັ້ນ, ເຈົ້າກະຕັນຍູ “ທີ່ມີພຣະວິນຍານສັກສິດເປັນເພື່ອນຂອງເຈົ້າຕະຫລອດເວລາ”?¹⁴

ຜູ້ຄົນອາດຮູ້ວ່າ ເຈົ້າບໍ່ດື່ມເຫລົ້າ ຫລື ສູບຢາ ຫລື ໃຊ້ຢາທີ່ເປັນອັນຕະລາຍ. ແຕ່ພວກເຂົາຮູ້ບໍ່ວ່າ ເຈົ້າຕັດສິນໃຈເລືອກເຮັດສິ່ງເຫລົ່ານີ້ ເພາະພຣະເຢຊູຄຣິດໄດ້ສິດສອນວ່າ “ຮ່າງກາຍຂອງເຈົ້ານັ້ນສັກສິດ,” “ເປັນຂອງຂວັນທີ່ໜ້າອັດສະຈັນຈາກພຣະບິດາເທິງສະຫວັນຂອງເຈົ້າ,” ຊຶ່ງຖືກສ້າງຂຶ້ນຕາມຮູບລັກສະນະຂອງພຣະອົງ?¹⁵

ໝູ່ເພື່ອນຂອງເຈົ້າອາດຮູ້ວ່າ ເຈົ້າຈະບໍ່ໂກງ ຫລື ຕົວະ ແລະ ວ່າເຈົ້າຈິງຈັງກັບການສຶກສາ. ແຕ່ເຈົ້າຮູ້ບໍ່ວ່າ ນີ້ເປັນເພາະວ່າ ພຣະເຢຊູຄຣິດໄດ້ສິດສອນວ່າ “ຄວາມຈິງນັ້ນຈະເຮັດໃຫ້ພວກເຈົ້າເປັນອິດສະລະ”?¹⁶

ທີ່ສຳຄັນທີ່ສຸດ, ໝູ່ເພື່ອນຂອງເຈົ້າຮູ້ບໍ່ວ່າ ເຈົ້າຕັດສິນໃຈເລືອກເຮັດສິ່ງທີ່ບໍ່ເປັນທີ່ນິຍົມໃນບາງຄັ້ງ ເພື່ອຄົງຢູ່ໃນຄວາມແນ່ວແນ່ຕໍ່ມາດຕະຖານຂອງພຣະຄຣິດ ເພາະເຈົ້າຮູ້ວ່າ “ພຣະເຢຊູຄຣິດເປັນຄວາມເຂັ້ມແຂງຂອງເຈົ້າ”?¹⁷

ພຣະອົງເປັນຄວາມເຂັ້ມແຂງຂອງເຈົ້າ

ຂ້າພະເຈົ້າມອບພະຍານທີ່ແນ່ນອນແກ່ເຈົ້າວ່າ ພຣະເຢຊູຄຣິດເປັນທາງນັ້ນ ສູ່ອະນາຄົດທີ່ສົດໃສ ແລະ ຮຸ່ງເຮືອງ—ອະນາຄົດຂອງເຈົ້າ. ແລະ ພຣະອົງເປັນທາງນັ້ນ ສູ່ປະຈຸບັນທີ່ສົດໃສ ແລະ ຮຸ່ງເຮືອງເຊັ່ນກັນ. ຈົ່ງຍ່າງໄປຕາມທາງຂອງພຣະອົງ, ແລະ ພຣະອົງຈະຍ່າງໄປກັບເຈົ້າ. ເຈົ້າສາມາດເຮັດໄດ້!

ໝູ່ເພື່ອນໜຸ່ມທີ່ຮັກແພງຂອງຂ້າພະເຈົ້າ, ພຣະເຢຊູຄຣິດເປັນຄວາມເຂັ້ມແຂງຂອງເຈົ້າ. ຈົ່ງສືບຕໍ່ຍ່າງໄປກັບພຣະອົງ, ແລະ ພຣະອົງຈະຊ່ວຍເຈົ້າທະຍານຂຶ້ນ “ດ້ວຍປີກຄືກັນກັບນົກອິນຊີ”¹⁸ ສູ່ຄວາມຊື່ນຊົມນິລັນດອນທີ່ພຣະອົງໄດ້ກຽມໄວ້ສຳລັບເຈົ້າ.

© 2024 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly For the Strength of Youth Message, March 2024. Laotian. 19356 331