Suportahon kag Amligan Kita sang Dios

Ni Elder Dale G. Renlund

Sang Korum sang Dose ka Apostoles

Pareho kay Kapitan Moroni, makabaton kita sang diosnon nga bulig kag gahum para sa mga kabudlayan nga ginaatubang naton sa kabuhi.

Si Kapitan Moroni nga nagakapot sang bandera sang kahilwayan

Sang una ko nabasa ang Libro ni Mormon, nawili gid ako sa kasaysayan sang mga giyera sa tunga sang mga Nefinhon kag mga Lamanhon. Nagdayaw gid ako sa pagtuo, kaalam, kag mga taktika nga gingamit ni Kapitan Moroni, isa ka kumander sa militar nga ginpili nga lider sang bilog nga Nefinhon nga mga kasoldadohan sang 25 anyos lang sia. Maalam sia, mabukod, kag maabtik. Lubos sia nga dedikado sa kahilwayan kag kaayohan sang iya katawhan. (Tan-awa sa Alma 48:11–12.)

Imbes nga ipatungod ang ila kadalag-an militar sa iya kaugalingon, ginpatungod niya ang kadalag-an sa Dios kag sa sagrado nga suporta nga nabaton sang iya mga kasoldadohan sa wala nagapakig-away nga mga babayi kag kabataan. Ginhambalan niya ang isa ka napierde nga lider sang kaaway: “Ang Ginuo … gintugyan [Niya] kamo sa amon mga kamot. Kag karon luyag ko nga inyo mahangpan nga ini … tungod sang amon relihiyon kag sang amon pagtuo kay Cristo.” Dayon ginpaambit ni Moroni ining pagpahangop sang propeta: “ang Dios magasakdag, kag magatipig, kag magaamlig sa amon, samtang tampad kami sa iya, kag sa amon pagtuluohan, kag sa amon relihiyon” (Alma 44:3, 4).

Sa pagligad sang panahon, narealisar ko nga si Moroni nagpakita sang mga prinsipyo nga magamit naton agud buligan kita nga atubangon ang mga hangkat sang aton moderno nga mga kabuhi. Kon magpakita kita sang pagtuo kay Jesucristo, ang Manluluwas sang kalibutan, bugayan Niya kita sang Iya gahum. Pero para Iya ini mahimo kag para makilala naton ang Iya mga bugay, kinahanglan naton nga mahangpan ang aton katuyoan, magplano para sa kadalag-an, kag maghanda para sa simboliko nga mga giyera nga aton ginaatubang, pareho nga si Moroni naghanda kag nag-atubang sang matuod-tuod nga mga giyera sa iya kabuhi. Kon himuon naton ini, suportahon kag amligan kita sang Amay nga Langitnon kag ni Jesucristo.

Paghangop sang Aton Katuyoan

Liwat-liwat nga ginapahanumdum ni Moroni ang katawhan kon sin-o sila (mga manunubli sang kasugtanan ni Abraham), kay sin-o sila (pinalangga nga mga anak sang Dios), kag ang kawsa nga ila ginapakig-away (pamilya, pagtuo, kag kahilwayan). Si Moroni nagtudlo sa iya katawhan nga nagapakig-away sila para sa ila mismo kaluwasan kag para sa kahilwayan halin sa pagpamigos kag pagkaulipon. Sa kabaliskaran, ang ila mga kaaway nagpakig-away para sa kaugalingon nga kauswagan kag gahum paagi sa pagsakop sa iban.

Sang ang pila ka mga Nefinhon nagtinguha sa pag-agaw sang awtoridad para sa kaugalingon nga kaayohan, gingisi ni Moroni ang iya kunop kag nagsulat sa isa ka bahin sini sang panguna nga aspeto sang iya mensahe: “Sa handumanan sang aton Dios, sang aton relihiyon, kag kahilwayan, kag sang aton paghidaet, sang aton mga asawa, kag sang aton mga anak.” Ginwagayway niya ining bandera, nga iya gintawag “ang bandera sang kahilwayan,” sa punta sang isa ka tukon kag gingamit ini sa pagpahanumdum sa katawhan kon parte sa ano ang inaway kag agud tiponon sila sa kawsa. (Tan-awa sa Alma 46:12–13, 19-20.)

Sa espirituhanon nga mga giyera sa kabuhi, “kita [wala] nagapakig-away batok sa unud kag dugo, kondi batok sa … manugdumala sang kalibutan sining kadudulman … [kag] batok sa espirituhanon nga kalautan” (Mga Taga-Efeso 6:12). Kita man, kinahanglan nga pahanumdumon kon parte sa ano ang inaway. Si Elder Neal A Maxwell (1926–2004), sadto anay miyembro sang Korum sang Dose ka Apostoles, nagpahayag sining panghunahuna sa manami bisan malip-ot lang nga pag-istoryahanay.

Sang 2004, ginbisitahan ko si Elder Maxwell sa ospital antes sia napatay. Maayo gid sia sa tanan nga nagbisita ukon nagbulig sa iya. Ang mga health-care worker nagasulod sa iya kwarto kag nagahibi paggwa. Ginhambalan ko sia, “Elder Maxwell, kabudlay gid sini.” Nagkadlaw sia kag nagsiling, “Dale, wala katapusan kita nga mga tinuga nga nagakabuhi sa mortal nga kalibutan. Sa gwa kita sang aton naandan, pareho sang isda nga wala sa tubig. Ang tanan nga ini mahangpan lamang kon may wala katapusan kita nga panan-aw.”

Indi gid naton dapat pagkalimtan ang daku nga pag-angtanay sang aton diosnon nga kinaiya kag wala katapusan nga kapalaran kag ang yawan-on nga mga puwersa nga nagakontra sa aton. Ang husto nga paghangop sang plano sang Amay nga Langitnon magatulod sa aton nga magpadayon sa pagpakig-away para sa aton wala katapusan nga kaluwasan kag para sa aton kahilwayan halin sa espirituhanon nga pagkaulipon.

Pagplano para sa Kadalag-an

Sa tanan nga mga giyera nga gin-away sang iya mga kasoldadohan, si Moroni nagplano agud masiguro ang kadalag-an. Naggamit sia sang mga espiya agud tukibon ang mga aktibidades kag mga tuyo sang iya mga kaaway. Nagpangayo sia sang giya halin sa propetang si Alma. Si Moroni dayon naggamit sinang inspirado nga laygay sa iya taktika sa giyera. Nagpadala sia sang bulig base sa panginahanglan, nga nagabutang sang mas madamo nga soldado sa mga siyudad nga indi tama kabakod. Ginabase niya ang stratehiya sa pagpalakat sang giyera base sa pinakabag-o nga impormasyon.

Sa sina nakabentaha sia kontra sa mga kasoldadohan sang kaaway. Wala sia nagakakontento sa nagliligad nga mga kadalag-an; kundi, padayon niya nga ginapauswag ang kapasidad niya kag sang iya mga kasoldadohan sa pag-atubang sang palaabuton nga mga hangkat.

Magamit man naton ang pareho nga mga pamaagi sa pag-atubang sang espirituhanon nga mga kaaway. Makasugod kita paagi sa pagkilala kon ano ang ginatinguhaan ni Satanas nga himuon sa aton mga kabuhi. Ginatinguhaan niya nga agawon ang aton igtalupangod halin sa aton katuyoan. Kon ginatentar, dapat naton pamangkuton ang aton mga kaugalingon:

Paano ining akon himuon makumparar sa ginpahayag nga pulong sang Dios?
Ano ang mga konsikwensya sang paghimo sini?
Ining akon bala himuon makabulig sa akon nga matuman ang akon katuyoan sa kalibutan?

Dapat man naton kilalahon ang resulta sa ulihi sang pagpadaug sa bisan magagmay lang nga mga tentasyon. Kon magpadaug kita sa tentasyon, nagainom kita sang “hilo sing amat-amat” (Alma 47:18), isa ka epektibo katama nga stratehiya nga ginagamit sang mga gahum sang kalainan nga makadala sa makamamatay nga espirituhanon nga resulta.

Sarang naton mapabakod ang aton mga kaugalingon batok sa mga tentasyon ni Satanas paagi sa pagsunod sang giya nga mabaton naton sa aton propeta sa ulihing mga adlaw. Ang paghimo sini nagabulig sa aton hupot sang wala katapusan nga panan-aw nga paagi sini matulutimbang naton ang aton mga buhat. Ang pagplano kon paano naton atubangon ang mga tentasyon nga nagaabot sa lain-lain nga mga bahin sang aton mga kabuhi magabulig sa aton nga maghimo sing mas husto nga mga pagpili sa sina nga tion. Ang pagplano ngadaan sang mga stratehiya kag mga pamaagi magabulig sa aton nga mabatoan ang paglisa sang aton igtalupangod sa aton wala katapusan nga katuyoan.

Isa ka halimbawa sina amo ang teknolohiya. Ang teknolohiya mahimo nga duha ang epekto, alangay makabulig kag makahalit, depende kon paano naton ini ginagamit. Agud buligan kita sa paghimo sang maalam nga mga pagpili parte sa aton mga gadyet, ang mga lamharon kag mga may edad mahimo magbasa sang “Taking Charge of Technology” kag Para sa Kusog sang mga Lamharon: Giya sa Paghimo sang mga Pagpili. Nagapahanumdum ang mga ini sa aton sang aton katuyoan, nagatudlo sa aton kay Jesucristo, kag nagabulig sa aton sa pag-agda sang Balaan nga Espiritu sa aton mga kabuhi. Ang pagplano kon paano, san-o, kag diin naton gamiton ang teknolohiya magapabakod sa aton kontra sa imoral, dutan-on nga mga taktika.

Paghanda para sa Simboliko nga mga Giyera

Nga ginapaabot ang nagahilapit nga mga giyera, ginhanda ni Moroni ang iya katawhan sing tinag-isaisa gamit ang mga taming sa dughan kag sa butkon, mga taming nga panagang sa ulo, kag madamol nga mga panapton. Ginhanda niya ang iya katawhan sing tingob paagi sa pagpalibot sang kuta sa mga siyudad, nga ginatampok ang mga bungyod sang duta sa palibot sang mga ini.

Sa espirituhanon, nagahanda kita sing tinag-isaisa paagi sa pagtuman sang mga kasugoan sang Dios. Nagahimo kag nagatuman kita sang mga kasugtanan sa Dios nga nagadala sang gahum ni Jesucristo sa aton mga kabuhi. Nagapakigbahin kita sa personal, pribado nga mga buhat sang debosyon, pareho sang pagpangamuyo, pagpuasa, kag pagbasa sang balaan nga mga kasulatan. Nagaakto man kita sa pagtuo, nga nagasabat sa espirituhanon nga giya nga aton mabaton. Matutum kita nga nagahanda kag takos nga nagaambit sang sakramento. Sa paghimo naton sini, ang Manluluwas mangin may mas daku nga impluwensiya sa aton mga kabuhi, pareho nga may daku Sia nga impluwensiya kay Moroni nga mabakod ang pagtuo kay Jesucristo. Nakahibalo si Moroni nga makasalig sia sa Manluluwas para sa giya kag kaluwasan (tan-awa sa Alma 48:16). Kita man makasalig kay Jesucristo para sa giya kag kaluwasan.

Makahanda pa gid kita sing dugang paagi sa pagpabakod sang aton mga pamilya. Ang aton Amay nga Langitnon nag-organisar sa aton sa mga pamilya agud buligan kita nga mangin malipayon kag makatuon kon paano magbalik sa Iya. Ang aton mga pamilya sarang mangin kuluhaan sang bulig para sa aton. Makabatyag kita tanan sang kalipay kag gugma paagi sa pagdumdum nga kabahin kita sang dako nga panimalay sang Dios, bisan ano pa man ang indibidwal nga mga kahimtangan sang aton mga pamilya.

Pwede kita nga tingob nga mag-angkon sang kusog kag maghanda para sa aton espirituhanon nga mga giyera kon magbuylog kita sa mga komunidad sang mga Santos. Ang aton mga stake kag mga district nagapatigayon sinang lugar nga dalangpan kag pangamlig. Masagod naton sing espirituhanon ang isa kag isa, mabuligan sa pagtuman sang mga kasugoan sang Dios ang isa kag isa, kag mapaisog nga magsalig kay Cristo ang isa kag isa, pirme kag labi na gid sa tinion sang mga hangkat. Kon magtipon kita, marealisar naton nga wala kita nagaaway sang aton mga giyera nga isahanon. May mga abyan, mga manunudlo, mga lider kita nga makabulig kag makaamlig sa aton. Mas mabakod kita tanan kon ululupod kita nga maghanda.

Talalupangdon, ginpatungod ni Moroni ang tanan nga kalipay sang iya katawhan sa ila katampad sa ila pagtuo sa Dios kag ila relihiyon. Pareho kay Moroni, dapat naton marealisar nga ang kalipay maangkon tungod sa Amay nga Langitnon kag Iya plano kag tungod kay Jesucristo kag Iya Pagbayad-Sala. Sa aton paghangop sang aton katuyoan, pagplano para sa kadalag-an, kag paghanda para sa simboliko nga mga giyera, makabaton kita sang diosnon nga bulig kag gahum.

Pareho kay Moroni, nakahibalo ako nga ang Langitnon nga Amay kag si Jesucristo nagadala sang pinakataas nga kahilwayan halin sa pagkaulipon—kahilwayan halin sa kamatayon kag sala. Ginabugayan Nila kita sang Ila gahum kon nagadangop kita sa Ila sa tanan nga butang.

© 2024 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, August 2024.Hiligaynon. 19294 861