Bulanan nga Mensahe sang Para sa Kusog sang mga Lamharon, Agosto 2024
Isa ka Gamhanan nga Kaangtanan
Ang kasugtanan masobra sangsa isa lang ka kontrata; isa ini ka kaangtanan.
May litrato pa ako gihapon sang berde nga mga siya nga ginpungkuan nila ni Elder Pistone kag Elder Moraso samtang ginatudloan nila ang akon pamilya sa amon balay sa Argentina. Nagtudlo sila sing may tuman nga espirituhanon nga gahum nga ang akon 10-anyos nga magulang nga babayi kag ako (edad 9) nagadalagan paghalin nila agud tandogon ang mga siya, sa paglaum nga inang gahum mapasa sa amon.
Wala magdugay kag nahibal-an ko nga ang gahum wala nagahalin sa mga siya kundi sa pag-angkon sang kaangtanan paagi sa kasugtanan sa Dios kag kay Jesucristo.
Ang akon Eksperiyensia sa Bunyag
Ginhimo ko ang akon una nga kasugtanan sang Nobyembre 13, 1977. Diutay lang ang akon madumduman parte sa akon bunyag, pero nadumduman ko si Elder Pistone nga ginabuligan ako sa tubig kag si Elder Morasco nga ginakumpirmahan ako samtang basa pa ang akon buhok. Madumduman ko man ang kalipay nga akon nabatyagan sang ang bag-o nga mga abyan sa ward naghakos kag naghalok sa akon sa Argentinhon nga paagi kag ang dako nga handum nga akon nabatyagan nga mangin matutum nga anak nga babayi sang Amay nga Langitnon.
Ang bata nga si Sister Spannaus (natung-an) upod sa iya mga ginikanan (sa wala), iya utod nga babayi nga si Silvina (sa punta nga natuo), kag si Elder Morasco.
Sang ulihi narealisar ko nga ang kalipay nga akon nabatyagan naghalin sa dulot sang Balaan nga Espiritu. Natun-an ko nga samtang matutum ko nga ginatuman ang akon mga kasugtanan sa Dios, ang Espiritu mangin kaupod nakon. Ang Balaan nga Espiritu isa lang sang gamhanan nga mga bugay nga nagahalin sa kaangtanan paagi sa kasugtanan sa Dios kag kay Jesucristo.
Subong, bisan pa kon ang akon mga motibo, mga hunahuna, kag mga buhat kabos, may paglaum ako agud padayon nga magtinguha. Ngaa? Tungod paagi sa pag-ambit sang sakramento posible nga mabag-o ko ang akon mga kasugtanan kag makahimo sang bag-o nga mga kasugtanan kada semana. Nagapasalamat gid ako sa sinang bugay.
Isa ka Mapinalanggaon nga Kaangtanan paagi sa Kasugtanan
Pirme naton mabatian nga ang mga kasugtanan baslanay nga mga promisa naton kag sang Dios. Samtang matuod ina, indi lang amo sina ang mga ini. Sa matuod-tuod, “ang pagtuman sang kasugtanan indi isa ka impersonal nga transaksyon kundi isa ka mapinalanggaon nga kaangtanan.”
Gani, paano ka maghimo sang kaangtanan paagi sa kasugtanan sa Amay nga Langitnon kag sa Manluluwas? Palangga na nila kamo ngadaan sing perpekto kag gusto nga bugayan kamo (tan-awa sa 3 Nefi 14:11). Pero ang bisan ano nga baslanay nga kaangtanan nagakinahanglan sang tiempo kag pagpalangga halin sa magtimbang nga bahin.
Gusto mo bala maghatag sang dugang nga tiempo upod sa Ila? Kon ginahimo mo ang mga butang nga Ila himuon, nagasunod ka sa Ila! Mahimo nga pareho lang ina kasimple sa pagpamati sa isa ka abyan sa mabudlay nga tion, paghatag sang tiempo sa paghampang sa isa ka utod, ukon paglakip sang isa nga nagabatyag nga naitsapwera. Sang sini lang, naghatag ako sang tion sa pagsunod sa Dios paagi sa pagrekord sang ginhambal nga mensahe kag pagpadala sang mga text sa isa ka abyan sa Argentina nga ginasuboan. Nagdesisyon man ako nga tipigan pirme ang akon temple recommend nga aktibo agud makahinguyang ako sang tion upod sa Ginuo sa Iya balaan nga balay. Makapangamuyo kamo para sa mga ideya nga magabulig sa inyo nga maghatag sang tion sa Amay nga Langitnon kag inyo Manluluwas.
Gusto mo bala ipakita sa Ila nga nagaulikid ka? Kabiga ang mga kasugoan nga nagpakighisugot ka sa pagtuman bilang paagi nga mapakita ang imo pagpalangga, indi bilang listahan sang mga pagsulundan. Halimbawa, agud ipangabuhi ang Pulong sang Kaalam, nagtuon ako kon paano magluto sang kalan-on nga maayo sa lawas. Subong, ginatudloan ko ang akon mga anak nga babayi nga maghimo sang amo man. Kon hugot sa buot nga ginatuman ninyo ang mga kasugoan sang Dios, ang inyo pagpalangga sa Iya kag sa Manluluwas magadugang.
Ang aton mga kaangtanan paagi sa kasugtanan sa Amay nga Langitnon kag kay Jesucristo magabulig sa aton nga makilala Sila sing mas maayo kag makaangkon sang mas mahapos nga pagtigayon sang Ila gahum sa aton mga kabuhi—labi kasobra sangsa bisan ano nga mahatag sang berde nga mga siya. Kag inang gahum nagabag-o sa aton sa wala katubtuban!
© 2024 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly For the Strength of Youth Message, August 2024. Hiligaynon. 19342 861