Parau poro’i tā’āva’e nō te Nō te pūai o te feiā ’āpī, ’Ātete 2024
E tā’amura’a pūai
’Ua hau atu te hō’ē fafaura’a i te hō’ē noa parau fa’aau ; e tā’amura’a te reira.
Tē vai noa ra ā te hō’ē hōho’a nō te pārahira’a matie tā Elder Pistone ’e ’o Elder Morasco i pārahi ’a ha’api’i ai rāua i tō’u ’utuāfare i tō mātou fare i Rāparata. Nō tō rāua ha’api’ira’a mai ma te mana pae vārua rahi, e horo tō’u tuahine 10 matahiti ’e ’o vau nei (9 matahiti) e tāpe’a i te mau pārahira’a ’ia reva atu rāua, ma te ti’aturi ē e tae mai terā mana i ni’a ia māua.
’Ua ha’api’i ’oi’oi au ē ’aita te mana nō roto mai i te mau pārahira’a, nō te fa’ari’ira’a rā i te hō’ē tā’amura’a fafaura’a ’e te Atua ’e ia Iesu Mesia.
Tō’u bāpetizora’a
’Ua rave au i tā’u fafaura’a mātāmua i te 13 nō Novema 1977. ’Aita vau e ha’amana’o rahi nō ni’a i tō’u bāpetizora’a, tē ha’amana’o nei rā vau ia Elder Pistone i te tauturura’a iā’u ’ia tomo i roto i te pape ’e ia Elder Morasco i te hōro’ara’a mai i te Vārua maita’i iā’u ’a rari noa ai tō’u rouru. Tē ha’amana’o ato’a nei au i te ’oa’oa tā’u i fa’ari’i ’a tauahi ai te mau hoa ’āpī o te pāroita ’e ’a ’āpā mai ai rātou iā’u ’ia au i te peu nō Rāparata ’e te hina’aro pūai i roto iā’u ’ia riro ’ei tamāhine ha’apa’o maita’i nā te Metua i te ao ra.
Te tuahine Spannaus (i rōpū) ’e tōna nā metua (i te pae ’aui), tōna tuahine ’o Silvina (i te pae ’atau roa), ’e ’o Elder Morasco.
A muri a’e tō’u ’itera’a ē te ’oa’oa tā’u i fa’ari’i nō roto mai ïa i te hōro’a nō te Vārua Maita’i. ’Ua ha’api’i mai au ē ’ia ha’apa’o maita’i au i tā’u mau fafaura’a ’e te Atua, e pārahi mai te Vārua i pīha’i iho iā’u. Te Vārua Maita’i, ’o te hō’ē noa ïa o te mau ha’amaita’ira’a pūai e tae mai nā roto i te hō’ē tā’amura’a fafaura’a ’e te Atua ’e ia Iesu Mesia.
I teienei, noa atu ā e paruparu tō’u hina’aro, tō’u mana’o ’e tā’u mau ’ohipa, tē vai nei te ti’aturira’a e tāmau noa i te tāmata. Nō te aha ? Nō te mea maoti te ravera’a i te ’ōro’a mo’a e ti’a ai iā’u ’ia fa’a’āpī i tā’u mau fafaura’a ’e ’ia rave i te mau fafaura’a ’āpī i te hepetoma tāta’itahi. E māuruuru rahi tō’u nō taua ha’amaita’ira’a ra.
E tā’amura’a nō te fafaura’a māhanahana
Pinepine tātou i te fa’aro’o ē te mau fafaura’a e fa’aaura’a piti pae ïa i roto ia tātou ’e te Atua. Noa atu ē e parau mau te reira, e ’ere rā te reira ana’e. Te parau mau rā, « e ’ere te ha’apa’ora’a i te fafaura’a i te hō’ē ho’ora’a faufa’a ’ore, e tā’amura’a māhanahana rā. »
Nō reira, nāhea ’outou i te fa’atupu i te hō’ē tā’amura’a fafaura’a ’e te Metua i te ao ra ’e te Fa’aora ? ’Ua here maita’i roa rāua ia ’outou, a’ena, ’e tē hina’aro nei rāua e ha’amaita’i ia ’outou (hi’o 3 Nephi 14:11). Terā rā nō te tā’amura’a piti pae e tītauhia te taime ’e te here i roto i nā pae e piti.
Tē hina’aro ra ānei ’outou e hōro’a rahi atu ā i te taime i pīha’i iho ia rāua ? ’Ia rave ana’e ’outou i te mau mea tā rāua e rave, tē haere ra ’outou nā muri ia rāua ! E nehenehe te reira e riro ’ei mea ’ōhie mai te fa’aro’ora’a i te hō’ē hoa i roto i te hō’ē taime fifi, te fa’ata’ara’a i te hō’ē taime nō te ha’uti ’e te hō’ē taea’e ’e te hō’ē tuahine, ’aore rā mai te tauahira’a i te hō’ē ta’ata e mana’o ra ē ’aita ’oia e tāu’ahia ra. ’Aita i maoro a’enei, ’ua haere au nā muri i te Atua nā roto i te haruharura’a i te mau poro’i paraparau ’e te hāponora’a i te mau poro’i pāpa’i i te hō’ē hoa nō Rāparata tei vai ’ōtahi noa. ’Ua fa’aoti ato’a vau e tāpe’a i te hō’ē parau fa’ati’a mana nō te hiero ’ia ti’a iā’u ’ia fa’ata’a i te tahi taime i pīha’i iho i te Fatu i roto i tōna fare mo’a. E nehenehe ’outou e pure nō te mau mana’o ’o tē tauturu ia ’outou ’ia fa’ata’a i tō ’outou taime nō te Metua i te ao ra ’e i tō ’outou Fa’aora.
Tē hina’aro ra ānei ’outou e fa’a’ite ia rāua ē e māna’ona’ora’a te reira nō ’outou ? ’A fa’ariro i te mau fa’auera’a tā ’outou i fafau ’ia ha’apa’o ’ei rāve’a nō te fa’a’ite i tō ’outou here, ’eiaha rā ’ei tāpura nō te mau ture. ’Ei hi’ora’a, nō te ora i te Parau Pa’ari, ’ua ha’api’i mai au e nāhea i te tunu i te mā’a maita’i. I teienei tē ha’api’i nei au i tā’u mau tamāhine ’ia nā reira ato’a. ’Ia ha’apa’o ana’e ’outou i te mau fa’auera’a a te Atua ma te hina’aro mau, e tupu tō ’outou here iāna ’e i te Fa’aora i te rahi.
E tauturu tō tātou mau tā’amura’a fafaura’a ’e te Metua i te ao ra ’e ’o Iesu Mesia ia tātou ’ia mātau maita’i a’e ia rāua ’e ’ia fa’ari’i rahi atu ā i tō rāua mana i roto i tō tātou orara’a—hau atu i tā te hō’ē noa a’e pārahira’a matie e hōro’a mai. ’E e taui taua mana ra ia tātou ē a muri noa atu !
© 2024 nā Intellectual Reserve, Inc. Fatura’a pāruruhia. Nene’ihia i te Fenua Marite. Parau fa’ati’a nō te reo peretāne : 6/19. Parau fa’ati’a nō te ’īritira’a : 6/19. ’Īritira’a nō Monthly For the Strength of Youth Message, August 2024. Tahitian. 19342 895