« Nāhea tātou e tāhō’ēhia ai, e mea ta’a ’ē mau ho’i tātou pā’āto’a ? », Nō te pūai o te feiā ’āpī, ’Ātopa 2024.
Parau poro’i tā’āva’e Nō te pūai o te feiā ’āpī, ’Ātopa 2024
Nāhea tātou e tāhō’ēhia ai, e mea ta’a ’ē mau ho’i tātou pā’āto’a ?
E mea ta’a ’ē tātou pā’āto’a. Tē hina’aro nei rā te Fatu ’ia « tāhō’ē » tātou (Te Ha’api’ira’a Tumu ’e te mau Fafaura’a 38:27). Teie te tahi ma’a parau tumu nō te hō’ēra’a tā te mau peropheta ’e te mau ’āpōsetolo i ha’api’i ia tātou :
E tāhō’ēhia tātou i roto ia Iesu Mesia, tāna ’evanelia ’e tāna ’Ēkālesia. « I roto ana’e, ’e nā roto ho’i, i tō tātou huru atati’a ta’ata hō’ē, ’e tō tātou here ia Iesu Mesia, tātou e nehenehe ai e tīa’i ’ia vai hō’ē. »
E tītau te tāhō’ēra’a i te here. « Noa atu te raura’a o te mau reo ’e te nehenehe ’e te fa’aurura’a o te mau peu, tītau-roa-hia ia tātou ’ia tāhō’ē tō tātou ’ā’au i roto i te hō’ēra’a ’e te here. »
E ’ere te hō’ēra’a i te hō’ē ā hōho’a te tā’āto’ara’a. « E ’ere te hō’ēra’a i te huritua o te raura’a. E nehenehe tātou e fa’atupu i te hō’ēra’a rahi a’e maoti te fa’ahereherera’a i te mana’o nō te fa’aōra’a ’e te fa’aturara’a i te raura’a. » « ’Aita te hō’ēra’a e tītau i te hō’ē ā hōho’a te tā’āto’ara’a, e tītau rā i au māite. »
E tītau te hō’ēra’a ’ia fa’a’ore i te mārōra’a ’e te ha’avā na. « Tē vai ra te pārahira’a nō te mau ta’ata ato’a. Terā rā, ’aita e pārahira’a nō te ha’avā na, te fa’ahapara’a, ’aore rā te mārōra’a huru rau. »
© 2024 nā Intellectual Reserve, Inc. Fatura’a pāruruhia. Nene’ihia i te Fenua Marite. Parau fa’ati’a nō te reo peretāne : 6/19. Parau fa’ati’a nō te ’īritira’a : 6/19. ’Īritira’a nō Monthly For the Strength of Youth Message, October 2024. Tahitian. 19344 895