“Jesus Christ Is the Source of ‘Lively,’ ‘Good,’ and ‘More Excellent Hope,’” Liahona, Dec. 2024.
ຂ່າວສານປະຈຳເດືອນ Liahona, ເດືອນທັນວາ 2024
ພຣະເຢຊູຄຣິດ ເປັນແຫລ່ງແຫ່ງ “ຄວາມຫວັງອັນມີຊີວິດ,” “ດີ,” ແລະ “ປະເສີດທີ່ສຸດ”
ໃນເທດສະການທີ່ພິເສດຂອງການສະເຫລີມສະຫລອງການກຳເນີດຂອງກຸມມານນ້ອຍໃນເບັດເລເຮັມ, ຂໍໃຫ້ເຮົາຈົ່ງຈົດຈຳຢູ່ສະເໝີວ່າ ພຣະເຢຊູຄຣິດໄດ້ມາກຳເນີດໃນໂລກເພື່ອເປັນພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ຂອງເຮົາ.
The Nativity [ສາກເລື່ອງລາວການກຳເນີດ], ໂດຍ ຊາລ໊ອດ ແອນດຣັສ໌
ອັກຄະສາວົກເປໂຕ ແລະ ສາດສະດາໃນພຣະຄຳພີມໍມອນ ຢາໂຄບ ແລະ ໂມໂຣໄນ ເນັ້ນໜັກເຖິງຂອງປະທານທາງວິນຍານແຫ່ງຄວາມຫວັງ ໃນພຣະຄຣິດໃນວິທີທີ່ຄ້າຍຄືກັນແບບແນະນຳ.
ຍົກຕົວຢ່າງ, ເປໂຕໄດ້ປະກາດວ່າ, “ສາທຸການແດ່ພຣະເຈົ້າ ພຣະບິດາເຈົ້າແຫ່ງອົງພຣະເຢຊູຄຣິດເຈົ້າຂອງເຮົາທັງຫລາຍ ຜູ້ໄດ້ຊົງພຣະມະຫາກະລຸນາແກ່ພວກເຮົາ ຊົງໂຜດໃຫ້ພວກເຮົາບັງເກີດໃໝ່ ເຂົ້າສູ່ ຄວາມຫວັງໃຈອັນມີຊີວິດຢູ່ ໂດຍການຄືນພຣະຊົນຂອງພຣະເຢຊູຄຣິດເຈົ້າ” (1 ເປໂຕ 1:3; ເນັ້ນຄຳເນີ້ງ). ກະລຸນາສັງເກດການໃຊ້ຄຳວ່າ “ມີຊີວິດ” ເພື່ອບັນຍາຍ “ຄວາມຫວັງ.”
ຢາໂຄບໄດ້ປະກາດວ່າ, “ດັ່ງນັ້ນ, ພີ່ນ້ອງທີ່ຮັກແພງເອີຍ, ຈົ່ງຄືນດີກັບພຣະອົງທາງການຊົດໃຊ້ຂອງພຣະຄຣິດ ພຣະບຸດອົງດຽວທີ່ຖືກຳເນີດຂອງພຣະອົງ, ແລະ ພວກທ່ານຈະໄດ້ຮັບການຟື້ນຄືນຊີວິດໂດຍອຳນາດຂອງການຟື້ນຄືນຊີວິດຊຶ່ງຢູ່ໃນພຣະຄຣິດ, ແລະ ຖືກນຳມາເປັນຜົນທຳອິດຂອງພຣະຄຣິດຕໍ່ພຣະເຈົ້າ, ໂດຍມີສັດທາ, ແລະ ໄດ້ຮັບ ຄວາມຫວັງດີ ແຫ່ງລັດສະໝີພາບໃນພຣະອົງກ່ອນທີ່ພຣະອົງຈະສະແດງພຣະອົງເອງໃຫ້ປະຈັກໃນເນື້ອໜັງ” (ຢາໂຄບ 4:11; ເນັ້ນຄຳເນີ້ງ). ກະລຸນາສັງເກດການໃຊ້ຄຳວ່າ “ດີ” ເພື່ອບັນຍາຍ “ຄວາມຫວັງ.”
ແລະ ໂມໂຣໄນໄດ້ກ່າວວ່າ, “ແລະ ຂ້ານ້ອຍຈື່ໄດ້ອີກວ່າ ພຣະອົງກ່າວວ່າ ພຣະອົງໄດ້ຕຽມທີ່ພັກໄວ້ໃຫ້ແກ່ມະນຸດ, ແທ້ຈິງແລ້ວ, ແມ່ນໃນທ່າມກາງຜາສາດຂອງພຣະບິດາຂອງພຣະອົງ, ຊຶ່ງໃນນັ້ນ ມະນຸດຈະໄດ້ມີ ຄວາມຫວັງອັນປະເສີດທີ່ສຸດ; ດັ່ງນັ້ນ ມະນຸດຈຶ່ງຕ້ອງມີຄວາມຫວັງ, ຖ້າບໍ່ດັ່ງນັ້ນ ເຂົາຈະຮັບມູນມໍລະດົກໃນບ່ອນທີ່ພຣະອົງຕຽມໄວ້ບໍ່ໄດ້” (ອີເທີ 12:32; ເນັ້ນຄຳເນີ້ງ). ກະລຸນາສັງເກດການໃຊ້ຄຳວ່າ “ປະເສີດທີ່ສຸດ” ເພື່ອບັນຍາຍ “ຄວາມຫວັງ.”
ຄວາມຫວັງໃນພຣະຄຣິດແມ່ນຫຍັງ?
ຂອງປະທານທາງວິນຍານແຫ່ງຄວາມຫວັງໃນພຣະຄຣິດ ແມ່ນການຄອງຄອຍຖ້າອັນປິຕິຍິນດີແຫ່ງຊີວິດນິລັນດອນຜ່ານທາງ “ພຣະຄຸນຄວາມດີ, ແລະ ພຣະເມດຕາ, ແລະ ພຣະຄຸນຂອງພຣະເມຊີອາຜູ້ບໍລິສຸດ” (2 ນີໄຟ 2:8) ແລະ ຄວາມປາດຖະໜາອັນແຮງກ້າເຖິງພອນແຫ່ງຄວາມຊອບທຳທີ່ໄດ້ສັນຍາໄວ້. ຄຳຄຸນນາມ “ມີຊີວິດ,” “ດີ,” ແລະ “ປະເສີດທີ່ສຸດ” ໃນຂໍ້ເຫລົ່ານີ້ ຊີ້ໃຫ້ເຫັນເຖິງການຮັບຮອງທີ່ຂະຫຍາຍໃຫຍ່ ແລະ ມີຊີວິດຊີວາໃນການຟື້ນຄືນພຣະຊົນ ແລະ ໃນຊີວິດນິລັນດອນຜ່ານທາງສັດທາໃນພຣະເຢຊູຄຣິດ.
ສາດສະດາມໍມອນ ໄດ້ອະທິບາຍວ່າ:
“ແລະ ອີກຢ່າງໜຶ່ງ, ພີ່ນ້ອງທີ່ຮັກຂອງຂ້າພະເຈົ້າ, ຂ້າພະເຈົ້າຂໍເວົ້າກັບທ່ານກ່ຽວກັບຄວາມຫວັງ. ທ່ານຈະບັນລຸເຖິງສັດທາໄດ້ແນວໃດຖ້າຫາກທ່ານບໍ່ມີຄວາມຫວັງ?
“ແລະ ແມ່ນອັນໃດທີ່ທ່ານຈະຫວັງ? ຈົ່ງເບິ່ງ ຂ້າພະເຈົ້າກ່າວກັບທ່ານວ່າ ທ່ານຈະມີຄວາມຫວັງໂດຍທາງການຊົດໃຊ້ຂອງພຣະຄຣິດ ແລະ ໂດຍອຳນາດຂອງການຟື້ນຄືນພຣະຊົນຂອງພຣະອົງ, ເພື່ອຖືກຍົກຂຶ້ນສູ່ຊີວິດນິລັນດອນ, ແລະ ນີ້ເພາະສັດທາຂອງທ່ານທີ່ມີໃນພຣະອົງຕາມສັນຍາ.
“ດັ່ງນັ້ນ, ຖ້າຫາກຜູ້ໃດມີສັດທາກໍຈຳຕ້ອງມີຄວາມຫວັງ; ເພາະວ່າປາດສະຈາກສັດທາຈະມີຄວາມຫວັງບໍ່ໄດ້ເລີຍ” (ໂມໂຣໄນ 7:40–42).
ແຜນແຫ່ງຄວາມສຸກຂອງພຣະບິດາ
ຄວາມຫວັງໃນພຣະຄຣິດທີ່ມີຊີວິດ, ດີ, ແລະ ປະເສີດທີ່ສຸດ ເລີ່ມຕົ້ນດ້ວຍຄວາມຮູ້ທີ່ວ່າ ພຣະເຈົ້າພຣະບິດາຜູ້ສະຖິດນິລັນດອນຊົງພຣະຊົນຢູ່. ພຣະອົງເປັນພຣະບິດາຂອງເຮົາ, ແລະ ເຮົາເປັນລູກໆທາງວິນຍານຂອງພຣະອົງ. ເຮົາເປັນບຸດ ແລະ ທິດາທາງວິນຍານຂອງພຣະເຈົ້າແທ້ໆ ແລະ ໄດ້ສືບທອດຄຸນສົມບັດແຫ່ງສະຫວັນຈາກພຣະອົງ.
ພຣະບິດາເປັນຜູ້ສ້າງແຜນແຫ່ງຄວາມສຸກ (ເບິ່ງ ອັບຣາຮາມ 3:22–28). ໃນຖານະບຸດ ແລະ ທິດາຂອງພຣະເຈົ້າ, ເຮົາ “ຍອມຮັບເອົາແຜນຂອງພຣະອົງ ຊຶ່ງໃນແຜນນັ້ນ ລູກໆຂອງພຣະອົງຈະໄດ້ຮັບຮ່າງກາຍທີ່ມີເນື້ອໜັງ ແລະ ມີປະສົບການຕ່າງໆຢູ່ໃນໂລກ ເພື່ອຈະໄດ້ພັດທະນາຕົນ ຈົນເຖິງຂັ້ນດີພ້ອມທຸກຢ່າງ ແລະ ໃນທີ່ສຸດບັນລຸຈຸດໝາຍປາຍທາງແຫ່ງສະຫວັນຂອງເຂົາ ໃນຖານະຜູ້ຮັບມໍລະດົກແຫ່ງຊີວິດນິລັນດອນ.” ໃນພຣະຄຳພີ, ເຮົາຮຽນຮູ້ວ່າ: “ພຣະບິດາມີພຣະກາຍທີ່ເປັນເນື້ອໜັງ ແລະ ກະດູກ ທີ່ສຳພັດໄດ້ດັ່ງຂອງມະນຸດ; ພຣະບຸດກໍຄືກັນ” (ຄຳສອນ ແລະ ພັນທະສັນຍາ 130:22). ດັ່ງນັ້ນ, ການຮັບຮ່າງກາຍ ຈຶ່ງເປັນສິ່ງຈຳເປັນໃນຂະບວນການແຫ່ງການກ້າວໜ້າໄປສູ່ຈຸດໝາຍປາຍທາງແຫ່ງສະຫວັນຂອງເຮົາ.
ເຮົາເປັນສິ່ງທີ່ມີຊີວິດແບບຄູ່. ວິນຍານຂອງເຮົາ, ສ່ວນທີ່ເປັນນິລັນດອນຂອງເຮົາ, ຖືກສວມໄວ້ໃນຮ່າງກາຍທີ່ຢູ່ພາຍໃຕ້ຄວາມປາດຖະໜາ ແລະ ຄວາມຢາກຂອງຄວາມເປັນມະຕະ. ແຜນແຫ່ງຄວາມສຸກຂອງພຣະບິດາໄດ້ຖືກອອກແບບມາເພື່ອໃຫ້ການຊີ້ນຳສຳລັບລູກໆຂອງພຣະອົງ, ເພື່ອຊ່ວຍໃຫ້ພວກເຂົາກັບຄືນບ້ານໄປຫາພຣະອົງຢ່າງປອດໄພ ດ້ວຍຮ່າງກາຍທີ່ໄດ້ຟື້ນຄືນຊີວິດ ແລະ ໄດ້ຮັບຄວາມສູງສົ່ງ, ແລະ ເພື່ອຮັບພອນແຫ່ງຄວາມຊື່ນຊົມ ແລະ ຄວາມສຸກນິລັນດອນ.
The Christ Child [ກຸມມານນ້ອຍພຣະຄຣິດ], ໂດຍ ຊາລ໊ອດ ແອນດຣັສ໌
ບົດບາດແຫ່ງການໄຖ່ຂອງພຣະເຢຊູຄຣິດໃນແຜນຂອງພຣະບິດາ
ພຣະເຢຊູຄຣິດເປັນພຣະບຸດອົງດຽວທີ່ຖືກຳເນີດຂອງພຣະບິດາຜູ້ສະຖິດນິລັນດອນ. ພຣະອົງໄດ້ມາກຳເນີດໃນໂລກເພື່ອກະທຳຕາມພຣະປະສົງຂອງພຣະບິດາຂອງພຣະອົງ (ເບິ່ງ 3 ນີໄຟ 27:13). ພຣະເຢຊູຄຣິດໄດ້ເປັນຜູ້ທີ່ຖືກເຈີມຈາກພຣະບິດາ ເພື່ອເປັນຕົວແທນສ່ວນຕົວຂອງພຣະອົງໃນທຸກສິ່ງທີ່ກ່ຽວຂ້ອງກັບຄວາມລອດຂອງມະນຸດຊາດ. ພຣະອົງເປັນພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ຂອງເຮົາ ເພາະພຣະອົງໄດ້ເອົາຊະນະທັງຄວາມຕາຍ ແລະ ບາບ.
ແອວມາໄດ້ທຳນາຍແກ່ຜູ້ຄົນຂອງກີເດໂອນກ່ຽວກັບວຽກງານການຊ່ວຍໃຫ້ລອດຂອງພຣະເມຊີອາ:
“ແລະ ພຣະອົງຈະສະເດັດອອກໄປ, ທົນຕໍ່ຄວາມເຈັບປວດ ແລະ ຄວາມທຸກ ແລະ ການລໍ້ລວງທຸກຢ່າງ; ແລະ ນີ້ກໍເພື່ອຄຳເວົ້າຈະໄດ້ສຳເລັດຊຶ່ງໄດ້ກ່າວໄວ້ວ່າ ພຣະອົງຈະຮັບເອົາຄວາມເຈັບປວດ ແລະ ຄວາມປ່ວຍໄຂ້ຂອງຜູ້ຄົນຂອງພຣະອົງ.
“ແລະ ພຣະອົງຈະຮັບເອົາຄວາມຕາຍ ເພື່ອພຣະອົງຈະໄດ້ເຮັດໃຫ້ສາຍຮັດແຫ່ງຄວາມຕາຍຊຶ່ງຜູກມັດຜູ້ຄົນຂອງພຣະອົງຫລຸດອອກ; ແລະ ພຣະອົງຈະຮັບເອົາຄວາມບົກພ່ອງຂອງພວກເຂົາ ເພື່ອອຸທອນຂອງພຣະອົງຈະເຕັມໄປດ້ວຍຄວາມເມດຕາຕາມທາງຂອງເນື້ອໜັງ ເພື່ອພຣະອົງຈະຮູ້ຈັກຕາມທາງຂອງເນື້ອໜັງວ່າ ຈະຊ່ວຍເຫລືອຜູ້ຄົນຂອງພຣະອົງຕາມຄວາມບົກພ່ອງຂອງພວກເຂົາໄດ້ແນວໃດ.
“ບັດນີ້ພຣະວິນຍານຮູ້ຈັກທຸກສິ່ງ; ເຖິງຢ່າງໃດກໍຕາມ ພຣະບຸດຂອງພຣະເຈົ້າຍັງຮັບທຸກທໍລະມານຕາມທາງຂອງເນື້ອໜັງ ເພື່ອພຣະອົງຈະໄດ້ຮັບເອົາບາບຂອງຜູ້ຄົນຂອງພຣະອົງ, ເພື່ອພຣະອົງຈະໄດ້ລຶບການລ່ວງລະເມີດຂອງພວກເຂົາຕາມອຳນາດແຫ່ງການປົດປ່ອຍຂອງພຣະອົງ” (ແອວມາ 7:11–13).
ຫລັກທຳຂໍ້ທຳອິດແຫ່ງພຣະກິດຕິຄຸນແມ່ນສັດທາໃນອົງພຣະເຢຊູຄຣິດເຈົ້າ. ສັດທາທີ່ແທ້ຈິງສຸມໃສ່ໃນ ແລະ ຢູ່ທີ່ພຣະຜູ້ຊ່ວຍໃຫ້ລອດ ແລະ ເຮັດໃຫ້ເຮົາໄວ້ວາງໃຈໃນພຣະອົງ ແລະ ມີຄວາມໝັ້ນໃຈຢ່າງເຕັມທີ່ໃນອຳນາດຂອງພຣະອົງທີ່ຈະຊ່ວຍເຮົາຈາກຄວາມຕາຍ, ຊຳລະລ້າງເຮົາຈາກບາບ, ແລະ ອວຍພອນເຮົາດ້ວຍກຳລັງທີ່ເໜືອກວ່າກຳລັງຂອງເຮົາເອງ.
ໂມໂຣໄນໄດ້ເປັນພະຍານວ່າ, “ແລະ ເປັນຍ້ອນການໄຖ່ຂອງມະນຸດ, ຊຶ່ງມາໂດຍພຣະເຢຊູຄຣິດ, ຄົນທັງຫລາຍຈຶ່ງຖືກນຳກັບໄປຫາທີ່ປະທັບຂອງພຣະຜູ້ເປັນເຈົ້າ; ແທ້ຈິງແລ້ວ, ດ້ວຍການນີ້ມະນຸດທັງປວງຈຶ່ງຖືກໄຖ່, ເປັນຍ້ອນການສິ້ນພຣະຊົນຂອງພຣະຄຣິດ ຈຶ່ງເຮັດໃຫ້ເກີດການຟື້ນຄືນຊີວິດ, ຊຶ່ງເຮັດໃຫ້ເກີດການໄຖ່ເພື່ອໃຫ້ພົ້ນຈາກການນອນຫລັບອັນບໍ່ມີວັນສິ້ນສຸດ, ຊຶ່ງເມື່ອເວລາສຽງແກດັງຂຶ້ນ ອຳນາດຂອງພຣະເຈົ້າຈະປຸກມະນຸດທັງປວງໃຫ້ຕື່ນຈາກການນອນຫລັບ; ແລະ ຄົນທັງຫລາຍຈະອອກມາ ທັງຜູ້ນ້ອຍ ແລະ ຜູ້ໃຫຍ່, ແລະ ທຸກຄົນຈະຢືນຢູ່ຕໍ່ໜ້າບ່ອນພິພາກສາຂອງພຣະອົງ ໂດຍຖືກໄຖ່ ແລະ ຫລຸດຈາກສາຍຮັດແຫ່ງຄວາມຕາຍຊົ່ວນິລັນດອນ, ຊຶ່ງຄວາມຕາຍນັ້ນເປັນຄວາມຕາຍທາງໂລກ” (ມໍມອນ 9:13).
ຂ້າພະເຈົ້າເປັນພະຍານວ່າ ພຣະຜູ້ຊ່ວຍໃຫ້ລອດໄດ້ທຳລາຍສາຍຮັດແຫ່ງຄວາມຕາຍ. ພຣະອົງໄດ້ຟື້ນຄືນພຣະຊົນ, ຊົງພຣະຊົນຢູ່, ແລະ ພຣະອົງເປັນແຫລ່ງດຽວແຫ່ງຄວາມຫວັງອັນມີຊີວິດ, ດີ, ແລະ ປະເສີດທີ່ສຸດ.
ຫລັກໝັ້ນໃຫ້ແກ່ຈິດວິນຍານ
ສາດສະດາອີເທີໄດ້ເປັນພະຍານວ່າ, “ດັ່ງນັ້ນ, ຜູ້ໃດທີ່ເຊື່ອໃນພຣະເຈົ້າ ຜູ້ນັ້ນອາດຈະ ມຸ້ງຫວັງຢ່າງແນ່ນອນສຳລັບໂລກທີ່ຈະດີກວ່ານີ້, ແທ້ຈິງແລ້ວ, ແມ່ນທາງເບື້ອງຂວາພຣະຫັດຂອງພຣະເຈົ້າ, ຊຶ່ງຄວາມຫວັງນີ້ມາຈາກສັດທາອັນເຮັດຫລັກໝັ້ນໃຫ້ແກ່ຈິດວິນຍານຂອງມະນຸດ, ຊຶ່ງຈະເຮັດໃຫ້ເຂົາແນ່ໃຈ ແລະ ແນ່ວແນ່, ເຮັດວຽກງານດີໃຫ້ຫລາຍຢູ່ສະເໝີ, ອັນຈະນຳໄປຫາການຖວາຍບາລະມີແດ່ພຣະເຈົ້າ” (ອີເທີ 12:4; ເນັ້ນຄຳເນີ້ງ).
ໃນເທດສະການທີ່ພິເສດຂອງການສະເຫລີມສະຫລອງການກຳເນີດຂອງກຸມມານນ້ອຍໃນເບັດເລເຮັມ, ຂໍໃຫ້ເຮົາຈົ່ງຈົດຈຳຢູ່ສະເໝີວ່າ ພຣະເຢຊູຄຣິດໄດ້ມາກຳເນີດໃນໂລກເພື່ອເປັນພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ຂອງເຮົາ. ພຣະອົງມອບຂອງປະທານອັນລໍ້າຄ່າຈົນຫາທີ່ປຽບບໍ່ໄດ້ແຫ່ງຊີວິດ, ຄວາມສະຫວ່າງ, ການເລີ່ມຕົ້ນໃໝ່, ຄວາມຮັກ, ສັນຕິສຸກ, ມຸມມອງ, ຄວາມຊື່ນຊົມ, ແລະ ຄວາມຫວັງ.
ຂ້າພະເຈົ້າຂໍເຊື້ອເຊີນທ່ານໃຫ້ສະແຫວງຫາຂອງປະທານທາງວິນຍານແຫ່ງຄວາມຫວັງໃນພຣະຜູ້ຊ່ວຍໃຫ້ລອດຢ່າງເໝາະສົມ ໂດຍການສຶກສາຄຳສອນ ແລະ ປະຈັກພະຍານຂອງສາດສະດາສະໄໝບູຮານ ແລະ ສະໄໝໃໝ່ ກ່ຽວກັບການເສຍສະລະຊົດໃຊ້ ແລະ ການຟື້ນຄືນພຣະຊົນທີ່ແທ້ຈິງຂອງພຣະອົງ. ເມື່ອທ່ານເຮັດເຊັ່ນນັ້ນ, ຂ້າພະເຈົ້າສັນຍາວ່າ ປະຈັກພະຍານຂອງທ່ານເຖິງຄວາມເປັນພຣະເຈົ້າຂອງພຣະຜູ້ໄຖ່ຈະເຂັ້ມແຂງຂຶ້ນ, ການປ່ຽນໃຈເຫລື້ອມໃສຂອງທ່ານໃນພຣະອົງຈະເລິກເຊິ່ງຂຶ້ນ, ຄວາມປາດຖະໜາ ແລະ ຄວາມຕັ້ງໃຈຂອງທ່ານທີ່ຈະຢືນເປັນພະຍານທີ່ກ້າຫານຂອງພຣະອົງຈະເພີ່ມຂຶ້ນ, ແລະ ທ່ານຈະໄດ້ຮັບພອນດ້ວຍຫລັກໝັ້ນໃຫ້ແກ່ຈິດວິນຍານຂອງທ່ານ—ແມ່ນແຕ່ຄວາມຫວັງອັນມີຊີວິດ, ດີ, ແລະ ປະເສີດທີ່ສຸດ.
ພ້ອມດ້ວຍບັນດາອັກຄະສາວົກຜູ້ທີ່ໄດ້ເປັນພະຍານເຖິງພຣະອົງຕະຫລອດທຸກຍຸກທຸກສະໄໝ, ຂ້າພະເຈົ້າປະກາດຄຳພະຍານຂອງຂ້າພະເຈົ້າຢ່າງປິຕິຍິນດີວ່າ ພຣະເຢຊູຄຣິດເປັນພຣະບຸດຂອງພຣະເຈົ້າທີ່ຊົງພຣະຊົນຢູ່. ພຣະອົງເປັນພຣະຜູ້ໄຖ່ທີ່ໄດ້ຟື້ນຄືນພຣະຊົນດ້ວຍພຣະກາຍທີ່ເປັນເນື້ອໜັງ ແລະ ກະດູກທີ່ມີລັດສະໝີພາບ ແລະ ຈັບຕ້ອງໄດ້. ແລະ ຍ້ອນການໄຖ່ ແລະ ການຄືນດີກັບພຣະເຈົ້າທີ່ພຣະຜູ້ເປັນເຈົ້າເຮັດໃຫ້ເປັນໄປໄດ້ສຳລັບມະນຸດຊາດທັງປວງ, ເຮົາຈຶ່ງສາມາດຮັບການຮັບຮອງທາງວິນຍານ ແລະ ຄວາມຫວັງທີ່ມີຊີວິດ, ດີ, ແລະ ປະເສີດທີ່ສຸດ ທີ່ “ ຄົນທັງປວງກໍຈະຖືກຊົງບັນດານໃຫ້ມີຊີວິດ ເພາະກ່ຽວເນື່ອງກັບພຣະຄຣິດ” (1 ໂກຣິນໂທ 15:22).
© 2024 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly Liahona Message, December 2024. Laotian. 19296 331