ຂ່າວສານປະຈຳເດືອນ For the Strength of Youth, ເດືອນທັນວາ 2024
ສາກເລື່ອງລາວການກຳເນີດ
ຮຽນຮູ້ກ່ຽວກັບສາກການສະແດງເລື່ອງລາວກ່ຽວກັບຄຣິດສະມາດທີ່ຮູ້ຈັກກັນດີນີ້ ແລະ ເບິ່ງວ່າມັນຊ່ວຍໃຫ້ເຮົາສຸມໃຈໃສ່ທີ່ພຣະຜູ້ຊ່ວຍໃຫ້ລອດແນວໃດ.
ພາບປະກອບ ໂດຍ ແຄໂຣລາຍ ວິບເບີດ
ເບັດເລເຮັມ
ເບັດເລເຮັມ ມີຄວາມໝາຍວ່າ “ບ້ານແຫ່ງເຂົ້າຈີ່” ໃນພາສາເຮັບເຮີ. ບາງຄັ້ງມັນກໍຖືກເອີ້ນວ່າເມືອງຂອງດາວິດ, ທີ່ຖືກທຳນາຍໄວ້ວ່າພຣະເມຊີອາຈະມາຈາກເຊື້ອສາຍຂອງເຂົາເຈົ້າ (ເບິ່ງ ເຢເຣມີຢາ 23:5; ໂຢຮັນ 7:42). ຊາມູເອນໄດ້ເຈີມກະສັດດາວິດທີ່ເມືອງເບັດເລເຮັມ (ເບິ່ງ 1 ຊາມູເອນ 16:1–13). ມັນໄດ້ຖືກທຳນາຍໄວ້ວ່າພຣະເມຊີອາຈະມາກຳເນີດຢູ່ທີ່ນັ້ນ (ເບິ່ງ ມີກາ 5:2).
ໂຮງແຮມ
ໃນພາສາກຣີກ ໂຮງແຮມ ອາດຈະໃຫ້ຄວາມໝາຍວ່າເປັນບ່ອນພັກເຊົາຊົ່ວຄາວ, ລວມທັງຫ້ອງພັກສຳລັບແຂກ. ນາງມາຣີ “ໄດ້ວາງ [ກຸມມານນ້ອຍພຣະຄຣິດ] ໄວ້ໃນຮາງຫຍ້າ; ຍ້ອນວ່າໃນໂຮງແຮມນັ້ນບໍ່ມີຫ້ອງຫວ່າງສຳລັບພວກເພິ່ນເລີຍ” (ລູກາ 2:7). (ການແປຂອງໂຈເຊັບ ສະມິດ ກ່າວວ່າ “ໂຮງແຮມ.”) “ບໍ່ມີບ່ອນຫວ່າງ” ອາດຈະໝາຍຄວາມວ່າພວກເພິ່ນໄດ້ຖືກປະຕິເສດ ຫລື ວ່າບໍ່ມີສະຖານທີ່ໃດທີ່ພວກເພິ່ນສາມາດພັກເຊົາເພື່ອຄອດລູກ. ບໍ່ວ່າຍ້ອນເຫດຜົນໃດ, ພວກເພິ່ນກໍໄດ້ໄປຫາສະຖານທີ່ແຫ່ງໜຶ່ງບ່ອນທີ່ມີຮາງຫຍ້າ.
ຮາງຫຍ້າ
ຮາງຫຍ້າເປັນກ່ອງ ຫລື ຮາງທີ່ມີຂາຕັ້ງຂຶ້ນສູງເພື່ອບັນຈຸອາຫານສຳລັບສັດ. ໃນເຂດຢູດາສະໃໝບູຮານ, ຮາງເຫລົ່ານີ້ສ່ວນຫລາຍແມ່ນເຮັດດ້ວຍຫີນ. ໂຮງແຮມຫລາຍແຫ່ງມີເດີ່ນຢູ່ລະຫວ່າງກາງທີ່ມີຮາງຫຍ້າ, ແລະ ເຮືອນຫລາຍໆບ່ອນກໍຍັງມີຮາງຫຍ້າຢູ່ໃນຫ້ອງໂຖງໃຫຍ່ເຊັ່ນກັນ ເພື່ອຮັກສາສັດລ້ຽງໄວ້ໃນນັ້ນໃນຕອນກາງຄືນ.
ຜ້າອ້ອມ
ບັນດາແມ່ທັງຫລາຍໄດ້ຫໍ່ຜ້າອ້ອມໃຫ້ກັບລູກນ້ອຍເກີດໃໝ່ (ດ້ວຍການພັນຜ້າຫົ່ມ ຫລື ຜ້າແພໃຫ້ກັບເດັກເກີດໃໝ່) ເປັນເວລາຫລາຍພັນປີມາແລ້ວ. ສີ່ງນີ້ຈະເຮັດໃຫ້ພວກເຂົາຮູ້ສຶກສະຫງົບ ແລະ ຖືກປອບໂຍນຈາກການຕົກໃຈທີ່ໄດ້ກຳເນີດອອກຈາກທ້ອງແມ່. ຜ້າແພທີ່ນາງມາຣີໄດ້ນຳໃຊ້ນັ້ນອາດຈະມີລວດລາຍພິເສດທີ່ເປັນເອກະລັກສຳລັບຄອບຄົວຂອງເພິ່ນ.
ນາງມາຣີ ແລະ ໂຢເຊັບ
ພວກເພິ່ນເປັນຄົນດີ ແລະ ຊອບທຳ, ແລະ ທັງສອງເປັນລູກຫລານຂອງດາວິດ. ແຕ່ລະຄົນແມ່ນໄດ້ຖືກຢ້ຽມຢາມໂດຍທູດສະຫວັນໃນການກຽມພ້ອມສຳລັບການກຳເນີດຂອງພຣະຜູ້ຊ່ວຍໃຫ້ລອດ (ເບີ່ງ ມັດທາຍ 1:18–25; ລູກາ 1:26–38). ພວກເພິ່ນໄດ້ເດີນທາງ 100–140 ກິໂລແມັດ (60–90 ໄມ) ມາທີ່ເມືອງເບັດເລເຮັມ. ນາງມາຣີກຳລັງຖືພາລະຫວ່າງການເດີນທາງ.
ຄົນລ້ຽງແກະ
ຄົນລ້ຽງແກະກຳລັງເບິ່ງແຍງຝູງແກະຂອງພວກເຂົາຢູ່ໃກ້ກັບເມືອງເບັດເລເຮັມ. ອີງຕາມນັກປາດອາຈານບາງຄົນ, ມີພຽງແຕ່ແກະທີ່ລ້ຽງໄວ້ສຳລັບການຖວາຍບູຊາໃນພຣະວິຫານເທົ່ານັ້ນທີ່ຖືກອະນຸຍາດໃຫ້ລ້ຽງໃກ້ກັບຕົວເມືອງ. ສະນັ້ນຄົນລ້ຽງແກະເຫລົ່ານີ້ອາດຈະກຳລັງລ້ຽງແກະທີ່ເປັນຕົວແທນຂອງການເສຍສະລະຂອງພຣະເຢຊູຄຣິດເພື່ອພວກເຮົາ (ເບິ່ງ ໂມເຊ 5:6–7). ພວກເຂົາໄດ້ປະຝູງແກະຂອງພວກເຂົາໄວ້ເພື່ອໄປຫາພຣະເມຊີອາ, ຜູ້ທີ່ເຮັດໃຫ້ການເສຍສະລະຊົດໃຊ້ຂອງພຣະອົງລົບລ້າງການຖວາຍບູຊາດ້ວຍສັດ.
ກຸມມານນ້ອຍພຣະຄຣິດ
ພຣະເຢຊູຄຣິດເປັນບຸກຄົນສຳຄັນໃນສາກເລື່ອງລາວການກຳເນີດ— ແລະ ໃນຊີວິດຂອງເຮົາ.
© 2024 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly For the Strength of Youth Message, December 2024. Laotian. 19346 331