Raiyawa

“Era sa cauravou bulabula kece ka yaloqaqa, ia era sa icegu bula ka kaukauwa vinaka tu; ia raica me kena ikuri—ni ra sa tamata yalodina ena veigauna kecega ena veika kecega era nuitaki kina. … Io era sa tamata dina sara ka yalomatua, ni ra sa vakavulici mera muria tiko ga na ivakaro ni Kalou” (Alma 53:20–21).

Era gadreva na cauravou na vanua e rawa ni ra vakasoqoni tani kina mai na idre kei vuravura, tara cake na isema tudei ena kosipeli, ka vaqaqacotaka na nodra vakabauta na Tamada Vakalomalagi kei Jisu Karisito. Digitaka vakamatau na vanua e rawa ni tara kina na isema ni veimaliwai ka vakavurea na vakanananu ni bula taucoko. Na veikasotavi oqo ena tara cake na duavata kei na vakabauta, ka vukei ira na itabagone mera vakatitobutaka na lomadra mera muria na iVakabula.

Mera vakayagataka na iliuliu ni kuoramu, dauveituberi ni kuoramu, kei ira na kenadau ena kuoramu na ivakarau e tuvai tu ena idusidusi oqo me vukea na kena tuvai ka vakadonui na itaviqaravi ni keba bogidua kei na bogivica baleti ira na cauravou, se vanua cava ga era tiko kina. Na keba era sa tuvai ka cokonaki me vaka na ivakavuvuli, iwalewale, kei na inaki eso oqo ena vukei ira na cauravou mera vakayacora na nodra itavi vakamatabete, tubu ena kosipeli i Jisu Karisito, tara cake na isema tudei vakosipeli, ka vakatorocaketaka na bula vakayalo, veimaliwai, vakayago, kei na vakasama (raica na Luke 2:52).

Na vosa iliuliu ni kuoramu sa kena ibalebale tiko o ira na mataveiliutaki ni kuoramu ni dikoni, mataveiliutaki ni kuoramu ni ivakavuvuli, na matabisopi, vata kei ira na ivukevuke ena kuoramu ni bete. O ira na dauveituberi ni Matabete i Eroni kei ira na kenadau era sega ni iliuliu ni kuoramu (raica na iVoladusidusi Raraba: Veiqaravi ena Lotu i Jisu Karisito ni Yalododonu Edaidai, 10.3–10.4, ChurchofJesusChrist.org).