iNaki—Cava na Vuna

Taracake na Vakabauta ka Vakatitobutaka na Saumaki

“Ena veisiga ka lako mai, ena sega ni rawa na bula tiko vakayalo ke sega na cakacaka veituberi, veidusimaki, ka veivakacegui ni Yalo Tabu.” (Russell M. Nelson, “iVakatakila ki na Lotu, iVakatakila ki na Noda Bula,” Ensign se Liaona, Me 2018, 96).

E sega ni rawa ni suguraki na veika vakayalo, ia na keba e rawa ni vukea na kena dau taki na ituvaki mai na veivakawelei ni bula ka rawa mera na vakila rawarawa cake kina na cauravou na Yalotabu, vakalevutaka na nodra vakabauta na Karisito, ka cakava na yalayala mera muri Koya.

Tuvanaka na itaviqaravi e vakavurea na veivosaki se ituvaki eso ka na vukei ira na cauravou me taucoko na nodra saumaki ki na kosipeli i Jisu Karisito. E rawa ni ra vukei ira na cauravou na dauveituberi mera kila na Yalotabu ni ra wasea na nodra veikasotavi ka tukuna baleta na dina. Laiva vei ira na cauravou na gauna vakanomodi mera vakasama titobu, raikiloma, ka volavola ena ivolaniveisiga; oqo e dau gauna e vakavulici, tuberi, ka vakacegui ira kina na Yalotabu. Ni yaco vei ira na cauravou na veikasotavi vakayalo, vakasamataka o na vukei ira vakacava mera kila na cava e sa yaco tiko.

Nanuma ni kevaka e tubu cake na vakabauta kei na saumaki ni dua mada ga na cauravou, sa yaga sara na keba oya. Na Turaga ea veiqaravi yadudua, ka rawa ni caka na keba yadua me vukea e dua ga.

Tokona na Duavata kei na Veitacini ni Kuoramu

“Sa vakaroti ira talega mera kakua ni veileti vakaira, ia me ra vakanamata ki liu ena mata e duabau, ka me duabau ga na vakabauta ka duabau ga na papitaiso, me semati na lomadra ena duavata kei na veilomani vakataki ira” (Mosiah 18:21).

Na keba e vakarautaka na madigi eso me tarai cake kina na bula vakaveitacini kei na duavata ni kuoramu. Ni ra vakila o ira na veiqaravi vata kei iko na loloma kei na veivakabauti, na cakacaka ni Turaga e toso ki liu.

Ni o tuvanaka na itaviqaravi ni keba, qara na sala eso e rawa ni ra cakacaka vata kina na cauravou, rawata na cakacaka veibolei, ka tara cake na veitokani, ka bucina na yalodina ki vei ira vakai ira. Sa rawa vei ira na dauveituberi mera vakatataki ira na iliuliu ni itabagone mera vakaliuca na duavata ena itaviqaravi yadua.

Vakatorocaketaka na Kilayaga, Sorodredre, kei na Colaivua

Kilayaga

“Ia na veika kece oqo me yaga ki na nona lotu na Kalou bula, io me ra vakavinakataka cake na tamata yadua na nodra dui taledi, ka rawata na tamata yadua na, io, me vakadrautaki” (Vunau kei na Veiyalayalati 82:18).

Tuvanaka na itaviqaravi me vakalevutaki na vakasama ni vakatulewa, tara cake na sorodredre, ka vaqaqacotaka na colaivua ni tamata yadua. Vakasamataka na veitaviqaravi e rawa ni vakavulica na kilayaga me vaka na veitaratara kei ira na tani, vakavinakataki motoka ena itikotiko raraba, veivuke taumada, vakasaqa, kei na so tale. Era gadreva na cauravou mera vakatorocaketaka na kilayaga ena vukei ira mera vakavakarau ki na nodra gauna mai muri.

Vakasaqara na sala eso mera vukei kina na cauravou mera tara cake na yalodei ena nodra vakarautaka na madigi me vulica ka vakamatautaka na kilayaga vovou ena ituvaki ni bula-dina. Ni ra cakacaka mera tara cake na kilayaga vovou, vakavulica vei ira ni ra na sega ni matau sara ki na kilayaga vovou ke sega na vakamatautaki kei na sasaga vakaukauwa.

Sorodredre

“Na cava eda gadreva kina na vakabauta sorodredre vakaoqo? Baleta ni tu mai muri na veisiga dredre. Ena tu yadua ena gauna mai muri me rawarawa se ciqomi vinaka na Yalododonu Edaidai yalodina. Eda na vakatovolei yadudua” (Russell M. Nelson, “Qarava na Veisiga ni Mataka ena Vakabauta,” Ensign se Liaona, Me 2011, 35–36).

Na sorodredre sai koya na nomu rawata mo bulatale ka veisau rawarawa ki na bolebole yadua. Tuvanaka na veikasotavi e tara cake na sorodredre. O ira na cauravou e dodonu me ra vakabauti ira vakataki ira—me rawa ni ra vakayarayarataka na vua ena nodra bula mai na ivakatakila, igu, cakacaka vata, vakasama, kila, kei na kilayaga. Mera vakanamata ena itutuniyalo oqo, ki na veika e rawa ni ra cakava ka sega ni vakatau ki na veika ena taudaku ni nodra lewa.

Ni ra cakacaka vata na cauravou ena ituvaki veibolei ni bula vakayago, era na vakatubura na moirawarawa me cakacaka ena vakasama duidui eso ka vulica na sala me duri tale kina mai na dredre. Era na vakavinavinaka kina ki na marau ni bula oqo. Era na tara cake e dua na vakabauta kaukauwa ni ra rawa ni toso ki liu ena veivuke ni Kalou, ena gauna mada ga ni vei dredre duidui ni bula oqo.

iTavi

“E sega ni dau tekivu na Kalou ena nona tarogi keda me baleta na noda rawaka, ia e baleta ga na noda tiko rawa, ia kevaka meda na qai vakadinadinataka na noda nuitakirawa, ena vakalevutaka o koya na noda rawaka” (Neal A. Maxwell, “Na Veiqaravi, Sega ni iTutu, E Wiliki,” Ensign, Julai 1975, 7).

Na keba kei na itaviqaravi tale eso era sa ituvaki me rawa ni ra vulica kina na icolacola na cauravou mai na veikasotavi dina. Era na tubu na cauravou ni ra ciqoma na itavi ka vakacavara na ilesilesi.

Ni tuvanaki na itaviqaravi, era na veivuke na dauveituberi me laurai na itavi eso e rawa ni ra vakatalai kina na cauravou. E dodonu mera veivakavulici na dauveituberi vei ira na mataveiliutaki ni kuoramu ena nodra veilesi ka talemuria na ilesilesi. Na talemuria e ka bibi sara ena vakavulici ni itavi. Vukei ira na iliuliu ni itabagone ni ra vakasaqara na madigi eso me okata na cauravou kece. Vakatarai ira na cauravou mera veiliutaki.

Na rawati ni veika dredre e dau vakavulica na itavi yadua. Na veikasotavi e tautuba e vakarautaka na madigi vinaka mera cakava kina na veika dredre na cauravou. O ira na iliuliu ni kuoramu kei na dauveituberi ni kuoramu era na vukei ira na cauravou mera rawata e levu cake mai na ka era vakabauta ni ra solia na nodra veivakayaloqaqataki, loloma, kei na maqusa ena gauna ni cakacaka. Kakua ni kauta laivi na ibolebole; vukei ira ga mera rawata. Tokoni ira ena itavi vovou me vukea na nodra tubu.