iWalewale—E Vakacava

Veivosakitaka Vata

Ni ra dau veitalanoa vata na iliuliu kei ira na dauveituberi ni kuoramu ena sureta na veivakauqeti ni Yalo Tabu me ra kila na sala e rawa ni sotava kina na keba na nodra gagadre na cauravou kei na nodra matavuvale. Ni ra veivosaki vata na iliuliu ni kuoramu kei na dauveituberi ni kuoramu, era na vulica e dua na sala me ra veivakauqeti kina.

Na veivosaki vinaka e rawati duadua ena gauna:

E rokovi kina na idola ni matabete. Me ra laiva na dauveituberi ni kuoramu me veiliutaki na mataveiliutaki ni kuoramu. E dodonu mera vakatavulica na idola ni mataveiliutaki e tiko vei ira na peresitedi vakadonui ni kuoramu mera ciqoma kina na veivakauqeti e yaga ki na nodra kuoramu.
Na veirogorogoci e vakaliuci. Ena drodro vinaka na veivakauqeti ni ra vakasaqara kece ka ra vakila ni kauwaitaki na nodra kilaka. Na dauniveituberi ena vakavurea na veitalanoa ena nona vakarorogo vakavinaka ka vakauqeta na vosa kei na vakasama mai vei ira na tani. Ni sa rokovi na nodra vakasama na tani, era na qai ciqoma na ivua ni nodra digidigi. (Raica na Vunau kei na Veiyalayalati 88:122; iVoladusidusi Raraba: Veiqaravi ena Lotu i Jisu Karisito ni Yalododonu Edaidai, 4.2.5, ChurchofJesusChrist.org.)

Ena nomuni veivosaki vata, raica na uto ni takete me baleta na keba kei na sala ena vukei ira kina na cauravou yadua. Veivosakitaka na mataqali itaviqaravi ka na vukea na kena rawati na takete oqo kei na sala mo tauyavutaka kina na ituvaki eso me sureta na Yalotabu.

Laurai na Gagadre ni Tamata yadua kei na iVurevure Vakaitaukei

Ena tubu cake na duavata ni kuoramu ni ra kauwai na iliuliu ni kuoramu kei na dauveituberi ki na nodra gagadre na cauravou yadua kei na ituvaki ni nodra matavuvale. Na gagadre, malele, kei na ivurevure e rawa ni raici mai na Vakadidike ni Taledi kei na Malele e kune ena ChurchofJesusChrist.org.

Na tabanalevu kei na matabose ni itabagone ni tabanalevu e rawa ni vukea na kena laurai na nodra gagadre kei na nodra malele na cauravou kei na nodra matavuvale. Vakarorogo vakabibi vei ira na marama ena matabose ni tabanalevu, vakabibi vei ira e rawa ni ra tinadra na cauravou. (Raica na iVoladusidusi Raraba, 7.5.2.)

Vakayagataka na iVurevure Vakaitaukei

E dua na itukutuku ni ivurevure e rawa ni vukei ira na iliuliu ni kuoramu me ra tuvanaka na itaviqaravi ni keba. E rawa ni o biuta na idusidusi ni:

Uabula e tu vei ira na kila, taledi, kila vakacakacaka, se kilaka ki na bolebole e rawa ni sotava tiko e dua na cauravou.
Na iyaya e taukena na Lotu se o ira na lewenilotu se so tale ena itikotiko raraba era na yalorawarawa mera solia me ra vakayagataka na itabagone, me vaka na iyaya ni keba, iyaya ni qoli, iyaya ni qito, bavelo, kei na waqa.
Na iyauqaqa e voleka, me vaka na rara vakavanua kei na yasana, vanua ni qito e wai, kei na vanua ni keba.
Ena vanua e rawa kina, o ira na tamata yadua era vuli vakavuniwai ka rawa ni ra veivuke ena kisi ni leqa tubukoso.

Sa rawa vei ira na iliuliu ni iteki mera vakasamataka mera vakatorocaketaka na idusidusi oqo ena dua na iteki me rawa ni vakarautaki kina na ivurevure cecere me baleti ira taucoko na itabagone ena iteki.

iTuvatuva kei na iVolanivula

Tuvatuvalaki

Na vanua e caka kina na keba ni kuoramu ni Matabete i Eroni ena vakatau ki na nomu vanua kei na gagadre. Na keba era dau vakayacori e tautuba ena dua na vanua taqomaki ka yawa mai vale. E dodonu me vakayacori na keba ena dua na vanua vagagalu era na vakila kina na cauravou na Yalo, wasea na nodra ivakadinadina, vuli kilayaga eso, ka veilasamaki. Ena vanua e dredre se vakatabui kina na keba bogi dua, ena vinaka cake beka me na tuvanaki e dua na keba ena siga. E rawa ni vakayacori na keba ena dua na vanua volekata na nodra itikotiko na cauravou.

E rawa ni tuvanaki na keba ena dua ga na gauna ni yabaki. Raica mo vakasamataka na draki, na kena gauna, kei na mataqali keba era vinakata na cauravou mera sotava. Ena ituvaki e rawa kina, e dodonu vei ira na cauravou me ra taura e dua na keba sigavica ena veiyabaki (raica na iVoladusidusi Raraba, 10.2.1.3). Me ganita, na keba me kua ni sivia e lima na siga, e sega ni dodonu me vakayacori ena Siga ni Vakacecegu, ka sega ni dau vakayacori ena siga Moniti.

Me kena ikuri, me tolu ki na ono na itaviqaravi vakabogi e vakauqeti, ke vakatarai ena ituvaki. (raica na iVoladusidusi Raraba, 20.6.12). Vakamuria na lawa ni vanua me baleta na keba vakabogi.

iVolanivula

E gadrevi na gauna veirauti me tuvai kina na veikasotavi ka na sotava na rai kei na inaki vakaibalebale. Na tuvai ni keba ena dua na yavu vakayabaki e vakalevutaka cake na ituvakiyaga ni keba ena kena soli na gauna vei ira na iliuliu mera tokoni ira na cauravou ka vakatakila ka okati ira na matavuvale. Na ituvatuva e liu tiko e solia na gauna me vakavakarau vakayago, vulica na kilayaga me baleta na keba, ka kumuni ilavo e gadrevi me vaka na lawatu ni Lotu.

Gacagaca Bibi ni Tuvanaki ni Keba

Masu ka veivosaki vata.
Tuvatuvanaki Vakayabaki.
Tuvanaka na takete vakatabakidua me baleta na keba.
Tuvanaka na ituvatuva me vakavurea na isema vakayalo.
Tuvanaka na taraicake ni duavata ni kuoramu.
Cakava e dua na ituvatuva ni ivurevure vakarautaki.
Vakavulici ira na itabagone mera qarava na ilesilesi.
Veituberi ena kilayaga ni veiliutaki.
Vakarautaka na veiqaravi.
Ciqomi ira na vakaleqai vakayago.
Vakadeitaka na tataqomaki.