Abuso
Pagpanalipod sa mga Miyembro ug Pagreport sa Pag-abuso

“Pagpanalipod sa mga Miyembro ug Pagreport sa Pag-abuso,” Unsaon sa Pagtabang (2018).

“Pagpanalipod sa mga Miyembro ug Pagreport sa Pag-abuso,” Unsaon sa Pagtabang.

Pagpanalipod sa mga Miyembro ug Pagreport sa Pag-abuso

Ang pag-abuso mao ang pagpasagad o pagmaltrato sa uban (sama sa anak o kapikas, sa mga tigulang, sa mga baldado, o ni bisan kinsa) sa paagi nga makahatag og pisikal, emosyonal, o sekswal nga kadaut. Ang unang responsibilidad sa Simbahan sa mga kaso sa pag-abuso mao ang pagtabang niadtong giabuso ug sa pagpanalipod niadtong mahimong biktima sa umaabut nga pag-abuso. Ang mga lider ug mga miyembro sa Simbahan kinahanglang maamumahon, maloloy-on, ug sensitibo kon makigtambayayong sa mga biktima ug sa ilang mga pamilya.

Sa usa ka sulat nga gipetsahan og Marso 26, 2018, ang Unang Kapangulohan sa Simbahan miawhag sa mga lider sa Simbahan nga pinaagi sa gugma motabang niadtong nag-antus sa pag-abuso:

“Kining tibuok kalibutan nga problema padayon nga nakapabalaka kanamo karon. Ang among mga pagbati ug mga pag-ampo anaa niadtong naapektuhan niining bug-at nga problema.

“Aron matabangan nga masiguro ang kasiguroan ug proteksyon sa mga bata, mga batan-on, ug mga hamtong, mohangyo mi nga ang tanang mga lider sa pagkapari ug sa auxiliary mapamilyar sa kasamtangang mga polisiya ug mga lagda sa Simbahan bahin sa pagpugong ug pagtubag sa pag-abuso” (Sulat sa Unang Kapangulohan, Mar. 26, 2018).

Ang mga lider ug mga miyembro sa Simbahan kinahanglang motuman sa tanang legal nga mga obligasyon sa pagreport sa pag-abuso ngadto sa sibil nga mga awtoridad. Kinahanglan gayud nga walay lider nga mobaliwala sa usa ka report sa pag-abuso o motambag sa usa ka miyembro nga dili moreport sa kriminal nga kalihokan. Ang mga bishop, mga presidente sa branch, ug mga presidente sa stake kinahanglang motawag sa eklesyastikal nga help line sa Simbahan matag higayon nga makahibalo sila bahin sa pag-abuso aron motabang sa mga biktima ug mahimo ang mga gikinahanglan sa pagreport. Adto sa counselingresources.lds.org alang sa numero sa help line ug sa dugang nga impormasyon.

Ang mga lider ug mga miyembro sa Simbahan kinahanglan usab nga motabang sa mga biktima, mga nakasala, ug sa ilang mga pamilya nga makabaton og propesyonal nga pagtambag o laing mga kapanguhaan sa komunidad, kon anaa. Kon magtrabaho aron matabangan ang mga nakasala, ang mga lider sa pagkapari kinahanglang motabang nila nga maghinulsol, modawat sa tanang sangputanan sa ilang mga aksyon, ug mohunong sa ilang abusado nga kinaiya (tan-awa sa Isaias 1:18; Mosiah 26:29–32; Doktrina ug mga Pakigsaad 64:7).

Alang sa mga lider sa Simbahan, palihug ribyuha ang mosunod nga video diha sa konseho sa ward o sa stake:

12:10

Mga Kapanguhaan sa Komunidad ug sa Simbahan

(Ang ubang mga kapanguhaan nga gilista sa ubos wala himoa, wala gimintenar, o wala gikontrolar sa Ang Simbahan ni Jesukristo sa mga Santos sa Ulahing mga Adlaw. Samtang kining mga materyal gitumong aron magsilbing dugang nga mga kapanguhaan, ang Simbahan wala moendorso og bisan unsang sulod [content] nga wala mahisubay sa mga doktrina ug mga pagtulun-an niini.)

Alang sa dugang nga impormasyon kon unsaon sa pagtabang niadtong naapektuhan sa pag-abuso, palihug konsultaha ang mosunod nga mga materyal: