Unsa ang kinahanglan nakong buhaton kon ang akong anak giabuso?

Mahimong maagian nimo ang nagkadaiyang matang sa mga emosyon sa pagkadiskubre nga ang imong anak giabuso, lakip na ang pagkakugang, dili makatuo, kasuko, ug kaguol. Normal ra nga mobati og kasamok sa panghunahuna kon kansang mga panginahanglan ang tutokan, ilabi na kon ang imong anak giabuso sa laing sakop sa pamilya. Ang pagkasayud kon unsaon pagtubag sa mga panginahanglan sa tanan makapabug-at sa pagbati. Ang imong unang prayoridad kinahanglang mao ang pag-atiman sa mga panginahanglan sa giabuso nga anak. Ang imong ikaduhang prayoridad kinahanglang mao ang pagbaton og tabang alang sa imong kaugalingon ug sa imong pamilya. Kon ang nakasala usa sa imong laing mga anak, magkinahanglan usab siya og tabang.

Hinumdumi nga magpakitambag diha sa pag-ampo uban sa Langitnong Amahan ug mangayo og tabang sa Manluluwas, pinaagi sa Iyang Pag-ula. Gidapit kitang tanan sa Ginoo nga moduol ngadto Kaniya bisan unsa pa man ang atong mga kahimtang:

“Umari kanako, kamong tanan nga nabudlay ug nabug-atan, ug papahulayon ko kamo.

“Isangon ninyo ang akong yugo diha kaninyo, ug pagtuon kamo gikan kanako; kay ako maaghup ug mapaubsanon sa kasingkasing: ug makakaplag kamog pahulay alang sa inyong mga kalag.

“Kay masayon ang akong yugo, ug magaan ang akong luwan” (Mateo 11:28–30).

Mga Panginahanglan sa Imong Anak

Ang giabuso nga mga bata mahimong maayo ra tan-awon—ug daghan pa gani ang moingon nga maayo ra sila. Mahimong molihok sila nga morag wala makaapekto nila ang pag-abuso. Ang mga bata mahimong dili mopaambit nga nakasinati sila og pag-abuso tungod sa nagkadaiyang mga rason. Mahimong maglakip kini sa kaulaw, paglikay sa kasakit o truma, kahadlok nga magkaproblema sila, kahadlok sa nakasala, kahadlok nga magkaproblema ang ubang tawo, kakulang sa panabut sa unsay nahitabo o nanghitabo, ug sa kawalay abilidad nga masulti ang nasinati. Importante nga makonsiderar nga kon ang nakasala ila rang kaila ug gipangga, mahimo nga gustong panalipdan sa mga bata ang nakasala gikan sa mga sangputanan. Bisan unsa pa ang gusto sa imong anak, importante ang pagbuhat dayon sa mosunod sa higayon nga imong madiskubrihan ang pag-abuso:

1. Paghimo og mga lakang aron mapanalipdan ang bata gikan sa dugang pa nga pag-abuso.

2. Ireport ang pag-abuso ngadto sa sibil nga mga awtoridad. Pangandam sa pagpaambit sa impormasyon mahitungod sa nakasala, sa imong anak, ug sa bisan unsang nahibaloan nga impormasyon mahitungod sa pag-abuso. Komon ra nga walay mga tubag sa tanang mga pangutana nga ipangutana kanimo atol sa pagreport. Kooperar sa sibil nga mga awtoridad ug sultihi sila sa tanan kutob sa imong nahibaloan. Makatabang kini nga mapabiling luwas ang bata.

3. Kon ang bata giabuso sa laing sakop sa pamilya (sama sa igsoon o ginikanan), ang pagpahilayo sa nakasala gikan sa panimalay mahimong mao ang pinakamaayong opsyon.

Ang imong anak nga giabuso magkinahanglan og suporta, pagsabut, ug pasalig nga mapanalipdan sila. Pakig-istoryahi ang imong anak kon unsay makatabang nila nga mobati nga luwas ug, kutob sa mahimo, hatagi sila niadtong mga butanga. Ang mga lider sa Simbahan, sibil nga mga awtoridad, ug propesyonal nga mga tigtambag makatabang nimo nga mapalambo ang tukma nga mga pamaagi sa kasiguroan.

Pasaligi ang bata nga ang pag-abuso dili ilang sayop; ang maabuso dili usa ka sala, ug wala kinahanglana nga maghinulsol sila. Tabangi sila nga mahibalo nga sila adunay tabang ug suporta. Kon mahimo, ipasusi ang imong anak pinaagi sa usa ka propesyonal nga tigtambag kinsa nakasinati sa pakigtambayayong sa giabuso nga mga bata. Makatimbang-timbang ang usa ka tigtambag sa epekto sa pag-abuso diha sa imong anak ug makatambag kon unsaon sa pagtabang kanila aron mamaayo.

Pagbaton og Tabang alang Kanimo ug sa Imong Pamilya

Hinumdumi, dili ikaw ang responsable kon ang imong anak giabuso sa laing tawo; ang bugtong tawo nga responsable mao ang nakasala. Ang mga ginikanan ug ang ubang mga sakop sa pamilya sa mga bata nga giabuso mahimong makabenepisyo gikan sa propesyonal nga pagtambag. Makadawat ka usab og espiritwal ug emosyonal nga suporta gikan sa mga lider sa Simbahan. Siguroa nga mogahin ka og panahon sa pagpalig-on sa espiritwal, emosyonal, sosyal, pisikal, ug sa intelektwal nga paagi.

Kaloy-i ang imong kaugalingon ug ang mga sakop sa imong pamilya. Ang pagkadiskubre nga ang imong anak giabuso makahatag og tensyon sa mga relasyon sa pamilya. Padayuna ang mga kalihokan sa pag-ugmad og relasyon uban sa mga sakop sa imong pamilya. Kasagaran sa mga ginikanan mobati nga ang mga butang dili na gayud mobalik pa sa normal. Magkinahanglan kini og panahon, apan ayaw pagpakawala sa paglaum. Ang Manluluwas nga si Jesukristo, pinaagi sa Iyang Pag-ula, makatabang kanimo aron mamaayo.

Kon laing sakop sa imong pamiya ang nakasala, tingali kinahanglan nimong ikonsiderar ang pagpahilayo kaniya gikan sa panimalay. Samtang morag mopabati kini nga ang pamilya nabungkag, ang panaglagyo usa ka importante nga lakang nga mahimong moresulta sa pagkaayo sa katapusan sa tanang nalambigit. Sa ubang mga sitwasyon, ang panaghiusa pagbalik sa pamilya mahimong posible sa katapusan pinaagi sa tabang sa sibil nga mga awtoridad ug propesyonal nga mga tigtambag. Sa ubang mga sitwasyon, ang panaghiusa pagbalik sa pamilya tingali dili mahimong iawhag.

Mga Kapanguhaan sa Komunidad ug sa Simbahan

(Ang ubang mga kapanguhaan nga gilista sa ubos wala himoa, wala gimintenar, o wala gikontrolar sa Ang Simbahan ni Jesukristo sa mga Santos sa Ulahing mga Adlaw. Samtang kining mga materyal gitumong aron magsilbing dugang nga mga kapanguhaan, ang Simbahan wala moendorso og bisan unsang sulod [content] nga wala mahisubay sa mga doktrina ug mga pagtulun-an niini.)

• “Why a Child May Sexually Harm Another Child,” Stop It Now!

• “Help for Parents of Children Who Have Been Sexually Abused by Family Members,” Rape, Abuse & Incest National Network (RAINN)

• “What to Do If Your Child Discloses Sexual Abuse: A Guide for Parents and Caregivers,” National Child Traumatic Stress Network (NCTSN)

• “Coping with the Shock of Intrafamilial Sexual Abuse: Information for Parents and Caregivers,” National Child Traumatic Stress Network (NCTSN)

May Kalabutan nga mga Artikulo

• Pagpakig-istorya sa mga Bata mahitungod sa Pag-abuso

• Unsa ang mga timailhan nga ang usa ka tawo giabuso?

• Unsa ang kinahanglan nakong buhaton kon nahibalo ko o nagsuspetsa nga ang usa ka tawo giabuso?