Pagpangandam sa Leksiyon
Mga Baroganan sa Epektibo nga Pagpangandam sa Leksiyon
Mga Kapanguhaan sa Pagpangandam sa Leksiyon
Mga kasulatan
Ang tanang upat ka kurso sa seminary ug ang kadaghanan sa giaprobahan nga mga kurso sa institute naglangkob og pagtuon sa sumbanang mga kasulatan. Ang nag-unang kapanguhaan sa pagtino kon unsay itudlo niini nga mga kurso mao ang mga kasulatan mismo. Sa usa ka pakigpulong ngadto sa mga magtutudlo sa seminary ug institute, si Presidente Ezra Taft Benson mitudlo, “Kanunay hinumdomi, walay makatagbaw nga puli sa mga kasulatan ug sa mga pulong sa buhing mga propeta. Kinahanglan kini ang inyong orihinal nga mga kapanguhaan” (“The Gospel Teacher and His Message” [pakigpulong ngadto CES religious educators, Sept. 17, 1976], 3).
Ang pipila sa mga kurso sa institute nagatutok sa mga hilisgotan sa ebanghelyo kay sa pagtuon sa sumbanang mga kasulatan. Ang mga magtutudlo niini nga mga kurso kinahanglang maghunahuna sa materyal nga gisugyot diha sa kurikulum sa institute (ingon man sa mga kasulatan) isip ilang unang kapanguhaan alang sa pagpangandam. Ang mga magtutudlo kinahanglan nga makanunayong mangita og mga oportunidad sa paggamit sa mga kasulatan ug sa mga pulong sa mga propeta aron sa pagpatin-aw ug pagpakita sa mga doktrina ug mga baroganan nga gitudlo niini nga mga kurso.
Kurikulum sa seminary ug institute
Ang kurikulum sa seminary ug institute gihatag isip ang nag-unang kapanguhaan sa pagtabang sa mga magtutudlo sa pagpangandam ug sa pagtudlo og epektibong mga leksiyon. Ang kurikulum naghatag og background nga impormasyon mahitungod sa mga kasulatan ug sa ilang konteksto, mga pagpasabot sa lisod nga mga pulong ug hugpong sa mga pulong, mga komentaryo sa Kinatibuk-ang Awtoridad bahin sa mga doktrina ug mga baroganan nga gitudlo diha sa mga kasulatan, ug mga sugyot kon unsay itudlo nga sulod, mga doktrina, ug mga baroganan. Kini usab nagsugyot og mga ideya kon unsaon sa pagtudlo. Samtang naggamit ang mga magtutudlo sa kurikulum kauban sa ilang pagtuon sa hut-ong sa kasulatan [scripture block] , ang Espiritu Santo makadasig kanila samtang ilang gihimo nga personal ang mga leksiyon alang sa mga panginahanglan sa ilang mga estudyante.
Mihatag og pagpasabot si Presidente Henry B. Eyring kabahin sa pagpangandam ug paggamit sa kurikulum: “Kadtong gitawag sa propeta aron sa pagseguro sa kaeksakto sa doktrina nga gitudlo diha sa Simbahan mirebyo sa matag pulong, matag hulagway, matag diagram diha sa kurikulum nga inyong nadawat. Atong mabuksan ang gahom sa kurikulum pinaagi lamang sa paglihok basi sa atong hugot nga pagtuo nga kini dinasig sa Dios. …
“Ang pagpabilin diha sa sulod sa kurikulum ingon man usab sa pagsunod-sunod niini moabli sa talagsaon natong mga gasa sa pagtudlo, dili mopugong niini” (“The Lord Will Multiply the Harvest” [usa ka gabii kauban ang usa ka Kinatibuk-ang Awtoridad, Peb. 6, 1998], 4–5).
Dugang nga mga kapanguhaan
Ang mga magtutudlo mahimong mogamit og dugang nga mga kapanguhaan sama sa mga magasin sa Simbahan, ilabi na ang mga pagtulun-an gikan sa kinatibuk-ang komperensiya, tungod kay kini naghatag og mas tin-aw nga pagsabot sa hut-ong sa kasulatan [scripture block] . Ang ubang mga kapanguhaan kinahanglan nga dili gamiton aron sa pagpangagpas, sa pagpahingangha o sa pagtudlo og mga ideya nga wala pay klarong naestablisar sa Simbahan. Bisan pa og ang usa ka butang napanghimatud-an na o namantala kaniadto, mahimong dili lang gihapon kini angay nga gamiton diha sa klasrom. Ang mga leksiyon kinahanglan nga molig-on sa hugot nga pagtuo ug pagpamatuod sa mga estudyante.
Paghukom kon Unsa ang Itudlo ug kon Unsaon sa Pagtudlo Niini
Kon mag-andam og leksiyon, ang matag magtutudlo kinahanglan gayod nga modesisyon: “Unsa ang akong itudlo?” ug “Unsaon ko kini sa pagtudlo?” Ang Unsa ang itudlo naglangkob sa konteksto (lakip ang background, kultura, ug dapit nga nahitaboan), sa sulod (sama sa istorya, mga tawo, mga panghitabo, mga sermon, ug dinasig nga mga pagpasabot), ug sa importanteng mga kamatuoran sa ebanghelyo nga anaa sulod sa hut-ong sa kasulatan. Ang Unsaon sa pagtudlo naglangkob sa mga metodo, mga paagi, ug mga kalihokan nga gamiton sa magtutudlo sa pagtabang sa estudyante nga makakat-on (sama sa panaghisgot sa klase, audiovisual nga mga kapanguhaan, mga pagbansay sa pagsulat, ug buluhaton sa ginagmayng grupo). Ang paghukom kon unsa ang itudlo kinahanglan nga mag-una sa pagpili kon unsaon sa pagtudlo aron ang unang pagtutok magpabilin diha sa mga kasulatan, kay sa diha sa mga metodo ug mga paagi.
Sa panahon sa pag-andam sa leksiyon, kinahanglan ang magtutudlo maghatag og igong panahon ug paningkamot sa paghukom sa duha unsa ang itudlo ug unsaon sa pagtudlo. Kon ang unsa ang itudlo makakuha sa hapit tanan nga paghatag og gibug-aton atol sa pag-andam sa leksiyon, ang magtutudlo wala nay igo nga panahon sa paghunahuna kon unsaon sa pagtabang ang mga estudyante sa pag-apil sa pagkat-on. Sa kasagaran moresulta kini sa mga leksiyon nga makapalaay ug nakasentro kaayo sa magtutudlo. Kon ang magtutudlo magtutok pag-ayo sa unsaon pagtudlo, ang mga leksiyon dili magkasumpay, kulang sa katuyoan ug sa gahom.
Pagdesisyon kon Unsa ang Itudlo
Adunay upat ka sukaranang mga ang-ang nga agian sa mga magtutudlo samtang sila mag-andam unsa ang ilang itudlo: Una, maninguha sila sa pagsabot sa konteksto ug sa sulod sa hut-ong sa kasulatan [scripture block] . Ikaduha, ilang ilhon ug sabton ang mga doktrina ug mga baroganan nga makaplagan diha sa hut-ong. Ikatulo, modesisyon sila kon unsa nga mga baroganan ang labing importante nga makat-onan ug magamit sa ilang mga estudyante. Ug ika-upat, sila modesisyon kon unsa nga lebel sa paghatag og gibug-aton ang ihatag sa matag bahin sa hut-ong sa kasulatan.
1. Sabta ang konteksto ug ang sulod sa hut-ong sa kasulatan nga gitudlo.
Ang mga magtutudlo maninguha sa pagsabot sa konteksto, o sa background, sa hut-ong sa kasulatan ug sa pagsubsob sa ilang mga kaugalingon diha niana nga hut-ong sa kasulatan hangtod ang sulod mahimong pamilyar. Ang pagsubsob sa kaugalingon diha sa mga kasulatan nagkahulogan og pagbasa, pagtuon, pagpamalandong, ug sa pag-ampo alang sa inspirasyon ug pagsabot mahitungod sa unsay nabasa.
Usa sa labing makatabang nga mga butang nga mabuhat sa magtutudlo aron masabtan ang sulod sa kasulatan mao ang pagbantay sa mga kausaban diha sa hut-ong sa kasulatan diin ang pag-ilis og hilisgotan o lihok mahitabo. Gamit ang kurikulum ug ang ilang kaugalingong mga panabot, ang mga magtutudlo makabahin dayon sa hut-ong sa kasulatan ngadto sa ginagmay nga mga bahin o sa mga grupo sa mga bersikulo base niining mga natural nga mga kausaban. Kining ginagmay nga mga bahin mahimong importante nga mga hugpong o bahin sa mga hut-ong nga gamiton unya sa mga magtutudlo sa ilang pag-andam og han-ay sa dagan sa ilang leksiyon ug aron sila makahimo sa paghatag og bisan pipila ka pagtagad sa tanang sulod sa hut-ong sa kasulatan.
Samtang naglatid sa hut-ong sa kasulatan niini nga paagi, ang mga magtutudlo kinahanglan usab nga maninguha sa pagpalambo sa ilang pagsabot sa mga tawo, mga dapit, mga panghitabo, ug sa hinungdan-ug-epekto nga mga relasyon nga ingon og importante, ingon man sa kahulogan sa lisod nga mga pulong o hugpong sa mga pulong. Ang pagkuha og igo nga pagsabot sa sulod kasagaran nagkinahanglan og pagbasa sa hut-ong sa kasulatan sobra sa kausa.
2. Ilha ug sabta ang mga doktrina ug mga baroganan.
Uban sa pagsabot sa konteksto ug sa sulod, ang mga magtutudlo kinahanglan nga mabinantayon sa pag-ila ug sa pagsabot sa mga doktrina ug mga baroganan diha sa hut-ong sa kasulatan ug sa pagribyo niadtong gisugyot diha sa kurikulum. Gawas kon nabuhat na sa kurikulum, ang usa ka magtutudlo kinahanglan nga maningkamot sa pagsulat sa mga doktrina ug mga baroganan sa klaro, mubo nga mga pamahayag. Ang pagbuhat sa ingon nagtabang sa pagpatin-aw sa mga baroganan ug sa kahulogan niini diha sa hunahuna sa magtutudlo. Kini motabang usab sa paggiya sa mga kalihokan sa pagkat-on atol sa klase ug motugot og dugang nga pagsabot ug mas nakatutok nga paggamit sa mga estudyante.
3. Desisyoni kon hain nga mga baroganan ug mga doktrina ang labing importante nga makat-onan ug magamit sa mga estudyante.
Sa normal nga hut-ong sa kasulatan hapit kanunay mas daghan ang materyal kay sa makahuloganong paghisgot diha sa panahon sa klase. Sa higayon nga ang mga magtutudlo nakatuon sa mga kasulatan ug sa kurikulum, kinahanglan silang mohukom hain nga mga doktrina ug mga baroganan ang labing importanteng masabtan ug maggamit sa ilang mga estudyante. Sa paghimo niini nga desisyon, kinahanglan nga ang mga magtutudlo mokonsiderar sa mosunod.
Mga Pag-aghat sa Espiritu Santo. Sa paghukom unsa nga mga baroganan ug mga doktrina ang hatagan og gibug-aton, kinahanglan nga ang mga magtutudlo padayong magtinguha og direksiyon gikan sa Espiritu Santo.
Ang tinguha sa dinasig nga tagsulat. Ang mga magtutudlo kinahanglan nga maninguha sa pagtino kon unsa ang gitinguha nga ipahayag sa propetikanhong tagsulat. Miingon si Presidente Ezra Taft Benson: “Kon sila [ang mga tagsulat] nakakita sa atong panahon, ug mipili niadtong mga butang nga labing bililhon ngari kanato, dili ba kana ang unsaon nato pagtuon ang Basahon ni Mormon? Kinahanglan nga kanunay natong pangutan-on ang atong mga kaugalingon, ‘Nganong gidasig sa Ginoo si Mormon (o si Moroni o si Alma) sa paglakip niana sa iyang rekord? Unsa nga leksiyon ang akong makat-onan gikan niana nga makatabang kanako sa pagpuyo niining adlawa ug panahona?’” (“The Book of Mormon—Keystone of Our Religion,” Ensign, Nob. 1986, 6). Kinahanglan nga hunahunaon sa mga magtutudlo ang susama nga mga pangutana atol sa ilang pagpangandam sa leksiyon alang sa bisan unsa nga mga kurso sa kasulatan nga ilang gitudlo.
Kinahanglan usab nga hinumdoman sa mga magtutudlo nga ang labing importanteng katuyoan sa mga propeta diha sa mga kasulatan mao ang kanunay nga pagpamatuod kang Jesukristo. Sama sa gisulti ni Nephi, “Kay ang kahingpitan sa akong tuyo mao nga ako unta makakabig sa mga tawo sa pagpaduol ngadto sa Dios ni Abraham, ug sa Dios ni Isaac, ug sa Dios ni Jacob, ug maluwas”(1 Nephi 6:4). Busa, ang usa ka magtutudlo kinahanglang mangutana, “Unsay gitudlo niini nga hut-ong sa kasulatan mahitungod kang Jesukristo nga motabang sa akong mga estudyante sa pagsabot ug sa pagsalig sa Iyang mga pagtulun-an ug Pag-ula?”
Samtang maninguha ang mga magtutudlo sa pagtino sa tuyo sa dinasig nga tagsulat, kinahanglan silang magmatngon sa dili paglapas sa unsay giklaro diha sa basahon. Mipahimangno si Presidente Henry B. Eyring, “Ako dili gayod magpaka-aron ingnon nga nahibalo ako sa tanan nga gipasabot sa mga tigsulat, o unsay dili nila gipasabot” (“‘And Thus We See:’ Helping a Student in a Moment of Doubt” [usa ka gabii kauban ang usa ka Kinatibuk-ang Awtoridad, Peb. 5, 1993], 6).
Makapakabig nga mga baroganan ug ang doktrinal nga mga hilisgotan. Kon magtino kon unsa ang itudlo, ang usa ka magtutudlo kinahanglan nga maghunahuna, “Sa tanang mga kamatuoran nga mahimong hatagan og gibug-aton niini nga hut-ong sa kasulatan, hain ang motabang sa akong mga estudyante nga mas mapaduol ngadto sa Langitnong Amahan ug sa Manluluwas ug mogiya ngadto sa kaluwasan?” Si Presidente Henry B. Eyring mitambag: “Kon mag-andam mo og leksiyon, pangitaa diha ang makapakabig nga mga baroganan. … Ang makapakabig nga baroganan mao kanang moresulta ngadto sa pagkamasulundon sa kabubut-on sa Dios” (sa L. Tom Perry “Converting Principles” [gabii uban sa usa ka Kinatibuk-ang Awtoridad, Peb. 2, 1996], 1).
Ang mga panginahanglan ug mga abilidad sa mga estudyante. Kon mas makaila ug makasabot ang magtutudlo sa iyang mga estudyante, mas sayon kini sa pag-ila ug sa paghatag og gibug-aton sa may kalabotang mga baroganan nga daling magamit. Samtang ang mga magtutudlo magtuon sa hut-ong sa kasulatan, mahimo silang makakita og mga ideya o mga konsepto nga sa personal makapaukyab o may piho personal nga kahulogan, apan kini mahimong lapas sa espiritwal nga pagkaandam ug pagsabot sa mga estudyante (tan-awa pananglit, ang tambag ni Pablo mahitungod sa gatas ug sa gahing pagkaon diha sa 1 Mga Taga-Corinto 3:2). Ang pipila sa mga baroganan nga dili bag-o o dili makaikag sa mga magtutudlo mahimong importante kaayo ngadto sa mga estudyante. Gikinahanglan sa mga magtutudlo ang paghinumdom nga sila nagtudlo og mga estudyante, dili lamang mga leksiyon. Nagmugna sila og kasinatian sa pagkat-on ug dili lamang pag-andam og mga latid sa leksiyon. Ang kurikulum makatabang kaayo sa mga magtutudlo kon magtino hain nga mga baroganan ug mga doktrina ang labing may kalabotan sa mga estudyante.
Gitudlo ni Elder Richard G. Scott: “Itino, sumala sa indibidwal nga mga kapasidad ug mga panginahanglan sa inyong mga estudyante, kon unsa ang kinahanglan nga unahon. Kon ang usa ka mahinungdanon nga baroganan nasabtan, nahimong kabahin sakaugalingon, ug nahimong kabahin sa giya sa kinabuhi sa mga estudyante, niana ang labing importante nga tumong natuman” (“To Understand and Live Truth” [usa ka gabii uban sa usa ka Kinatibuk-ang Awtoridad, Peb. 4, 2005], 2–3).
Samtang naghukom unsa nga mga kamatuoran ang hatagan og gibug-aton, ang magtutudlo mahimo usab nga moplano og daklit nga pagpasabot sa usa ka baroganan o doktrina nga wala nila planoha nga tutokan sa higayon sa pagtudlo sa hut-ong sa kasulatan. Kini makahatag sa Espiritu Santo og oportunidad sa pagpersonal sa usa ka baroganan nga, bisan pa man dili mao ang labinggitutokan sa leksiyon, mahimong importante alang sa indibidwal nga estudyante. Kinahanglan usab nga hinumdoman sa mga magtutudlo nga ang mga estudyante mahimong makamatikod ug gustong histogan ang pipila ka mga kamatuoran sa ebanghelyo nga wala mamatikdi ug wala planohi sa magtutudlo nga hisgotan.
Sa tanan niining mga konsiderasyon, ang magtutudlo kinahanglang magtinguha og panghimatuod gikan sa Espiritu. Ang Espiritu motabang kanila nga mas masabtan ang tinguha sa dinasig nga manunulat sa kasulatan, ang mga panginahanglan sa mga estudyante, ug hain nga mga kamatuoran sa ebanghelyo ang makatabang sa mga estudyante nga mas maduol sa ilang Langitnong Amahan ug sa Manluluwas.
4. Pagdesisyon kon unsa nga lebel sa paghatag og gibug-aton ang ihatag sa matag bahin sa hut-ong sa kasulatan.
Adunay pagsabot sa konteksto ug sa sulod sa hut-ong sa kasulatan, ingon nga nabahin na kini ngadto sa mas gagmay, may kalabotan sa sulod nga mga bahin, ug ingon nga nakapili na og importanteng mga kamatuoran sa ebanghelyo alang sa pagkat-on ug paggamit sa mga estudyante, ang mga magtutudlo andam na karon sa paghukom unsa nga lebel sa paghatag og gibug-aton ang ihatag sa kada bahin sa hut-ong sa kasulatan. Sa kasagaran, kadto nga mga bahin nga naglangkob sa mga doktrina ug mga baroganan nga gipaninguha nga hatagan og importansiya sa magtutudlo diha sa leksiyon maoy tagaan og labing dako nga gibug-aton. Kini nagpasabot nga alang niini nga mga grupo sa mga bersikulo, ang mga magtutudlo mogiya sa mga estudyante sa pagsabot sa ilang konteksto ug sulod, sa pag-ila ug sa pagsabot sa importante nga mga doktrina ug mga baroganan nga makaplagan diha niini, sa pagbati sa kamatuoran ug importansiya niadto nga mga doktrina ug mga baroganan diha sa ilang mga kasingkasing, ug sa pagtabang kanila sa pagsabot kon unsaon nila sa paggamit niadto nga mga kamatuoran sa ilang mga kinabuhi.
Ang ubang bahin sa hut-ong sa kasulatan mahimong dili kaayo motutok diha sa mga kamatuoran nga gihatagan og gibug-aton sa leksiyon, apan kinahanglan nga kini dili laktawan o ibalewala. Ang mga magtutudlo kinahanglang magplano sa bisan og pag-summarize lang usab niini nga mga grupo sa mga bersikulo.
Pahinumdom: Kini talagsaon ang pagbaton og dili limitado nga panahon sa pagpangandam. Usa ka sagad nga sayop nga mahimo sa mga magtutudlo mao ang paggahin og daghang panahon sa pagbasa ug sa pagtuon ug sa pagpaninguha sa paghukom kon unsa ang itudlo nga wala nay igong panahon sa mahunahunaong pagpangandam kon unsaon sa pagtudlo niini. Adunay moabot nga higayon diha sa pagpangandam sa matag leksiyon diin ang magtutudlo kinahanglan gayod nga moingon, “Akong gibati nga ako adunay igo nga pagsabot sa unsa ang itudlo. Karon ako kinahanglan nga maghukom unsaon nako pagtudlo niini sa epektibo nga paagi.”
Desisyoni kon Unsaon sa Pagtudlo
Komon sa mga magtutudlo nga mahimong maukyab mahitungod sa hut-ong sa kasulatan nga ilang itudlo ug sa mga kamatuoran nga ilang nadiskobrehan. Pinaagi sa makugihong paningkamot sa pagtuon, pagsabot, ug pagka-natudloan sa Espiritu, ang mga magtutudlo malig-on ug dayag lamang nga mobati og tinguha sa pagpahayag unsay ilang nakat-onan atol sa pagpangandam. Bisan og kini angay, kinahanglan nga hinumdoman nga ang katuyoan sa bisan unsa nga leksiyon mao nga ang mga estudyante makasabot sa mga kasulatan, matudloan sa Espiritu Santo, ug mobati og kadasig sa paggamit unsa ang ilang nakat-onan. Kini hapit kanunay nagkinahanglan og labaw pa sa mga magtutudlo nga magsulti sa mga estudyante unsa ang nakat-onan sa ilang kaugalingon gikan sa mga kasulatan ug kon nganong gibati nila nga kini importante. Kini naglakip usab og labaw pa kaysa magtutudlo nga nagbasa og bersikulo, nagkomentaryo kabahin niini, dayon nagbasa og laing bersikulo.
Ang mga estudyante malig-on kon sila giyahan pinaagi sa proseso sa pagkat-on nga susama sa unsay nasinati sa magtutudlo atol sa pagpangandam sa leksiyon. Kinahanglan nga ang mga estudyante giyahan sa pagsiksik sa mga kasulatan alang sa pagsabot ug sa pagdiskobre sa mga kamatuoran sa ebanghelyo alang sa ilang kaugalingon. Kinahanglan nga sila mahatagan og mga oportunidad sa pagpasabot sa ebanghelyo sa ilang kaugalingon nga mga pulong ug sa pagpakigbahin ug sa pagpamatuod sa unsay ilang nahibaloan ug gibati. Kini nagtabang sa pagdala sa ebanghelyo gikan sa ilang mga ulo naog ngadto sa ilang mga kasingkasing.
Samtang ang mga estudyante kanunay nagsinati og pagkat-on sa ebanghelyo niini nga paagi, makaangkon sila og kompyansa sa ilang abilidad sa pagtuon sa mga kasulatan alang sa ilang mga kaugalingon ug magkat-on pinaagi sa Espiritu. Bation nila ang tinguha sa paggamit unsa ang ilang nakat-onan diha sa ilang mga kinabuhi. Mahimo usab silang mas andam sa pagpasabot unsa ang ilang gituohan ngadto sa uban ug sa pagpamatuod kabahin sa mga doktrina ug mga baroganan sa ebanghelyo.
Kinahanglan nga ang mga magtutudlo magplano og mga paagi nga motabang sa mga estudyante sa pagsinati niining proseso sa pagkat-on samtang sila mouswag og dungan pinaagi sa mga kasulatan diha sa klase. Samtang ang mga magtutudlo nagpalambo sa ilang plano sa leksiyon, ang mga tubag sa mosunod nga mga pangutana naghatag og kapasikaran alang sa paghukom unsaon sa pagtudlo:
-
Unsa nga mga pamaagi o mga kalihokan sa pagkat-on ang motabang sa akong mga estudyante sa pagsabot sa konteksto ug sulod nga gikinahanglan nila nga mahibaloan?
-
Unsa nga mga metodo ang motabang sa mga estudyante nga makahimo sa pag-ila ug sa pagsulti sa importanteng mga doktrina ug mga baroganan ug maghatag kanila og oportunidad sa pagdiskobre sa uban?
-
Unsa ang labing maayo nga paagi sa pagtabang sa akong mga estudyante sa pagsabot niini nga mga baroganan ug mga doktrina?
-
Unsa nga mga metodo o mga paagi ang mogiya sa akong mga estudyante nga mobati sa kamatuoran ug importansiya niini nga mga baroganan ug modapit kanila sa pagpakigbahin ug sa pagpamatuod niini?
-
Unsa ang epektibo nga paagi sa pagtabang kanila nga makakita kon unsaon nila sa paggamit niini nga mga baroganan diha sa ilang mga kinabuhi ug sa pag-awhag kanila sa pagbuhat sa ingon?
Ang mosunod mao ang pipila sa mga pagahunahunaon sa paghukom kon unsaon sa pagtudlo.
Seguroha nga ang mga metodo sa pagtudlo nahiuyon sa mensahe nga gitudlo ug makatabang sa impluwensiya sa Espiritu. Usahay, sa pagsulay og lingaw sa mga estudyante o sa pagpabilin sa ilang interes, ang mga magtutudlo magpili og mga metodo o maggamit og mga paagi nga dili mogiya ngadto sa pagsabot ug paglig-on. Sa pagpili og mga metodo, kinahanglan nga hunahunaon sa mga magtutudlo kon ang pamaagi modugang o mokuha ba sa mensahe nga gituyo sa pagtabang sa mga estudyante nga mahimong kabahin sa ilang kinabuhi. Sama pananglit, ang usa ka dula nga nagtudlo tingali makalingaw ug epektibo nga paagi sa pagtudlo og impormasyon (sama sa pagsunod-sunod sa mga basahon diha sa Biblia), apan sa pagkatinuod dili mabungahon kon ang tumong mao ang pagdapit og espiritwal nga pagbati. Ang pagtinabangay diha sa gamay nga mga grupo mahimong epektibo, apan kay nagkinahanglan og dako-dako nga panahon, kini dili tingali ang labing maayo nga pamaagi alang sa pag-ila og yanong gipahayag nga baroganan.
Kinahanglan nga segurohon sa magtutudlo nga ang mga metodo sa pagtudlo ug ang mga kalihokan angay alang sa usa ka kahimtang sa pagkat-on sa ebanghelyo, dili mopasilo ug mopasakit ni bisan kinsa, ug motabang sa impluwensiya sa Espiritu.
Gamita ang kurikulum. Ang kurikulum sa seminary ug institute nagtanyag og mga sugyot kabahin sa unsaon sa pagtudlo nga naggamit sa Mga Sukaranan sa Pagtudlo ug Pagkat-on sa Ebanghelyo. Samtang ang mga magtutudlo nag-andam sa kada leksiyon, kinahanglan silang magmabinantayon sa pagribyo sa kurikulum ug magpili hain nga impormasyon ug mga metodo ang ilang gamiton sa pagtudlo sa hut-ong sa kasulatan. Ang mga magtutudlo mahimong mopili nga mogamit sa tanan o sa bahin sa mga gisugyot sa kurikulum alang sa hut-ong sa kasulatan o ipahiangay ang gisugyot nga mga ideya ngadto sa mga panginahanglan ug sa mga kahimtang sa ilang klase.
Paghan-ay og may kalabotan ug katuyoan. Kon ang mga estudyante makakita og may kalabotan sa unsay ilang gitun-an diha sa hut-ong sa kasulatan ngadto sa ilang kaugalingon nga mga sitwasyon ug mga kahimtang, sila sa kasagaran maawhag sa pagkat-on ug sa paggamit sa mga pagtulun-an sa ebanghelyo. Sila usab makahimo sa pagkakita sa unsang paagi ang mga kasulatan naghatag og mga tubag ug direksiyon nga makagiya kanila sa tinuod nga mga sitwasyon sa kinabuhi.
Busa, sa higayon nga mangandam kon unsaon sa pagtudlo, mahimong magmaalamon ang mga magtutudlo sa pagpamalandong sa mahangtorong mga kamatuoran nga gilangkob sa hut-ong sa kasulatan ug sa pagkonsiderar kon sa unsang paagi kini magamit ug makahuloganon diha sa mga kinabuhi sa mga estudyante. Maghunahuna niini, ang mga magtutudlo kasagaran nga mosugod sa leksiyon gamit ang may kalabotan nga pangutana, sitwasyon, o problema nga mogiya sa mga estudyante sa pagsiksik sa mga kasulatan alang sa mga baroganan ug mga doktrina sa ebanghelyo nga naghatag kanila og paggiya ug direksyon. Samtang sila nangandam sa mga leksiyon, ang mga magtutudlo kinahanglan nga magplano usab og mga paagi sa pagpabilin sa interes ug sa pagpadayong sa pagpaapil sa mga estudyante diha sa proseso sa pagtuon.
Tinoa ang kapaspason. Kinahanglan nga ang mga magtutudlo makugihong maghimo og paningkamot sa paghuman sa tibuok hut-ong sa kasulatan. Hinoon, sa pagtino sa gidugayon sa panahon nga igahin sa nagkalain-lain nga mga bahin sa leksiyon, importante kini sa mga magtutudlo sa paghinumdom nga sila nagtudlo og mga estudyante, dili mga leksiyon. Kinahanglan ang mga magtutudlo dili kaayo motutok sa higpit nga pagsunod sa plano sa leksiyon nga dili na sila motugot alang sa posibilidad sa inspirasyon o wala maplano nga pag-apil sa estudyante atol sa klase nga maghimo niini nga gikinahanglan nga usbon ang leksiyon.
Usa sa labing sagad nga mga sayop nga mahimo sa mga magtutudlo mao ang paggahin og daghan kaayong panahon sa unang bahin sa leksiyon ug dayon magdali ngadto sa kataposang bahin. Samtang nangandam ang mga magtutudlo, kinahanglan nilang bana-banaon unsay gidugayon ang paghuman sa kada seksiyon sa leksiyon gamit ang mga pamaagi nga ilang napili. Tungod kay ang magtutudlo hapit kanunay adunay daghang itudlo kay sa panahon sa pagtudlo niini, gikinahanglan nila ang pagtino kon hain nga mga bahin sa hut-ong ang hatagan og gibug-aton ug unsa ang i-summarize.
Ang panginahanglan sa kapaspason magamit ngadto sa tibuok kurso ingon man ngadto sa indibidwal nga mga leksiyon. Sama pananglit, sa Bag-ong Tugon nga kurso, kon ang mga magtutudlo mogahin og taas kaayong panahon diha sa upat ka Ebanghelyo, dili sila makahimo og igo nga paghuman sa importanteng mga kamatuoran nga makaplagan diha sa ulahing mga basahon.
Kadaghanan sa mga kurikulum sa seminary ug institute nagtanyag og mga sugyot sa kapaspason ug usa ka iskedyul alang sa paghuman sa tibuok kurso.
Tutuki ang pagtabang sa mga estudyante nga matuman ang ilang tahas. Samtang ang mga magtutudlo nangandam unsaon nila sa pagtudlo, kinahanglan nga magpabilin silang nagtutok diha sa tigkat-on ug dili lamang sa unsay buhaton sa magtutudlo. Kaysa mangutana lamang “Unsay akong buhaton sa klase karon?” o “Unsay akong itudlo sa akong mga estudyante?” ang usa ka magtutudlo kinahanglan usab nga mogamit og pagpangandam sa leksiyon nga maghunahuna, “Unsa ang buhaton sa akong mga estudyante sa klase karon?” o “Unsaon nako pagtabang ang akong mga estudyante nga makahibalo unsa ang ilang gikinahanglan nga mahibaloan?”
Paggamit og nagkalain-lain nga mga metodo ug mga paagi. Bisan ang makadani nga paagi sa pagtudlo mahimong dili epektibo o laay kon masubrahan ang paggamit. Bisan og ang mga magtutudlo kinahanglan nga dili magpili og mga metodo alang sa pagpalain lamang, daghan sa mga epektibong mga magtutudlo nagpalain-lain sa ilang mga paagi sa pagtudlo atol sa kada leksiyon ug usab sa matag adlaw. Kinahanglan ang mga magtutudlo andam sa pag-ilis og mga metodo sa panahon sa leksiyon kon ang mga estudyante nawad-an og interes o kon unsay ilang gibuhat ingon og wala makatabang sa mga estudyante sa pagkab-ot sa gitinguha nga mga resulta.
Ang paggamit og lain-laing pamaagi sa pagtudlo makatabang usab nga maabot ang mga estudyante kinsa nagkat-on sa lahi nga mga paagi. Ang mga metodo sa pagtudlo o mga kalihokan sa pagkat-on nga nagkinahanglan sa mga estudyante sa paggamit og lain-laing mga balatian, sama sa pagtan-aw, pagdungog, paghikap makatabang sa pagpalambo sa pag-apil sa mga estudyante ug sa ilang paghinumdom sa unsay gitudlo.
Bisan og ang mga magtutudlo sa kasagaran kinahanglan nga magpili og mga metodo nga bation nila ang kakomportable ug kahanas sa paggamit, kinahanglan silang andam sa pag-ekspiremento sa bag-ong mga metodo o mga paagi nga makahimo kanila nga gani mas epektibo.
Ang sunod nga seksiyon niini nga tamdanan nga basahon maghisgot og lain-laing mga metodo ug mga paagi nga mahimong ikonsiderar sa mga magtutudlo kon maghukom unsaon sa pagtudlo.
Ang Mga Seminary ug Mga Institute of Religion (S&I) nga kurikulum usa ka nag-una nga kapanguhaan alang sa pagtabang kanimo nga molambo isip usa ka magtutudlo ug maghatag og makapalig-on nga mga kasinatian sa pagkat-on alang sa imong mga estudyante. Si Presidente Henry B. Eyring sa Unang Kapangulohan mitudlo:
“Kadtong gitawag sa propeta aron sa pagsiguro sa kaeksakto sa doktrina nga gitudlo diha sa Simbahan moribyo sa matag pulong, matag hulagway, matag dayagram diha sa kurikulum nga imong madawat. Atong mabuksan ang gahom sa kurikulum pinaagi lamang sa paglihok basi sa atong hugot nga pagtuo nga kini dinasig sa Dios. …
“Ang pagpabilin diha sa sulod sa kurikulum ingon man usab sa pagsunod-sunod niini moabli sa talagsaon natong mga gasa sa pagtudlo, dili mopugong niini” (“The Lord Will Multiply the Harvest” [usa ka gabii kauban ang usa ka Kinatibuk-ang Aworidad, Peb. 6, 1998]).
Ang kurikulum naningkamot nga mapahiuyon ang mga metodo ug mga kalihokan sa pagkat-on ngadto sa dereksiyon nga nadawat gikan sa Church Board of Education ug sa administrasyon sa S&I. Ang paggamit sa kurikulum ug pagtinguha sa tukmang pagpahiangay ug paggamit makatabang kanimo sa paglakip sa mga baroganan sa Kristohanong pagtudlo. Pinaagi sa kanunay nga paggamit niini nga kurikulum, ikaw mahimong mas nakatutok sa tigkat-on ug makakita unsaon pagsentro sa matag kasinatian sa pagkat-on ngadto sa Manluluwas.
Ang kurikulum naningkamot usab sa pagtabang kanimo sa pagtudlo sa mga kasulatan nga mas epektibo. Kini naglakip sa pagtabang sa mga estudyante nga mas makasabot sa konteksto ug sulod aron sila makaila sa mga kamatuoran sa ebanghelyo, makita ang kalabotan niini, ug gamiton kini sa ilang kinabuhi. Ang pagbuhat sa ingon makatabang ug makadasig sa mga estudyante sa ilang mga paningkamot aron mahimong mas mahisama sa Langitnong Amahan ug ni Jesukristo.