1. Atia’e le Maufetuuna’i i Taimi o le Atuatuvale

O loo i ai i lenei vaega ni fautuaga lautele mo le puipuia ma le taulimaina o taimi atuatuvale pe a tula’i mai. E mafai ona aoga nei fautuaga i faifeautalai uma.

A. Tali Lelei Atu i le Atuatuvale

• Tatalo faatauanau ma tatalo soo. Tau atu i le Alii ou lagona, aafiaga, fuafuaga, ma popolega. Ole atu i le Agaga ina ia faatasi ma oe i mea uma. Tusi i lalo ni uunaiga e te mauaina a o e tatalo ma suesue i tusitusiga paia. Ia nofouta i le taitaiga faaleagaga e mafai ona e mauaina i le faagasologa o le aso. Ua’i atu i le leo o le Agaga. A e faia, o le a faaauau ona e mauaina nisi taitaiga, faamafanafanaga, ma fesoasoaniga. “Aua faauta, ou te toe fai atu ia te outou, afai tou te ulu atu i le ala, ma maua le Agaga Paia, o le a faaali mai e ia ia te outou mea uma e tatau ona outou faia” (2 Nifae 32:5). Ole atu i le Alii e fesoasoani ia e iloa ma mulimuli i uunaiga faaleagaga.

• Ia filemu. O le filemu e le faapea e na o le filemu faaletino, e ui e mafai moni ona aofia ai lena mea. O le fifilemu o se uiga i totonu. O se tulaga o le toafilemu i le loto lea e valaaulia ai le afio ai o le Atua. “Ia filemu ma ia iloa o A’u o le Atua” (Salamo 46:10). Aoao ia filemu. Ona atili ai lea ona e logo i uunaiga a le Agaga. O le a mafai atili ai ona e ausia mea e manaomia a lau misiona. Soo se taimi e te lagonaina ai le tele o le atuatuvale, e mafai ona e faata’ita’ia le fifilemu. Nai lo le taulai atu i mafaufauga o lou mafaufau, ia e gauai i faalogona o lou tino. Matau pe o fufusi uaua o lou tino pe o toafimalie, ma matau leo ma manogi o loo siomia ai oe. E sili ona aoga lou gauai i lau manava (tagai i le Faamalositino Tau le Manava). E te le o taumafai taotaomia ni mafaufauga pe aua foi e te mafaufau. Ua na ona e seu ese lau gauai mai popolega ma atuatuvalega. O le a mafai ona tuu se avanoa mo le Agaga i lou mafaufau E mafai foi ona fesoasoani e te lagona atili ai le filemu.

Ou te tuu atu ia te outou le manuia, o lo’u manuia ou te avatu ia te outou; ou te le avatu e faapei ona avatu e le lalolagi. Aua le atuatuvale o outou loto, aua foi tou te matatau.

Ioane 14:27

• Ia iloa le aao o le Alii i mea uma. Ua ia te oe le avanoa o le auai i le faatinoga o le galuega ofoofogia a le Atua o le faamanuiaina o Ana fanau. Faataitai ona taulai atu i aso uma i faamanuiaga ua e maua ai le loto faafetai. Ia matau le faatosinaga a le Agaga i lou olaga, ma tusi e faatatau i ai i lau tusi talaaga (tagai i le Moronae 10:3).

• Galue mai ou malosiaga ma taleni. Fai se lisi o ou malosiaga, taleni, ma meaalofa faaleagaga. O ou malosiaga o se vaega o le faleteuoloa a le Alii. Na te utuvai mai ai e faamanuiaina ai Ana fanau ma fausia ai Lona malo. O se vaega taua o lau misiona o le atiina a’e o au meaalofa. Faaaoga ou malosiaga i se ala faaKeriso e fesoasoani ai i isi. Mafaufau i le mea na musumusu atu ai le Agaga i se tasi o faifeautalai “Ou te lei valaauina oe ona o ou vaivaiga. Na ou valaauina oe ona o ou malosiaga.” Taulai atili atu i mea e lelei ona e faia nai lo mea e sese e te faia. Ia fuafua ni auala i vaiaso taitasi e atiae ai ma faaaoga au meaalofa e auauna atu ai ma faamanuia isi. (Tagai i le Mataupu Faavae ma Feagaiga 82:18–19).

• Faailoa ma tauloto ia mau e oo mai ai faamafanafanaga. A e suesue i tusitusiga paia, ia lisi mau ia e faamalosia ma faamafanafanaina ai oe. E mafai ona e faitau, faalogologo i ai, pe taulotoina.

• Taulai atu i manaoga o i latou oloo e auauna i ai. Mafaufau i se mea e mafai ona e faia e faamanuiaina ai i latou oloo e auauna i ai. Saili musumusuga ia iloa ai pe mafai faapefea ona fesoasoani atili ia i latou. Taumafai e faamalolosia lo latou faatuatua.

• Faafesootai lau galuega i tagata e te iloa. Mafaufau pe faapefea ona fesoasoani lau auaunaga i tagata e te iloa e i ai moni lava ni faafitauli. I lau tusi talaaga, tusi ai faataitaiga pe o faapefea e au auaunaga ona faia se suiga lelei mo isi.

  

• Iloilo ou faamoemoega. A tonu e le tutusa lau faamoemoega sa i ai ma lau misiona auauna atu. O nisi taimi e le taunuu se mea i e tusa ma le mea sa e faamoemoeina. Atonu e faigata pe le tauia foi i taimi uma le galuega na tofi i ai oe. Atonu foi o le a le atoatoa lou faia o mea uma. Ae ia manatua le fautuaga a le Alii ia Iosefa Samita i le Falepuipui o Liperati: “O nei mea uma e te maua ai le poto masani, ma o le a avea mo ou lelei. … O le mea lea, ia piimau i lou ala” (Mataupu Faavae ma Feagaiga 122:7, 9).

• Talosaga mo se faatagaga e fai ai sau malologa mai soo se mea o e faia. Atonu e le mafai ona fai sau malologa i le taimi lava lea. Afai o lea, ta’u ifo ia te oe lava, “E mafai ona ou faatalitali seia oo i le taimi o se malologa.”

• Faamalositino. O le faamalositino e le aunoa o se tasi lea o auala aoga e pulea ai le atuatuvale. Taumafai e auai i ni gaoioiga eseese ia e maua uma ai le fiafia ma luitauina faaletino. A o e taulai atu i nei gaoioiga, e ono mafai ona e iloa e oe lava ua faaopoopo le malosi. O le a mafai ona e faagaloina ia popolega o le aso. Soo se faamalositino lava e mafai ona fesoasoani e faateleina ai lou malosi ma le gafatia e auauna atu ai i le Alii. Sue se auala e tauia ai oe lava ona o le sailia o auala e faateleina ai au faamalositino.

• Aua e te taumafai e faatonutonu ni mea e le mafai ona e faafoea. O taunuuga o au taumafaiga amiotonu e ono faalagolago i le filifiliga saoloto o isi. E le mafai ona e puleaina tagata pe faamalosia i latou e fai ni mea. “E leai se mana po o se aafiaga e mafai pe tatau ona faatumauina ona o le perisitua, nao i le faatauanau, i le tali-tiga, i le agamaualalo ma le agamalu, ma le alofa faamaoni” (Mataupu Faavae ma Feagaiga 121:41). “O lea, le au uso pele e, ia tatou faia ai ma le fiafia mea uma ua i ai i lo tatou mana; ona mafai lea ona tatou tutu, ma le mautinoa atoatoa, e vaai i le faaolataga a le Atua, ma mo lona aao e faaali mai” (Mataupu Faavae ma Feagaiga 123:17).

• Faataitai le mafaufau i isi. O le mafaufau i isi o se metotia mo le taulimaina o le atuatuvale. E aofia ai le gauai atu i aafiaga i le taimi nei. Faaaoga pe a lagonaina le ova o le atuatuvale po o le fefe. Taumafai e taulai lou silafia i mea o loo tutupu i lou siomaga. Taulai i le taimi nei ma iinei, ae le o le lumanai. Matau le tali atu o lou mafaufau i lenei silafia.

  • Manava tele i totonu, moeiini ou mata pe a tatau ai, ma taumafai e nofo toafilemu lelei.

  • Savalivali teisi pe afai e aoga lena mea.

  • Matau, toetoe faapei o se tagata ese, i mea na e popole ai. O le a sou lagona i ai?

  • Faate’a ese soo se mea o faalavelaveina ai oe. Taulai atu i mea e mafai pe tatau ona e faia i nai minute e sosoo ai.

  • Afai e leai se suiga lelei o le tulaga o i ai, faailoa i lou taitai misiona mo auaunaga.

Faamalositino Tau le Manava

• Saofai i se tulaga toafimalie pe tu ma le filemu.

• Ia manava tele ae lemu i lou isu, ma taofi i le va o manava taitasi.

• Faalusi ou tauau ma taumafai e mānava ina ia minoi lou manava, ae le o ou tauau.

• Taumafai e taulai i lau manava. Afai ua agaigai ese atu ou mafaufaua, ia toe faafoi filemu mai i lau manava.

• Faaauau pea ona mānava lemu ma toafimalie mo le lima minute pe seia to’a ifo ou lagona popolevale.

• Faauo i e tou te galulue ma isi faifeautalai. Ia fefaasoaai manatu, auauna le tasi i le isi, fesoasoani le tasi i le isi, ma faamagalo le tasi i le isi.

  

• Faaaoga musika. Faamanatu ni upu o ni nai pese po o mau e te fiafia i ai. A e lagonaina le atuatuvale po o le lotovaivai, ia manatua upu. Fesili pe mafai ona e faaaogaina meafaalogo tuu i taliga i le galuega ua tofia ai oe e te auauna ai. Faalogologo i musika faatoafimalie ai pe afai e le faalavelave i lau galuega. Mafaufau e faaaoga le “Calm” po o se polokalame feaveai faapena i luga o lau telefonipoto.

• Manatua mea sa e aoaoina. Na e feagai ma suiga ma faigata i lou olaga atoa. Lisi mea na e aoaoina mai vaitau ua tuanai o le maualuga o le atuatuvale (se suiga o le nofoaga, se maliu, po o se a’oga po o se galuega fou). E mafai faapefea ona e faaaogaina nei tomai i le taimi nei?

E. Tali atu i se “Atuatuvale Faafuasei”

E tupu se atuatuvale faafuasei pe a faafuasei ona e see atu i sone lanu moli pe lanu mumu o le atuatuvale. Afai ua e i ai i se tulaga lamatia faaletino pe faalelagona, vili vave ou matua po o le taitai misiona mo auaunaga. Mo isi tulaga, faataitai ona utagia fautuaga nei:

• Fai sina malologa puupuu. Afai ua e lagonaina le le fiafia tele po o le soona atuatuvale, fai sina malologa. Fai ni nai manava faaletino lemu tetele, falolo, ma malolo. Pe a toe toafilemu lou tino ma lou mafaufau, o le a e mafaufau manino atili. Savalivali, pe vaai sina meaai po o se vai inu. Pe na o le nofo ma ia toafilemu mo ni nai minute. Tau lava ina ta’u igoa o mea ua e faalogoina (mo se faataitaiga, ua ou lagona le le fiafia po o le teena) e mafai ona fesoasoani i lou fai’ai e amata ona galue i le faafitauli.

• Ia e agalelei ia te oe lava. Talanoa ia te oe lava ia i ituaiga upu lava e tasi, upu faalaeiau e te faaaogaina i se isi tagata. E oso le le fiafia o tagata uma pe faia ni mea sese i nisi taimi. Ia iloa e malamalama le Alii. Mafaufau ia te Ia o loo alala latalata atu ia te oe, o loo faafofoga ma ofo atu le lagolago. Manatua, o mafaufauga o le le loto fesoasoani, leai o se faamoemoe, po o tausalaga matuia e le mai le Alii.

• Toe taulai atu i le lotofaafetai. Matau mea o loo siosiomia ai oe. Taulai i mea e sa’o, lelei, ma aoga e uiga ia te oe lava ia ma le lalolagi. Tuu atu se tatalo o le loto faafetai mo ni mea patino ia le itiiti ifo ma le lima. Ta’u ifo ia te oe lava, “O au o se soo o Iesu Keriso, le Alo o le Atua. Ua ia valaauina au e talai atu lana afioga i totonu o ona tagata,” (3 Nifae 5:13).

• Fai se laa se tasi i le taimi. Faailoa le faafitauli ua i ai nei, ma fai le laa e tasi i le taimi ina ia foia ai. Faamanatu ia te oe lava, “E na o le pau le mea e ao ona ou faia i le taimi nei o le .”

• Fesoasoani i se isi tagata. Toe faataulai atu lou malosi e ala i le auauna atu i se isi tagata. Mata ataata i tagata, fesoasoani ia i latou, ma ofo atu se auaunaga. Amata se talatalanoaga ma se tasi e toe aumaia ai ou mafaufauga i le taimi nei.

• Talanoa atu e faafetaiaia mafaufauga le lelei. O le taimi nei lava, pe a o lei moe i le po, tusi i se pepa ia mafaufauga le lelei o le aso. Ona toe tusia lea ia atili maua ai le faamoemoe, moni, ma faamalosiau (tagai i faataitaiga nei).

Talanoa Atu i Mafaufauga Le Lelei

O O’U MAFAUFAUGA	MEA UA OU TOE TUSIA
O O’U MAFAUFAUGA E le mafai ona ou faia lenei tofiga.	MEA UA OU TOE TUSIA E faigata lenei tofiga i le taimi nei. Ae e mafai ona ou aoaoina.
O O’U MAFAUFAUGA Ua ou fiu i lenei galuega.	MEA UA OU TOE TUSIA O le a ou sailia se auala e fai ai ia sili ona manaia lenei galuega mo au.
O O’U MAFAUFAUGA Ou te le popole po o a manatu o la’u pule; O le a ou faia faapea.	MEA UA OU TOE TUSIA Ou te popole; ua na o lo’u le fiafia lava. O le a ou taumafai ia sili atu la’u faalogo ma fai nisi mau fesili. Ona ou malamalama ai lea i le mafuaaga e ese ai le vaai a lo’u supavaisa.
O O’U MAFAUFAUGA O taimi uma lava e faamasinosino ai au.	MEA UA OU TOE TUSIA Ou te iloa o loo ou faia galuega lelei; e silafia foi e le Alii. O le taimi nei pau le mea e mafai ona ou fai o le taulai i a’u taumafaiga.
O O’U MAFAUFAUGA O taimi uma lava ou te le faatulagaina faalelei.	MEA UA OU TOE TUSIA O nisi taimi ou te le faatulaga lelei ai mea e fai, ae o nisi foi taimi ou te faatulaga leleia ai. E mafai ona ou pikiina se mea se tasi e galue ai ia faatulagaina lelei atili.
O O’U MAFAUFAUGA E le mafai ona ou faamaeaina lenei aso.	MEA UA OU TOE TUSIA Na mafai ona ou faamaeaina aso uma e oo mai i lenei taimi, ma o le a faapena foi i le asō. E na o le pau le mea e ao ona ou faia i le taimi nei o mea ia ua i ai i ou luma, e tasi le laa i le taimi. O le a ou nofo to’afilemu lelei mo le lima minute e faatoafilemu ai.
O O’U MAFAUFAUGA Ua tatau ona ou iloa na tofi a’u e galue ai i le taimi nei.	MEA UA OU TOE TUSIA O ai o fai mai ua tatau ia te au? O loo ou galue malosi. O le a fesoasoani mai le Alii ma isi ia te au e faatino lo’u tofiga.
O O’U MAFAUFAUGA E faafiufiu tele e oloo matou galulue faatasi.	MEA UA OU TOE TUSIA Ou te iloa e alofa le Atua i Ana fanau uma. O le a fesoasoani mai o Ia ia ou alofa foi ia i latou.

I. Fesoasoani Atu i Isi Ua Ova Le Atuatuvale

• Matau isi o loo tauivi. Ia tuu atu ia latou iloa e te malamalama. Ofo atu e fesoasoani. Fai se taimi e te faalogo ai i o latou atuatuvalega. Fautua i ai e fai sina malologa.

• Mafaufau i au feagaiga o le papatisoga. Tatou te folafola atu “e tauave avega a le tasi, ina ia māmā; … faanoanoa faatasi ma e e faanoanoa; ioe, ma faamafanafana atu ia te i latou o e e manaomia le faamafanafanaga, ma tutu o ni molimau a le Atua i taimi uma” (Mosaea 18:8–9). Ia faaaoga lenei feagaiga e ala i le (1) tausoaina o avega a isi, (2) ofoina atu o le faalaeiauga ma le faamafanafanaga, ma le (3) molimau atu e uiga i le alofa o le Atua.

• Fai atu ni nai fesili, ae aua nei faamalosia le tagata e talanoa. Taumafai e fai atu, “E foliga mai ua e le fiafia. O le a le mea na tupu? po o le “E te fia manao e tau mai ia te au?” O isi tala e lelei e aofia ai:

  • “Ou te le popole po o le a se tala e fai atu nei, ae ua ou fiafia lava ua e faamatala mai ia te au.”

  • “Faamatala mai ou lagona i le taimi nei.”

  • “Ou te manatu ia te oe.

  • “Ua ou i ai iinei mo oe”.

  • “E le afaina ou lagona faapena. E le o uma lau aoga.”

• Faamanatu i le isi tagata ma na te faia lele. Mo se faataitaiga, e mafai ona e fai atu, “Ou te matua talisapaia moni lava lou amiosa’o ma lou manao e auauna atu i le Atua.”

• Faalogo ina ia malamalama ai, ma ofo atu le lagolagosua ma le faamalosiauga. Seia oo ina lagona e le tagata ua malamalama, ae o le ofoina atu o fautuaga ma le fautuaina atu o vaifofo e tele ina le aoga. Fai atu ni fesili ma fesoasoani i le tagata e saili ana lava ia tali. E le tatau ona e tauaveina le matafaioi o le faufautua i isi. Ae e mafai ona avea oe ma se tagata faalogologo ma le loto malamalama e fesoasoani ma lagolagoina i latou.

• Tuu atu lau molimau. Faasoa atu lou talitonuga maumaututu e uiga i le alofa ma le naunautaiga o le Atua e fesoasoani mai.

• Ia e atamai a o e auauna atu i isi. O ia te oe se valaauga paia. Ia faatuatuaina oe, ma ia e tausisia le le faalauaiteleina.

  

• Taulai atu i mea e manaomia ona fai i ai faaiuga i le taimi nei. Fesoasoani i tagata ua ova le atuatuvale ia faataatia ese faafitauli tetele ae taulai i faaiuga vave e ao ona faia. Ofo atu e fesoasoani ia i latou. Fautuaina i latou e toe foi mai i le faafitauli tele atu pe a oo ina toafimalie mea. Ona fesoasoani lea ia i latou e vaavaai mo ni vaifofo. Faamanatu ia i latou e mafai ona fesoasoani mai le Alii i vaifofo i se taimi faasolosolo. E ao ina tatou faia o mea tatou te mafaia ma faaliliu atu a tatou faafitauli ia te Ia.

Na aoao mai Peresitene Spencer W. Kimball: “E silafia i tatou uma e le Atua, ma na te leoleoina i tatou. Ae e masani lava, o se isi tagata e faaauala mai ai lona taulimaina o o tatou manaoga. … I le Mataupu Faavae ma Feagaiga ua tatou faitau ai e uiga i le taua o le ‘… fesoasoani i e vaivai, ia sii ae lima o loo tautau i lalo, ma faamalolosia tulivae vaivai’ [Mataupu Faavae ma Feagaiga 81:5]. O le tele o taimi, o a tatou faatinoga o le auauna atu e aofia ai nai faamalosiauga faatauvaa po o le tuuina atu o fesoasoani faalelalolagi i galuega faalelalolagi, ae oka ni taunuuga mamalu e mafai ona tafe mai i nei galuega faalelalolagi atoa ma gaoioiga faatauvaa ae lelei ona fuafuaina!”

Aoaoga a Peresitene o le Ekalesia: Spencer W. Kimball (2006),82

O. Taulimaina le i ai o se Faafitauli Faaletagata lava ia

O oe o se tagata tulaga ese ua i ai ni malosiaga ma ni vaivaiga tulaga ese. Afai o i ai sou luitau patino e te fia manao e galue ai, tusi ii:

Fai se lisi o mea ua uma ona e aoaoina ua fesoasoani ia te oe e taulimaina ai:

Ia tusia foi se lisi o mea fou e taumafai e fai. E mafai ona e aoao mai tagata o loo siomia oe, suesuega faapolofesa po o suesuega faaletagata lava ia. Mafaufau i auala faaletino, faalelagona, faaleagafesootai, faaleatamai, po o le faaleagaga e ono fesoasoani. Manatua atonu e tatau ona e faata’ita’ia se auala po o se faiga fou mo ni nai vaiaso. O iina o le a e iloa ai pe o le a lona lelei.

Faataitai le faamalamalamaina o lou luitau i isi ma talosaga atu mo se fesoasoani e pulea ai. Faataitai ma ou matua po o taitai misiona mo auaunaga.

Na fautua mai Elder Jeffrey R. Holland: “Po o a lava ou luitau, o’u uso e ma tuafafine—faalemafaufau pe faalelagona pe faaletino po o le a lava … ia faalagolago i le Atua. Taofimau i Lona alofa. … E ui lava atonu tatou te lagonaina ‘peiseai [o i tatou o] se ipu ua nutililii,’ e pei ona fai mai ai le fai Salamo [Salamo 31:12], e tatau ona tatou manatua, o lena ipu o loo i ai i aao o le tufuga faalelagi. O mafaufau mafatia e mafai ona faamaloloina i le ala lava e faamalolo ai ivi gausia ma loto nutimomoia.

“Peiseai o se Ipu Ua Nutililii,” Ensign po o le Liahona, Nov. 2013, 42