Faifeautalai Mo Auaunaga
3. Atia’e le Maufetuuna’i Faalelagona

“3. Atia’e le Maufetuunai Faalelagona,” Fetuunaiga i le Olaga Faafaifeautalai mo Auaunaga: Tamaitusi o Punaoa (2020)

“3. Atia’e le Maufetuunai Faalelagona,” Fetuunaiga i le Olaga Faafaifeautalai mo Auaunaga

faifeautalai mo auaunaga o loo galue

3. Atia’e le Maufetuunai Faalelagona

O lagona malolosi e pei o le fefe ma le popole e fesoasoani ia i tatou e iloa ai ua tatou soona atuatuvale lava. Faitau “1. Atia’e le Maufetuunai i Taimi o le Atuatuvale,” mo fautuaga aoao mo le puleaina o manaoga faalelagona. E faaopoopo atu, o fautuaga o i lalo e mafai ona fesoasoani i lagona patino. Afai ua oo ina lofituina ou lagona pe ua umi foi se taimi o i ai, talanoa i ou matua po o taitai misiona mo auaunaga e uiga i le sailia o se lagolago faapolofesa.

A. Fetuunai i Lou Tofitofiga Fou.

  • Iloilo au mafuaaga mo lou auauna ai i se misiona. Mafaufau i lau misiona o se meaalofa o le faafetai e mafai ona e ofo atu i le Faaola. Lisi ou faamanuiaga. Faamanatu ia te oe lava po o a mea o le a ta’u atu ia te oe e ou taitai ma e pele ia te oe e uiga i lau auaunaga.

  • Ia onosai. E masani lava ona alu ai pe a ma le ono vaiaso e amata ai ona tau fetuuai i se tulaga fou. Faataatia ese soo se faaiuga seia oo ina i ai sou lava taimi e fetuunai ai. Ia faasolosolo lelei i le tasi le aso i le taimi.

  • Faapipii i luga ni ata e faaosofia ai. Faasalalau ni mau, upusii, po o ni ata e fesoasoani ai ia e manatua ou tulaga faatauaina. O le a fesoasoani ia te oe e taulai ai i lau auaunaga ma naunauga amiotonu.

  • Iloilo ia mau ma tala faagaeetia. Ao mai ia mau, aafiaga patino, upusii, ma tala faaleaiga ia e fesoasoani e faaosofia ai oe. A e faitauina mau faagaeetia, tuu i ai lou igoa i na mau. e mafai ona e taumafai e tuu i ai lou igoa i mau e pei o nei: Faataoto 3:5–6; 2 Nifae 4:28–35; Mosaea 24:13–14; Alema 36:3; Helamana 5:12; ma le Mataupu Faavae ma Feagaiga vaega e 4, 6, ma le 31. (Tagai foi i le “Adversity,” i le Faamaoni i le Faatuatua [2004], 8–11.)

  • Iloilo soo lou faamanuiaga faapeteriaka mo se taitaiga. Vaavaai mo ni auala e mafai ona saofaga ai au meaalofa ma malosiaga i lau galuega.

faifeautalai mo auaunaga o loo faaaoga se komepiuta

E. Faatoilaloina o Lagona Faanoanoa po o le Lotovaivai

  • Aua nei faatuai. Faataatia ese o mea e mafai ona tau atu i le atuatuvale. Vaevae ni galuega tetele i ni nai galuega laiti. Amata i se fasimea se tasi o le galuega. Faamanau ia te oe lava, “E na o le pau le mea e ao ona ou faia i le taimi nei o le ” po o le “O le a tau na ona ou faia le mea lenei mo ni nai minute ona malolo ai lea pe a ou manao i ai.”

  • Faalogologo i musika pe usu se pese. Filifili musika e toafilemu ma mālū pe afai o loo e popole. O musika e faagaeetia ma fiafia e mafai ona fesoasoani ia te oe pe a e faanoanoa. (Ia mautinoa e le o faia ni au mea faalogologo tuutaliga a o faia lou tofiga sei vagana ua avatu se faatagaga.)

  • Ia lafoai mea e le mafai ona e puleaina E le mafai ona e puleaina le taimi ua tuanai po o filifiliga a isi tagata po o uiga o le tagata. E le mafai ona e pulea nisi o ou lava tapulaa. Taulai i mea e mafai ona e fai i ai se mea. . Tuu mea o tooe i le Alii.

  • Talia le mea moni e faapea, o nisi o faiga masani e ‘iva. E le o mea uma o le olaga e matua anoa ma faafiafiaina. Aloese mai le faia o se mea e tosina atu i ai tagata, faalialiavale, po o se feteenaiga e taulima ai le le fiafia. Ae, ia talisapaia ma olioli i mea lelei o loo siomia ai oe. Vaavaai mo auala e faalelei ma auauna atu.

  • Toleni lou fai’ai e vaavaai mo le itu lelei. Taulai i le itu lelei o siomia ai oe. Faaaoga ni nai minute i po taitasi e tusi ai pe faasoa atu lau tali i se tasi o fesili nei:

    • O le a se mea faate’ia na e fiafia ai i le aso. O ai na fesoasoani e faatupu lena mea, ma pe na faapefea ona latou faia?

    • Na faapefea ona fesoasoani le Atua ia te au i le aso?

    • O a ni mea fou se tolu ou te matua faafetai ai i le aso?

    • E mafai faapefea ona ou manatua ma talisapaia nei mea?

    • O ai na fesoasoani ia te au i le aso, pe o ai na ou fesoasoani i ai?

    • O le a se taimi na ou talia ai se tulaga lamatia lea na fesoasoani ai ia ou tuputupu a’e? O le a se mea na ou aoao mai ai? E mafai faapefea ona fesoasoani lenei mea ia te au ia atili lelei ai ona ou faia i le lumanai?

    • O le a le taimi o le asō na ou manumalo ai i se mea faigata i le aso? Na faapefea ona ou faia? E mafai faapefea ona samiina?

  • Lu’i ou mafaufauga. O le popole ma le faanoanoa e mafai ona fetuunai ai mamanu o ou mafaufauga. Afai o loo e lagonaina ni lagona e le lelei, fesili ifo ia te oe lava:

    • Pe o i ai se mea o loo lagolagoina ai le moni o mea o loo ou mafaufau i ai?

    • Pe o se mea ea lenei e finagalo le Faaola ou te mafaufau i ai pe lagonaina?

    • Pe o atoa ea mea uma pe leai foi i lenei mafaufauga--uliuli pe paepae, malo pe faia’ina, tonu pe sese?

    • Pe o aoga ia te au lea ituaiga o mafaufauga?

    • O faapefea o’u lagona ona o lenei mafaufauga?

    • O le a se mea ua ou iloa e uiga ia te au lava ia ma isi e ta’u mai ai e le moni lenei mea?

    • O le a se mea ou te ta’u atu i a’u uo pe afai latou te mafaufauina nei mea?

  • Saili ni mea e fiafia i ai. E ui ina ava i le mamalu o lou valaauga, ia toe faaolaola ia uiga malie. Talisapaia le matagofie o le lalolagi, ae matau le agalelei o isi. Sagisagi fiafia i le lagonaina o le Agaga i lou olaga.

  • Ia fai mea faavae: tatalo, suesue i tusitusiga paia, ma auauna atu. Pe a faitauina tusitusiga paia, ia taumamao mai le soona faamasinoina o oe lava ia. Taulai i vaega e sili ona faatatau ia te oe o se auauna faamaoni a le Atua.

  • Faitau le Alema 26 ma iloa mea na faia e Amona ina ua lotovaivai o ia. Ia faitau foi le Mataupu Faavae ma Feagaiga 127:2 ma matau le auala na taumamao ai Iosefa Samita mai le lotovaivai. Aua e te popole i lou popole, lea e mafai ai ona fatu se tulaga e leai sona taunuuga lelei. O se mea masani lava le i ai o ni aso tatou te lagonaina ai le lotovaivai, atuatuvale, po o le ma’i manatu. O le tele lava o taimi o le a mou atu ai nei lagona.

  • Ia taulai atu i faamalositino ma le moe. O le faamalositino e faapitoa le taua i le puleaina o le fefe ma le popole. Tusa lava foi pe e te le fiafia e faamalositino, ae e mafai ona fesoasoani e lelei atili ai lau faalogona ma atili ai foi ona fatufatua’i. Amata laitiiti ma atia’e nai mea iti i lea taimi ma lea taimi. O le alu e moe i le taimi e tasi i po taitasi ma le lava o le moe e maua, e taua foi.

  • Talanoa i se tagata o le aiga, uo, po o le taitai misiona mo auaunaga. Faasoa atu ou lagona i se tasi e manatu atu ia te oe. O le a atili lelei lau faalogona pe a e malamalama faapea e iloa e i ai se tagata e iloa ma manatu atu ia te oe. O le a e maua se vaaiga fou. Atonu o lea tagata o le a na ona faalogo atu pe i ai foi ni ana fautuaga e mafai ona e faata’ita’ia.

  • Talanoa i se tagata poto faapitoa. Pe ua silia ma ni nai vaiaso lou faanoanoa? Pe o faalavelaveina ai lou olaga? E tele lava ina mafai e se faufautua faapolofesa ona fesoasoani atu. O nisi taimi o le faanoanoa faifai pea e afua mai i se tulaga faalesoifua maloloina e pei o se ma’i o le thyroid po o le suka. O mea ia e tatau ona togafitia e se fomai. O nisi taimi o vailaau e togafitia ai le atuatuvale e mafai ona fesoasoani e te maua ai le malosi.

  • Vaai se fesoasoani pe a e lagonaina le fia pule i le ola. Pe i ai ni taimi e te mafaufau ai pe i ai se aoga o le ola pea? Pe i ai ni ou mafaufauga e faatiga oe lava ia i soo se ala? Pe e te manatu e i ai ni taimi ua sili ai ia te oe le oti? O mafaufauga faapenei e le o ni mea e le masani ai. Afai e te le o fiafia i nei mafaufauga ma o loo tulai mai pea lava i le tele o aso, aua e te faatali. Faamatala na lagona i se tasi ma vaai se fesoasoani. Fai le mea enei aemaise lava pe afai ua amata ona e mafaufau i se fuafuaga e faamuta lou ola.

    faifeautalai mo auaunaga o loo talanoa ma se taitai o le Ekalesia.

I. Faatoilaloina o le Lagona o le Faitioina o Oe Lava Ia

  • Taulai atu i mea sa’o e te faia, ma aloese mai le faatusatusa o oe lava ia i isi. O tagata e i ai ni faamoemoega maualuluga tele mo i latou lava, atonu ua soona taulai atu i o latou vaivaiga ma toilalo. Nai lo le faaleleia la, latou te ono lagonaina le leai o se faamoemoe. Pe a faitau i tusitusiga paia, ia taulai atu i vaega ia e sili ona faatatau ia te oe. O oe o se auauna faapelepele a le Atua. Vaavaai mo faamaoniga o le onosai, alofa tunoa, faamoemoe, ma le alofa mutimutivale o le Atua. Na te tuuina mai nei faamanuiaga ia i latou e alolofa ia te Ia ma naunau e auauna atu ia te Ia.

  • Talanoa i le itu lelei ia te oe lava ia. Tagai i le “Talanoa Atu i Mafaufauga Le Lelei.”

  • Ia iloa o mea uma e te faia e le mafai ona i luga atu ma le averesi E te manao e galue malosi ina ia faaleleia, ma atonu e te lelei tele i nisi o mea Ae e le mafai ona i luga atu o le averesi i mea uma e te fai. Ua na o se matematika lea, e le o se faapgai o le atuatuvale.

  • Toe faamalo ia te oe lava. Toe faaopoopo se faamalo ia te oe lava mo le faia o se mea e le lelei ona e faia, pe e te fiafia foi i ai i taimi uma. Ia manatu e tusa lava pe e te lei faia na mea i le atoatoa, ae sa e faia lava. A o faasolo ina lelei atili lou faia o nei mea, atonu o le a e iloa ua e fiafia i ai. Ae o lo ausia o lena tulaga e manaomia le taimi ma le faataitai, lagolago, ma lo poto masani.

  • Faataitai lou nofo filemu. Taulai ese lau gaua’i mai mafaufauga i lou mafaufau, ma faataitai ona e nofo filemu. Ia iloa o loo i ai ou mafaufauga o le faitioina o oe lava. Ae o nei mafaufauga e le o ta’u atu ai lou tagata moni. (Tagai foi i le “Tali Lelei Atu i le Atuatuvale.”

  • Galue i ni sini tetele se tasi pe lua foi i le taimi e tasi. Aloese mai le taumafai e faaleleia ni mau mea i lou olaga i le taimi e tasi. E mafai ona lofituina lena mea ma tata’i atu ai i lagona o le toilalo.

  • Faalgolago ia Iesu Keriso ma Lana Togiola. O o tatou tapulaa ma lē agavaa e le o ni agasala. E masani lava ona taofiofia ai i tatou mai le mama ma le agavaa mo le Agaga. Na puapuagatia Iesu Keriso ina ia mafai ona faamalolosia i tatou, siitia, ma faamagaloina. E fesoasoani le mana o le Faaola ia i tatou e faatoilalo ai o tatou vaivaiga ma agasala.

  • Tusifaamaumau ni mea musuia i se api o tusigamanatu po o se api fai fuafuaga. E mafai ona e tusifaamaumauina:

    • Mau e sili ona fiafia i ai.

    • O sini e te manao ia ausia.

    • Tala patino pe faaleaiga e uiga i le vave ona toe foi i tulaga masani mai puniala o le agai i luma po o faigata.

  • Faalogo i le Agaga, ae le o mea le lelei. Afai o i ai ni ou mafaufauga e faatauemu, e le mai le Alii. E faapena foi mafaufauga e taufaifai, ita, faalumaluma, pe faitio. O le taumuimui ma le faipona e le mai le Alii foi ia. Afai o ia te oe na lagona, taumafai e tusitusi uma i lalo. Ona saesae lea o le pepa. Pe toe tusi ou mafaufauga taitasitasi i le taimi ina ia faaupu mai ai se manatu moni, ma lelei. Faaopoopo i ai se faamatalaga moni ma le alofa i le ala o loo lagonaina e le Alii mo oe. Fai leotele: “O Keriso o lo’u Fautua. E alofa o Ia ma talitonu ia te au i taimi uma.”

  • Saili mo fautuaga lelei. Talosaga atu i ou taitai misiona mo auaunaga ma isi e fesoasoani atu ia te oe ia iloa pe o lava le malosi o lau taumafai. Fesili i ai pe ua e soona taumafai malosi. Ia talia a latou fautuaga. E toatele tagata e faitioina i latou lava, e le lelei i le faaeseeseina o le lava o le taumafai malosi ma le soona taumafai malosi.

    faifeautalai o auaunaga i le komepiuta

O. Faatoilaloina o Lagona Popole po o le Le Atoatoa

  • Ia fiafia i le avea ai ma se tagata faato’a amata i le taimi e te fou ai i se mea. E le o faamoemoeina oe ia avea ma se tagata tomai silisili pe a e aoaoina se mea. Ua lava lava le fiailoa, gauai, lotomaualalo, ma le naunautai e taumafai. Fiafia e aoao se mea fou!

  • Ia fai ma le fiafia mea e te mafaia, ma tuu atu i le Atua e faaatoa le eseesega. O nisi taimi e lagona ai e faifeautalai le le aoga po o le maasiasi pe a foliga mai ua faamanuiaina tele isi nai lo i latou. E faaosooso e Satani i tatou ia masalosalo ia i tatou lava pe faatusatusa i tatou lava i isi. Ia manatua o le galuega lenei a le Alii, ma Na te filifilia ē vaivai ma faatauvaa e faia. Ua Ia filifilia oe! Faalagolago ia te Ia, aua Na te faatuatuaina oe.

  • Mafaufau i le faamanuiaina. Popole i me e ono sese e mafai ona avea o se auala o le faataita’ia o le toilalo i le mafaufau. Nai lo le popole, taumafai e faataita’i i le mafaufau ia taunuuga lelei. Aua le popole i le mea e ono tulai mai. Nai lo lena, fai ni fuafuaga ia ausia le manuia. Afai e le sologa lelei ni mea e pei ona e faamoemoe i ai, manatu faalemafaufau i le aoaoina o oe lava ia mai se faafitauli ma agai i luma. Mafaufau ia te oe lava o loo agaigai i luma.

  • Ola pea i ou tulaga faatauaina. E te le tau lafoa’ia ou popolega ma le fefe. E mafai lava ona e ola i se olaga fiafia. E mafai ona e filifili e ola i ou tulaga faatauaina tusa lava i le lotolotoi o le popole ma le fefe. E le mafai ona e pulea mea uma. Ae mafaufau i se mea se tasi pe lua e mafai ona e faia e ola ai i ou tulaga faatauaina. Fuafua pe mafai faapefea ona e auauna atu i isi pe faailoa atu le lototoa i se tulaga e faapopoleina ai oe.

  • Aua e te taumafai e faatonutonu mea e le mafai ona e faafoea. O le taumafai e pulea mea e te le mafaia o le a na ona e lagona atili ai lava o le le puleaina. O le faia o lenei mea e faateleina ai lou popole. Taulai lou malosi i mea e mafai ona e faia i ai se mea.

  • Fesili, “O le a le mea e sili ona leaga e mafai ona tupu?” E tele taimi e iloa ai e tagata o le taunuuga aupito leaga e ono oo i ai, o se mea lea e mafai ona latou onosaia. Ona mafai ai lea ona latou agai i luma. E le afaina po o le a le mea e tupu, e mafai lava e le Faaola ona fesoasoani ia te oe e faatoilaloina, ina ia e le fefe tele ai.

  • Taumafai e faifai lemu pe afai ua e naunau tele e faatatope. Afai ua faaopoopo lou toafilemu, o le a mafai ona atili ai lou faimeamae’ae’a faapea foi ma lou fiafia sili atu. O le faifai malie o le a manaomia ai ona faataitai. O le a e manaomia se ala e faamanatu atu ai ia te oe lava e faia lenei mea. Faapipii se feau i luga o lau faaata po o le puipui. Tuu se fafagu faailo i luga o lau telefoni. Pe tatalo foi i taeao taitasi mo se fesoasani ia e manatua ai e faifai malie. A maea ni vaiaso, iloilo lou agai i luma.

  • Aua e te popole i le popole. O le popole o se vaega masani o le olaga i aso faisoo. O le popole i ou atuatuvalega o le a le fesoasoani lea. E le o se mea lelei le popole, ae o le a mou atu ai. Pe a oo ina e popole, nofo filemu ma faataga oe lava e lagonaina le fefe. E masani ona o ese lava latou a o lei tuai.

  • Aua e te fefe i puniala o le agai i luma pe a o e faia ni mea faigata. Ina ia mafai ona ola i se olaga ‘anoa, e tatau ona e taliaina ni tulaga lamatia. E i ai taimi, e tatau ai ona e la’a atu i mea e le mailoa. O mea e sili ona taua e mafai ona faigata, ae e mafai ona aoaoina e ala i le faataitai i ai. Aua e te tuu i le fefe e taofia oe mai le faia o mea faigata. Ma taumafai ia aua nei e vaai atu i puniala o le agai i luma o ni toilalo. O le fefe ma puniala o le agai i luma e mafai ona faauigaina faapea o loo e taliaina mea faigata ma ua e lototoa.

  • Fai se lisi o tala. Manatua, tusifaamaumau, ma faasoa atu tala. O nei tala e mafai ona aumai mai lou olaga po o olaga o tagata e te faamemelo i ai. O nei tala e tatau ona faamatala ai pe na faapefea e nei tagata ona agai pea i luma ae sa faigata ma taufaafefe ia mea. E tatau ona faamatala ai pe na faapefea ona e tali atu pe tali atu foi isi i puniala o le agai i luma po o le fefe i auala ua e faamemelo i ai. E tele taimi e faia ai e tagata nai mea iti e agai ai pea i luma pe faaalia ai le lototoa.

  • Talia le le mautinoa O nisi taimi e le mananao ai tagata e ola ma le le mautonu po o le le mautonu. E sili ia i latou le toilalo nai lo le talia o le tulaga lamatia e aunoa ma le iloa o le a faamanuiaina i latou. E le mafai ona e iloa nei pe o le a e ola atoatoa i au sini ma tulaga faatauaina. E le mafai ona e iloa pe o a faafitauli atonu lua te fetaiai i le lumanai. Ae e mafai ona e faia nei se faaiuga e ola ma le lototele, lotofaafetai, lotoalofa, ma le lotomaualalo. O le taimi nei, e mafai lava ona e ola e tusa ai ma au sini ma au miti. Na pau lava lena o le mea e mafai e soo se tasi o i tatou ona fai, ma ua lava lea. Taumafai e tataiese oe laa mai faaosoosoga o le le fiafia ma le popole. Taulai i mea o tutupu i le taimi nei.

  • Auauna Atu. A o e auauna atu i isi, ia faaitiitia lou mafaufau ia te oe lava ma ia tele lou fiafia.

    faifeautalai mo auaunaga o loo talanoa

O. Faatoilaloina o Lagona o le Maitaita po o le Faalii

  • Tuu atu se taimi i lou fai’ai e pulea ai ou lagona. E mafai e lou fai’ai ona autalaina se faamalamalamaga ma faia faamasinoga lelei. Afai e te faalii pe itaitagofie, faliu ese mai le tulaga mo ni nai minute. Ia manavanava loloa, ma tuu atu i lou fai’ai iloilo se taimi e mafafu ai ma autalatala mea. E mafai ona e faitau e oo i le 10, fai se faamalositino, alu i fafo, pe filifili ni mafaufauga aoga. E mafai ona e faalogologo i se musika faanofogofie, manatunatu loloto, pe tatalo.

  • Aua le faaosoa lou ita. Atonu e te filifili e vaai atu i isi o se taufaamata’u, e faaituau, pe le faaaloalo. Afai o lea, e ono foliga mai o le a e lagona le ita. Ae, vaai pe mafai ona e mafaufau i se faamalamalamaga sili atu ona agalelei mo a latou amioga. Atonu ua vaivai, pe lei faailoaina atu ia i latou, le mautonu, po o le taumafai e fesoasoani mai. Fai le filifiliga e aua nei faaosoa le ita.

  • Taumafai ia malamalama i isi tagata. Ia fia iloa mea o loo mafaufau ma lagonaina e isi. Fai ni fesili i tagata ma faalogo fimalie ma le faaeteete ia i latou. Ta’u atu i le isi tagata po o le a lou manatu i mea na e faalogo ai. Fesili pe ua sa’o lou malamalama A leai, toe taumafai.

  • Tetee atu i le taumafai e tuuaia isi po o oe lava. Afai e i ai se mea e faaletonu, taumafai e mafaufau po o le a le faafitauli. Fesili i isi mo se fesoasoani i le foiaina o le faafitauli, tusa lava po o ai e sese. Taumafai e aua nei tuua’ia se tasi mo le afuaga o le faafitaui.

  • Ia naunau e faatoese ma fesili po o le a se mea e mafai ona e faia e faasa’o ai. O le faatoese o se faailoga o le malosiaga faaleagaga, ae le o se vaivaiga. Pe a e faia se mea sese, talia o lou tiutetauave lena. Fesili pe mafai faapefea ona e faasa’oina pe taumamao mai lea faafitauli i le lumanai. Faaali atu le loto malamalama mo lagona o isi tagata.

  • Ia nanau e ‘ata ia te oe lava ia. O le mafai ona e ‘ata ia te oe lava o le a fesoasoani e taulima lelei ai popolega o le olaga. O tala malie faagaeetia e mafai ona fesoasoani e faaleleia ai ou uiga faaalia, sootaga, ma le soifua maloloina. E ui e le talafeagai le ‘ata i taimi uma, ae e mafai ona aoga i tagata uma le talie atili. Pe a amata ona e ita, taumafai e ‘ata ia te oe lava ma lou ita. O le ‘ata ia te oe lava e mafai ona avea o se vailaau lelei mo le ita!

  • Auauna atu ia i latou ua e ita i ai. Faaaoga le fautuaga a le Faaola ia “alolofa atu i e ita mai.” Na Ia fetalai, “Ia outou alolofa atu i e ua ita mai ia te outou, ia outou faamanuia atu i e ua fetuu mai ia te outou, ia outou agalelei atu i e ua inoino mai ia te outou, ia outou tatalo foi mo e ua tuuai fua mai ma faasaua mai ia te outou” (3 Nifae 12:44). E mafai faapefea ona e auauna atu pe tatalo mo se tasi ua e ita i ai?

  • Ia tausia lelei oe lava ia. Taumafai e ‘ai lelei, ia lava lau moe, faamalositino, ma tatalo. O le faia o nei mea o le a fesoasoani e te maua ai punaoa faalelagona e taulima ai faaletonu.

  • Fatu se tala fou. Mafaufau mo se faamalamalamaga aupito lelei e te mafaia mo le mafuaaga e fai e isi tagata aga pei ona i ai. Tusi i lalo

  • Faamagalo atu. Suesue le Mataio 18:23–35. Afai o maua, matamata le vitio “Forgive Every One Their Trespasses: The Parable of the Unmerciful Servant” (ChurchofJesusChrist.org). Mafaufau pe faapefea ona faatatau le savali o le faataoto ia te oe.

    faifeautalai mo auaunaga o loo tuleia se taavale.

F. Faatoilaloina o le Lagona e Le o Faaosofia

  • Taulai atu i ou tupuaga. O a ni tulaga faatauaina, taleni, aafiaga, ma ni meaalofa ua e aumaia i lau auaunaga? Fai se lisi o auala e mafai ona e faaaogaina ai se tasi o ou malosiaga i ni ala fatufatuai i lenei vaiaso. Afai e i ai se faafitauli i lou iloaina o ou malosiaga, fesili atu i isi mo se fesoasoani.

  • Fai se laa se tasi i le taimi. Fai se lisi o ni mea se e manaomia ona e faia. Ona faatulaga lea o na mea ilau kalena. Faamanatu ia te oe lava, “E na o le pau le mea e ao ona ou faia i le taimi nei o le .”

  • Fai ia malie! Faatutu ni sini mananaia e fesoasoani ai ia te oe i lau auaunaga faafaifeautalai. Fai se taaloga mai le ausiaina o au sini. Ia fatufatuai ma faamalo ia te oe lava ia mo le manuia [o au taumafaiga].

  • Aua nei lofituina oe lava ia i le anoanoai o le mau sini patino i le taimi e tasi. Seti se sini patino se tasi pe lua i le taimi e tasi (e pei o le fiafia atili po o le tuuitiitia o le gasu). Aua e te faamoemoe o le a atoatoa. Ia faaaofia ai se fuafuaga i le auala o le a e toe foi ai i le ala lea pe a faaletonu lou aso. Ia faamanatu soo ia te oe lava pe aisea e te manao ai ia sui.

  • Faasoa atu au sini i ou matua po o taitai. E mafai ona latou lagolago ia te oe ma ofo atu ni manatu aoga.

  • Ia iloa o le faaosofia e sosoo ai ma le faatinoga. O le amataina e tele taimi o le vaega aupito sili lea ona faigata. Ta’u ifo ia te oe lava, “Tau lava ina fai mo se 10 minute.” Ona amata loa lea. O le a tele ina faaosofia atili oe.

    tamaitai o loo faitau tusitusiga paia

G. Puleaina o Lagona Feusuai po o Lagona

  • Alofa Faavalea. O mafaufauga feusuai ma le alofa faavaleai o ni lagona masani na aumai i le Atua. Ae tatou te manaomia ona pulea lelei o tatou mafaufauga, sootaga, ma amioga. Afai e te faia lenei mea o se faifeautalai, o le a e tuputupu ae i le malosiaga ma maua ai faamauiaga sili. Suesue ma le agaga tatalo le 1 Korinito 9:24–27; Mosaea 3:19; Alema 38:12; ma le Mataupu Faavae ma Feagaiga 121:45. Sue le “Amiomama”ma le “Legavia” i e Taiala i Tusitusiga Paia (“ i lescriptures.ChurchofJesusChrist.org). Lisi ia faamanuiaga ma tulaga lelei o le a oo atu ia te oe pe a e atiaeina nei uiga.

  • Sui le mafaufauga. Taumafai e aua nei faatumulia oe i mafaufauga ma lagona faalefeusuaiga po o le alofa faavalea. Tata’i ese oe lava, ma ia alo e fai se isi mea. Taumafai ia toamalie. Usu ni viiga. Tauloto ni mau ma toe faamatala. Taulai i mea o loo e faafetai ai. Mafaufau i fuafuaga mo le aso. Faamalositino. Toetuuto atu i lau galuega. Ia fiafia ma ia fatufatuai.

  • Aloese mai faaosoosoga. Aloese mai nofoaga, tulaga, talanoaga, po o tagata e matua’ia ia faaosoosoga. Afai ua e vaai i se ata pe mafaufau i se manatu taufaaosooso, aua nei nofoa’i ai i lena mea. Sui lou alaleo faalemafaufau i isi mea. Aluese mai le tulaga i le vave e te mafaia.

  • Faaauau pea i le faamoemoe ma le faatuatua. Afai o loo e tauivi e pulea ou lagona feusuai ma le talafeagai, e alof apea le Atua ia te oe. Aua lava nei lafoaia le lua sootaga ma le Atua ona ua e lagonaina lou le agavaa. E ui atonu o loo e tauivi e pulea nei lagona, ae o le a Ia le teena lava oe. E malamalama o Ia i le tulaga o loo e i ai. Na te faatauaina au taumafaiga e tetee i le faaosoosoga, aoao mai mea sese, ma salamo. Saili atu i le fautuaga a lou taitai misiona mo auaunaga, ma faaauau pea ona taumafai malosi e faatoilalo nei luitau.

  • Aua nei e soona matelaina, tuuatoatasi, lelava, paie, po o le atuatuvale. O nei mea uma e mafai ai ona faafaigata atili ona teenaina ia faaosoosoga. Aumai se meaai māmā faigofie. Fai sina malologa puupuu mai mea o loo e faia, pe fai se isi mea mo sina taimi. Fai se talatalanoaga lelei, pe faataitai ia faamalositino e faatoafilemu ai le mafaufau (tagai i le Faamalositino e Faatoafilemu ai le Mafaufau).

  • Tausia lou lava saogalemu. Ia malamalama i tulafono ma taiala e faatatau i le fegalegaleai ma isi e faatatau ia te oe. Afai e te lagonaina lou tosina faalefeusuai atu i se tagata, faafesootai lou epikopo po o le peresitene o le siteki ma sailia lana fautuaga.

  • Anapogi ma tatalo mo le malamalama ma le malosi. Pe a e anapogi, ia faatuatuanai lou fia’ai masani maloloina mo meaa. E te faia lenei mea mo se vaitau ina ia mafai aiona e sailia le malosiaga faaleagaga. O le anapogi e mafai ai ona atia’e tomai e pei o le amio-pulea ma le gauai atu i le Agaga (tagai i le Isaia 58:6). E mafai ona avatu ai ia te oe le loto malamalama mo i laotu o e o fiaai. O tomai foi lava nei e mafai ona fesoasoani ia te oe e pulea ai lagona feusuai masani po o le alofa faavalea, o se faifeautalai i auala e talafeagai. O le anapogi o le a le aveesea ai lagona feusuai. Ae o le anapogi i masina taitasi e mafai ona fesoasoani ia te oe e maua ai le malosiaga ma lou iloaina o oe lava. E mafai ona faaosofia ai oe e pulea faalelei nei lagona.

faifeautalai mo auaunaga o loo faatutumuina fata.

H. Puleaina o Suiga ma Fesuiaiga

  • Iloa o oe lava ia. O suiga ma fesuiaiga e faigata atu mo nisi tagata nai lo isi. Afai e faapitoa le faigata o suiga mo oe, faailoa i tagata pe faapefea ona latou fesoasoani atu.

  • Mafaufau i isi fesuiaiga ua e oo i ai. O le a se mea na e aoaoina? O le a se mea na fesoasoani ia te oe e taulimaina i isi taimi? Ia iloa ou tulaga faamanuiaina ma ou tomai. O le fea o na mea e mafai ona fesoasoani i le taimi nei? O le a se isi mea e mafai ona e taumafai ai?

  • Tusi i lalo mafuaaga. Tusi i lalo mea ua e iloa e uiga i le mafuaaga ua tatau ai lenei suiga Toe tagai soo i le lisi. O le malamalama i mafuaaga mo le suiga e ono fesoasoani e tuuitiitia ai lou lagona faaletonu.

  • Manatua mea e le’i suia. Fai se lisi o mea ua suia ma mea e le’i suia. Taumafai e fai se lisi lona lua i le umi e te mafaia.

  • Fai se fuafuaga. Fatufatu se fuafuaga mo le taimi nei e fesoasoani ai ia te oe lava e faafoe le suiga. Tusi i lalo laasaga o lau fuafuaga. Talanoa foi i isi e te iloa lelei. E mafai ona latou lagolago ia te oe a o e faataunuuina lau fuafuaga

  • Mafaufau pe faapefea ona e lagonaina le toafilemu tele. Fai se lisi o mea e mafai ona e faia ia e saga toafilemu ai. Faitau mea nei a o lei faia le suiga, i le aluga o le suiga, ma pe a mae’a ona fai le suiga.

  • Fai se laa se tasi i le taimi. Pe a e feagai ma se fesuiaiga tele, manatua le mea lenei: e te le tau mafaufauina mea uma i le taimi e tasi. O le a le uluai faaiuga e tatau ona fai? Mata o le a se uluai laasaga? Le isi laasaga?