Sauniuniga a le Faifeautalai o Auaunaga

Fetuunai i le Olaga Faafaifeautalai mo Auaunaga

O se mea masani lava mo faifeautalai fou le lagonaina o sina tikeri o le atuatuvale po o le le toafimalie. O le a manaomia ona e aoaoina ni galuega fou, feiloai i tagata fou ma galulue ma isi. A o e aoao e faia nei mea, ia e onosai. O le a e aoao ia iloa faamanuiaga o le tuuto atu o lou ola i le Faaola. Manatua, o le a mafuta le Agaga Paia ma oe. O le a fesoasoani o Ia ia te oe e faia lenei fesuiaiga. O le a lagolago o Ia ia te oe e fetuunai i ou tiutetauave fou o se faifeautalai mo auaunaga.

Fetuunai i Aafiaga Fou

O faifeautalai mo auaunaga e pei foi o le toatele o tagata e ulufale atu i se tulaga fou. E toatele e feagai ma tulaga eseese o fetuunaiga faalelagona pe a amata la latou tautua.

• Mea ua Faamoemoeina

  • Atonu e te lagonaina le naunau mo le luitau (tagai 1 Nifae 3:7).

  • Atonu e te maua se lagona faateleina o le faamoemoega ma le tuuto faamaoni atu i le Atua (tagai i le 3 Nifae 5:13).

  • Atonu e te lagonaina le fiafia ma le tulimatai atu e feiloai ma tagata fou ma oo atu i ni nofoaga fou.

• Iloaina o mea e lei faamoemoeina

  • Atonu e amata ona e fesiligia lau faaiuga e auauna atu (tagai Alema 26:27).

  • Atonu e te mataua auga faaletino o le atuatuvale, e pei o le moe te’ite’i, suia o le tausami, po o le itaitagofie.

  • Atonu e te’i ua e faitio ma le le faamoemoeina ia tulafono o le misiona mo auaunaga ma ona faamoemoega. Atonu e te le manao e mulimuli atoatoa i ai.

• “E mafai ona ou faia lenei mea”

  • E te aoao ia tausisi ma le loto i ai tulafono ma mea ua faamoemoeina e le misiona.

  • E te aoao ia onosai (tagai i le Isaia 28:10; Mosaea 4:27).

  • E amata ona faaitiitia faailoga faaletino o lou atuatuvale, pe afai o i ai.

• Ola faalagolago faalelagona o le tagata ia te ia lava

  • E te lagonaina le toafimalie a o faagasolo galuega masani faaleaso.

  • E te iloaina ou malosiaga patino ma le alualu i luma.

  • E te malamalama i le uiga o le ola i le olaga i le laa e tasi i le taimi (tagai i le Mataupu Faavae ma Feagaiga 98:12).

  • E te atiaeina se talitonuga sili atu o oe lava ia ma se manao faateleina e auauna atu.

O Mea e Mafai Ona E Faia i le Taimi Nei

Saili i auala e auauna atu ai i isi. O le misiona o se valaauga e auauna atu. Taulai i le tilotilo i fafo atu o ou lava lagona o le le lagolelei. Auauna atu ia i latou o e manaomia se upu agalelei, se faatinoga o le alofa mama, po o se faauooga.

Talanoa i isi e uiga i le fetuunaiga o lau misiona mo auaunaga. Faaavanoa se taimi e talanoaina ai autu nei faatasi ma matua, taitai perisitua, po o uo faifeautalai ua maea mai le misiona:

• E manaomia e le Atua ni tagata se toatele e faia mea i talaatu o me latou te manatu e mafai ona latou faia. O le a se mea e mafai ona e aoaoina mai faataitaiga mai tusitusiga paia? E mafai ona e suesueina le Esoto 4:10–12; Ieremia 1:6–9; Alema 17:9–12; Alema 26:27; Eteru 12:23–27; Mose 6:31–32.

• Aisea e taua ai le moe ma ala i luga i le taimi e tatau ai? Aisea e taua ai le tausisia o le ‘ai i meaai paleni lelei? Aisea na tatau ai ona e faamalositino e le aunoa? Aisea na tatau ai ona fai au tatalo patino?

• E mafai faapefea e le tusitusi i se api talaaga ona fesoasoani ia te oe i le taimi e manuia ai ma taimi o luitau?

• E mafai faapefea ona e tali atu pe a le o ese ni mafaufauga po o ni lagona faavalevalea?.

• Taulai atu i le faamalosia o lau sootaga ma lou Tama Faalelagi. Saili le Agaga e ala i le tatalo patino ma le suesue o tusitusiga paia. Faalogologo i musika faagaeetia loto, ma faitau lou faamanuiaga faapeteriaka.

• Ia e agalelei ia te oe lava ma isi. Talanoa ia te oe lava i upu lava e tasi e faalaeiau ma agalelei e mafai ona e mafaufauina e faaaogaina e le Faaola. Manatua, o mafaufauga o le le loto fesoasoani, leai o se faamoemoe, po o tausalaga matuia e le mai le Alii.

• Faamoemoe e tupu mea e le faamoemoeina. O lou aafiaga o se faifeautalai mo auaunaga o le a le tutusa ma se isi lava. O mea uma o le a le tusa pau ma mea sa e fuafuaina. Taumafai malosi e talia suiga ina ia mafai ai ona e faataunuu ou tiutetauave o se faifeautalai mo auaunaga.

Manatua, o le a faatasi le Agaga ma oe a o e faia lenei fesuiaiga ma o le a fesoasoani ia te oe e fetuunaia i ou tiutetauave fou:

“Ma ai se na te talia outou, o iina o le a Ou i ai foi, ona o le a Ou alu muamua atu i o outou luma. O le a Ou i ai i lo outou lima taumatau ma lo outou agavale, ma o le a i ai lo’u Agaga i o outou loto, ma si’o faataamilo outou e a’u agelu, e sapasapai outou i luga” (Mataupu Faavae ma Feagaiga 84:88).

Aotelega

Manatua o lou ola o se faifeautalai mo auaunaga o le a ese mai lou olaga talu ai. Ae o le a tauia ma faamanuia oe e le Alii. Atia’e se amio fiafia lelei. Ia faaaoga le faatuatua i le Alii Ia e onosai ia te oe lava ma isi. Ia manatua le fautuaga na tuu atu i le Perofeta o Iosefa Samita: “Ia e iloa lo’u atalii e, o nei mea uma e te maua ai le poto masani, ma o le a avea ma ou lelei”(Mataupu Faavae ma Feagaiga 122:7).